Yesus nangrihi nulu Musa irua Elia
1 Amar inean nelak roak,
na Yesus novun Petrus,
Yakobus irua warin a Yohanes,
ma rva'al vuar karatat isa,
ma aksa ira watan na'a inyai.
2 Ira rsi'ik,
na Yesus felan a naling roak Ia.
Wahan a vanan ma wean lera,
ovu vali afa ovi nung a neluk ra,
rangiar urun ma rfitik-ryadat.
3 Brian munuk,
na rsi'ik Musa irua Elia rvotuk ma rangrihi nulu Yesus.
4 Ba Petrus nfalak verin Ia ne,
“Duila'a,
lolin urun ma tna'a wan ini.
Ni lolin a amfadiri befak itelu,
ma isa verin Oa,
isa verin Musa,
isa vali verin Elia.”
5 Petrus nangrihi obin,
na brian munuk mutan isa vanan urun ma nkum-teri irtelu.
Ira rarenar vai isa ntali mutan ralan yai ne,
“Ini Yanak i ulobang urun Ia.
Ia notu ma ralang a lolin urun,
ba mryenar afa ovi nfalak ra!”
6 Yesus Ni tamata avyai rarenar vai yai,
na rbobar urun ma rleka lahir rsuta lanun ma rtub-fangofak ira.
7 Yesus nma ma nkena ira,
beti nfalak ne,
“Deka byobar,
ba mdyiri kikyai!”
8 Ba rvanung waharira ra ma rsi'ik,
na wol tamata roak na'a inyai.
Yesus a'uk sa'i nana'a inyai.
Yesus Ni tamata ovi rorang Ia rorat na'a Elia
9 Nata rsuta tali vuar ma rna'a rira banbanan obin,
na Yesus nsurak ira ne,
“Deka fyamalik afa i mryea inlangin yai verin tamata ra veki.
Mnyaban ma Ubu nfava'at ewal Ya'a,
Tamata Yanan Ya'a tali matmatan,
beti fyamalik.”
10 Ira rorat Ia ne,
“Notu afakinimi Yahudi rira dawan ovi rair Musa ni inukun ra rfalak ne Elia nma ula ia,
beti Raja i ntevut dida salasilan ra nma?”
11 Yesus nfalak ne,
“Kena,
Elia nma ula ia,
boma nasusan afakataka munuk.
12 Na'uk ufalak verin mia ne,
Elia nma roak,
na'uk tamata ra wol rka'a ia ma rotu tia ma watan ia.
Wean inyai vali verin Ya'a Tamata Yanan Ya'a ini,
veka utuan sian rivun ma tamata ra veka rwi-rwa Ya'a.”
13 Na'ut inyai beti Yesus Ni tamata ra rka'a ne,
Yesus nfamalik Yohanes i nbaptis tamata ra.
Yohanes wean nabi Elia.
Yesus nala'ing vatuk nait sian tali kasiko'u brana isa
14 Yesus ovu Ni tamata itelu yai rsuta tali vuar yai ma rtuan tamata rivun.
Tali tamata rivun avyai,
na brana isa nma ma nsangatur na'a Yesus wahan ralan a ma nfalak ne,
15 “Duila'a,
fara fwaturu Mu silobang a verin yanak brana.
Ia ni suhut manut ma notu ma wean i nfoar,
ba nawar ma dawan ia,
ovu ba'i nleka na'a yafralan ovu vali na'a wear.
16 Ya'a ovun roak ia uma verin Mu tamata ovi rorang Oa,
na'uk wol rot-nala ma lolin ia.”
17 Yesus ntabu ira ma nfalak ne,
“Wean inba mia?
Wol bira inorang lahir ovu wol myorang afa ovi kena ra.
Amar ifira vali ma udoku ovu mia ma utahang nal ralang ovu mia,
tamata ovi wol bira inorang a?
Myovun kasiko'u yai mya ini!”
18 Ba Yesus nfareta nait sian i nleal kasiko'u yai ma nti talik ia.
Nait sian yai nti talik lahir ia,
ma lolin ewal ia.
Yesus naling vatuk nait sian tali kasiko'u (Matius 17:18)
19 Afa yai nlia roak,
beti Yesus ovu Ni tamata ovi rorang Ia rban-talik wan yai ma aksa ira watan,
ma rorat Ia ne,
“Afakinimi ami wol amaling nala nait sian yai?”
20 Yesus nfalak verin ira ne,
“Wol myot-nala,
tevek bira inorang a kako'u da'in.
Afa i ufalak verin mia ini,
kena urun!
Ba wean i bira inorang a veran sesawi ni vatul watan,
na bisma fyalak ma vuar yai nti wan liak,
na vuar yai veka nti lahir,
ba bis myot-nala afaka watan. [
21 Na'uk linga'an isa watan ma mila'ing vatuk nala nait sian i felan wean inyai.
Musti miflurut verin Ubu ovu mtyolat.]”*
Yesus nfamalik ewal Ni matmatan a
22 Amar isa,
na Yesus ovu Ni tamata ovi rorang Ia rasdovu ira na'a Galilea,
ma nfalak verin ira ne,
“Tamata ra veka rala Ya'a,
Tamata Yanan Ya'a ini,
verin tamata ra,
23 ma rfedan Ya'a,
na'uk amar itelu nelak,
na Ubu veka nfava'at ewal Ya'a.”
Rarenar afa i Yesus nfalak yai,
na ralarira ra lalau urun.
Yesus nbahir kulu verin Yahudi rira rahan dawan falurut
24 Yesus ovu Ni tamata ovi rorang Ia raran ahu Kapernaum.
Amar isa,
na tamata ovi ba'i rera babahir kulu verin Yahudi rira Rahan Dawan Falurut,
ti ma rtuan Petrus ma rorat ia ne,
“Mu guru nbahir kulu verin dida Rahan Dawan Falurut,
te wahal?”*
25 Petrus nfalak ne,
“Ia nbahir kulu yai!”
Nata nti rahan i Yesus nleal a mane norat afa yai tali Ia.
Wol norat Yesus obin,
na Yesus norat lan roak ia ne,
“Simon,
munovak aka na'a afa ini:
raja ovi rna'a lanit ivavan rfareta tamata aba ma rbahir kulu?
Rera tali rira tamata ra,
te tali tamata dakan ra?”
26 Petrus nfalak ne,
“Tali tamata dakan ra.”