Tamata iki ni dawan nlia munuk na'a Ubu Ni Fareta?
1 Na'ut inyai,
na Yesus Ni tamata ovi rorang Ia rma ma rtuan Ia,
ma rorat ne,
“Na'a Ubu Ni Fareta,
na iki ni dawan a nlia munuk?”
2 Yesus nera kasiko'u isa ma ndiri waharira ralan ra,
3 ma nfalak verin ira ne,
“Afa i ufalak verin mia ini,
kena urun!
Wean i wol myahil ma mtyalik tali bira salasilan ra,
ovu fyakabava tenabira ra wean kasiko'u ini,
na mia veka wol ti mnya'a Ubu Ni Fareta a.
4 Tamata iki watan nfakabava tenan a wean kasiko'u ini,
na ia veka dawan lia munuk tamata ovi rna'a Ubu Ni Fareta a.
5 Tamata iki watan nalang kasiko'u ra wean kasiko'u ini tevek narang a,
na ia nalang roak Ya'a.
6 Na'uk tamata iki watan notu ma kasiko'u i norang Ya'a nleka ma notu salasilan,
na Ubu veka nukun ia.
Ni lolin a,
rkeak vatu dawan isa na'a relan a,
ma rfanebar ia na'a tahat ralan.”
Yesus nfalak ne, iki watan nfakabava tenan a wean kasiko'u ini, na ia veka dawan lia munuk na'a Ubu Ni Fareta (Matius 18:4)
Afa ovi rweang tamata ra ma rotu salasilan
7 “Ya'i yo!
Veka sian urun i lahir,
tevek afa ovi rna'a lanit ivavan ini veka rotu ma tamata ra rira salasilan.
Ita tka'a roak ne,
afa sian avyai rotu ma tamata ra rira salasilan rna'a watan,
na'uk sian urun verin tamata ovi rotu ma tamata liak ra rotu salasilan.
8 Ba wean i limabira te eabira ra rotu ma myotu salasilan,
na myetal vatuk watan ira.
Ni lolin a,
limabira lihir te eabira lihir watan,
na'uk bira vava'at kakiwal ovu Ubu.
Sian urun i lahir wean limabira ovu eabira ratnemu,
na'uk rvatuk mia ma mnya'a yafwan kakiwal.
9 Wean i matabira lihir notu ma myotu salasilan,
na mkyivul vatuk watan ia.
Ni lolin a,
matabira lihir watan,
na'uk bira vava'at kakiwal ovu Ubu.
Sian urun ia lahir ma matabira irua,
na'uk rvatuk mia ma mnya'a yafwan kakiwal.”
Yesus nfamalik vaivatul kamkuma na'a domba i wol nleal a
10 “Msyi'ik wabira ma lolin,
boma deka minovak ne,
kasiko'u ovi wearira kasiko'u ini wol fyawarira.
Mingnanang,
tevek ufalak verin mia ne,
Ubu Ni sansinir ra tali lanit ratan rsi'ik ma lolin kasiko'u avyai,
ovu rdiri lalawatan Yamang i na'a lanit ratan wahan ralan a. [
11 Tevek Ya'a,
Tamata Yanan Ya'a,
uma lanit ivavan ini ma udava tamata ovi rfaroa ira tali Ubu,
ma usikat ira tali rira salasilan ra,
ma rira vava'at kakiwal.]*
12 Mia minovak aka na'a vaivatul kamkuma ini?
Tamata isa ni domba ratut isa,
na'uk isa nban-sala ma wol nleal roak.
Domba duan yai veka nti talik ni domba vutsi rahin isi yai ma rna'a vuar ni dadudur watan,
ma ti ndava domba i nban-sala yai.
13 Afa i ufalak verin mia ini,
kena urun!
Ti ma ndav-nala roak ia,
na inan urun i lahir,
nlia tali domba vutsi rahin isi ovi wol rban-sala.
14 Ba Yamadida i na'a lanit ratan wean vali inyai.
Ia wol inan ma kasiko'u isa vali tali kasiko'u avyai rban-sala ma veka wol rleal.”
Domba duan ndav-nala ewal ni domba i nban-sala (Matius 18:13)
Wean inba ma tfakena terad a valid ovi rorang Yesus, na'uk rotu salasilan verin ita
15 “Wean i teram-valim tamata inorang isa notu salasilan verin oa,
na muti ma fwalyawang verin ia na'a ni sala,
na'uk mirua watan ma deka tamata liak rka'a.
Wean i nrenar mu snurak a,
na nfaturu roak ne,
mirua ralabira lolin ewal roak.
16 Na'uk wean i wol nrenar oa,
na movun tamata isa te irua ewal ma msurak ewal ia,
ma rarenar afa ovi fwalak ra.
Rtulis roak na'a Surat Ralan ne,
‘Wean i mane rmangadu tamata,
na tamata irua te itelu musti rna'a inyai vali ma rarenar afa ovi rfalak ra.’*
17 Wean i nafena ma nrenar obin,
na fwamalik ni sala yai verin sidovung tamata ovi rorang Ya'a.
Wean i nafena vali ma nrenar ira,
na deka myotu kida ovu ia,
wean tamata ovi ba'i rera babahir kulu ra te tamata liak ovi wol rka'a Ubu.
18 Afa i ufalak verin mia ini,
kena urun!
Afa ovi fwalak teri na'a lanit ivavan ini,
Ubu veka nfalak teri vali na'a lanit ratan.
Wean i mtorung afaka watan na'a lanit ivavan ini,
na Ubu veka ntorung vali na'a lanit ratan.
19 Ufalak ewal verin mia ne,
wean i tamata irua tali mia na'a lanit ivavan ini mian vai isa ma myera afaka watan tali Yamang a na'a lanit ratan,
na Ia veka nvalat bira falurut a.
20 Tevek na'a inba watan,
wean i tamata inorang irua te itelu rasdovu ira,
na Ya'a una'a vali inyai.”
Vaivatul kamkuma na'a tamata sansinir i nafena ma nabun tamata
21 Petrus nma ma nfalak verin Yesus ne,
“Duila'a,
veka abun nala fafira salasilan ovi terang a valing isa notu verin ya'a?
Abun nala fafitu?”
22 Yesus nfalak verin ia ne,
“Wol fafitu watan.
Oa musti mabun salasilan ovi tamata ra rotu verin oa,
ti naran favutfitu,
fafitu.
23 Ufamalik afa yai tevek Ubu Ni Fareta a wean raja isa i mane nsi'ik ne,
ni tamata ovi rkarya verin ia rira utan ifira verin ia.
24 Ti ma nrekan utan avyai,
na rovun vali ni tamata isa nma verin ia.
Tamata yai ni utan dawan urun i lahir,
talenta rivun vutu a.*
25 Tamata yai wol nbahir nala ni utan yai,
ba raja yai nfareta ni tamata ra ma rfedi ia ovu awan a yanan ra ovu vali ni metan ra munuk ma nbahir ni utan yai.
26 Ba tamata yai nsuta ma nsangatur verin ia ma nfalak ne,
‘Baba,
fara mnaban kedan veki,
ma ki ubahir munuk ning utan a.’
27 Nata raja yai nfaturu ni silobang verin ia,
ma nfatalik ia ovu na'i vatuk tamata yai ni utan.
28 Na'uk ti ma nban-talik raja yai,
na ntuan tamata isa i nkarya vali verin raja yai.
Tamata yai nutang roak ni kubang a,
na'uk ko'u watan,
dinar ratut isa.
Ia ntaha ngurus tamata yai relan a,
beti nfalak ne,
‘Bwahir kikyai mu utan verin ya'a!’*
29 Ba tamata yai nsangatur verin ia ma nfalak ne,
‘Baba,
fara mnaban kedan a,
ma ki ubahir munuk ning utan.’
30 Na'uk nafena ma na'i vatuk tamata yai ni utan,
ba nala ia ma ti ra'abu'i ia,
ti naran i nbahir munuk ni utan a.
31 Ti ma tamata liak ovi rkarya verin raja yai rsi'ik afa i tamata yai notu,
na ralarira lalau urun.
Ba ti rfamalik afa yai verin raja.
32 Nata raja yai nsinir ma ti rera tamata yai ma nfalak ne,
‘Oa muktufan urun!
A'i vatuk munuk roak mu utan a,
tevek mera lablobang verin ya'a.
33 Notu afakinimi wol mlobang tamata i nkarya ovu oa,
wean i ulobang roak oa yai?’
34 Raja nangrova urun,
ba nfalak ma rtaha ia ti verin tamata ovi ba'i rwi-rwa tamata ra,
ti naran i nbahir munuk ni utan a.
35 Ba Yamang a na'a lanit ratan veka notu vali wean inyai verin lokat tamata,
wean i wol ralabira urun ma myabun salasilan ovi terabir-valibira ra rotu verin mia.”