Yesus nfamalik vaivatul kamkuma isa na'a domba i wol nleal a
1 Amar isa,
na tamata ovi ba'i rera babahir kulu ra,
ovu tamata salasilan liak ra,
rma rtuan Yesus ma rarenar afa ovi nfalak ra.
2 Ba tamata Yahudi boku rtali sidovung Farisi,
ovu rira dawan ovi rair Musa ni inukun ra,
rafngamu'ur ma rfalak ne,
“Ya'i yo,
tamata ini notu ni kida ovu tamata salasilan ra ma nafna'an ovu ira!”
3 Ba Yesus nala vaivatul kamkuma isa ma nfalak verin ira ne,
4 “Wean i tamata isa ntali mia ni domba ratut isa,
na'uk isa wol nleal,
na ia veka notu afaka?
Ia veka nban-talik domba vutsi rahin isi yai na'a wan lean vu i ngrova lalawatan a,
ma ti ndava domba i wol nleal yai,
ti naran i ndav-nala roak ia.*
5 Ba wean i ntuan roak domba yai,
na inan urun i lahir,
ma nala domba yai nrata varan a ma newal ia.
6 Ti ma naran ni rahan,
na nera ni kida ra ovu tamata ovi rna'a ni rahan nelan a ma nfalak verin ira ne,
‘Mya ma totu inad lolin,
tevek udav-nala roak ning domba i wol nleal a.’
7 Ba ufalak verin mia ne,
na'a lanit ratan veka wean vali inyai.
Ubu ralan a veka lolin urun,
tevek tamata salasilan isa nahil ma ntalik roak tali ni salasilan ra.
Ralan lolin yai nlia tali ralan lolin verin tamata vutsi rahin isi ovi rira vava'at ra rmalola,
ma wol rperlu ma rahil ma rtalik tali rira salasilan ra.”
Domba duan ovu ni domba ra (Lukas 15:4)
Yesus nfamalik vaivatul kamkuma isa ewal na'a kubang ihin i wol nleal
8 Nata Yesus nfamalik vaivatul kamkuma isa verin ira ne,
“Vata isa ni kubang ihin vutu a,
ba wean i isa wol nleal,
na veka notu afaka?
Ia veka ntutun damar ovu nbitin munuk rahan ralan a ma al ndava ni kubang i wol nleal yai,
ti naran i ndav-nala.
9 Ti ma ndav-nala roak kubang yai,
na nera ni kida ra ovu tamata ovi rna'a ni rahan nelan a ma nfalak verin ira ne,
‘Mya ma totu inad lolin,
tevek udav-nala roak ning kubang i wol nleal a.’
10 Wean vali inyai verin Ubu Ni sansinir ra na'a lanit ratan,
ma veka inarira lolin urun,
tevek tamata salasilan isa nahil roak tali ni salasilan ra.”
Yesus nfamalik ewal vaivatul kamkuma isa na'a kasiko'u i wol nleal roak a
11 Yesus nfalak ewal vali ne,
“Tamata isa yanan brana irua.
12 Amar isa,
na iwarin a nfalak verin yaman a ne,
‘Bapa,
msiduk kikyai dida metan ra,
ma mala ning wahat a verin ya'a.’
Ba yaman a nsiduk lahir ni metan ra verin yanan irua yai.*
13 Amar ifira nelak watan,
na yanan iwarin a ti nfedi munuk lahir ni metan ra ma nti negara i raroa.
Na'a negara yai,
na ia nawahak munuk lahir ni kubang ra ma al notu ni sian a lolin watan.
14 Ti ma nawahak munuk ni kubang ra,
na lafar dawan nkena negara yai.
Ba ni vava'at a sian urun i lahir.
15 Ia nti ndava karya na'a tamata isa na'a negara yai.
Ba tamata yai nala karya verin ia ma ti nwanar ni vavu ra na'a ni lanun a.
16 Ia nablafar da'in roak,
ba mane na'an watan vavu rira afamtahan ra,
na'uk wol tamata isa vali ntorung ma nala verin ia.
17 Ti nata ni fikiran lyawan roak ma nfalak na'a ralan ne,
‘Tamata ovi rkarya verin yamang a rivun urun ira,
ovu rira afamtahan a nngora tia ma watan,
na'uk una'a ini,
na mane umata ning lafar roak!
18 Ya'a veka ewal ya'a ma ti utuan yamang a ma ufalak verin ia ne:
Bapa,
ya'a otu salasilan roak verin Ubu ovu oa.
19 Wol inovan roak ma tamata ra rfalak ne,
oa yanam ya'a.
Ba fara mtorung ma ukarya verin oa,
wean watan mu tamata karya liak ra.’
Yaman nlobang ia ma nafla nti ma nangabuk ovu nvoan ia (Lukas 15:20)
20 Ba ndiri ma newal ia nti verin yaman a.
Nana'a raroa obin,
na yaman a nrea lan roak ia,
ba nfarnuang lahir na'a ralan ma nfaturu ni silobang a,
ba nafla nti ma nangabuk ovu nvoan ia.
21 Ia nfalak verin yaman a ne,
‘Bapa,
ya'a otu salasilan roak verin Ubu ovu oa,
ba wol inovan roak ma tamata ra rfalak ne,
oa yanam ya'a.’
22 Na'uk yaman nfalak verin ni sansinir ra ne,
‘Yarak ti myala ravit blawat i lolin urun a ma myotu ma neluk,
ovu myala tatea ma mya'adoru na'a ean a,
ovu vali myala sitana ma mya'adoru na'a liman a.*
23 Myotu munuk wean inyai,
beti myala sapi ko'u i ngbabal urun a ma fyedan ia.
Ki totu snoba ma tafna'an ovu totu inad lolin.
24 Tevek yanak ini nmata roak,
na'uk fiang ini nva'at ewal.
Ia wol nleal roak,
na'uk fiang ini utuan ewal roak ia.’
Ba rotu lahir rira snoba.*
25 Na'ut inyai vali,
na yanan iya'an a na'a va'i obin.
Ti ma newal ia ma nfaseri rira rahan a,
na nrenar tamata ra rdedang,
rafraik flo'its ovu rso'i-rsomar.
26 Ba nera rira tamata sansinir isa ma norat ia ne,
‘Rotu afakinyai?’
27 Sansinir yai nfalak ne,
‘Warim a newal roak ia,
ba yamam a nsinir ami ma amfedan roak sapi ko'u i ngbabal urun a,
tevek yanan i wol nleal yai newal roak ia ovu lolin.’
28 Ba yanan iya'an yai nangrova urun,
ma nafena nti rahan ralan.
Nata yaman a nma murin ma nera lablobang ia ma nma ralan.
29 Na'uk nfalak verin yaman a ne,
‘Varat a nkati varat,
na ukarya verin oa wean sansinir.
Wol fasa vali obin angal afa ovi fwareta ra,
na'uk wol mane fasa vali mala bibi ko'u isa verin ya'a ma otu snoba ovu ning kida ra.
30 Na'uk yanam yai ti ma nawahak munuk roak mu metan ra ovu vatlean ra.
Ti ma newal ia,
na bapa fwedan lahir sapi ko'u i ngbabal yai verin ia!’
31 Yaman nfalak verin ia ne,
‘Baba,
oa ini mna'a lalawatan ovu ya'a,
ba ning afakataka munuk,
oa mu vali.
32 Na'uk inovan ma totu snoba ma totu inad lolin,
tevek warim ini nmata roak,
na'uk fiang ini nva'at ewal.
Ia wol nleal roak,
na'uk tatuan ewal roak ia.’ ”