Yesus nfamalik vaivatul kamkuma isa na'a tamata i wol nsi'ik ma lolin ni dawan ni metan ovu ni kubang ra
1 Yesus nfalak verin Ni tamata ovi rorang Ia ne,
“Tamata ka'i isa ni tamata karya isa.
Tamata ka'i yai nala karya verin ia ma nasusan munuk ni metan ra.
Amar isa,
na tamata ra rmangadu tamata karya yai verin tamata ka'i yai ne,
ia nawahak tia ma watan tamata ka'i yai ni metan ovu ni kubang ra.
2 Ba tamata ka'i yai nera ni tamata karya yai ma norat ia ne,
‘Ya'a urenar roak ivar na'a mu karya a,
ba eka fwamalik munuk lahir afa ovi ala ma mususan ra,
tevek oa wol bisma mususan roak ning metan ovu ning kubang ra!’
3 Ba ia nanovak na'a ralan a ne,
‘Ya'a musti otu afaka fiang ini?
Tevek ning dawan a mane nfaleka ya'a tali ning karya.
Ya'a wol ufkear nala,
ovu ya'a wol bis vali ma era kubang tali tamata ra,
tevek uma'it.
4 Ya'a ufikir nala afa isa ma veka otu,
tevek sarseri roak ma ning dawan a nfaleka ya'a tali ning karya a,
ma wol ususan roak ni metan ovu ni kubang ra,
na bisma ning kida rivun.
Ira veka rala ya'a ma ti una'a rira rahan.’
5 Ba nera munuk tamata ovi rira utan na'a ni dawan a,
ma norat tamata avyai lokat ira.
Ia norat tamata i ula lalean a ne,
‘Mu utan ifira na'a ning dawan a?’
6 Tamata yai nfalak ne,
‘Ngul ngusi ratut isa.’
Ba nfalak verin tamata i ula lalean yai ne,
‘Ini oa mu surat utan a.
Mdoku ma mtulis lahir mu surat utan liak a,
ne ngul ngusi vutlima watan.’*
7 Nata nfalak vali verin tamata i norang hi ula lalean a ne,
‘Oa mu utan ifira?’
Tamata yai nfalak ne,
‘Gandum tenat rivun isa.’
Ba nfalak vali verin tamata yai ne,
‘Mala mu surat utan ini ma mdoku ma mtulis lahir mu surat utan liak a,
ne gandum tenat ratut iwalu watan.’
8 Ba tamata ka'i yai nfakaratat ni tamata i ba'i nasusan ni metan ovu ni kubang ra,
tevek ni kaka'a,
velik ne ni bota dawan.
Ufalak wean inyai,
tevek tamata ovi wol rorang Ubu rira kaka'a ma rasusan rira vava'at ra ovu rotu ma tamata ra inar ira,
nlia tali tamata ovi rira vava'at ra na'a lyawan ralan.
9 Myala metan ovi rna'a lanit i vavan ini ma al myotu bira kida,
boma wean i metan avyai wol fyawarira roak,
na Ubu veka nala mia ti mnya'a lanit ratan.
Tamata ovi rsi'ik ma lolin metan ovi Ubu nala verin ira na'a lanit ivavan ini, na Ia veka nala vali metan dawan ovi rna'a lanit ratan verin ira
10 Tamata iki watan not-orang lalawatan afa ovi nfalak ra na'a afa ovi ko'u ra,
na ia veka not-orang afa ovi nfalak ra vali na'a afa ovi dawan ra.
Na'uk tamata iki watan nsiklabir na'a afa ovi ko'u ra,
na ia veka nsiklabir vali na'a afa ovi dawan ra.
11 Ba wean i wol myot-orang afa ovi fyalak ra na'a metan ko'u ovi rna'a lanit i vavan a,
na Ubu veka wol norang vali mia ma nala metan dawan ovi rna'a lanit ratan verin mia.
12 Wean i msyiklabir ma wol msyi'ik ma lolin tamata rira metan ra,
na iki vali veka nala metan ra verin mia?
13 Tamata sansinir isa wol bisma nkarya verin duan irua.
Ia veka wol inan lahir isa,
na'uk nlobang isa.
Te veka not-orang lalawatan afa ovi nfalak ra verin isa,
na'uk wol inan lahir isa.
Mia weabira vali inyai,
ma wol bisma myala bira vava'at ra verin Ubu,
ovu vali myala bira vava'at ra verin bira metan ra.”
14 Ti ma tamata Farisi avyai rarenar munuk afa ovi Yesus nfalak ra,
na rmalit Ia,
tevek rlobang urun rira kubang ra.
15 Ba Yesus nfalak verin ira ne,
“Mia myotu felabira ra wean tamata ovi ba'i rotu a'uk afa ovi lolin ra na'a tamata waharira ralan ra,
na'uk Ubu nka'a munuk ralabira ra.
Afa ovi tamata ranovak ne lolin urun,
na Ubu wol inan lahir afa avyai.
16 Musa ni inukun ra ovu nabi rira afa ovi rair ra rbana,
nata ti naran Yohanes i nbaptis tamata ra nma.
Tali na'ut inyai,
na tamata ra rfamalik Ivar Lolin i nfamalik Ubu nfareta tamata ra wean lahir Raja.
Tamata rivun rkiwal ma ti rna'a Ni Fareta yai.
17 Musa ni inukun ra munuk,
ti naran ni titik koma ra,
veka rna'a kakiwal,
ma nlia tali lanit ovu lanit ivavan ini.
18 Brana iki watan ntalik awan a,
ma nsifa ewal ovu vata liak,
na brana yai sala roak ia,
wean lahir i ntuba ovu tamata i wol awan verin ia.
Ba wean i brana iki watan nsifa ovu vata i awan a ntalik roak ia yai,
na brana yai sala roak ia vali,
wean lahir i ntuba ovu tamata i wol awan verin ia.”*
Yesus nfamalik vaivatul kamkuma na'a tamata ka'i ovu Lazarus i ni kasian dawan a
19 Nata Yesus nfamalik ewal ne,
“Tamata ka'i isa ba'i noru a'uk ravit blawat i lolin urun a ovu kadaravit liak ovi fyawar urun a.
Lokat amar,
na ia notu inan lolin ovu ni kaka'i a.*
20 Tamata isa vali ni kasian a dawan,
naran Lazarus.
Lokat amar,
na ia ntuba na'a tamata ka'i yai ni falfolat ngoran a.
Ni weba ra rsoru lahir tenan a.
21 Ia mane na'an watan afamtahan mumun ovi rleka na'a tamata ka'i yai ni meja vavan a,
na'uk wol nal-nala akataka.
Yaha ra rma vali ma rlelut ni weba ra.
22 Nata tamata kasian yai nmata,
ba Ubu Ni sansinir ra tali lanit ratan rma ma rovun lahir ia nti wan i lolin urun a nebang Abraham.
Ba tamata ka'i yai nmata vali ma ti roving ia.
23 Tamata ka'i yai nana'a roak yafwan kakiwal,
na ni wawa'uk a dawan urun i lahir.
Ia ntadata ma nsi'ik tali raroa watan,
na Lazarus ndoku wan i lolin urun a nebang Abraham.
24 Ba nafwak ma nfalak ne,
‘O Bapa Abraham,
fara fwaturu Mu silobang verin ya'a!
Msinir Lazarus ma nsovu liman tutul a na'a wear ma nma nfangridin earng a,
tevek ufarnuang wawa'uk i dawan urun a na'a yafu ralan ini!’
25 Na'uk Abraham nfalak ne,
‘Mungnanang veki ta baba,
tevek na'ut i bwa'at obin a,
na oa mu munuk roak afa ovi lolin ra,
na'uk Lazarus ni watan afa ovi sian ra.
Fiang ini Lazarus inan lolin roak,
na'uk oa mu wawa'uk a dawan urun ia.
26 Nlia tali inyai vali,
na tivat isa i bilaman urun a nelak ita ma oa mna'a lihir a,
na ami amna'a lihir a.
Ba wean i tamata ovi rtali wamami mane rahu tivat yai ma rti ralola mia,
te ovi rna'a inyai mane rma ma ralola ami,
na wol bis lahir!’
27 Ba tamata ka'i yai nfalak ne,
‘Baba,
wean inyai ba era lablobang verin oa,
ma msinir Lazarus ma nti yamang ni rahan a,
28 tevek a'ang-waring ilima rna'a rahan yai obin,
ma nfangnanang urun ira,
boma na'ut i rmata a,
na deka rma wan i ni wawa'uk a sian urun ini.’
29 Na'uk Abraham nfalak ne,
‘Ira rira roak Musa ovu nabi rira kitab ra.
Ba fara rorang watan afa ovi rtulis roak na'a kitab avyai!’
30 Ba tamata yai ka'i nfalak ne,
‘Baba,
inyai wol naran obin,
na'uk wean i matmatan isa nva'at ewal ma nti nfalak verin ira,
na ira veka rahil ma rtalik tali rira salasilan ra.’
31 Na'uk Abraham nfalak ne,
‘Wean i wol rarenar afa ovi rtulis roak na'a Musa ovu nabi rira kitab ra,
na ira veka wol rorang vali ma rahil ma rtalik tali rira salasilan ra,
velik ne matmatan isa nva'at ewal ma ti nfalak verin ira.’ ”*