Yesus nair tamata ovi awarira roak ma deka rsitalik
1 Yesus ndir-talik ahu Kapernaum ma nti Propinsi Yudea na'a oar Yordan ni lihir a.
Tamata rivun rma ewal ma rdir-lilit Yesus ma nair ira,
wean i ba'i nsiair a.
2 Tamata Farisi boku rma ma rlabir teman Ia,
ma rorat Ia ne,
“Na'a dida agama ni inukun ra,
na brana i nsifa roak bisma ntalik awan te wahal?”
3 Ba Yesus norat ira ne,
“Musa nfareta aka verin mia na'a ni inukun ra?”
4 Ira rfalak ne,
“Musa ntorung verin brana ra ne,
wean i brana isa mane ntalik awan a,
na ia nasusan ni surat sitalik,
beti nfasuka ia.”*
5 Yesus nfalak verin ira ne,
“Musa nala ni inukun yai verin mia,
tevek ralabira ra rangrebat da'in.
6 Tevek na'ut i Ubu notu lanit ivavan a,
na Ia notu vali brana ovu vata.*
7 Wean inyai,
bi brana veka nsuta talik renan ovu yaman a,
ma irua awan a rleal isa.
8 Vata irua brana ralarira isa ma ikisa watan ira.
Ba irua ikisa watan roak.*
9 Wean inyai,
bi Ubu notu roak ma irua rleal isa,
ba tamata ra wol bis rotu ma rsitalik.”
10 Nata Yesus ovu Ni tamata ovi rorang Ia rti rahan ralan ewal ma rorat Yesus na'a afa avyai.
11 Yesus nfalak ne,
“Brana iki watan i ntalik awan a ma nsifa ewal ovu vata liak,
na ia naflidan* roak,
ba notu sala roak verin awan lan a.
12 Wean vali inyai verin vata ra.
Vata iki watan i ntalik awan a ma nsifa ovu brana liak,
na ia naflidan vali.”
Yesus naflahar kasiko'u ra
13 Tamata ra rovun yanarira rma verin Yesus,
boma nfadoku liman na'a ira,
na'uk Ni tamata ovi rorang Ia rangrova tamata avyai.
14 Yesus nsi'ik afa yai,
na nangrova ma nfalak verin ira ne,
“Msyi'ik watan ma kasiko'u avyai rma ma rtuan Ya'a.
Deka myotu teri ira,
tevek tamata ovi wearira avyai,
ira veka warira vali ovu Ubu na'a Ni Fareta a.
15 Afa i ufalak verin mia ini,
kena urun!
Tamata iki watan wean i wol norang wean kasiko'u avyai ne,
Ubu nfareta tamata ra wean lahir Raja,
na ia veka wol wan na'a Ubu Ni Fareta a.”
16 Ba Yesus nangabuk kasiko'u avyai ovu nfadoku liman nana'a ira ma naflahar ira.
Yesus ovu kasiko'u ra (Markus 10:13)
Brana i ni metan rivun
17 Yesus mane nti roak,
na brana isa nafla nma ma nsangatur nulu Ia ma norat ne,
“Tuan Guru,
lolin Oa.
Ya'a musti otu afaka,
boma ning vava'at kakiwal?”
18 Yesus norat ia ne,
“Afakinimi fwalak ne lolin Ya'a?
Wol tamata isa vali lolin ia,
Ubu a'uk sa'i lolin Ia.
19 Oa mka'a munuk afa ovi Ubu nfareta roak verin ita.
Deka msifedan,
wean i msifa roak,
na deka mtuba ovu tamata i wol awam verin ia,
ovu deka bwori.
Deka mdiri fareta waharira ralan ra ma msiklabir na'a afa ovi fwalak ra na'a tamata liak,
deka fwaruki tamata liak ra ovu malang renam ovu yamam a.”*
20 Tamata yai nfalak ne,
“Tuan Guru,
ya'a ot-orang munuk roak afa avyai,
tali na'ut i ning kako'u obin.”
21 Yesus nsi'ik,
na nlobang ia ma nfalak ne,
“Teran afa isa wol motu obin.
Muti ma fwedi munuk mu metan ra,
ma mtanang kubang avyai verin tamata kasian ra.
Motu wean inyai,
na veka mu metan na'a lanit ratan,
beti mwa ma morang Ya'a.”
22 Ti ma nrenar afa i Yesus nfalak yai,
na wahan aleman ma newal ia ovu ralan lalau,
tevek ni metan rivun.
23 Yesus nsi'ik lilit Ni tamata ra,
na nfalak verin ira ne,
“Susa buas ma tamata ovi rka'i ra rtorung ma Ubu nfareta ira wean lahir Raja!”
24 Yesus Ni tamata ra rarenar Ni vaivatul ra,
na rtalkaka.
Ba Yesus nfalak ewal verin ira ne,
“Baba averi,
veka susa buas ma tamata ovi rka'i ra rtorung ma Ubu nfareta ira wean lahir Raja.
25 Susa ma afwatan dawan isa naran unta nuruk nala dirin ni bilahin a,
na'uk susa lia munuk verin tamata ovi rka'i a ma ti rna'a Ubu Ni Fareta a.”
26 Tamata ovi rorang Yesus rtalkaka lahir ma rsiforat ira ne,
“Ba wean inyai,
na iki veka ni vava'at kakiwal?”
27 Yesus nsi'ik ira ma nfalak ne,
“Tamata ra wol rot-nala lahir afa yai,
na'uk wol wean inyai verin Ubu,
tevek Ia bis not-nala munuk akataka.”
28 Petrus nfalak verin Yesus ne,
“Ami amban-talik roak mami afakataka munuk ma amorang Oa!”
29 Yesus nfalak ne,
“Afa i ufalak verin mia ini,
kena urun!
Tamata iki watan i nban-talik ni rahan teta a,
a'an a warin ra,
renan ovu yaman a,
uran a yanan ra,
te ni va'i ra ma norang Ya'a ovu nfamalik Ubu Ni Ivar Lolin a, na
30 fiang ini Ubu veka nal-ewal ma ntafal ma faratut ni rahan teta,
a'an a warin,
uran a yanan ra,
renan ra,
ovu vali ni va'i ra,
na'uk veka rotu sian ia vali,
tevek norang Ya'a.
Na'uk amar ovi veka rma ini,
na ia veka ni vava'at kakiwal.
31 Na'uk tamata rivun ovi fiang ini dawan ira ma rban-ulu verin tamata ra,
ira veka rban-muri watan.
Tamata ovi ko'u watan ira fiang ini ma rban-muri,
ira veka dawan ira ma rban-ulu verin tamata ra.”*
Yesus nfamalik ewal Ni matmatan
32 Ira rva'al rarata Yerusalem,
na Yesus nbana ula Ia.
Yesus Ni tamata ovi rorang Ia rtalkaka,
ovu vali tamata ovi rban-orang ira rbobar.
Ia nera Ni tamata vutu rahin irua ovi rorang Ia yai ma rti nelan kedan a,
ma nfamalik verin ira na'a afa ovi tamata ra veka rotu verin Ia.
33 Yesus nfalak ne,
“Fiang ini mane tati Yerusalem,
na Ya'a,
Tamata Yanan Ya'a ini,
veka rala Ya'a ti ma una'a dawan mela falurut ra ovu dawan ovi rair Musa ni inukun ra limarira ralan ra.
Ira veka rukun Ya'a ma umata,
boma rala Ya'a verin tamata ovi wol Yahudi ra.
34 Tamata avyai veka rlabir waweang Ya'a ovu rira vaivatul ra,
rafnit Ya'a,
rasveva Ya'a,
beti rfedan Ya'a.
Na'uk ti ma amar itelu nelak,
na veka uva'at ewal.”
Tamata ovi rka'a ma rfakabava tenarira ma rlobang tamata liak ra, na dawan urun ira na'a Duila'a wahan ralan
35 Ba Zebedeus yanan ra,
nararira Yakobus ovu Yohanes,
ti rfaseri Yesus ma rfalak verin Ia ne,
“Tuan Guru,
fara fwakena watan afa i mane amera tali Oa.”
36 Ba Yesus norat ira ne,
“Inabira ma otu afaka verin mia?”
37 Ira rfalak verin Yesus ne,
“Na'ut i mdoku na'a wam i mdoku ma fwareta na'a Mu Fareta i nfitik nyadat a,
na fara mtorung ma amdoku Mu lihir mela ovu balit a.”*
38 Yesus nfalak verin ira ne,
“Mia wol mkya'a afa i myera tali Ya'a.
Mtyahang nala ma rotu sian ovu rfedan mia wean i veka rotu sian ovu rfedan Ya'a?”*
39 Ira rfalak ne,
“O'u,
amtahang nala afa sian avyai.”
Ba Yesus nfalak verin ira ne,
“Mia fyalak kena ne,
veka rotu sian ovu rfedan mia,
wean i veka rotu sian ovu rfedan Ya'a.
40 Ya'a wol bisma ufadoku ne,
iki ndoku Ning lihir mela ovu balit a.
Ubu a'uk sa'i nfadoku ne,
tamata aba veka rdoku ovu Ya'a.”
41 Nata Yesus Ni tamata vutu rarenar afa ovi Yakobus irua Yohanes rfalak ra,
ba rangrova ira.
42 Yesus nera munuk ira ma nfalak ne,
“Mia mkya'a roak ne,
tamata ra rka'a munuk tamata fareta ra ovu tamata dawan ovi wol rorang Ubu,
ma rfareta tamata ra ovu limarira tma'an.
43 Na'uk mia deka weabira tamata avyai.
Tamata iki inan ma ni dawan nlia tamata ra,
na ia musti neluk tamata sansinir verin mia.
44 Iki inan ma nlia munuk mia,
na musti neluk tamata sansinir ma nkarya verin iki watan.
45 Ba Ya'a vali Tamata Yanan Ya'a,
wol uma ma usinir tamata ra ma rlobang Ya'a,
na'uk uma ma ulobang tamata ra,
ovu ala tenang al ukvanak tamata rivun tali rira salasilan ra.”
Yesus notu ma Bartimeus nsirea lahir
46 Yesus ovu Ni tamata ovi rorang Ia raran Yerikho.
Nata,
ira ovu tamata rivun vali rti talik kota yai,
na rtuan tamata kasian isa nkibu,
naran Bartimeus,
yaman a naran Timeus.
Ia ndoku linga'an nelan ma nera kubang tali tamata ra.
47 Ti ma nrenar ne,
Yesus i ntali Nazaret nma inyai,
na nafwak ne,
“Yesus,
Oa ubum-nusim Raja Daud.
Fara fwaturu Mu silobang a verin ya'a!”
48 Tamata rivun rtabu ia ma deka vain.
Na'uk ia ntafal ma nafwak ila'a ne,
“Oa ubum-nusim Raja Daud.
Fara fwaturu Mu silobang a verin ya'a!”
49 Nata Yesus ndir-teri ma nfalak verin tamata ovi rna'a inyai ne,
“Eka myera ia ma nma ini.”
Ba ira rfalak verin tamata kibu yai ne,
“Kida,
eka motu ma ralam a lolin ma mdiri,
tevek Yesus nera oa.”
50 Ia naling ni ravit a blawat a ma ndiri lahir ma ti ntuan Yesus.
51 Yesus norat ia ne,
“Oa inam ma otu afaka verin oa?”
Ba tamata kibu yai nfalak verin Ia ne,
“Tuan Guru,
ya'a inak ma usirea!”
52 Nata,
Yesus nfalak verin ia ne,
“Mewal oa ta baba,
tevek mu inorang verin Ya'a notu ma lolin roak oa!”
Ba ia nsirea lahir ma norang Yesus na'a Ni banbanan.