Vaivatul kamkuma na'a tamata ovi rkarya na'a va'i anggur
1 Yesus nfalak ne,
“Na'ut i Ubu nfareta tamata ra wean lahir Raja,
na Ni Fareta yai wean vaivatul kamkuma ini:
Va'i duan isa nbatar varverak sumatan,
ma ti ndava tamata ma rkarya na'a ni va'i anggur a.
2 Va'i duan yai na'an vai isa ovu tamata ovi ndav-nala roak ira ma nbahir kubang dinar isa na'a amar isa,
tevek fyawan i wean ini ba'i rala na'a amar isa.
Ba nsinir ira ma ti rkarya na'a ni va'i anggur.
3 Ka'a bi jam sembilan varverak,
na ia nti wan i rfedi-rfaha afa na'a ma nsi'ik tamata liak boku vali.
Tamata avyai wol rira karya,
ma rdiri watan.
4 Ba nfalak verin ira ne,
‘Miti ma mkyarya na'a ning va'i anggur a,
ki ubahir bira kadi ra ma inovan ovu bira karya.’
Ba rti ni va'i a.
5 Lera ndirlola roak,
na nti ewal ma ndava tamata.
Jam tiga lerasian sian,
na notu vali wean inyai.
6 Ti ma jam lima lera sian roak,
na nti ewal inyai ma ntuan tamata ovi rdiri watan.
Ia nfalak verin ira ne,
‘Notu afakinimi mdyiri watan ma wol mkyarya na'a amar lolan ini?’
7 Ira rfalak verin ia ne,
‘Wol tamata rera ami ma amkarya.’
Ba nfalak verin ira ne,
‘Miti ma mkyarya na'a ning va'i anggur a.’
8 Lervava roak,
na va'i duan yai nfalak verin ni tamata i nfili ma nfareta ovi rkarya ra ne,
‘Mera tamata rkarya ra ma bwahir rira kadi ra.
Bwahir lan verin tamata ovi rban-muri ra,
beti ovi ula ira.’
9 Ba tamata ovi rkarya tali jam lima lersian yai rma,
ma nbahir rira kadi ra na'a amar isa.
Lokat ira rira kadi kubang dinar isa.
10 Nata tamata ovi rkarya tali varverak yai rma.
Ia nbahir ira kubang dinar isa vali.
Tamata avyai ranovak ne,
rira kadi veka nlia dinar isa,
na'uk rira kadi ra wean watan ovi rban-muri ra.
11 Ba rala rira kadi ra,
na rafngamu'ur watan verin va'i duan yai.
12 Ira rfalak ne,
‘Tamata ovi rban-muri lalean rkarya jam isa watan,
na'uk bwahir ma wean watan ami!
Velik ne ami amkarya amar lolan lahir,
ma lera ntunu ami!’
13 Va'i duan yai nfalak verin tamata isa tali rir tinemun ne,
‘Kida,
ya'a wol ulabir oa.
Ita ta'an vai isa roak ma ubahir oa,
kubang dinar isa na'a amar isa.
14 Ya'a mane ubahir tamata ovi rban-muri lalean rira kadi ra ma wean watan mu kadi a.
Ba mala mu kadi a ma mewal oa.
15 Tali watan ralang a ma otu wean inyai,
tevek ya'a ning kubang avyai.
Oa betane ralam sian ya'a,
tevek ralang lolin ma ala verin ira wean i ala verin oa.’ ”
16 Nata Yesus nfalyawang vaivatul kamkuma yai ihin a verin Ni tamata ra ne,
“Wean vali inyai verin tamata ovi fiang ini rban-muri,
ira veka rban-ulu.
Tamata ovi fiang ini rban-ulu,
ira veka rban-muri watan.”*
Yesus nangrihi nala fatelu roak na'a Ni matmatan a
17 Na'ut i Yesus nti Yerusalem,
ma na'a linga'an ralan obin,
na nera Ni tamata vutu rahin irua ovi rorang Ia yai,
ma rti nelan kedan a ma nfalak verin ira ne,
18 “Fiang ini mane tati Yerusalem,
na tamata ra veka rala Ya'a,
Tamata Yanan Ya'a ini,
verin dawan mela falurut ra ovu dawan ovi rair Musa ni inukun ra.
Ira veka rukun Ya'a ma umata.
19 Ira veka rala Ya'a verin tamata ovi wol Yahudi ra.
Tamata avyai veka rlabir waweang Ya'a ovu rira vaivatul ra,
rasveva Ya'a,
beti rbaku Ya'a na'a aa walwalur.
Na'uk ti ma amar itelu nelak,
na Ubu veka nfava'at ewal Ya'a.”
Tfakabava tenadida ra ma tlobang vali tamata liak ra
20 Nata Zebedeus awan a ovu yanan ra,
rma ma rtuan Yesus.
* Zebedeus awan a nsoak ma nsangatur verin Yesus,
mane nera afa tali Ia.
21 Ba Yesus norat ia ne,
“Inam ma otu afaka verin oa?”
Vata yai nfalak verin Yesus ne,
“Era ma mtorung ne,
veka mala yanak ra ma isa ndoku Mu lihir mela ovu isa ndoku vali Mu lihir balit a,
ma mimunuk fyareta tamata ra na'a Mu Fareta a.”
22 Na'uk Yesus nfalak verin ia ne,
“Mia wol mkya'a afa i myera tali Ya'a.
Mtyahang nala ma rotu sian mia wean i veka rotu sian Ya'a?”
Ira rfalak ne,
“O'u.
Amtahang nala watan.”
23 Ba Yesus nfalak verin ira ne,
“Fyalak kena urun,
tevek ira veka rotu sian mia wean i veka rotu sian Ya'a.
Na'uk Ya'a wol bisma ufadoku ne,
iki ndoku Ning lihir mela ovu balit a.
Ning lihir mela ovu Ning lihir balit a.
Yamang a'uk sa'i nfadoku ne,
tamata aba veka rdoku ovu Ya'a.”
24 Nata Yesus Ni tamata vutu rarenar afa ovi rira kida irua yai rfalak ra,
ba rangrova ira.
25 Ba Yesus nera ira munuk ma nfalak ne,
“Mia mkya'a roak ne,
tamata fareta ra ovu tamata dawan ovi wol Yahudi ira rfareta rira tamata ra ovu limarira tma'an ma rta'i ira.
26 Na'uk mia deka weabira tamata avyai.
Tamata iki inan ma ni dawan nlia tamata ra,
na ia musti neluk tamata sansinir verin mia.
27 Iki inan ma nlia munuk mia,
na ia musti neluk tamata sansinir verin mia.
28 Wean vali inyai verin Ya'a,
Tamata Yanan Ya'a.
Ya'a wol uma ma usinir tamata ra ma rlobang Ya'a.
Na'uk uma ma ulobang tamata ra ovu umata al ukvanak tamata rivun tali rira salasilan ra.”
Yesus notu ma tamata kibu irua rsirea ewal
29 Na'ut i Yesus ovu Ni tamata ovi rorang Ia rban-talik kota Yerikho,
na tamata rivun rorang vali ira.
30 Na'a linga'an nelan,
na tamata kibu irua rdoku.
Ira rarenar ne,
Yesus nahu inyai,
ba rafwak ne,
“Yesus,
Oa ubum a nusim Raja Daud,
ba fara fwaturu Mu silobang verin ami!”
31 Tamata rivun rtabu ira ma deka vairira.
Na'uk rtafal ma rafwak ila'a ne,
“Oa ubum-nusim Raja Daud,
ba fara fwaturu Mu silobang verin ami!”
32 Nata Yesus ndir-teri ma nera tamata kibu irua yai ma norat ira ne,
“Inabira ma otu aka verin mia?”
33 Ira rfalak ne,
“Duila'a,
fara ne mlobang ami ma motu ma amsirea ewal!”
34 Yesus nfaturu Ni silobang verin ira,
ba nkena matarira ra,
na rsirea lahir.
Ba rdiri ma rorang Yesus.