Vaivatul kamkuma na'a vata varu isa ovu tamata i ba'i nfaleka inukun verin tamata ra
1 Yesus nfamalik vaivatul kamkuma isa verin Ni tamata ovi rorang Ia ma al nair ira.
Ia nfangnanang ira ma musti raflurut lalawatan ovu deka ralarira kako'u.
2 Ia nfalak ne,
“Tamata isa i ba'i nfaleka inukun nleal kota isa.
Ia wol nbobar Ubu ovu wol nkamlabir tamata isa vali.
3 Na'a kota yai vali,
na vata varu isa nma lalawatan ma ntuan tamata inukun yai ma nera verin ia ne,
‘Mlobang ma mususan ning ngrihi a ovu tamata i nangal ya'a ini ovu ni malolan a.’
4 Ya'i mnanat,
na tamata inukun yai wol nkamlabir lahir varu yai,
ti nata nanovak na'a ralan a ne,
‘Velik ne wol ubobar Ubu ovu wol ukamlabir tamata isa vali,
5 na'uk varu ini nlabir lalawatan ya'a.
Ba ni lolin a,
ulobang ia ovu ni malolan a,
boma deka nma lalawatan ma nlabir ya'a.’ ”
6 Ba Duila'a nfalak ne,
“Minovak ma lolin na'a afa ovi tamata inukun yai nfalak ra.
Ni vava'at a wol nmalola!
7 Ubu notu ma nlia tali inyai!
Ia veka nlobang Ni tamata ovi nfili ra.
Ira ovan-amar raflurut verin Ia.
Ia veka wol ntal ma mnanat ma nlobang ira!
8 Ufalak lahir verin mia ne,
Ubu veka nlobang lahir ira ovu Ni malolan a!
Na'uk wean i Ya'a,
Tamata Yanan Ya'a,
uma lanit ivavan ini,
na Ya'a veka utuan tamata inorang ra te wahal?”
Vaivatul kamkuma na'a tamata isa ntali Yahudi rira sidovung isa naran Farisi ovu tamata i ba'i nera babahir kulu
9 Yesus nfamalik vali vaivatul kamkuma ini verin tamata ovi ranovak ne,
wol rotu salasilan,
ovu ranovak vali ne,
tamata liak ra wol fyawarira.
10 Ia nfalak ne,
“Tamata irua rti Rahan Dawan Falurut ma raflurut.
Tamata isa ntali sidovung Farisi,
na tamata isa vali ba'i nera babahir kulu.
11 Tamata Farisi yai ndiri ma naflurut watan na'a ralan a ne,
‘Ubu,
ya'a ufalak fara weninyai verin Oa,
tevek ya'a wol weang tamata liak ra;
ira rwi-rwa tamata ra ma rbori rira metan ra,
rangal inukun ra,
rsifa roak na'uk rtuba ovu tamata ovi wol awarira verin ira,
ovu vali wol weang tamata i ba'i nera babahir kulu ini.
12 Ya'a utolat farua na'a karedralan isa,
ovu ala persen vutu tali ning karya enan ra munuk verin Oa.’
13 Na'uk tamata i ba'i nera babahir kulu yai ndiri ma nfaroa ia tali tamata ra.
Ia wol nabrahi ma ntadata nrata lanit,
na'uk nfefik buburn a ma nfalak ne,
‘O Ubu,
fara fwaturu Mu silobang a verin ya'a,
tamata salasilan ini.’*
14 Mryenar ma lolin afa ovi ufalak ini!
Tamata i ba'i nera babahir kulu yai,
na'ut i newal ia nti ni rahan a,
na Ubu na'i vatuk roak ni salasilan ra,
na'uk tamata Farisi yai wahal.
Tevek tamata iki watan nfakaratat tenan a,
na Ubu veka nfakabava ia,
na'uk tamata iki watan nfakabava tenan a,
na Ubu veka nfakaratat ia.”
Yesus naflahar kasiko'u yanat ra
15 Tamata rovun yanarira ko'u ra rma verin Yesus,
boma nfadoku liman na'a ira.
Na'ut i Ni tamata ovi rorang Ia rsi'ik tamata avyai,
na rangrova ira.
16 Na'uk Yesus nera kasiko'u avyai,
beti nfalak verin Ni tamata ra ne,
“Msyi'ik watan ma kasiko'u avyai rma ma rtuan Ya'a.
Deka myotu teri ira,
tevek tamata ovi wearira avyai,
ira veka warira vali ovu Ubu na'a Ni Fareta a.
17 Afa i ufalak verin mia ini,
kena urun!
Tamata iki watan wean i wol norang ne,
Ubu nfareta tamata ra wean lahir Raja,
wean kasiko'u avyai,
* na ia veka wol wan na'a Ubu Ni Fareta a.”
Tamata ovi rka'i ra susa ma ti rna'a Ubu Ni Fareta a
18 Yahudi rira dawan isa nfalak verin Yesus ne,
“Tuan Guru,
lolin Oa.
Ya'a musti otu afaka,
boma ning vava'at kakiwal?”
19 Yesus nfalak ne,
“Afakinimi fwalak ne lolin Ya'a?
Wol tamata isa vali lolin ia,
Ubu a'uk sa'i lolin Ia.
20 Oa mka'a munuk afa ovi Ubu nfareta roak verin ita:
‘Wean i msifa roak,
na deka mtuba ovu tamata i wol awam verin ia,
deka msifedan,
deka bwori,
deka mdiri fareta waharira ralan ra ma msiklabir na'a afa ovi fwalak ra na'a tamata liak,
ovu malang renam ovu yamam a.’ ”*
21 Tamata yai nfalak ne,
“Ya'a ot-orang munuk roak afa avyai,
tali na'ut i ning kako'u obin.”
22 Yesus nrenar munuk afa ovi tamata yai nfalak ra,
na nfalak verin ia ne,
“Teran afa isa wol motu obin.
Musti fwedi munuk mu metan ra ma mtanang kubang avyai verin tamata kasian ra.
Motu wean inyai,
na veka mu metan na'a lanit ratan,
beti mwa ma morang Ya'a.”*
23 Ti ma nrenar afa ovi Yesus nfalak ra,
na ralan a lalau urun,
tevek nka'i urun ia.
24 Yesus nka'a lahir ne,
tamata yai ralan lalau,
ba nfalak verin ia ne,
“Susa buas ma tamata ovi rka'i ra rtorung ma Ubu nfareta ira wean lahir raja.
25 Susa buas ma unta nuruk dirin ni bilahin a nti,
na'uk susa lia vali verin tamata ka'i ra ma rtorung ma Ubu nfareta ira wean lahir raja.”
26 Tamata ovi rarenar afa ovi Yesus nfalak ra rorat ne,
“Ba wean inyai,
na iki veka ni vava'at kakiwal?”*
27 Ba Yesus nfalak ne,
“Afa ovi tamata wol rot-nala ra,
Ubu not-nala munuk.”*
28 Nata Petrus nfalak ne,
“Ami amban-talik roak mami afakataka munuk ma amorang Oa.”
29-30 Yesus nfalak verin ira ne,
“Afa i ufalak verin mia ini,
kena urun!
Tamata ovi rban-talik roak rira rahan ra,
te awarira ra,
te terarir-valirira ra,
te renarir-yamarira ra,
te yanarira ra,
tevek rfamalik Ubu Ni Fareta verin tamata ra,
na Ia veka ntafal enarira ra ma nlia ma dawan tali lan a na'a rira vava'at ra,
ovu vali na'a amar ovi veka rma ini,
na ira veka rira vava'at kakiwal.”*
Afwatan i naran unta (Lukas 18:25)
Yesus nangrihi fatelu roak na'a Ni matmatan a
31 Yesus nasdovu munuk Ni tamata vutu rahin irua ovi rorang Ia ma nfalak verin ira ne,
“Fiang ini tati Yerusalem.
Na'a ineri,
na afa ovi nabi ra rtulis munuk roak na'a Ya'a,
Tamata Yanan Ya'a,
veka rkena lahir Ya'a.
32 Tamata ra veka rala Ya'a verin tamata ovi wol Yahudi ra ma rlabir waweang Ya'a ovu rira vaivatul ra,
rfalak sian Ya'a ovu rafnit Ya'a.
33 Ira veka rasveva Ya'a ovu rfedan Ya'a,
na'uk ti ma amar itelu nelak,
na veka uva'at ewal.”
34 Na'uk Yesus Ni tamata ovi rorang Ia wol rfan-aran afa ovi nfalak ra.
Ni vaivatul avyai wean afa fanfonak verin ira,
ba wol rka'a afa ovi Yesus nfalak ra.
Yesus notu ma tamata kibu isa nsirea lahir
35 Na'ut i Yesus nfaseri roak kota Yerikho,
na tamata kibu isa ndoku linga'an nelan ma nera afa tali tamata ra.
36 Ti ma nrenar tamata rivun ovi rahu inyai vairira ra,
na norat ira ne,
“Myotu afakinyai?”
37 Ira rfalak ne,
“Yesus i ntali ahu Nazaret nbana nahu ini.”
38 Ba ia nafwak ne,
“Yesus,
Oa ubum-nusim Raja Daud.
Fara fwaturu Mu silobang a verin ya'a!”
39 Tamata ovi rbana ula ira rtabu ia ma deka vain.
Na'uk ia nafwak ma vain a dawan urun ma nfalak ne,
“Oa ubum-nusim Raja Daud,
ba fara fwaturu Mu silobang a verin ya'a!”
40 Nata Yesus ndir-teri,
beti nsinir tamata boku ma rovun tamata kibu yai nma.
Ti ma nfaseri Yesus,
na Yesus norat ia ne,
41 “Oa inam ma otu afaka verin oa?”
Tamata yai nfalak ne,
“Duila'a,
ya'a inak ma usirea!”
42 Ba Yesus nfalak verin Ia ne,
“Msirea kikyai,
tevek mu inorang a verin Ya'a notu ma lolin roak oa!”
43 Na'ut inyai vali,
na tamata yai nsirea lahir.
Nata norang Yesus ovu nfadawang Ubu.
Ti ma tamata rivun avyai rsi'ik afa yai,
na ira munuk rfadawang Ubu.