Zakheus nahil tali afa ovi notu ra ma norang Yesus
1 Ti ma Yesus naran kota Yerikho,
na nban-oli kota yai.
2 Na'a kota yai,
na tamata ka'i isa naran Zakheus.
Ia nban-ulu verin tamata ovi ba'i rera babahir kulu.
3 Ia inan ma nsi'ik Yesus,
na'uk tamata rivun ovu kabava da'in ia,
ba wol bisma nrea Yesus.
4 Ba nafla ula ia tali tamata rivun avyai nti ma nakbasal aa ara isa,
boma bisma nsi'ik Yesus na'ut i nahu inyai.
5 Ti ma Yesus naran aa ara yai,
na ntadata ma nfalak ne,
“Zakheus msuta kikyai,
tevek amar ini musti una'a teri mu rahan.”
6 Ba Zakheus ralan lolin urun ma nsuta lahir,
tevek Yesus veka nana'a teri ni rahan a.
7 Tamata rivun ovi rsi'ik afa yai rafngamu'ur ma rfalak ne,
“You!
Yesus nti lahir tamata i ba'i notu salasilan yai ni rahan a.”
8 Na'uk Zakheus ndiri ma nfalak verin Duila'a ne,
“Duila'a,
ya'a veka ala lahir ning metan lihir a verin tamata kasian ra,
ovu veka ubahir ma nlia nala fafa'at verin tamata ovi ulabir nala roak ira.”
9 Ba Yesus nfalak verin Zakheus ne,
“Amar ini lahir,
na Ubu nsikat oa ovu mu rahan teta tali bira salasilan ra,
ma bira vava'at kakiwal,
tevek Abraham ubun a nusin vali oa.*
10 Ya'a,
Tamata Yanan Ya'a,
uma ma udava ovu ala tamata ovi rfaroa ira tali Ubu,
ma usikat ira tali rira salasilan ra,
ma rira vava'at kakiwal.”
Zakheus nakbasal aa ara isa, boma bisma nsi'ik Yesus (Lukas 19:4)
Yesus nfamalik vaivatul kamkuma na'a tamata sansinir vutu
11 Yesus nfaseri roak Yerusalem,
ba tamata avyai rnarin ne,
Ubu Ni amar sarseri lalean roak ma nfareta tamata ra wean lahir Raja.
Tamata avyai rarenar Yesus nangrihi obin a,
ba Ia nfamalik ewal vaivatul kamkuma isa.
12 Yesus nfalak ne,
“Tamata mela isa mane nti negara isa i raroa ma ndava mane rsikat ia ma notu raja na'a negara yai,
beti newal ia.
13 Ia wol nati obin,
na nera ni tamata sansinir vutu a ma nala kubang masa sasan lokat ira,
ma nfalak ne,
‘Myala kubang ovi ma al fyedi-fyaha afa,
nata ti naran i ewal ya'a.’*
14 Na'uk tamata ovi rtali ni negara wol inar lahir tamata mela yai.
Ia nti roak,
beti rsinir tamata boku ma rorang ia ma rfalak verin tamata ra na'a negara yai ne,
‘Ami wol inamami ma tamata ini notu raja verin ami!’
15 Velik ne wean inyai,
na'uk raja i nfareta negara yai nsikat watan ia ma notu raja,
beti newal ia.
Ia nsinir tamata ra ma rera ni sansinir ovi nala roak kubang verin ira ma rma,
boma nka'a lahir ne,
uturira te wahal.
16 Sansinir i ula lalean a nma ma nfalak ne,
‘Baba,
ala roak kubang masa isa i mala verin ya'a yai,
ma ufedi-ufaha afa ma utung nala kubang masa vutu a.’
17 Ba raja yai nfalak verin ia ne,
‘Oa mu karya lolin buas.
Oa mot-orang lalawatan afa ovi ufalak ra na'a afa ko'u ovi ala verin oa,
ba ya'a veka usikat oa ma fwareta kota vutu a.’
18 Sansinir i norang i ula lalean a nma ma nfalak ne,
‘Baba,
ala roak kubang masa isa i mala yai,
ma ufedi-ufaha afa ma utung nala kubang masa ilima.’
19 Ba raja nfalak verin ia,
‘Ya'a veka usikat oa ma fwareta kota ilima.’
20 Sansinir liak isa vali nma ma nfalak ne,
‘Baba,
mu kubang hi ini.
Ukum-teri ma lolin ia na'a lesu isa.
21 Ubobar oa ta baba,
tevek waham a ngrova watan.
Oa mala afa ovi oa wol mua ra,
ovu ba'i mala va'i ihin tali va'i ovi wol muvuri-muva na'a.’
22 Raja nfalak verin tamata yai ne,
‘Oa muktufan urun,
ba veka ufaleka inukun verin oa tali afa ovi fwalak ra.
Oa mka'a roak ne,
wahang a ngrova ovu ba'i ala afa ovi wol ningu ra,
ovu vali ba'i ala va'i ihin tali va'i ovi wol uvuri-uva na'a.
23 Wean inyai,
na afakinimi wol fwadoku ning kubang yai na'a bank,
boma ti ma ewal ya'a,
na bisma ala kubang yai ovu ni bunga a.’
24 Nata raja nfalak verin tamata ovi rdiri inyai ne,
‘Myal-ewal kubang tali sansinir yai,
ma myala verin sansinir i ni kubang masa vutu a.’
25 Na'uk ira rfalak ne,
‘Baba,
ia ni kubang masa vutu roak.’
26 Raja nfalak ne,
‘Mingnanang!
Tamata iki watan npake ma lolin afa ovi rna'a roak ia,
na veka utafal vali verin ia.
Na'uk tamata iki watan wol npake ma lolin afa ovi rna'a roak ia,
na veka al-ewal afa ovi rna'a ia.
27 Na'uk fiang ini myovun tamata ovi rira sian ya'a ovu wol inar ma una'a raja verin ira ma rma ini.
Fyedan ira na'a wahang ralan a!’ ”*
Tamata ovi rna'a Yerusalem rsa'a Yesus ovu inar lolin
28 Ti ma Yesus nfamalik munuk vaivatul kamkuma yai,
na nbana ula ia nti Yerusalem,
ma Ni tamata ra rahu murin a.
29 Ti ma Yesus nfaseri ahu Betfage ovu Betania i rna'a vuar Zaitun a,
na nsinir tamata irua tali Ni tamata ovi rorang Ia ma rti ula ira.
30 Yesus nsurak ira ne,
“Miti ahu i na'a ulu eri.
Ti myaran ahu yai,
na veka mtyuan keledai isa i wol ka'i dawan ia obin,
ovu rkeak teri ia.
Tamata ra wol rata rdoku tetan ratan obin.
Mryuvat ni kakeak a ma fyabana ia mya.
31 Wean i tamata rorat mia ne,
‘Notu afakinimi fyatalik keledai yai?’,
na byalat ira ne,
‘Duila'a nperlu keledai yai.’ ”
Yesus Ni tamata irua raruvat munuk roak keledai i wol ka'i dawan ia obin ni kakeak a (Lukas 19:31)
32 Ba Yesus Ni tamata irua yai rti,
na rtuan lahir afa i Yesus nfalak roak verin ira.
33 Na'ut i raruvat keledai yai ni kakeak a,
na tamata ovi rira keledai yai rorat ira ne,
“Afakinimi mane fyatalik keledai yai?”
34 Ira rfalak ne,
“Duila'a nperlu.”
35 Ba rovun keledai yai ti verin Yesus,
ma rala rira ravit blawat ra ma al raraang tetan ratan a,
beti rsikat Yesus ma rata ndoku.
36 Na'ut i Yesus nrata roak keledai yai ma nati Yerusalem,
na tamata ra rvelar rira ravit blawat ra na'a linga'an ralan.*
37 Ti ma Yesus nfaseri Yerusalem na'a linga'an dadudur i na'a vuar Zaitun,
na Ni tamata ovi rorang Ia munuk rotu inar lolin ovu rfadawang Ubu ovu vair dawan,
tevek rarea munuk roak mujizat ovi notu ra.
38 Ira rfalak ne,
“Ubu naflahar tamata i neluk Raja ma nma ovu Duila'a naran a!
Fara dida vava'at ra malinan watan ovu Ubu i na'a lanit ratan,
ovu tfadawang Ubu i Ni dawan a nlia munuk afakataka.”
39 Tamata Farisi boku rovu vali tamata rivun avyai,
ba rfalak verin Yesus ne,
“Tuan Guru,
mtabu Mu tamata ovi rorang Oa yai ma deka rangrihi wean inyai!”*
40 Ba Yesus nfalak lahir verin ira ne,
“Ufalak verin mia ma mkya'a ne,
wean i tamata ovi wol vairira,
na vatu ovi veka rafwak.”
Yesus nrata keledai ma nati Yerusalem, na tamata ra rvelar rira ravit blawat ra na'a linga'an (Lukas 19:40)
Yesus nvakar na'ut i nsi'ik kota Yerusalem
41 Na'ut i Yesus nfaseri roak Yerusalem,
ma nsi'ik kota yai,
na nvakar lahir.
42 Ia nfalak ne,
“Wora lahir mia tamata ovi mnya'a Yerusalem ini!
Ya'a inak urun ma amar ini fyan-aran afa ovi rotu ma Ubu ralan malinan ovu mia!
Na'uk fiang ini wol fyan-aran lahir afa avyai obin.
43 Tevek ni amar a veka nma ma tamata ovi rira sian mia rdir-lilit mia ovu rotu balbelat i nangrebat urun,
ma rdovak mia tali wan inba watan.*
44 Ira veka rvisal bira kota ma rfedan mia ovu bira tamata ra munuk.
Ira veka ra'ar munuk lahir bira rahan ra ovu tembok ra ma wol trea vatu isa vali na'a wan a,
tevek mia wol mkya'a amar i Ubu nma ma nsikat mia tali bira salasilan ra,
boma bira vava'at kakiwal.”*
Yesus nala'ing vatuk tamata ovi rfedi-rfaha afa na'a tamata Yahudi rira Rahan Dawan Falurut i na'a Yerusalem ni lean a
45 Nata Yesus nati Yahudi rira Rahan Dawan Falurut ni lean a ma nala'ing vatuk tamata ovi rfedi-rfaha afa na'a inyai.
46 Yesus nfalak verin ira ne,
“Surat Ralan nfalak wean ini:
‘Ning rahan a neluk rahan falurut ma tamata raflurut na'a,’
na'uk mia myotu ma neluk wan ma tamata barborin ra rna'a.”*
47 Lokat amar,
na Yesus nsiair na'a Rahan Dawan Falurut.
Ba Yahudi rira dawan mela falurut ra,
ovu rira dawan ovi rair Musa ni inukun ra,
ovu dawan Yahudi ra rdava linga'an mane rfedan Ia.
48 Na'uk ira wol rdav-nala linga'an ma rfedan Ia,
tevek tamata ra munuk inar urun ma rarenar Ni vaivatul ra.