Tamata ovi rna'a Yerusalem rsa'a Yesus ovu ralarira lolin urun
1 Yesus ovu Ni tamata ovi rorang Ia ti rfaseri Yerusalem,
na raran lan ahu Betfage ovu Betania.
Ahu irua yai rna'a vuar Zaitun.
Ba Yesus nsinir tamata irua tali Ni tamata ovi rorang Ia ma rti ula ira.
2 Ia nfalak verin ira ne,
“Miti ahu i na'a ulu eri.
Ti myaran ahu eri,
na veka mtyuan lahir keledai isa i wol ka'i dawan ia obin.
Rkeak teri ia,
ovu vali tamata ra wol rata rdoku tetan ratan obin.
Mryuvat ni kakeak a ma fyabana ia mya.
3 Beta ne tamata ra rorat mia ne,
‘Afakinimi mryuvat keledai yai ni kakeak a?’,
na fyalak ne,
‘Duila'a nperlu keledai yai,
ovu wol mnanat,
na veka rtaha ewal rma.’ ”
4 Tamata irua yai rti ma rtuan keledai yai na'a linga'an nelan.
Tamata ra rkeak keledai yai na'a rahan isa ni falfolat a.
Ba irua rti ma raruvat ni kakeak a, na
5 tamata ovi rdiri inyai rorat ira ne,
“Afakinimi mryuvat keledai yai ni kakeak a?”
Yesus navul keledai i wol ka'i dawan ia obin ma naran Yerusalem (Markus 11:7)
6 Tamata irua yai rfalak wean afa ovi Yesus nfalak lan roak verin ira,
ba tamata ovi rna'a inyai rsi'ik watan ma rfabana keledai yai rti.
7 Ba rfabana keledai yai rti verin Yesus,
ovu rala rira ravit blawat ra ma al raraang tetan ratan a,
ma Yesus rata ndoku.
8 Tamata rivun rvelar rira ravit a blawat ra na'a linga'an ralan,
na boku vali rfadoku aa sanan tutul ovi retal na'a rira va'i ra.
9 Tamata ovi rbana ula ira ovu ovi rban-muri ra,
rafwak ma vairira dawan ne,
“Mya ma tfadawang Ubu!
Ubu naflahar Ia i nma ovu Duila'a naran a.*
10 Ubu naflahar ita,
tevek Ni fareta i veka nma ini lolin urun,
wean i ubud a nusid Raja Daud nfareta!
Ubu nana'a wan i karatat lia munuk a,
ba traning Ia!”
11 Yesus naran roak Yerusalem ma nti Yahudi rira Rahan Dawan Falurut ralan a.
Ia nsi'ik lilit wan yai,
na ya'i laflofan roak,
ba nti Betania ovu Ni tamata vutu rahin irua ovi rorang Ia.
Yesus near nfasoba aa isa naran ara
12 Ni ilyan ana,
Yesus ovu Ni tamata ovi rorang Ia rban-talik Betania,
na Yesus nfarnuang Ni balafar roak.
13 Tali raroa obin,
na nsi'ik aa isa naran ara nafroang roak.
Ba nti ma nsi'ik aa yai al ndava ne,
vuan te wahal,
na'uk wol nrea vuan isa vali.
Ia nrea watan aa yai roan ra,
tevek wol naran amar i vuan obin.
14 Ba Yesus nfalak verin aa ara yai ne,
“Tali amar ini,
na tamata ra wol ra'an roak vuam a!”
Yesus Ni tamata ra rarenar munuk afa i nfalak a.
Yesus nala'ing vatuk tamata ovi rfedi-rfaha afa na'a tamata Yahudi rira Rahan Dawan Falurut i na'a Yerusalem ni lean a
15 Yesus ovu Ni tamata ovi rorang Ia rewal ira rti Yerusalem,
na nti Yahudi rira Rahan Dawan Falurut ni lean a,
ma nala'ing vatuk tamata ovi rfedi-rfaha afa na'a inyai,
beti nir-nar tamata ovi rsikati kubang rira meja ra,
ovu vali dakdokwan ovi tamata ra rdoku ma ala rfedi modarlaka.*
16 Ia ntab-teri vali tamata ra ma deka rtaha afa ovi rfedi-rfaha ra,
ma rahu Rahan Dawan Falurut ni lean a.
17 Yesus notu wean inyai,
beti nair tamata ovi rna'a inyai.
Ia nfalak verin ira ne,
“Surat Ralan nfalak wean ini:
‘Ning rahan a neluk rahan falurut verin bangsa ra munuk na'a lanit ivavan,’
na'uk mia myotu ma neluk wan ma tamata barborin ra rna'a.”*
18 Yahudi rira dawan mela falurut ra ovu dawan ovi rair Ubu Ni inukun ra rarenar vaivatul avyai,
ba rdava linga'an mane rfedan Yesus,
tevek rbobar Ia.
Rbobar Ia,
tevek tamata rivun ovi rna'a inyai rtalkaka,
ovu inar urun ma rarenar afa ovi nfalak ra.
19 Lera nakduvul ma laflofan roak,
na Yesus ovu Ni tamata ovi rorang Ia rban-talik kota yai.
Yesus nala aa ara i nangaran roak ma nfalyawang ne, Ubu nrenar dida falurut ra
20 Varverak sumatan obin,
na Yesus ovu Ni tamata ovi rorang Ia rban-ewal rti Yerusalem ma raran aa ara yai.
Aa yai nangaran munuk roak ma ti naran ni wa'ar ra.
21 Petrus nangnanang ewal afa i Yesus nfalak lan roak verin ira na'a aa yai,
ba nfalak verin Ia ne,
“Tuan Guru,
eka msi'ik!
Aa i inravin mear fwasoba yai nangaran munuk roak!”
22 Yesus nfalak verin ira ne,
“Myorang urun Ubu!
23 Afa i ufalak verin mia ini,
kena urun!
Wean i tamata iki watan wol ralan raruan al norang Ubu,
na ia veka nfalak verin vuar isa ne,
‘Mlaun talik wam kikyai ma roal mtuba tahat ralan!’,
na vuar yai veka nlaun lahir ma roal ntuba tahat.
24 Wean inyai,
bi ufalak verin mia ne,
wean i myorang ne,
afa ovi myera tali Ubu na'a bira falurut ra,
Ia nala roak verin mia,
na Ia veka nala afa avyai verin mia.
25 Na'ut i miflurut,
na wean i ralabira sian tamata isa,
na myabun ia veki,
boma Yamabira i nleal lanit ratan veka na'i vatuk vali bira salasilan ra. [
26 Na'uk wean i wol myabun tamata ra,
na Yamabira na'a lanit ratan veka wol na'i vatuk vali bira salasilan ra.”]*
Yahudi rira dawan ra rorat Yesus na'a Ni ngrebat a
27 Yesus ovu Ni tamata ovi rorang Ia rewal ira rma Yerusalem.
Ia nbana na'a Yahudi rira Rahan Dawan Falurut ni lean a,
na Yahudi rira dawan mela falurut ra ovu rira dawan ovi rair Musa ni inukun ra,
ovu vali Yahudi rira dawan ra rma ma rtuan Ia,
28 ma rorat ne,
“Oa Mu ngrebat aka ma al motu afa ovi?
Iki nala ngrebat yai verin Oa ma motu afa avyai?”*
29 Yesus nfalak ne,
“Ya'a mane orat mia na'a afa isa,
ba byalat Ya'a veki,
beti ufalak vali verin mia ne,
iki nala ngrebat verin Ya'a ma otu afa avyai.
30 Yohanes nbaptis tamata ra ovu ngrebat tali iki?
Ngrebat tali lanit ratan,
te tali tamata?
Eka fyalak kikyai!”
31 Ba rsifalak afa verin ira ne,
“Wean i tfalak ne,
‘Yohanes ni ngrebat ntali lanit ratan,’
na Ia veka nfalak ne,
‘Notu afakinimi wol myorang ia?’
32 Na'uk susa vali ma tfalak ne,
‘Ngrebat tali tamata!’ ”
Ira rbobar,
tevek tamata rivun rorang roak ne,
Yohanes nabi mnga'un ia.
33 Ba rfalak verin Yesus ne,
“Ami wol amka'a.”
Yesus nfalak verin ira ne,
“Ba wean inyai,
na Ya'a veka wol ufalak vali verin mia ne,
ala ngrebat tali iki ma otu afa avyai.”