Yahudi rira dawan ra rorat Yesus na'a Ni ngrebat a
1 Amar isa,
na Yesus nair tamata rivun na'a Yahudi rira Rahan Dawan Falurut ovu nfamalik Ubu Ni Ivar Lolin a,
na Yahudi rira dawan mela falurut ra ovu rira dawan ovi rair Musa ni inukun ra,
ovu vali rira dawan ovi rban-ulu verin ira rma wan yai.
2 Ira rfalak verin Yesus ne,
“Eka fwalak verin ami ne,
Mu ngrebat aka ma al motu afa ovi,
ovu iki nala ngrebat yai verin Oa ma motu afa avyai?”
Tamata Yahudi rira Rahan Dawan Falurut i na'a Yerusalem (Lukas 20:1)
3 Yesus nfalak verin ira ne,
“Ya'a mane orat vali afa isa tali mia,
ba fyalak verin Ya'a.
4 Yohanes nbaptis tamata ra ovu ngrebat tali iki?
Ngrebat tali lanit ratan,
te tali tamata?”
5 Ba ranovak afa yai ma rfalak ne,
“Wean i tfalak ne,
‘Yohanes ni ngrebat ntali lanit ratan,’
na Ia veka nfalak ne,
‘Notu afakinimi wol myorang ia?’
6 Na'uk wean i tfalak ne,
‘Ngrebat tali tamata,’
na tamata ra munuk veka rala vatu al rasba ita,
tevek ira rorang ne,
Yohanes nabi ia.”
7 Ba rfalak ne,
“Ami wol amka'a ne,
nala ngrebat tali iki ma nbaptis tamata ra.”
8 Yesus nfalak verin ira ne,
“Ba wean inyai,
na Ya'a veka wol ufalak vali verin mia ne,
ala ngrebat tali iki ma otu afa avyai.”
Yesus nfalak ne, Yahudi rira dawan ra wearira tamata va'i ovi rangal duarira ra
9 Yesus nfamalik vaivatul kamkuma isa verin tamata rivun avyai ne,
“Tamata isa notu ni va'i anggur,
beti nala verin tamata va'i ra ma rasusan ni va'i yai,
ma ki rsiduk anggur boku verin ia.
Nata nban-talik ni ahu ma nti wan raroa,
ma ya'i mnanat ia na'a wan yai.
10 Ni amar naran roak ma rfufu anggur vuan ra,
na va'i duan yai nsinir ni tamata sansinir isa ma ti ntuan ira,
boma rala ni wahat a.
Na'uk tamata avyai rvaval sansinir yai,
beti rsinir ma newal ia ovu liman vu watan.
11 Ba nsinir ewal ni sansinir liak isa,
na'uk rvaval vali sansinir yai ovu rfama'it ia,
beti rsinir ma newal ia ovu liman vu watan.
12 Nata nsinir ewal ni sansinir liak isa ma fatelu roak,
na'uk rvaval ma sansinir yai namngala lahir,
beti rvatuk ia nti va'i yai murin a.
Aa anggur ovu vuan ra (Lukas 20:10)
13 Ti nata va'i duan yai nfalak na'a ralan ne,
‘Ya'a musti otu afaka ewal?
Ya'a veka usinir yanak i ulobang urun ia.
Snain ira veka ralang ia.’
14 Na'uk ti ma tamata va'i avyai rarea va'i duan yai yanan a brana,
na rsifalak afa verin ira ne,
‘Tamata ini va'i duan yanan a,
ba mya ma tfedan ia,
boma tala va'i ini verin ita.’
15 Rvatuk ia nti va'i yai murin a,
beti rfedan ia.”
Yesus norat tamata rivun avyai ne,
“Ba wean i va'i duan yai nma,
na veka notu afaka verin tamata avyai?
16 Ia veka nma ma nfedan tamata avyai ma nala ni va'i anggur yai verin tamata liak ra.”
Ti ma tamata rivun avyai rarenar afa i Yesus nfalak yai,
na rfalak ne,
“Fara deka wean inyai!”
17 Na'uk Yesus nsi'ik ira ma nfalak ne,
“Wean inyai,
na vaivatul ovi rna'a Surat Ralan ini ihin aka?
‘Vatu i tukan ra rvatuk yai,
fyawan lia munuk ma al nfangrebat rahan yai.’*
18 Tamata iki watan wean i nleka nsuta vatu yai ratan a,
na veka manminan lahir ia,
ovu wean i vatu yai nleka tali wan karatat ma nta'i tamata iki watan,
na tamata yai veka manminan lahir ia.”
Yahudi rira dawan ovi rair Musa ni inukun ra, ovu Yahudi rira dawan mela falurut ra rorat Yesus na'a babahir kulu ma al rfaleka Ia
19 Ba Yahudi rira dawan ovi rair Musa ni inukun ra ovu Yahudi rira dawan mela falurut ra rdava linga'an mane rtaha Yesus amar yai vali,
tevek rka'a roak ne,
Ia nala vaivatul kamkuma yai al nta'ing ira,
na'uk rbobar tamata rivun avyai.
20 Yahudi rira dawan ovi rair Musa ni inukun ra,
ovu Yahudi rira dawan mela falurut ra rsi'ik nanuang watan Yesus.
Ira rsinir tamata boku ma rotu felarira wean tamata ovi wol rsiklabir ra,
boma rorat afa isa tali Ia ma rfasala Ia,
ma rtaha Ia verin gubernur i nfareta na'a wan yai.
21 Tamata avyai rorat Yesus ne,
“Tuan Guru,
ami amka'a ne,
afa ovi fwalak ovu mair ra kena ovu wol fwili tamata.
Oa msiair ovu ni malolan a wean Ubu ralan nfalak a.
22 Wean inyai,
ba eka fwalak verin ami ne,
dida agama nfalak ne,
kena ma tbahir kulu verin Kaisar te wahal?”*
23 Na'uk Yesus nka'a lahir rira siweang a,
ba nfalak verin ira ne,
24 “Eka fyaturu kubang ihin isa verin Ya'a.
Tamata iki walun ovu naran a na'a kubang ini?”
Ira rfalak ne,
“Kaisar walun ovu naran a.”*
25 Nata Yesus nfalak verin ira ne,
“Ba wean inyai,
na myala verin Kaisar afa ovi ia nia ra,
ovu myala verin Ubu afa ovu Ia Nia ra.”
26 Ira wol rfalek-nala Ia tali Ni vaivatul ra na'a tamata rivun waharira ralan ra.
Ira rtalkaka lahir ovu wol vairira,
tevek afa ovi Yesus nfalak yai.*
Yahudi rira sidovung isa naran Saduki rira tamata ra rorat waweang Yesus ne, matmatan ra veka rva'at ewal te wahal
27 Tamata boku tali Yahudi rira sidovung isa naran Saduki rma ma rtuan Yesus.
Tamata Saduki ra wol rtorung ne,
tamata matmatan ra veka rva'at ewal,
ba rorat Yesus ne,
28 “Tuan Guru,
Musa ntulis inukun ini verin ita:
Wean i brana isa nmata ma teran a'uk awan a,
na'uk wol yanarira,
na brana yai a'an te warin musti nal-ewal varu yai ma neluk awan,
ma fara ia i nmata roak yai veka duan yanan boku.
29 Ba wean i brana ifitu iya'an iwarin ira ma iya'an nsifa roak,
na'uk wol yanan obin,
na nmata.
30 Nata warin nsifa ewal ovu varu yai,
na'uk wol yanar obin,
na nmata.
31 Warin i norang ia nsifa ewal ovu varu yai,
na'uk wol yanar obin,
na nmata vali.
Wean inyai lalawatan,
nata ti naran iwarin tutul a.
32 Ti nata vata yai nmata vali.
33 Ba wean inyai,
na ti naran amar i tamata matmatan ra rva'at ewal,
na iki veka awan mnga'un vata yai,
tevek brana ifitu yai awar munuk roak ia?”
34 Yesus nfalak verin ira ne,
“Tamata ovi rna'a lanit i vavan ini rsifa,
35 na'uk tamata ovi Ubu nfava'at ewal ira tali matmatan ma inovan ma rva'at na'a lanit ivavan ngorva'an a,
ira wol rsifa.*
36 Tevek ira wearira Ubu Ni sansinir tali lanit ratan ma wol rmata vali.
Ubu yanan ira,
tevek Ia nfava'at ewal ira tali matmatan.
37 Mia wol myorang ne,
tamata ovi rmata roak bisma rva'at ewal.
Musa ka'i nfaturu roak ne,
matmatan ra veka rva'at ewal.
Ia ntulis na'a Surat Ralan ma nfamalik na'ut i nsi'ik yafu nonga na'a lavurun lesmat ralan.
Ia ntulis ne,
Duila'a neluk ‘Ubu verin Abraham,
Ishak ovu Yakub.’*
38 Ia wol neluk Ubu verin matmatan ra,
na'uk neluk Ubu verin tamata ovi rva'at ra,
tevek na'a wahan ralan a,
na tamata ra munuk rva'at.”*
39 Boku tali Yahudi rira dawan ovi rair Musa ni inukun ra rarenar afa ovi Yesus nfalak yai,
na rfalak ne,
“Tuan Guru,
afa ovi fwalak yai kena urun.”
40 Tali inyai,
na wol rabrahi roak ma rorat afa tali Yesus.
Yesus nfalyawang ne, Raja i ntevut dida salasilan ra nlia tali Raja Daud
41 Nata Yesus norat ira ne,
“Wean inba ma tamata ra bisma rfalak ne,
Raja i ntevut tamata rira salasilan ra,
Daud ubun-nusin Ia?
42 Daud ka'i nfalak roak na'a kitab Mazmur ne,
‘Ubu nfalak verin ning Duila'a ne:
Mdoku Ning lihir mela a,*
43 ti naran i otu ma tamata ovi rira sian Oa rsoak nulu Oa.’*
44 Ba wean i Daud nfalak ne,
Raja i ntevut tamata rira salasilan ra Duila'a Ia,
na wean inba ma Daud ubun-nusin Ia?”
Yesus nfangnanang Ni Tamata ovi rorang Ia ma deka rot-orang Yahudi rira dawan ovi rair Musa ni inukun ra
45 Na'ut i tamata rivun rarenar i Yesus nangrihi a,
na Ia nfalak verin Ni tamata ovi rorang Ia ne,
46 “Msyi'ik wabira ma lolin na'a dawan ovi rair Musa ni inukun ra.
Wean i rbasiar,
na inar ma roru ravit blawat,
ovu inar vali ma tamata ra ralang ira ma rala salam verin ira na'a wan i rfedi-rfaha afa na'a.
Ira inar ma rdoku wan ovi tamata ra ba'i ralang ira na'a rahan falurut ra,
ovu vali na'a snoba ra.
47 Ira rangrihi ma rlabir vata varu ra ma rala rira metan ra.
Ira raflurut ma rira falurut ra blawat ma ala rteri rira afa sian ovi rotu ra.
Ubu veka nukun ira ovu inukun i aleman urun a ma nlia tamata liak ra.”