Yesus nair tamata ra ma deka rot-orang Yahudi rira dawan ra ovu tamata Yahudi ovi rtali sidovung Farisi, rira afa ovi rotu ra
1 Ba Yesus nfalak verin Ni tamata ovi rorang Ia ovu tamata rivun vali ne,
2 “Tamata Yahudi rira dawan ovi rair Musa ni inukun ra ovu Yahudi ovi rtali sidovung Farisi,
ira rfalyawang Musa ni inukun ra,
tevek rka'a ma lolin afa ovi Musa ntulis.
3 Ba myot-orang munuk afa ovi rair verin mia,
na'uk deka myot-orang afa ovi rotu ra.
Ira rira vava'at ra wol kena ovu afa ovi rair ra.
4 Ira rala varvara aleman verin tamata ra tali afa ovi rair ra,
na'uk ira wol rlauk limarira ra al rlobang tamata ra,
ma rot-nala afa ovi rair ra.
5 Ira rtulis vaivatul boku tali Surat Ralan a ma rkeak na'a ulurira te na'a limarira ra.
Ira roru ravit blawat i ni wahan nsoli lanun a.
Ira rotu munuk afa avyai na'a tamata rivun waharira ralan ra,
boma tamata ra rsi'ik ma rfadawang ira.
6 Ira inar ma rdoku wan ovi tamata ra ba'i ralang ira na'a snoba ra ovu na'a rahan falurut ra.
7 Ira inar vali ma tamata ra ralang ira,
ma rala salam verin ira na'a wan i rfedi-rfaha afa na'a,
ovu inar ma tamata ra rera ira ne,
‘Tuan guru.’
8 Na'uk mia deka inabira ma tamata ra rfadawang mia ma rera mia ne,
‘Tuan guru.’
Tevek Tuan Guru mnga'un isa watan,
ovu vali bir tinemun weabira isa watan.
9 Mia deka fyadawang tamata ovi rna'a lanit ivavan ini ma fyalak ne,
‘Bapa,’
tevek Yamadida ikisa watan na'a lanit ratan.
10 Mia deka inabira vali ma tamata ra rfalak mia ne,
tamata dawan mia,
tevek Ya'a Raja i utevut bira salasilan ra,
ovu Ya'a sa'i uban-ulu verin mia.
11 Ba tamata i ni dawan a nlia tamata ra munuk na'a bira sidovung a,
na ia musti neluk tamata sansinir verin mia.
12 Tevek tamata iki watan nfakaratat tenan a,
na Ubu veka nfakabava ia.
Na'uk tamata iki watan nfakabava tenan a,
na Ubu veka nfakaratat ia.”
Yesus nfasala tamata Yahudi ovi rtali sidovung Farisi ovu rira dawan ovi rair Musa ni inukun ra, tevek rfalak afa isa, na'uk rotu afa liak
13 “Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Ba afa ovi myair verin tamata ra wol kena ovu Ubu Ni vaivatul ra,
tevek fyalak teri tamata ra ma deka ti rna'a Ni Fareta a.
Mia wol wabira na'a Ubu Ni Fareta a,
ovu vali myotu teri tamata ovi mane ti rna'a Ni Fareta. [
14 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Mia mingrihi ma mlyabir tia ma watan varu ra ma myala rira metan ra,
ti naran i myala rira rahan ra.
Bira falurut ra blawat urun,
ma al mtyeri afa sian ovi myotu ra.
Na'uk Ubu veka nukun mia ovu inukun i aleman urun,
ma nlia tamata liak ra!]
15 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Mia myobal te bya'al vuar ra ala mdyava tamata liak i mane norang bira inukun ra.
Tamata yai norang roak mia,
ba myotu sian roak tamata yai ma ni salasilan nlia nala farua mia.
Ba ia veka nti urun yafwan kakiwal wean vali mia.
16 Mia Yahudi ovi byan-ulu verin tamata ra,
veka sian urun i lahir verin mia!
Mia weabira tamata kibu ovi rfaturu linga'an verin tamata liak ra.
Myair tamata ra ne,
wean i tamata iki watan nala Rahan Dawan Falurut naran a al nafwaba,
na inyai wol ihin akataka.
Na'uk tamata iki watan nala masa i na'a Rahan Dawan Falurut ma al nafwaba,
na ia musti nfakena ni tnorung a.
17 Ya'i yo!
Mia tamata ovi mkyibu ovu byoda ra.
Mia mkya'a roak ne,
Rahan Dawan Falurut fyawan lia munuk masa ovi rna'a ralan a.
Rahan Dawan Falurut ka'i notu ma masa yai nmerat urun ovu fyawan.
18 Mia fyalak vali ne,
tamata iki watan nala wan i ba'i rasnuri rira korban ra na'a ma al nafwaba,
na wol ihin akataka,
tevek wol nfakena ni tnorung a.
Na'uk tamata iki watan nfalak ne,
afa ovi nfadoku roak na'a wan yai ma al nafwaba,
na ia musti nfakena ni tnorung a.*
19 Hoi!
Matabira ra betane rkibu urun roak!
Mia mkya'a roak ne wan i ba'i rasnuri rira korban ra na'a yai,
fyawan lia korban i rasnuri roak a.
Tevek wan i rasnuri rira korban ra na'a yai nmerat urun,
ba rira korban ra rmerat urun vali.
20 Wean i tamata isa nala wan i rasnuri rira korban ra na'a yai ma ala nafwaba,
na ia nafwaba vali verin afa ovi rna'a wan i ba'i rasnuri rira korban ra na'a yai ratan a.
21 Wean i tamata isa nala Rahan Dawan Falurut al nafwaba,
na ia nafwaba roak ovu Rahan Dawan Falurut yai naran a ovu Ubu i nleal inyai.
22 Wean i tamata isa nala lanit ratan al nafwaba,
na ia nafwaba roak ovu wan i Ubu ndoku ma nfareta,
ovu vali Ubu i ndoku wan yai.
Wan i rasnuri korban ra na'a (Matius 23:18)
23 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Mia myala persen vutu tali bira va'i bumbu ra,
nararira selasih,
adas manis ovu jintan verin Ubu,
na'uk wol myot-orang inukun ovi rbana ula lalean ra na'a Musa ni inukun ra.
Inukun avyai wean ini:
Myotu afa ovi kena ra verin tamata ra munuk ovu fyaturu bira silobang verin tamata liak,
ovu vali myot-orang munuk afa ovi Ubu nfalak roak verin mia.
Myot-orang inukun ovi ula lalean avyai,
ovu vali deka miblufang ma myotu vali afa liak ovi Ubu nfareta roak.
24 Mia Yahudi ovi byan-ulu verin tamata ra,
weabira tamata kibu ovi rfaturu linga'an verin tamata liak ra!
Myaling vatuk afwatan ko'u wean barboras tali wear i myenu a,
na'uk afwatan dawan i naran unta mtyelas watan!*
25 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Mia mryaming bira moko ovu bira binan muririra ra ma rmerat,
na'uk ralarira ra ngra-ngrodi obin.
Mia vali ralabira ra ngra-ngrodi wean inyai,
ba inabira ma myala tamata liak rira metan ra,
ovu fyikir a'uk tenabira ra.
26 Hoi Farisi averi,
matabira rkibu!
Fyamerat lan ralabira ra veki,
boma bira afa ovi myotu ovu fyalak ra veka lolin vali.
Inyai wean mryaming bira moko ralarira ra veki ma rmerat,
na muririra ra veka rmerat vali.
27 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Mia weabira kubur ovi rsoka ira ma rangiar ma rsi'ik tali murin,
na lolin.
Na'uk na'a ralarira ra,
na rngora ovu tamata luririra ra,
ovu vali afa ovi ngra-ngrodi ra munuk.
28 Mia weabira vali inyai.
Tamata ra rsi'ik bira afa ovi myotu ra kena,
na'uk ralabira ra rngora ovu bira salasilan ra,
wean lahir tamata ovi ba'i rfalak afa isa,
na'uk rotu afa liak!
Ubu veka nukun dawan Yahudi ovi rair Ni inukun ra ovu rira sidovung Farisi
29 Mia dawan Yahudi ovi myair Musa ni inukun ra ovu ovi mtyali sidovung Farisi,
veka sian urun i lahir verin mia!
Mia ba'i fyalak afa isa,
na'uk myotu afa liak!
Myotu ma nabi rira kubur ra lolin buas,
ovu mya'ang vatu ra ma karatat na'a kubur avyai.
Tamata ovi lan a rira vava'at ra rmalola rna'a kubur avyai.*
30 Mia fyalak ne,
wean i bya'at na'ut i ububir-nusibira rva'at a,
na mia wol mtyorung ma rfedan nabi ra.
31 Na'uk tali bira vaivatul ra,
na fyaturu roak ne,
mia weabira ububir-nusibira ovi rfedan nabi ra.
32 Mia fyabana munuk afa sian ovi ububir-nusibira ra rotu a,
ba Ubu veka nukun mia vali.
33 Mia sian mia ovu vali ububir-nusibira ra wearira nifa isa naran aru.
Deka minovak ne,
Ubu wol nukun mia ma miti mnya'a yafwan kakiwal.
34 Eka mryenar!
Wean inyai bi veka usinir nabi ra ovu tamata ovi rira kaka'a dawan ra,
ovu vali dawan ovi rair Musa ni inukun ra ma ti rtuan mia.
Na'uk mia veka fyedan boku tali ira,
ovu byaku boku na'a aa walwalur,
boku vali myi-mya ira na'a bira rahan falurut ra.
Mlyabas boku vali tali ahu isa ma miti ahu liak vali ma fyedan ira.
35 Ba mia veka byara munuk varvara na'a tamata ovi rira vava'at ra rmalola yai,
tevek fyedan ira.
Tali lalan ana,
ububir-nusibira ra rsifedan.
Ira rfedan lan Habel i ni vava'at a nmalola.
Mia fyedan vali tamata liak ovi rira vava'at rmalola a,
ti naran i fyedan Bereka yanan a Zakharia.
Mia fyedan ia na'a Rahan Dawan Falurut a,
ovu wan i ba'i misnuri bira korban ra verin Ubu,
fruarira ra.
36 Afa i ufalak verin mia ini,
kena urun!
Mia ka'i byara munuk afa sian ovi ububir-nusibira rotu ra,
ba Ubu veka nukun mia.”
Yesus nsi'ik tamata Israel ra, na ralan lalau
37 Nata Yesus nfalak ne,
“Tamata ovi mnya'a Yerusalem!
Mia fyedan nabi ra ovu mtyev-fedan tamata ovi Ubu nsinir ira rma rtuan mia!
Ya'a umaseak dalang roak ma usdovu mia,
wean manut itai isa nkoka yanan ra na'a manin vavan a,
na'uk mifena ma otu wean inyai.
38 Eka mryenar ma lolin!
Ubu veka nti talik bira Rahan Dawan Falurut a,
ba veka vu watan.
39 Ufalak verin mia ne,
tali amar ini veka wol msyi'ik roak Ya'a,
nata ti naran i veka fyalak ne,
‘Ubu naflahar Ia i nma ovu Duila'a naran a.’ ”*