Vaivatul kamkuma na'a vata mnelat vutu a
1 Yesus nfalak verin Ni tamata ovi rorang Ia ne,
“Na'ut i veka uma ewal,
na Ubu Ni Fareta a wean vaivatul kamkuma na'a vata mnelat vutu i rtaha rira damar ra,
ma ti rsa'a brana i mane nsifa a.
2 Tali vata vutu yai,
na ilima rboda,
na ilima vali rira kaka'a dawan.
3 Vata ilima i rboda yai rtaha rira damar ra,
na'uk wol rtaha ngul fre'i.
4 Na'uk vata ilima i rbitar yai,
rtaha rira ngul fre'i na'a rira suran ra.
5 Ira rnaban brana i mane nsifa yai,
na'uk mnanat i nma a,
ba matarira ra waswosu roak ma rtuba.
6 Ti ma nafafruan tenan roak,
na rarenar fawak isa ne,
‘Byatar kikyai!
Brana i mane nsifa yai sarseri ma nma roak!
Miti murin ma msya'a ia.’
7 Ba vata avyai rbatar lahir ma rasusan rira damar ra.
8 Vata ovi rboda yai rera lablobang tali vata ovi rira kaka'a dawan yai ne,
‘Myala bira ngul kedan a verin ami,
tevek mami damar ra mane rmata roak.’
9 Na'uk vata ovi rira kaka'a dawan yai rfalak verin ira ne,
‘Ami wol amala verin mia,
beta ne mami ngul a wol naran ami,
ovu vali verin mia.
Ba miti ma fyaha ngul na'a wan i ba'i rfedi ngul na'a.’
10 Ba vata ovi rboda yai rti ma rfaha rira ngul.
Na'ut i rti ma rfaha ngul a,
na brana i mane nsifa yai nma,
ba vata ovi rira kaka'a dawan yai rorang ia rti rahan ralan ma rotu snoba,
nata falfolat a natfolat.
11 Ba vata ovi rboda yai rma ewal rahan yai,
ma rafwak ne,
‘Bapa,
mlobang ma bwadil falfolat a verin ami!’
12 Na'uk brana i mane nsifa yai nfalak ne,
‘Afa i ufalak verin mia ini,
kena urun!
Ya'a wol uka'a mia!’
13 Ba wean inyai,
na msyi'ik wabira ma lolin,
tevek mia wol mkya'a ne,
veka ewal Ya'a na'a amar ba te na'ut inba.”
Ita musti weadida tamata sansinir ovi rot-orang lalawatan afa ovi duarira nfalak a
14 “Na'ut i veka uma ewal a,
na Ubu Ni Fareta wean vali vaivatul kamkuma ini.
Tamata isa mane nti talik ni rahan a.
Ia wol nti obin,
na nasdovu ni tamata sansinir ra ma nala karya verin ira ma rasusan ni kubang ra.
15 Ia nsiduk ni kubang a verin ni tamata sansinir ra ma inovan ovu rira kaka'a a.
Ia nala kubang masa kadut ilima verin ni sansinir isa.
* Ia nala vali kubang masa kadut irua verin sansinir isa,
beti nala kubang masa kadut isa verin sansinir isa vali.
Nsiduk munuk ni kubang masa avyai,
beti nfalak verin ira ma ti rfabana kubang avyai.
Nata nti talik ira ma nobal.
16 Tamata sansinir i nala roak kubang masa kadut ilima yai nti ma nfabana lahir kubang yai,
ma utun kubang masa kadut ilima vali.
17 Tamata sansinir i nala kubang masa kadut irua yai nti vali ma nfabana kubang yai,
ma utun kubang masa kadut irua vali.
18 Na'uk tamata sansinir i nala kubang masa kadut isa yai nti ma nkear voat,
ma noving fanfonak kubang i duan a nala verin ia.
19 Ya'i mnanat roak,
ba tamata sansinir itelu avyai duarira a newal ia ma nasdovu ira,
ma nera ma rfamalik na'a i wean inba ma rfabana kubang masa ra,
boma nka'a ne,
utur ifira.
20 Ba sansinir i nfabana kubang masa kadut ilima yai nma ma ntuan duan a.
Ia nala kubang masa kadut vutu verin duan a.
Nata nfalak verin duan a ne,
‘Baba,
oa mala kubang masa kadut ilima verin ya'a.
Eka msyi'ik,
utung vali kubang masa kadut ilima,
ba utaha uma verin oa.’
21 Ba duan nfalak verin ia ne,
‘Mu karya a lolin buas ovu mot-orang afa ovi ufalak ra.
Oa mot-nala roak afa ovi ufalak ra na'a varvara ovi maraan a,
ba veka al vali varvara ovi aleman a verin oa.
Mwa ma totu snoba,
tevek inad lolin.’
22 Tamata sansinir i nfabana kubang masa kadut irua yai nma vali ma ntuan duan a.
Ia nfalak verin ia ne,
‘Baba,
oa mala kubang masa kadut irua verin ya'a.
Eka msyi'ik,
utung vali kubang masa kadut irua ba utaha uma verin oa.’
23 Ba duan nfalak verin ia ne,
‘Mu karya a lolin buas ovu mot-orang afa ovi ufalak ra.
Oa mot-nala roak afa ovi ufalak ra na'a varvara ovi maraan a,
ba veka al vali varvara ovi aleman a verin oa.
Mwa ma totu snoba,
tevek inad lolin.’
24 Nata tamata sansinir i nala kubang masa kadut isa yai nma ma ntuan vali duan a ma nfalak ne,
‘Baba,
ya'a uka'a ne oa msingarova sian.
Oa mala afamtahan na'a va'i ovi wol muvuri na'a.
Oa mnaban watan ma mala tamata liak rira karya enan ra.
25 Wean inyai bi ubobar,
beta ne otu ma mu kubang a wol nleal ma mukun ya'a,
ba uti wan isa ma ukear voat ma oving mu kubang a.
Eka msyi'ik,
mu kubang a hi ini,
ba al ewal verin oa.’
26 Na'uk duan nfalak ne,
‘Hoi,
tamata ktufan!
Oa bwosa sian.
Oa fwalak ne,
al afamtahan na'a va'i ovi wol uvuri na'a,
ovu unaban watan ma ala tamata liak rira karya enan ra?
27 Ba wean urun inyai,
na velik aba mala ning kubang yai verin tamata ovi rfabana kubang,
boma wean i ewal ya'a,
na al-ewal ning kubang a ovu ni bunga.’
28 Nata tamata yai nfalak verin ni tamata sansinir liak ra ne,
‘Myal-ewal kubang yai tali ia ma myala verin tamata i ni kubang masa kadut vutu a.’
29 Tevek tamata iki watan npake ma lolin afa ovi rna'a roak ia,
na Ya'a veka ala ma rivun ila'a matan verin ia.
Na'uk tamata iki watan wol npake ma lolin afa ovi rna'a roak ia,
* na velik ne ko'u watan,
veka ala munuk tali ia.
30 Ba byatuk vali tamata i nbosa sian yai nti murin ma na'a dedan ralan.
Na'a wan yai,
na tamata ra rvakar lalawatan ovu nifarira ra rsitutu ira tevek rfarnuang wawa'uk dawan a.”*
Na'ut i Yesus veka nukun tamata ra
31 “Wean i Ya'a,
Tamata Yanan Ya'a,
uma ovu vanang i nfitik nyadat a,
na Ning sansinir ra tali lanit ratan veka rovu vali Ya'a ma una'a wan i udoku ma ufareta,
ma ukun tamata ra munuk.
32 Bangsa ra munuk veka rasdovu ira ma rdiri wahang ralan a,
ma ukun ira.
Ya'a veka usiduk ira na'a sidovung irua,
wean tamata i ba'i nfawatak domba notu a.
Ia notu ma domba ra rna'a wan isa,
na bibi ra rna'a wan liak.
33 Ya'a veka usdovu tamata ovi rira vava'at ra rmalola na'a Ning lihir mela a.
Na'uk tamata ovi rira vava'at ra wol rmalola,
veka ala ira ma ti rna'a Ning lihir balit a.
34 Nata Ya'a Raja Ya'a ini veka ufalak verin ovi rna'a Ning lihir mela yai ne,
‘Yamang a naflahar roak mia,
ba mya ini ma mnya'a Ni Fareta ralan a.
Ubu nasusan roak Ni Fareta yai verin mia na'ut i notu lanit ivavan a.
35 Tevek na'ut i ublafar a,
na myala afamtahan roak ma uan.
Na'ut i ubroa,
na myala roak wear ma enu.
Na'ut i Ya'a wean tamata dakan,
na myala roak Ya'a ma ti una'a bira rahan.
36 Na'ut i wol Ning kadaravit a,
na myala roak ma ung eluk Ya'a.
Na'ut i nawar Ya'a,
na mlyobang roak Ya'a.
Na'ut i una'a bu'i ralan,
na mya roak ma milola Ya'a.’
37 Ba tamata ovi rira vava'at rmalola veka rfalak verin Ia ne,
‘Duila'a,
na'ut inba ma amrea ne,
mublafar ma amala afamtahan ma muan.
Te na'ut inba ma amrea ne,
mubroa ma amala wear ma menu?
38 Baba,
ami wol amka'a vali ne,
na'ut inba ma amrea Oa wean tamata dakan,
ma amala Oa ti mna'a mami rahan,
ovu na'ut inba ma amrea Oa wol mu kadaravit ma amala ma mung-meluk Oa?
39 Duila'a,
ami wol amka'a ne,
na'ut inba ma nawar Oa,
ovu na'ut inba ma mna'a bu'i ralan ma ti amalola Oa?’
40 Raja Ya'a ini veka ufalak verin ira ne,
‘Afa i ufalak verin mia ini,
kena urun!
Na'ut i myotu wean inyai verin terang a valing ovi rira kasian a dawan,
na inyai wean i myotu roak verin Ya'a.’
41 Ya'a veka ufalak vali verin ovi rna'a Ning lihir balit a ne,
‘Yamang a veka near nfasoba mia,
ba miti vatuk mia tali ini,
ma ti mnya'a yafwan kakiwal.
Wan yai Ubu nfadoku roak verin nitdawan ovu ni sansinir ra.
42 Inyai mia bira varvara a,
tevek na'ut i ublafar a,
na wol myala afamtahan ma uan.
Na'ut i ubroa,
na wol myala wear ma enu.
43 Ti ma aksa Ya'a wean tamata dakan,
na wol myala vali Ya'a ma ti una'a bira rahan.
Na'ut i wol Ning kadaravit ma ung a eluk Ya'a,
na wol myala vali kadaravit verin Ya'a.
Ti ma nawar Ya'a ovu una'a bu'i ralan,
na wol mya ma milola vali Ya'a.’
44 Ba veka rfalak ne,
‘Duila'a,
na'ut inba ma ami amka'a ne,
mublafar,
mubroa te tamata dakan Oa,
te amrea ne wol Mu kadaravit?
Na'ut inba ma amka'a ne,
nawar Oa ovu mna'a bu'i ralan ma wol amati ma amalola Oa?’
45 Ba Raja Ya'a ini veka ufalak verin ira ne,
‘Afa i ufalak verin mia ini,
kena urun!
Na'ut i mifena ma mlyobang tamata ovi rira kasian dawan avyai na'a rira susa ra,
na fyaturu roak ne,
wol mlyobang Ya'a.’
46 Ba tamata ktufan ovi rna'a Ning lihir balit a,
veka rti yafwan kakiwal,
na'uk tamata ovi rira vava'at ra rmalola veka rira vava'at kakiwal.”