Yesus nair Ni tamata vutu rahin irua ovi rorang Ia
1 Yesus nasdovu Ni tamata vutu rahin irua ovi rorang Ia,
ma nala Ni ngrebat verin ira ma raling vatuk nait sian ra tali tamata ra,
ovu rotu ma lolin tamata ra tali rira suhut afaka watan,
ovu rotu ma lolin vali tamata ovi tenarira ra rmafun.
2-4 Yesus Ni tamata vutu rahin irua ovi reluk rasul nararira:
Simon i rfanara ia ne,
Petrus;
Andreas i warin verin Simon;
* Yakobus irua warin a Yohanes,
yamarira naran Zebedeus;
Filipus;
Bartolomeus;
Tomas;
Matius i ba'i nera babahir kulu;
Yakobus i yaman naran Alfeus;
Tadeus;
Simon i ntali sidovung isa naran Zelot;
* ovu Yudas Iskariot i nfedi Yesus.
Yesus nsinir Ni rasul vutu rahin irua yai ma ti rfamalik Ubu Ni Ivar Lolin
5 Yesus nsurak Ni tamata vutu rahin irua yai,
beti nsinir ira ma rti.
Ia nfalak verin ira ne,
“Deka miti tamata ovi wol Yahudi ra,
ovu deka miti vali tamata Samaria rira ahu ra.
6 Na'uk miti watan tamata Israel ra,
tevek rafena roak ma rorang Ya'a.
Ira wearira domba ovi rban-sala roak.
7 Miti ma fyalak verin ira ne,
‘Sarseri roak ma Ubu nma ma nfareta tamata ra wean lahir Raja.’
8 Myotu ma lolin tamata ra tali rira suhut ra,
ovu fyava'at ewal tamata ovi rmata roak ra.
Myotu ma lolin ewal tamata ovi rira suhut ngabaa,
ovu myaling vatuk nait sian ra tali tamata ra.
Ya'a ala ngrebat verin mia,
na'uk wol era ma byahir,
ba mlyobang watan tamata ra,
na'uk deka myera akataka tali ira.
9 Miti ovu tenabira vu watan,
ba deka mtyaha kubang te masa te perak.
10 Na'a bira banbanan a,
deka mtyaha sadawan.
Bis watan ma mtyaha ravit,
takil te tatea,
na'uk sasan watan.
Tamata ovi rkarya ra,
inovan ma rala afa ovi rperlu tali tamata ovi rlobang nala roak ira.
11 Wean i miti ahu te kota isa,
na mdyava tamata ovi inar ma mnya'a teri rira rahan ra.
Mnya'a teri inyai veki,
ti naran i mane miti talik wan yai.
12 Ba wean i miti rahan isa ma milola ira,
na myala salam verin ira.
13 Wean i rahan duan avyai ralarira ra lolin ma mnya'a teri rira rahan ra,
na Ubu veka nala malinan a ma nturat ira.
Na'uk wean i wol rtorung ma mnya'a rira rahan ra,
na myera verin Ubu ma deka nala malinan verin ira.
14 Wean i rahan duan te ahu ra wol rtorung ma mnya'a teri rira rahan ra,
te rafena ma rarenar afa ovi fyalak ra,
na byan-talik ira.
Byan-talik ira,
beti misnabar vatuk kyavu ovi rna'a eabira ralan ra,
tevek rafena ma rarenar afa ovi fyalak ra.*
15 Afa i ufalak verin mia ini,
kena urun!
Ba na'a amar i Ubu nma ma nukun tamata ra,
na Ni inukun i veka nala verin tamata avyai nlia inukun i veka nala verin tamata ovi lan a rleal kota Sodom ovu Gomora.”
Deka byobar tamata ovi veka rwi-rwa mia
16 “Mingnanang afa ini!
Usinir mia ma miti wan ovi tamata sian ra rna'a.
Mia weabira domba ovi rva'at na'a serigala warira i rna'a,
ba fara msyi'ik wabira ma lolin wean nifa ra,
na'uk ralabira ra rmerat wean modarlaka ra.*
17 Msyi'ik wabira ma lolin,
tevek tamata ra mane rtaha ma rala mia ti verin tamata dawan ovi rfaleka inukun verin tamata ra.
Ira veka rvaval vali mia na'a Yahudi rira rahan falurut ra.
18 Ira veka rala vali mia ti verin dawan fareta ra ovu raja ra,
tevek myorang Ya'a.
Na'ut inyai,
na mia veka fyamalik Ya'a verin ira ovu vali verin tamata ovi wol Yahudi ra.
19 Ti ma rtaha mia ti verin dawan i nfaleka inukun verin tamata ra,
na ralabira deka kako'u na'a afa ovi mane fyalak ra,
te wean inba ma byalat ira.
Tevek na'ut inyai,
na Ubu veka nala vaivatul verin mia ma mingrihi verin ira.
20 Ba afa ovi fyalak ra wol rtali mia,
na'uk Yamabira Ni Roh veka nala vaivatul ra verin mia ma mingrihi.
21 Na'ut inyai,
na tamata ra veka rsifedi-sikual ira.
Ira veka rfedi a'arir-waririra ra ma tamata ra rfedan ira.
Brana ra rotu vali wean inyai,
ma veka rfedi yanarira ra,
ovu vali yanarira ra veka rangal renarir-yamarira ra ma rala ira ti verin tamata ra ma rfedan ira.
22 Tamata ra munuk veka wol inar lahir mia,
tevek myorang Ya'a.
Na'uk tamata ovi rorang Ya'a ti naran amar i rmata,
na Ubu veka nsikat ira tali rira salasilan ra,
boma rira vava'at kakiwal.
23 Ba wean i miti ahu isa ma rwi-rwa mia,
na miti ahu liak watan.
Afa i ufalak verin mia ini,
kena urun!
Mia wol fyamalik Ubu Ni vaivatul ra verin tamata Israel rira ahu ra munuk obin,
na Ya'a,
Tamata Yanan Ya'a ini,
uma ewal roak.
24 Wol tamata isa ni dawan nlia ni guru a,
ovu tamata sansinir ra wol rlia duarira ra.
25 Naran watan ma tamata isa ni kaka'a veran ni guru a,
ovu tamata sansinir isa ni dawan a veka veran watan duan a.
Ya'a wean rahan duan Ya'a,
na mia wean tamata ovi rna'a rahan yai.
Tamata ovi wol rorang Ya'a rfalak ne,
Beelzebul Ya'a,
ma uban-ulu verin nait sian ra munuk.
Wean inba ovu mia?
Ira veka rfalak sian mia nlia tali Ya'a!”*
Tbobar a'uk Ubu
26 Yesus ntafal ma nfalak ne,
“Na'uk mia deka byobar tamata ra,
tevek afa fanfonak ovi rotu ra veka rvotuk,
ovu afa ovi rfonak na'a ralarira ra veka lyawan vali.
27 Afa ovi ufalak fanfonak verin mia yai,
ti fyamalik ma lyawan verin tamata ra.
Te afa ovi ufifi roak na'a arubira ra,
ti fyamalik na'a rahan ratan ra ma tamata rivun rarenar.
28 Deka byobar tamata ovi inar ma rfedan tenabira ra,
tevek wol rira ngrebat ma rvatuk bira roh a na'a yafwan kakiwal.
Byobar a'uk Ubu,
tevek Ia Ni ngrebat ma nfedan tenabira ra ovu not-visal vali bira roh a ma mnya'a yafwan kakiwal.
29 Tamata ra rfedi subit irua ma fyawarira ko'u lalean,
na'uk wean i Yamabira Ubila'a ralan wol nfalak,
na wol subit isa vali ka'i nleka watan nsuta lanun.
30 Vut ovi rna'a ulubira ra,
na Ubu nrekan ovu nka'a munuk vali roak.
31 Ba deka byobar,
tevek Ubu nsi'ik ma lolin mia.
Mia fyawabira lia subit ra!
32 Tamata iki watan ntorung ne,
norang Ya'a na'a tamata waharira ralan ra,
na Ya'a veka utorung vali verin Yamang na'a lanit ratan ne,
tamata yai norang Ya'a.
33 Na'uk tamata iki watan wean i nalak ia ne,
wol nka'a Ya'a na'a tamata waharira ralan ra,
na Ya'a veka alak vali ia ne,
wol uka'a ia na'a Yamang wahan ralan a na'a lanit ratan.”
Wol maraan ma torang Yesus
34 “Deka minovak ne,
Ya'a uma lanit ivavan ini ma otu ma malinan.
Wahal!
Uma ma otu ma tamata ra rsingarahi.
35 Ya'a uma ma otu ma brana ra rangal yamarira ra,
ovu vata ra rangal renarira ra.
Etan ra rangal vali avarira ra.
36 Tamata ra veka rsingarahi ma dawan vali na'a rira rahan teta ra.*
37 Tamata iki watan i nlobang renan te yaman a nlia tali nlobang Ya'a,
na wol fyawan lahir ma norang Ya'a.
Tamata iki watan i nlobang yanan vata te yanan brana nlia tali nlobang Ya'a,
na wol fyawan lahir ma norang Ya'a.
38 Tamata i norang Ya'a musti ntuan susa,
te nmata,
wean i nvara ni aa walwalur a.
Ba tamata i nafena ma nvara ni aa walwalur,
na wol fyawan lahir ma norang Ya'a.
39 Tamata iki watan ka'i nfikir a'uk ni vava'at na'a lanit ivavan ini,
na ia veka wol ni vava'at kakiwal.
Na'uk tamata iki watan wol nfikir ni vava'at a,
velik ne nmata,
tevek norang Ya'a,
na ia veka ni vava'at kakiwal.
40 Tamata iki watan notu lolin mia,
na ia notu lolin roak Ya'a.
Tamata iki watan notu lolin Ya'a,
na ia notu lolin roak Ubu,
tevek Ia nsinir Ya'a.
41 Tamata iki watan notu lolin nabi isa tevek nabi mnga'un ia,
na Ubu veka nka'a ia,
wean i nka'a nabi ra.
Tamata iki watan notu lolin tamata i ni vava'at nmalola tevek tamata yai ni vava'at nmalola,
na Ubu veka nka'a vali ia,
wean i nka'a tamata i ni vava'at nmalola.
42 Tamata iki watan nala wear ngneridin gelas isa verin tamata kasian isa,
tevek tamata kasian yai norang Ya'a,
na Ubu veka naval ia na'a ni rala lolin a.”