Yesus ovu tamata Farisi ra rsiforat ira na'a amar i Yahudi ra ryari ira
1 Amar isa na'ut i Yahudi ra ryari ira,
na Yesus ovu Ni tamata ovi rorang Ia rban-etal va'i gandum ra.
Ni tamata ra rfufu gandum ni funu boku,
ma rsufak ovu limarira ra,
beti ra'an ihin ra.
2 Na'uk tamata Farisi boku rfalak ne,
“Afakinimi myangal dida agama ni inukun ra,
ma myotu afa i wol bisma totu na'a amar i tyari ita?”
3 Yesus nfalak verin ira ne,
“Mia byas roak afa ovi Raja Daud notu ra,
na'ut i ia ovu ni tamata ovi rorang ia rablafar.*
4 Ia nti befak dawan i ba'i raraning Ubu na'a.
* Ia nti ralan ma nala roti ovi rala roak ma neluk korban verin Ubu ma na'an.
Nata ntanang vali roti avyai verin ni tamata ovi rorang ia,
velik ne na'a dida agama ni inukun ra rfalak ne,
mela falurut ra watan sa'i bisma ra'an roti avyai.”
5 Yesus nfalak vali verin ira ne,
“Ya'a,
Tamata Yanan Ya'a,
ba Ning fareta a ti naran vali amar i tyari ita.”
Na'a amar i Yahudi ra ryari ira, na Yesus notu ma lolin tamata i liman mela nmata
6 Amar isa vali na'ut i Yahudi ra ryari ira,
na Yesus nti rira rahan falurut isa ma nsiair.
Na'a inyai,
na brana isa liman mela nmata.
7 Yahudi rira dawan ovi rair Musa ni inukun ra,
ovu tamata Farisi ra rsi'ik nanuang Ia,
betane notu ma lolin tamata ra na'a amar i ryari ira,
boma rmangadu Ia.
8 Na'uk Ia nka'a lahir afa ovi ranovak na'a ralarira ra,
ba nfalak verin brana i liman nmata yai ne,
“Mwa ma mdiri tamata ovi rna'a ini waharira ralan ra!”
Ba brana yai ti ndiri tamata ovi rna'a inyai waharira ralan ra.
9 Ba Yesus norat ira ne,
“Dida agama ni inukun ra rfalak ma bis totu afaka na'ut amar i tyari ita?
Totu afa ovi lolin ra,
te afa ovi sian ra?
Tlobang tamata ra ma rva'at,
te tfedan ira?”
10 Ia nfalak munuk wean inyai,
beti nsi'ik lilit ira munuk ma nfalak verin brana yai ne,
“Mlauk limam a mwa!”
Ia not-orang afa i Yesus nfalak a,
ba liman a lolin lahir.
11 Yahudi rira dawan ovi rair Musa ni inukun ra ovu tamata Farisi avyai rangrova urun i lahir,
ba rfamalik afa ini ma ranovak ne,
veka rotu afaka verin Yesus.
Yesus nfili Ni tamata vutu rahin irua, ma reluk rasul ma rfamalik Ubu Ni vaivatul ra
12 Amar isa,
na Yesus nrata vuar isa ma naflurut verin Ubu.
Ovan lolan yai,
na Ia naflurut lalawatan.
13 Ti ma lyawan roak,
na nera Ni tamata ovi rorang Ia,
beti nfili tamata vutu rahin irua tali tamata avyai ma reluk Ni rasul ra.
14 Tamata avyai nararira ra:
Simon i Yesus nfanara vali ia ne,
Petrus.
Ia ovu warin a naran Andreas.
Liak ra nararira ra:
Yakobus,
Yohanes,
Filipus ovu Bartolomeus,
15 Matius ovu Tomas,
Yakobus i yaman a verin Alfeus,
ovu Simon i rfanara ia ne Zelot,*
16 Yudas i yaman a verin Yakobus,
ovu vali Yudas Iskariot i nfedi Yesus.
Yesus nsiair ovu notu ma tamata ra lolin ewal ira
17 Yesus ovu Ni tamata ovi rorang Ia rsuta tali vuar yai ma rwelat wan manesan isa.
Tamata rivun ovi rorang Yesus rna'a vali inyai.
Tamata liak rivun ila'a rna'a vali inyai.
Boku rtali wan ovi rna'a propinsi Yudea,
ovu boku rtali kota Yerusalem.
Boku vali rtali kota Tirus ovu Sidon.
Kota irua yai rebang tahat.
18 Tamata avyai rma ma rarenar afa ovi Yesus nair ra,
ovu rera ma notu ma lolin ewal ira tali rira suhut ra.
Tamata ovi nait sian ra rleal ira rma vali,
ma Yesus naling vatuk nait sian avyai tali ira.
19 Ba tamata avyai rdava linga'an mane rkena Yesus,
tevek ngrebat i nvotuk tali tenan a notu ma lolin munuk ira tali rira suhut ra.
Tamata ovi Ubu naflahar ira ovu tamata ovi Ubu nukun ira
20 Yesus nsi'ik Ni tamata ovi rorang Ia ma nfalak ne,
“Ubu naflahar mia,
tamata ovi bira kasian a dawan,
tevek Ia wean lahir Raja ma nfareta mia,
tamata ovi myorang Ia.
21 Ubu naflahar mia,
tamata ovi fiang ini miblafar,
tevek Ia veka notu ma evubira ra rveda.
Ubu naflahar mia,
tamata ovi fiang ini byakar,
tevek Ia veka nfaloling ralabira ra.
22 Ubu naflahar mia na'ut i tamata ra wol inar lahir mia,
rfalak sian mia,
rala'ing vatuk mia ovu vali rfangra narabira ra,
tevek myorang Ya'a,
Tamata Yanan a.
23 Lalan ana,
uburir-nusirira ra rwi-rwa Ubu Ni nabi ra wean vali inyai.
Ba ti ma rotu mia wean inyai vali,
na ralabira lolin watan,
tevek Ia veka naval ma dawan mia na'a bira rala lolin a,
na'a lanit ratan.
24 Na'uk sian urun i lahir verin tamata ovi fiang ini mkya'i roak a,
tevek myotu roak inabira lolin ovu bira metan ra.
25 Sian urun i lahir verin tamata ovi fiang ini evubira ra rveda,
tevek mia veka miblafar urun.
Sian urun i lahir verin tamata ovi fiang ini myalit,
tevek mia veka ralabira lalau urun ovu byakar.
26 Sian urun i lahir verin tamata ovi fiang ini tamata ra munuk rfadawang mia,
tevek lan ana,
ububir-nusibira ra rotu roak wean inyai verin nabi siklabir ra.”
Tlobang dida tamata ovi rira sian ita
27 “Na'uk tamata ovi fiang ini mryenar Ya'a,
na ufalak verin mia ne,
mlyobang tamata ovi rira sian mia,
ovu myotu lolin a verin tamata ovi wol inar lahir mia.
28 Myera verin Ubu ma naflahar tamata ovi rear rfasoba mia.
Miflurut vali verin tamata ovi rotu sian mia.
29 Wean i tamata isa ntafitil fifim mela a,
na mala vali fifim balit a ma ntafitil,
ovu wean i tamata isa nala mu ravit blawat a,
na mala vali mu ravit a verin ia.*
30 Wean i tamata isa nera afa tali mia,
na myala verin ia,
ovu wean i tamata boku rkiwal ma rala bira metan ra,
na deka myera ewal tali ira.
31 Wean i inabira ma tamata ra rotu lolin mia,
na myotu lolin vali tamata ra.
32 Wean i mlyobang watan tamata ovi rlobang mia,
na Ubu veka wol nfadawang mia,
tevek tamata salasilan ra rlobang vali tamata ovi rlobang ira.
33 Wean i myotu lolin tamata ovi rotu lolin mia,
na Ubu veka wol nfadawang mia,
tevek tamata salasilan ra rotu lolin vali tamata ovi rotu lolin ira.
34 Wean i ka'i myal-teri bira kubang verin tamata liak,
tevek fyikir ne,
veka ral-ewal kubang yai munuk verin mia,
na Ubu veka wol nfadawang mia.
Tamata salasilan ra rotu vali wean inyai verin rira kida ra,
tevek rorang ne,
veka ral-ewal rira kubang ra.
35 Na'uk mia deka myotu wean inyai!
Mia musti mlyobang tamata ovi rira sian mia ovu myotu lolin ira.
Myal-teri bira kubang verin tamata liak,
na'uk deka fyikir ne,
veka ral-ewal verin mia.
Myotu wean inyai,
na Ubu veka naval ma dawan bira rala lolin a,
ovu vali afa ovi myotu yai nfaturu ne,
Ubu i Ni dawan nlia munuk afakataka yanan mia,
tevek Ia notu lolin tamata ovi wol rka'a ma rfalak fara weninyai,
ovu vali tamata ktufan ra.*
36 Ba fara fyaturu bira rala lolin verin tamata ra,
wean lahir Yamabira nfaturu Ni rala lolin a verin tamata ra munuk.”
Deka tfasala tamata liak, na'uk ni lolin a ka'i tahil tali dida salasilan ra
37 “Deka fyasala tamata ra,
boma Ubu deka nfaleka inukun verin mia.
Deka myukun tamata ra,
boma Ubu deka nukun mia.
Na'uk myabun tamata ovi rotu salasilan verin mia,
boma Ubu veka na'i vatuk vali bira salasilan ra.
38 Myala bira afaka watan verin tamata ra,
na Ubu veka nala vali verin mia.
Wean tamata i nala wanat kadut isa verin oa.
Ia nfak wanat na'a kadut ma nngora,
beti naya'uk ma ntafal ma nngora,
ma wanat boku rvoat.
Tevek afa i myala al myukur tamata ra,
Ubu veka nala vali al nukur mia.”
39 Yesus nfalak vali vaivatul kamkuma isa verin ira ne,
“Wean i tamata kibu isa nfabana tamata kibu liak,
na irua veka rleka rsuta bilaman ralan.
40 Wol tamata isa ni dawan nlia ni guru a,
na'uk wean i iki watan nair munuk ma nka'a roak afa ovi musti nair ra,
na ia veka wean lahir ni guru a.
41 Notu afakinimi msyi'ik aa mumun i na'a terabira isa matan a,
na'uk wol msyi'ik nala aa etal dawan i na'a matabira ra?*
42 Wean inba ma fyalak verin terabira yai ne,
‘Mwa ma aling vatuk aa mumun i na'a matam a,’
na'uk aa etal dawan a nana'a matabira obin?
Hoi,
mia fyalak afa isa,
na'uk myotu afa liak!
Eka myaling vatuk aa etal dawan yai tali matabira ra veki,
boma msyirea ma lolin,
beti myaling vatuk aa mumun i tali terabira yai matan a.”
Ita tka'a tamata ni vava'at lolin te sian tali ni vava'at amar-amar a
43 “Aa ovi lolin ra,
vuarira ra wol sian,
ovu aa ovi sian ra,
vuarira ra veka wol lolin.
44 Ita tka'a lokat aa tali vuan a.
Tamata ra wol rfufu aa ara vuan ra na'a karwamus ralan,
ovu vali wol rfufu anggur vuan ra na'a kadkadir ralan.
45 Wean vali inyai verin tamata ra.
Tamata ovi ralarira lolin veka rotu watan afa ovi lolin ra,
tevek ralarira ra rngora lahir ovu afa ovi lolin ra.
Na'uk tamata ovi raktufan ra rfamalik a'uk afa sian ra,
tevek ranovak lalawatan na'a afa avyai.
Vaivatul ovi rtali tamata sumarira ra rfaturu lahir ralarira ra.”
Aa ara ovu vuan ra (Lukas 6:44)
Tamata i not-orang afa ovi Duila'a nfalak ra, na ia wean tamata i nfadiri ni rahan na'a vatu ratan
46 “Afakinimi mifwak Ya'a ne,
‘Duila'a,
Duila'a,’
na'uk wol myot-orang afa ovi ufalak ra?
47 Ya'a ala vaivatul kamkuma ma ufamalik tamata ovi rma ma rarenar ovu rot-orang afa ovi ufalak ra.
48 Tamata avyai wearira tamata i mane nfadiri rahan isa.
Ia nkear ma lanun a blaman,
beti nfadoku ni fanderen a na'a vatu ratan.
Ti ma wear dawan a nma ma ni oar dawan nkena rahan yai,
na wol nawelu,
tevek nfadiri na'a fanderen i nangrebat urun a.
49 Na'uk tamata iki watan nrenar afa ovi ufalak ra ma wol not-orang,
na ia wean tamata i nfadiri rahan isa na'a lanun,
na'uk wol ni fanderen.
Ti ma wear dawan nma ma ni oar dawan nkena rahan yai,
na nleka ma nama'ar munuk lahir.”