Yesus notu ma lolin ewal Roma rira suldadu dawan isa ni tamata sansinir a
1 Ti ma Yesus nangrihi munuk verin tamata rivun ovi rna'a inyai,
na nti Kapernaum.
2 Na'a inyai,
na Roma rira suldadu dawan isa*,
ni tamata sansinir nawar ma dawan ia ovu sarseri mane nmata.
Ia nlobang urun ni sansinir yai.
3 Na'ut i nrenar ne Yesus nana'a inyai,
na nsinir lahir dawan Yahudi boku ma ti rtuan Yesus,
boma rera ma nma ma notu ma lolin ewal ni tamata sansinir yai.
4-5 Ba ira rma ma rtuan Yesus ma rera lablobang verin Ia,
ma rfalak ne,
“Bapa,
kena urun ma mlobang Roma rira dawan eri,
tevek ia nlobang urun dida bangsa a,
ovu vali nfadiri mami rahan falurut a.”
6 Ba irmunuk Yesus rati.
Na'ut i rfaseri roak suldadu dawan yai ni rahan a,
na nsinir ni kida ra ma ti rfalak verin Yesus ne,
“Bapa,
ya'a wol verang a ratang Oa,
ba deka fwafrea Oa ma mwa ning rahan a.*
7 Wean inyai bi wol ubrahi ma utuan Oa,
tevek wol verang a ratang Oa.
Ba fwalak watan vaivatul isa,
na ning tamata sansinir a veka lolin lahir ia.
8 Uka'a lahir ne,
afa ovi fwalak ra kena,
tevek usoak vali verin ning dawan a,
ovu suldadu ra rsoak vali verin ya'a.
Wean i ufareta suldadu isa ma ufalak ne,
‘Muti,’
na ia nti.
Wean i ufalak verin isa vali ne,
‘Mwa,’
na ia nma,
te ufalak verin ning tamata sansinir a ne,
‘Mkarya afa ini,’
na ia notu!”*
9 Yesus ntalkaka na'ut i nrenar vaivatul avyai.
Nata Ia ntamuri ma nfalak verin tamata rivun ovi rorang Ia ne,
“Mryenar ma lolin afa i ufalak ini!
Wol utuan tamata isa obin ni inorang a dawan wean tamata ini,
velik ne nana'a vali tamata Israel ra!”
10 Ti ma tamata ovi nsinir ira yai rewal ira rti suldadu dawan yai ni rahan a,
na tamata sansinir yai lolin ewal roak ia.
Yesus nfava'at ewal vata varu isa yanan a
11 Ti ma wol mnanat,
na Yesus ovu Ni tamata ovi rorang Ia rti kota isa naran Nain.
Tamata rivun rban-orang vali Ia.
12 Ti ma rfaseri roak kota yai ni falfolat ila'a ni fidu a,
na rtuan tamata ra rvara tamata matmatan isa ntali kota yai mane rti murin.
Matmatan yai vata varu isa yanan a brana ikisa lalo'i watan.
Tamata rivun tali kota yai rovu vali varu yai.
13 Ti ma Duila'a Yesus nsi'ik varu yai,
na nfarnuang lahir na'a ralan ma nfaturu Ni silobang verin ia,
ba nfalak verin ia ne,
“Deka bwakar!”
14 Nata Yesus ti ma nkena boban i matmatan ntuba na'a,
na tamata avyai rdir-teri lahir.
Ia nfalak ne,
“Baba,
ufalak lahir verin oa ne,
bwatar kikyai!”
15 Varverun i nmata yai nbatar lahir ma ndoku ovu nangrihi,
na Yesus nala ia verin renan a.
16 Tamata rivun avyai rbobar urun,
ovu rfadawang Ubu ma rfalak ne,
“Nabi dawan nma roak ma nana'a fruadida ra,”
ovu “Ubu nma roak ma nlobang Ni tamata ra!”
17 Ba Yesus Ni ivar a ti nsoru munuk ahu ovi rna'a propinsi Yudea,
ovu wan ovi rna'a ebang inyai.
Yohanes i nbaptis tamata ra nsinir ni tamata irua ma ti rtuan Yesus
18 Tamata ovi rorang Yohanes i nbaptis tamata ra rfamalik afa avyai verin ia,
na nera tamata irua tali ira.
19 Ia nsinir ira rti ma rtuan Duila'a Yesus ma rorat Ia ne,
“Bapa,
Oa ini Raja i veka mtevut mami salasilan ra,
wean i Ubu nfadoku roak na'a Ni tnorung a,
te musti amnaban tamata liak?”
20 Tamata irua yai rti ma rtuan Yesus ma rfalak verin Ia ne,
“Yohanes i nbaptis tamata ra nsinir ami ma amorat Oa ne,
Oa ini Raja i veka mtevut mami salasilan ra,
te ami musti amnaban tamata liak?”
21 Na'ut inyai vali,
na Yesus notu ma lolin ewal tamata rivun tali rira suhut ra.
Ia naling vatuk nait sian ra tali tamata ra,
ovu notu vali ma tamata ovi rkibu ra rsirea ewal.
22 Ba Yesus nfalak verin ira ne,
“Myewal mia ma fyamalik verin Yohanes na'a afa ovi mryenar,
ovu afa ovi msyi'ik ra.
Tamata ovi rkibu rsirea ewal,
tamata ovi raklukut rbana nala ewal,
tamata ovi rira suhut ngabaa lolin ewal ira,
ovu tamata ovi raktun,
rafrenar ewal.
Tamata ovi rmata roak rva'at ewal,
ovu ufamalik Ubu Ni Ivar Lolin verin tamata kasian ra.
23 Ubu naflahar tamata ovi ralarira ra wol raruan na'a rira inorang verin Ya'a.”
24 Ti ma Yohanes ni tamata ra rban-talik wan yai,
na Yesus nfamalik Yohanes verin tamata rivun ovi rna'a inyai.
Ia nfalak ne,
“Na'ut i miti wan lean vu dawan ma msyi'ik Yohanes,
na minovak aka?
Miti ma msyi'ik tavtevu ovi nait nean tia ma watan ira a?
Wahal!*
25 Inabira ma ti msyi'ik aka?
Beta ne inabira ma ti msyi'ik tamata isa i neluk kadaravit ovi lolin urun a?
Wahal,
tevek tamata ovi reluk kadaravit lolin ra,
ovu rva'at ovu rira metan rivun rleal raja rira rahan ra.
26 Inabira ma ti msyi'ik aka?
Beta ne inabira ma msyi'ik nabi isa?
Wean inyai,
na kena lahir,
ovu Yohanes ni dawan a nlia nabi ra.
27 Tevek lan ana,
Ubu nfamalik ma dawan ia na'a Ni Surat Ralan a,
ma nfalak ne,
‘Ini Ya'a Ning tamata sansinir ini,
Ya'a usinir lan ia beti Oa,
ma nasusan Mu linga'an a.’ ”*
28 Yesus nfalak vali ne,
“Mingnanang!
Tali lalan ma naran amar ini,
wol tamata isa vali ni dawan a veran lia Yohanes.
Na'uk tamata ovi rtorung ma Ubu nfareta rira vava'at ra,
na rira dawan a nlia Yohanes,
velik ne tamata ko'u ira watan.”
29 Tamata avyai munuk,
ovu tamata ovi ba'i rera babahir kulu,
rarenar afa ovi Yesus nfalak ra.
Ira rtorung ne,
Ubu kena Ia,
tevek Yohanes nbaptis roak ira.*
30 Na'uk tamata Farisi ra ovu Yahudi rira dawan ovi rair Musa ni inukun ra,
wol rtorung afa ovi Ubu ralan nfalak ma notu na'a rira vava'at ra,
tevek rafena ma Yohanes nbaptis ira.
31 Ba Yesus nfalak ewal vali ne,
“Ya'a veka ala vaivatul kamkuma aka ma ufamalik tamata ovi rva'at na'a tuvu ini?
32 Ira wearira kasiko'u ovi rdoku na'a wan i rfedi-rfaha afa na'a,
ma rafwak rira kida ra ne,
‘Amafraik flo'its verin mia,
na'uk mifena ma msyo'i-msyomar.
Amdedang dadedang ovi lalau ra,
na'uk wol byakar.’
33 Wean inyai vali verin Yohanes i nbaptis tamata ra.
Ia nma ma ntolat ma wol nafna'an ovu wol nenu anggur.
Mia mifena ia ma fyalak ne,
‘Nait sian nleal ia.’
34 Ya'a,
Tamata Yanan Ya'a,
uma ma ufna'an ovu ufnenu,
ba fyalak ne,
‘Ia nafna'an sian,
ba'i nanavut,
notu kida ovu tamata ovi ba'i rera babahir kulu ra,
ovu vali notu kida ovu tamata salasilan ra.’
35 Na'uk velik ne wean inyai,
tali afa lolin ovi Ni tamata ra munuk rotu,
na nfaturu ne,
Ubu Ni kaka'a dawan a kena.”
Vata isa nli'i ngul i voan lolin na'a Yesus ean a
36 Amar isa,
na tamata Farisi isa nasweang Yesus ma nma ma nafna'an na'a ni rahan a.
Ba Yesus nti ni rahan ma nafna'an.
37 Vata isa notu salasilan rivun na'a kota yai.
Ti ma vata yai nka'a ne,
Yesus nafna'an na'a tamata Farisi yai ni rahan a,
na ntaha botal ko'u isa i rotu tali vatu lolin isa naran pualam ma nti inyai.
Botal yai nsa'a ngul i voan a lolin urun.
38 Vata yai ti ndiri Yesus murin a ma nebang lahir Yesus ean a.
Ia nvakar ma lun ra rditi na'a Yesus ean a,
beti na'i lun ra ovu ni vut a.
Notu munuk wean inyai,
beti nvoan Yesus ean a ovu vali na'ung ngul ya'i na'a ean a.
39 Ti ma tamata Farisi i nasweang Yesus nsi'ik afa yai,
na nfalak na'a ralan a ne,
“Tamata ini wol nabi Ia,
tevek wol nka'a lahir ne,
vata i nkena Ia ini,
notu salasilan rivun.”
40 Ba Yesus nfalak verin tamata Farisi yai ne,
“Simon,
mane ufalak afa isa verin oa.”
Simon nfalak ne,
“Fwalak ta Tuan Guru.”
41 Yesus nfalak ne,
“Tamata irua rira utan na'a tamata i ba'i nal-teri kubang verin tamata ra.
Tamata isa ni utan kubang dinar ratut ilima,
na isa vali ni utan kubang dinar vutlima.*
42 Tamata irua ini wol rbahir nala rira utan a,
ba tamata i nal-teri kubang verin ira yai na'i vatuk munuk rira utan a.
Tali tamata irua yai,
na iki ni silobang a dawan lia verin tamata i nal-teri roak kubang verin ira yai?”
43 Simon nfalak ne,
“Ya'a ufikir ne,
tamata i ni utan dawan lia ni kida yai.”
Yesus nfalak ne,
“Mu fikiran a kena.”
44 Yesus nfulak wahan a ma nsi'ik vata yai,
beti nfalak verin Simon ne,
“Eka msi'ik vata ini.
Oa musweang Ya'a ma uma roak mu rahan ini,
na'uk wol mala vali wear ma uraming eang ra.
* Vata ini nvakar ma lun ra rditi na'a eang a,
beti na'i eang a ovu ni vut a.
45 Inlangin uma mu rahan a,
na wol bwoan Ya'a.
Na'uk tali inlangin a,
na vata ini nvoan lalawatan eang a.*
46 Oa wol mli'i ngul na'a ulung a,
na'uk ia nli'i ngul i voan a lolin urun a na'a eang a.
47 Ba ufalak verin oa ne,
ni silobang i dawan yai nfaturu ne,
Ubu na'i vatuk roak ni salasilan ra!
Na'uk wean i tamata isa ni salasilan kedan a watan ma Ubu na'i vatuk roak ni salasilan avyai,
na ni silobang a kedan watan vali.”*
48 Nata Yesus nfalak verin vata yai ne,
“Ya'a a'i vatuk roak mu salasilan ra.”
49 Tamata ovi rdoku ma rafna'an ovu Yesus ranovak na'a ralarira ra ne,
“Ini tamata iki ma nabrahi ma nfalak ne,
Ia na'i vatuk nala tamata rira salasilan ra?”
50 Yesus nfalak vali verin vata yai ne,
“Mu inorang verin Ya'a notu ma Ubu nsikat roak oa tali mu salasilan ra,
boma wol mwata kakiwal.
Ba mewal oa ovu malinan watan!”