Yesus nala vaivatul kamkuma ma nfamalik na'a tamata i navuri nabat ra
1 Amar isa,
na Yesus nsiair ewal vali na'a danau Galilea nelan a,
na tamata rivun ila'a rdir-lilit Ia.
Ba Yesus nti ma nrata ndoku kumal isa i nlau na'a danau,
ma nsiair na'a inyai.
2 Yesus nala vaivatul kamkuma ra al nair afa rivun verin ira.
Ba nair ira ma nfalak ne,
3 “Eka mryenar!
Amar isa,
na tamata va'i isa nti navuri nabat ra.
4 Na'ut i navuri nabat ra obin,
na boku rleka na'a linga'an ralan,
ba manut nangan ra rma ma ra'an munuk watan.
5 Nabat boku vali rleka na'a vatralan i lanun kadkedan watan.
Wol mnanat,
na nabat ra rarubu lahir,
tevek lanun a masnifit watan.
Yesus ndoku kumal ralan ma nair tamata ra (Markus 4:1)
6 Na'uk ti ma lera ndirlola,
na nabat ovi rarubu roak yai roarira ra rakla munuk ma rangaran,
tevek wol rabwa'ar ma lolin obin.
7 Nabat boku vali rleka na'a kadkadir ralan.
Kadkadir avyai rmel-yatak irubun ra,
ba wol vuarira.
8 Tali nabat avyai,
na boku vali rleka na'a lanun tinemun,
ba rarubu rmela ma lolin,
ovu vuarira;
funu boku rira vatul ra vatvutun taltelun,
boku vatvutun nanean,
boku vali ratratut sasan.”
9 Nata Yesus nfalak verin ira ne,
“Iki arun,
na eka nrenar ma lolin!”
Afakinimi Yesus nsiair ovu vaivatul kamkuma
10 Ti ma Yesus ovu Ni tamata vutu rahin irua,
ntafal vali tamata boku ovi rorang Ia,
rti talik roak tamata rivun avyai,
na rorat Yesus ne,
“Vaivatul kamkuma inlangin a,
ihin wean inba?”
11 Yesus nfalak verin ira ne,
“Ubu notu ma fyan-aran afa ovi Ia wol nfavotuk obin verin tamata ra na'a i wean inba ma nfareta tamata ra wean lahir Raja.
Na'uk verin tamata liak ra,
na air ira ovu vaivatul kamkuma ra,
12 boma:
velik ne rsi'ik afa ovi otu ra,
na'uk wol rfan-aran afa avyai.
Rarenar Ning vaivatul ra,
na'uk wol rfan-aran vali,
boma deka rahil ma rtalik tali rira salasilan ra,
ma Ubu wol na'i vatuk rira salasilan ra.”*
13 Ba Yesus nfalak verin tamata ovi rorang Ia ne,
“Mia wol mkya'a vaivatul kamkuma ini,
ba wean inba ma mkya'a munuk vaivatul kamkuma ovi veka ufamalik verin mia?
14 Tamata va'i yai navuri nabat ra,
wean ia nfamalik Ubu Ni vaivatul ra.
15 Tamata ovi rarenar Ubu Ni vaivatul ra,
wean nabat ovi rleka na'a linga'an ralan.
Na'ut i rarenar,
na nitdawan nma lahir ma nal-ewal Ubu Ni vaivatul avyai ma wol rna'a ralarira ra.
16 Tamata liak boku wean nabat ovi rleka na'a vatralan.
Tamata avyai rarenar Ubu Ni vaivatul ra ma rtorung lahir ovu ralarira lolin.
17 Na'uk ira wean irubun ovi wol rabwa'ar,
ba wol rtahang ma mnanat.
Ba ti ma rtuan susa te tamata ra rwi-rwa ira,
tevek rorang Ya'a,
na rafla talik lahir rira inorang a.
18 Tamata liak boku vali wean nabat ovi rleka na'a kadkadir ralan.
Ira rarenar Ubu Ni vaivatul ra,
19 na'uk ralarira ra raruan na'a afa rivun,
ma inar ma rira metan rivun,
ovu inar ma rira afa liak ra vali.
Ba Ubu Ni vaivatul ra wol wan roak na'a ralarira ra,
ma rira vava'at ra wol vuarira.
20 Na'uk tamata liak boku wean nabat ovi rleka na'a lanun tinemun.
Ira rarenar Ubu Ni vaivatul ra ovu rtorung ma rala na'a ralarira ra,
ba vuarira rivun,
ma boku vatvutun taltelun,
boku vatvutun nanean,
ovu vali ratratut sasan.”
Yesus nfalak ma deka tfonak Ni vaivatul ra tali tamata liak ra
21 Ba Yesus nfalak verin tamata avyai ne,
“Tamata ra wol rtutun damar ma rulang teri ovu ngusi,
te rfadoku na'a ko'i vavan a.
Na'uk ira veka rfadoku damar na'a damar wan,
te wahal?
22 Afa fanfonak ra veka lyawan,
ovu afa ovi tamata ra wol rka'a veka rvotuk.
23 Ba iki arun,
na eka nrenar ma lolin!”
24 Nata Yesus ntafal ma nfalak ewal ne,
“Fyikir ma lolin na'a afa i mryenar!
Tamata i norang afa ovi air verin ia,
na Ubu veka ntafal ma nfan-aran afa ovi ufalak ra.
25 Tamata iki watan inan ma nfan-aran Ubu Ni vaivatul ra,
na Ubu veka ntafal ni kaka'a.
Tamata iki watan wol inan ma nfan-aran Ubu Ni vaivatul ra,
velik ne nka'a kadkedan roak,
na Ubu veka nala munuk kaka'a yai tali ia.”
Yesus nala vaivatul kamkuma ma nfamalik na'a nabat i nmela narubu a
26 Yesus nfalak ewal ne,
“Ubu nfareta tamata ra wean lahir Raja veka wean ini.
Tamata isa nti ni va'i ma nava nabat ra.
27 Tamata yai ovan-amar tuba-batar watan ia.
Nabat avyai rarubu ovu rmela ma dawan ira,
na'uk ia wol nka'a ne,
afakinimi wean inyai.
28 Lanun sa'i nfaihing afamtahan ra ma vuarira.
Ba kan ra ula ira,
nata funu ra,
beti vuan ra.
29 Wean i vuarira rwavar roak,
na tamata va'i yai nti ma nafdiar,
tevek naran roak amar fadiar a.”
Vaivatul kamkuma na'a nabat i kako'u lalean a
30 Yesus norat vali ira ne,
“Ubu nfareta tamata ra wean lahir Raja,
na felan a veka wean inba?
Ufamalik vaivatul kamkuma aka al ufalyawang Ni Fareta a?
31 Na'ut i Ubu nfareta tamata ra wean lahir Raja,
na veka wean ini:
tamata isa nala sesawi ni vatul a ma nava na'a ni va'i a.
Sesawi ni vatul yai ko'u lia munuk tali afa ovi rira vatul ra munuk na'a lanit ivavan a.
32 Na'uk ti ma narubu,
na dawan lia munuk afa liak ovi rna'a va'i a.
Sanan ra dawan,
ba manut nangan ra ti rotu rira renga na'a.”
33 Yesus nair tamata ra ovu vaivatul kamkuma rivun ovi wean vaivatul kamkuma avyai,
ma inovan ovu rira kaka'a.
34 Ia nair ira ovu vaivatul kamkuma ra watan,
na'uk ti ma nana'a aling Ia ovu Ni tamata vutu rahin irua ovi rorang Ia,
na nfalyawang munuk afa avyai verin ira.
Yesus ntabu nait ovu saksakan ra ma rorang vain a
35 Nata lera nakduvul ma laflofan roak,
na Yesus nfalak verin Ni tamata ovi rorang Ia ne,
“Mya ma tati danau Galilea ni lihir a.”
36 Yesus ndoku kumal ralan obin,
na Ni tamata ovi rorang Ia raroal ma rarata kumal yai,
beti rti talik tamata rivun avyai.
Kumal liak boku rorang vali ira.
37 Nata nait fufakmetan nkena ira,
ba saksakan ra mane rulang ira,
ovu wear ndata lahir rira kumal ralan a,
ba sarseri ma rakduvul.
38 Yesus naluni bantal isa na'a kumal ni muri a,
ma ntub-lufa.
Ni tamata ra rkadu Ia ma rfalak ne,
“Tuan Guru,
Oa wol fwaduli lahir!
Ita mane takduvul roak ini!”
39 Yesus nbatar ma nfareta nait a,
ma nfalak verin saksakan ra ne,
“Ngarlina kikyai!”
Nait ovu saksakan rtalik lahir ma danau yai ngarlina ma latlatan.
40 Ba Yesus nfalak verin ira ne,
“Mia byobar aka?
Afakinimi wol myorang Ya'a?”
41 Ira rbobar urun i lahir ma rsifalak afa verin ira ne,
“Ini tamata iki mnga'un,
ma nfaret-nala nait ovu saksakan ra ma rorang Ia?”