Yesus naling vatuk nait sian tali brana isa, ba lolin roak ia
1 Yesus ovu Ni tamata ovi rorang Ia raran roak danau ni lihir a,
na'a wan i tamata Gerasa rleal.
2 Yesus nsuta tali kumal ralan a,
na brana isa nait sian nleal ia,
ntali van ovi rfadoku tamata matmatan na'a nma ma ntuan Yesus.
3 Brana yai nana'a watan van matmatan avyai,
ovu tamata ra wol rdadul nala roak ia,
velik ne rdadul ia ovu kakeak tma'an.
4 Tamata ra rdadul ma rivun roak liman a ean a ovu kakeak tma'an,
na'uk not-visal watan kakeak ra.
Wol tamata isa ntaha teri nala ia,
tevek nangrebat da'in.
5 Ovan-amar ia nbana tia ma watan na'a van avyai,
ovu nafwak lalawatan na'a vuar ra,
ovu vali nala vatu ovi ramneran ra ma al nfamngala tenan a.
Yesus ntuan brana i nait sian nleal ia (Markus 5:2)
6 Na'ut i nsi'ik Yesus tali raroa nma,
na nafla ti ntuan Ia ma nsangatur ma nraning Ia.
7-8 Yesus nfalak verin nait sian i nleal brana yai ne,
“Oa nait sian oa,
ba muti talik brana ini!”
Nait sian yai notu ma brana yai nafwak ne,
“Yesus mwa ini ma motu afaka verin ya'a?
Oa ini Ubu i Ni dawan nlia munuk afakataka Yanan Oa.
Ala Ubu naran a ma era verin Oa ne,
deka motu sian ya'a!”
9 Ba Yesus norat ia ne,
“Oa naram iki?”
Ia nfalak ne,
“Ya'a narang Legion,
tevek nait sian rivun ami.”*
10 Ba nera lalawatan verin Yesus ma deka nsinir ira ma rti talik wan yai.
11 Vavu dur dawan isa rfaseri wan yai ma rafnuak al rdava rira fana'an na'a vuar ni dadudur a.
12 Nata nait sian avyai rera lablobang verin Yesus ne,
“Fara msinir ami ma ti amna'a vavu averi.”
13 Yesus ntorung,
ba nait sian ra rti talik brana yai ma ti rna'a vavu dur yai.
Vavu avyai,
snain nlabas rivun irua,
rafla ma rti rtobur tali bili'in nelan ma rsuta danau ralan ma rakduvul ma rmata munuk.
14 Tamata ovi rfawatak vavu avyai rafla ma ti rfamalik na'a kota isa ovu ahu ovi rfaseri inyai ne,
Yesus nsinir nait sian ra ma ti rna'a vavu dur isa.
Ba tamata ra ti ma ramunin afa i Yesus beti notu a.
15 Ba rma ma rtuan Yesus,
na rarea brana i lan a,
nait sian ra rleal ia.
Nait sian ra wol rleal roak ia ma nka'a wan roak.
Ia ndoku ovu noru-neluk ni kadaravit roak,
ba rbobar.
16 Tamata ovi rarea brana i lolin roak ia yai,
ti rfamalik ne,
Yesus naling vatuk roak nait sian ra tali tamata i nait sian ra rleal ia,
ma ti rna'a vavu dur isa.
17 Ba rera lablobang verin Yesus ma nti talik warira yai.
18 Ba Yesus mane nrata kumal ralan,
na brana i lan a nait sian ra rleal ia,
nera verin Yesus ma novu vali.
19 Na'uk Yesus wol ntorung ma novu,
ma nfalak verin ia ne,
“Ni lolin a,
mewal a'uk oa muti mu ahu a,
ma fwamalik verin mu rahan teta na'a Duila'a Ni afa lolin ovi notu munuk roak verin oa,
ovu Ni silobang i nfaturu roak verin oa.”
20 Ba brana yai nti wan i naran Dekapolis* ma nfamalik na'a afa lolin ovi Yesus notu verin ia,
ma tamata ovi rarenar ra rtalkaka munuk.
Yesus notu ma lolin ewal Yairus yanan vata, ovu vata i nkena Yesus ni ravit blawat a
21 Yesus navul kumal ma netal ewal nti danau ni lihir a.
Na'a danau yai nelan a,
tamata rivun rma ma rdir-lilit Ia.
22 Tamata dawan isa,
naran Yairus.
Ia nban-ulu na'a Yahudi rira rahan falurut a.
Ia nma ma nsi'ik Yesus,
na nsangatur ma nsoak wahan a na'a Yesus wahan ralan a,
23 ma nera ovu ralan urun ne,
“Baba,
yanak vata nawar ma dawan ia,
ma sarseri ma nmata.
Fara mwa ma mlobang ia ma fwadoku limam na'a tenan a,
boma deka nmata!”
24 Ba Yesus irua Yairus rti,
na tamata rivun ila'a rorang Ia,
ba tamata avyai rsidekin ira.
25 Tali tamata rivun avyai,
na vata isa laran nvoat ma dawan da'in,
ti naran varat vutu rahin irua roak.
26 Vata yai ni vava'at wol lolin lahir,
ovu nala munuk roak ni metan ra al nbahir dokter ra,
na'uk nawar watan ia ovu ntafal ma aleman.
27 Ia nrenar roak ne,
Yesus notu ma lolin ewal tamata ra,
ba na'a tamata rivun fruarira ra,
na vata yai nahu Yesus murin nma ma nebang Ia,
ma nkena Ni ravit blawat a.
28 Ia nanovak na'a ralan a ne,
“Fara ukena watan Ni ravit blawat a,
na veka lolin ewal ya'a!”
29 Na'ut i nkena Yesus Ni ravit blawat a,
na brian munuk laran i nvoat a ntalik lahir,
ba ia nfarnuang ne,
lolin ewal ia tali ni suhut a.
30 Na'ut inyai lahir,
na Yesus a nka'a ne,
Ni ngrebat a ntali tenan nti ma notu ma tamata suhut ra lolin ewal ira.
Ba nfulak Ia na'a tamata rivun avyai fruarira ma norat ira ne,
“Iki nkena Ning ravit blawat i?”
31 Yesus Ni tamata ovi rorang Ia rfalak ne,
“Bapa ka'i msi'ik watan,
tamata rivun rdir-lilit Oa,
ba rdekin kena Oa,
na'uk morat watan obin ne,
‘Iki nkena Ya'a?’ ”
32 Na'uk Yesus nsi'ik lilit ira obin al ndava tamata i nkena Ia.
33 Vata yai nka'a roak ne lolin roak ia,
ba nbobar ma raruru ia,
ma nma ma nsangatur na'a Yesus wahan ralan a,
ma nfamalik verin Ia na'a afakataka munuk.
34 Ba Yesus nfalak verin vata yai ne,
“Titi,
morang Ya'a,
ba lolin roak oa!
Lolin roak oa,
ba mewal oa,
ovu fara Ubu nala Ni malinan verin oa.”
35 Na'ut i Yesus nangrihi obin,
na Yairus i nban-ulu na'a Yahudi rira rahan falurut yai,
ni tamata ifira rtali ni rahan rma.
Ira rfalak verin Yairus ne,
“Itrana,
yanam vata nmata roak,
ba deka fwafrea Tuan Guru.”
36 Na'uk Yesus nafena ma nrenar afa ovi rfalak ra,
ba nfalak verin Yairus ne,
“Deka bwobar,
ba morang watan Ya'a!”
37 Yesus wol ntorung ma tamata rivun avyai rban-orang Ia,
na'uk ntorung watan ma Petrus,
Yakobus irua warin a Yohanes rovu Ia.
38 Ti ma raran Yairus ni rahan,
na Yesus nsi'ik rahan ralan a vangoa-vanga,
ovu rvakar al rfaktanit ma vair dawan.
39 Yesus nti ralan ma nfalak verin ira ne,
“Afakinimi vangoa-vanga ovu byakar i?
Kasiko'u yai wol nmata,
na'uk ntub-lufa watan!”
40 Ira rmalit waweang Yesus,
ba Ia nsinir ira ma rti murin.
Ia novun kasiko'u yai renan ovu yaman a,
ntafal vali tamata itelu ovi rorang Ia ma rti wan i kasiko'u yai ntuba a.
41 Yesus ntaha kasiko'u yai liman a ma nfalak verin ia ne,
“Talita kum*.”
Faliak ini ihin a ne,
“Titi,
ufalak verin oa ma bwatar kikyai!”
42 Kasiko'u yai nva'at ewal ma nbatar lahir ma nbana.
Ia ni varat vutu rahin irua.
Tamata ovi rsi'ik afa i Yesus notu yai rtalkaka urun i lahir!
43 Na'uk Yesus nfalak teri lahir ma deka rfaivar verin iki watan na'a afa i notu a.
Ia nfalak munuk wean inyai,
na nsinir ira ma rala afamtahan ma kasiko'u yai na'an.