Yahudi rira inukun i ntali uburir-nusirira ra
1 Amar isa,
na tamata boku tali Yahudi rira sidovung isa naran Farisi ovu tamata boku vali tali Yahudi rira dawan ovi rair Musa ni inukun ra,
rtali Yerusalem rma ma rtuan Yesus.
Ira rorat ne,
2 “Afakinimi Mu tamata ovi rorang Oa rangal dida adat ovi rtali ubud-nusid ra?
Ira rafna'an,
na'uk wol raraming limarira ra obin.”
3 Yesus nfalak ne,
“Afakinimi myangal vali Musa ni inukun ra ma myorang a'uk bira adat ovi rtali ububir-nusibira ra?
4 Ubu nfalak ne,
‘Myalang renabir-yamabira ra.’
Ia nfalak vali ne,
‘Tamata iki watan nfalak sian renan a te yaman a,
na musti rfedan ia.’*
5 Na'uk mia fyalak ne,
tamata iki watan wean i nfalak verin renan te yaman a ne,
‘Mane ala afa boku verin mia ma al ulobang mia,
na'uk ala roak verin Ubu.’
6 Ba tamata yai wol nalang roak renan a ovu yaman a.
Wean inyai,
na fyaturu lahir ne,
wol fyabana roak Ubu Ni vaivatul ra,
tevek myorang a'uk bira adat ra.
7 Mia ba'i msyiklabir ma fyalak afa isa,
na'uk myotu afa liak!
Afa ovi lan ana,
nabi Yesaya ntulis roak na'a Surat Ralan a,
nfamalik lahir mia.
8 Yesaya nfalak ne,
‘Tamata ovi rfadawang Ya'a ovu rira vaivatul ra,
na'uk ralarira ra raroa tali Ya'a.
9 Ira raraning Ya'a,
na'uk wol ihin lahir,
tevek afa ovi rair ra wol rtali Ubu,
na'uk rtali watan tamata.’ ”*
Yesus nfamalik afa ovi rfangra tamata ra ma rira vava'at ra wol rmalola na'a Ubu wahan ralan
10 Yesus nera ewal tamata rivun avyai ma nfalak verin ira ne,
“Eka mryenar ma lolin boma fyan-aran.
11 Afa ovi mian ra wol rfangra mia.
Na'uk vaivatul ovi rtali sumarbira ra sa'i rfangra mia.”*
12 Ba Yesus Ni tamata ra rma ma rorat Ia ne,
“Baba,
Oa wol mka'a ne,
afa ovi fwalak avyai rotu ma tamata Farisi ra rangrova?”
13-14 Ba Yesus nfalak verin ira ne,
“Deka ralabira raruan na'a tamata avyai!
Ira wean afa ovi Yamang a na'a lanit ratan wol nfau ra,
ma veka ratvutuk watan.
Ira tamata dawan ira ma rban-ulu verin tamata ra,
na'uk ira wearira tamata ovi matarira ra rkibu.
Wean i tamata kibu isa nfabana tamata kibu liak,
na irua veka rleka rsuta bilaman ralan.”
15 Petrus nfalak verin Yesus ne,
“Baba,
fwalyawang vaivatul kamkuma yai verin ami.”
16 Yesus nfalak verin ira ne,
“Ba mia wol fyan-aran obin?
17 Wol fyan-aran obin ne,
afamtahan ra rahu tamata sumarn ma nsuta evun ralan,
beti ntimuri vatuk?
18 Na'uk vaivatul ovi rtali tamata sumarn a ma rti murin,
inyai ntali tamata ralan a,
ma sa'i rfangra ia.
19 Tevek afa ovi rtali tamata ralarira ra,
rotu ma tamata ra rfikir a'uk afa ovi sian ra.
Ira rsifedan,
rsifa roak,
na'uk rtuba ovu tamata ovi wol awarira verin ira,
rsifa tia ma watan ovu tamata ovi wol awarira verin ira,
rbori,
rsiklabir ovu rfalak sian tamata ra.
20 Afa sian avyai rfangra tamata ra,
na'uk wean i mifna'an,
na wol mryaming limabira ra,
inyai wol nfangra tamata ra.”
Vata Kanaan isa norang afa ovi Yesus nfalak a
21 Nata Yesus nban-talik wan yai ma nti naran wan i nfaseri kota Tirus ovu kota Sidon.
22 Vata Kanaan isa ntali wan yai nma ma nafwak ne,
“Duila'a,
raja Daud ubun a nusin Oa,
fara fwaturu Mu silobang verin ya'a,
tevek nait sian isa nleal yanak vata,
ovu notu ma nleka aleman roak.”*
23 Yesus wol nfalak afakataka verin vata yai,
ba Ni tamata ra rti ma rera verin Ia ne,
“Baba,
fara msinir vata ini ma nti,
tevek nban-orang ita ovu nafwak lalawatan.”
24 Yesus nfalak verin ia ne,
“Ubu nsinir Ya'a ma ulobang a'uk tamata Israel ra,
tevek ira wearira domba ovi wol rka'a roak ne,
duarira na'a inba.”
25 Na'uk vata yai nma ma nsangatur verin Ia ma nfalak ne,
“Duila'a,
fara mlobang ya'a!”
26 Ba Yesus nfalak verin ia ne,
“Wol lolin,
wean i tala kasiko'u rira afamtahan ra ma tvatuk verin yaha ra ma ra'an.”*
27 Vata yai nfalak verin Yesus ne,
“Kena ta Duila'a,
na'uk yaha ra ba'i ra'an afamtahan mumun ovi rleka na'a duarira rira meja vavan a.”
28 Ba Yesus nfalak verin ia ne,
“Titi,
mu inorang a dawan urun,
ba veka nfakena afa i ralam nfalak a.”
Brian munuk,
na vata yai yanan a lolin lahir ia.
Yesus notu ma tamata ovi rira suhut ra lolin ewal ira
29 Yesus nban-talik wan yai ma ti nban-oli danau Galilea nelan a.
Ia nrata vuar isa ma ndoku inyai.
30 Tamata rivun ila'a rma ma rtuan Ia na'a inyai.
Ira rovun tamata ovi ratlukut ra,
tamata ovi limarira te earira ra sian,
tamata ovi rkibu ra,
tamata ovi rmanu ra ovu vali tamata suhut liak ra.
Ira rfadoku tamata avyai na'a Yesus wahan ralan a,
ma notu ma lolin munuk ira.
31 Ba tamata rivun avyai rtalkaka,
tevek rsi'ik Yesus notu ma lolin ewal tamata ra.
Tamata ovi rmanu ra rangrihi nala roak,
tamata ovi limarira te earira ra sian lolin roak ira,
tamata ovi ratlukut ra rbana nala roak ovu tamata ovi rkibu ra rsirea ewal roak.
Ba rir tinemun rfadawang tamata Israel rira Ubu a.
Yesus notu ma tamata ovi rira suhut ra lolin ewal ira (Matius 15:30)
Yesus nfa'an tamata rivun ifa'at
32 Yesus nera Ni tamata ovi rorang Ia ma nfalak ne,
“Ufaturu Ning silobang verin tamata rivun ovi,
tevek rorang Ya'a amar itelu roak,
ovu wol rira afamtahan ma ra'an.
Wol mane usinir ma rewal ira ovu evurira vu,
boma deka renweringun na'a linga'an ralan.”
33 Ba Yesus Ni tamata ra rfalak verin Ia ne,
“Wol tamata na'a wan lean vu ini,
ba ki tala afamtahan tali inba ma al tfa'an tamata rivun ovi?”
34 Yesus norat ira ne,
“Bira roti ifira?”
Ira rfalak ne,
“Roti ifitu ovu ian ko'u ifira watan.”
35 Yesus nsinir tamata rivun avyai ma rdoku lanun,
36 beti nala roti ifitu yai ovu ian ra ma naflurut ovu nfalak fara weninyai verin Ubu.
Nata nvisul roti ovu ian ra ma nala verin Ni tamata ra,
ma rtanang verin tamata rivun avyai.
37 Ira munuk rafna'an ma evurira rveda roak,
beti Yesus Ni tamata ra rasdovuk teran ra na'a ahir* ifitu ma rngora.
38 Tali tamata ovi rafna'an,
na rarekan brana ra watan rivun ifa'at.
Wol rarekan vata ovu kasiko'u ra obin.
39 Yesus nsinir tamata rivun avyai ma rewal ira.
Nata Ia nrata kumal isa ma nti wan i naran Magadan.