Yahudi rira inukun i ntali uburir-nusirira ra
1 Amar isa,
na tamata boku tali Yahudi rira sidovung isa naran Farisi,
ovu boku vali tali Yahudi rira dawan ovi rair Ubu Ni inukun ra,
rtali Yerusalem rma ma rtuan Yesus.
2-4 Tamata Farisi ra ovu tamata Yahudi liak ra munuk rorang ma dawan adat ovi rtali uburir-nusirira ra.
Adat avyai rfalak ma raraming limarira ra beti rafna'an,
wean tamata isa newal ia tali wan i rfedi-rfaha afa na'a,
na nliru ia ma nmerat veki,
beti nafna'an.
Ira rorang vali inukun rivun tali uburir-nusirira ra,
wean raraming rira ketal,
kobi ovu afa ovi rala al rafva'ak ra ma rmerat.
Tamata Farisi ra ovu Yahudi rira dawan avyai rsi'ik Yesus Ni tamata boku ovi rorang Ia rafna'an,
na'uk wol rot-orang rira adat ma raraming limarira ra.
5 Ba ira mane rfasala Ni tamata ra ma rfalak ne,
“Afakinimi Mu tamata ovi rorang Oa wol rorang dida adat ovi rtali ubud-nusid ra?
Ira rafna'an,
na'uk wol raraming limarira ra.”
Yesus ovu tamata Farisi ra rsiforat ira (Markus 7:5)
6 Yesus nfalak verin ira ne,
“Mia ini wean lahir tamata ovi rfalak afa isa,
na'uk rotu afa liak!
Afa ovi lan ana,
nabi Yesaya ntulis roak na'a Surat Ralan a,
rfamalik lahir mia.
Yesaya ntulis ne,
‘Tamata ovi rfadawang Ya'a ovu rira vaivatul ra,
na'uk ralarira ra raroa tali Ya'a.
7 Ira raraning Ya'a,
na'uk wol ihin lahir,
tevek afa ovi rair ra wol rtali Ubu,
na'uk rtali tamata!’*
8 Mia wol myorang afa ovi Ubu nfareta ma myotu a,
ba inabira ma myorang a'uk adat ovi tamata ra rotu.”
9 Yesus ntafal ma nfalak vali verin ira ne,
“Mia mkya'a dalang ma mifena ma myorang afa ovi Ubu nfareta,
ma myorang a'uk bira adat ra!
10 Lalan ana,
Musa nfalak roak ne,
‘Myalang renabir-yamabira ra,’
ovu vali,
‘Tamata iki watan i nfalak sian renan te yaman a,
na musti rfedan ia.’*
11 Na'uk mia myair tamata Yahudi ra ne,
wean i tamata isa nfalak verin renan te yaman a ne,
‘Mane ala afa boku verin mia ma al ulobang mia,
na'uk ala roak verin Ubu,
ma neluk ning korban verin Ia.’
12 Mia fyalak ne,
lolin watan ma tamata yai wol nlobang renan te yaman a.
13 Ba wean inyai,
na sala ma dawan mia.
Mia wol fyabana roak Ubu Ni vaivatul ra,
tevek myorang a'uk ububir-nusibira rira adat ra.
Afa ovi wean inyai,
mia myotu ma rivun obin.”
Yesus nair ne, afa ovi rtali tamata ralan a sa'i rfangra ia
14 Nata Yesus nera ewal tamata rivun avyai ma nfalak verin ira ne,
“Eka mryenar ma lolin afa ovi ufalak ra,
boma mkya'a.
15 Afa ovi mian ra wol rfangra mia.
Na'uk afa ovi rtali ralabira ra ka'i rfangra mia.* [
16 Ba tamata iki watan tali mia inan ma nka'a Ning vaivatul ra,
na eka nrenar ma lolin!”]
17 Nata Yesus nban-talik tamata rivun avyai ma nti rahan isa ralan a,
na Ni tamata ovi rorang Ia rorat Ia na'a vaivatul kamkuma i nfamalik a.
18 Ia nfalak verin ira ne,
“Ba mia wol fyan-aran obin?
Wol mkya'a ne,
afa ovi rtali murin rti tamata evun ralan wol rot-nala ma ni vava'at wol nmalola na'a Ubu wahan ralan a.
19 Afamtahan wol nsuta tamata ralan a,
na'uk nsuta evun a,
beti ntimuri vatuk ia.”
(Yesus nfalak wean ini ma nfaturu ne,
bisma ta'an afamtahan afaka watan,
ovu afamtahan ovi ta'an avyai wol rotu ma dida salasilan.)
20 Yesus ntafal ma nfalak ne,
“Afa ovi rtali tamata ralan sa'i rfangra tamata rira vava'at ra.
21 Ba afa ovi rtali tamata ralan rotu ma tamata ra rfikir a'uk afa ovi sian ra.
Ira rsifa tia ma watan ovu tamata ovi wol awarira verin ira,
rbori,
rsifedan,
22 tamata ovi rsifa roak,
na'uk rtuba ovu tamata ovi wol awarira verin ira,
tamata ovi inar ma rtafal ila'a rira metan ra,
inar urun ma rot-visal tamata rira vava'at ra,
rsiklabir sian,
rorang rira ininan sian ra,
rbo'itea tamata liak rira metan ra,
rfalak sian tamata,
rfakaratat tenarira ra,
ovu vali rboda-rbadi.
23 Afa sian avyai munuk rtali tamata ralan ovu rotu ma ni vava'at a wol nmalola na'a Ubu wahan ralan.”
Vata isa norang Yesus, velik ne wol Yahudi ia
24 Yesus nban-talik propinsi Galilea ma nti wan i nfaseri kota Tirus.
Ia nti rahan isa ralan a,
ovu nafena ma tamata ra rka'a ne,
nleal inyai.
Na'uk wol nfonak nala tenan,
tevek tamata rivun rka'a roak.
25 Na'ut inyai,
na vata isa,
nait sian nleal yanan vata ko'u a.
Na'ut i nrenar afa ovi Yesus notu ra,
na nma lahir ma nsangatur nulu Yesus.
26 Vata ini wol tamata Yahudi ia.
Ia ntali wan isa naran Fenisia i na'a propinsi Siria.
Ia nera lablobang verin Yesus ma naling vatuk nait sian tali yanan vata yai.
27 Yesus nfalak verin ia ne,
“Wol lolin,
wean i tala kasiko'u rira afamtahan ra ma tvatuk verin yaha ra ma ra'an.”*
28 Vata yai nfalak verin Yesus ne,
“Kena ta Duila'a,
na'uk yaha ra ba'i ra'an kasiko'u rira afamtahan mumun ovi rleka na'a meja vavan.”
29 Ba Yesus nfalak verin ia ne,
“Oa mu vaivatul ovi fwalak yai lolin,
ba bisma mewal a'uk oa,
tevek nait sian nti talik roak yanam vata.”
30 Vata yai newal ia nti naran ni rahan ma nsi'ik,
na yanan ntuba ko'i ratan.
Nait sian nti talik roak ia.
Yesus notu ma lolin tamata i naktun ovu nmanu
31 Nata Yesus nti talik Tirus ma nti kota Sidon,
beti newal Ia nahu wan Dekapolis ma nti danau Galilea.*
32 Tamata ra rovun brana isa nma ma ntuan Yesus.
Brana yai nangrihi,
na'uk ni vaivatul ra wol lyawan,
ovu naktun.
Ira rera lablobang verin Ia ma nfadoku liman na'a brana yai.
33 Ba Yesus novun ia ma rfaroa ira tali tamata rivun ovi rna'a inyai,
ma na'adoru liman tanan ra rti brana yai arun ra,
beti notu beran na'a liman a ma nkena brana yai earn a.
34 Nata ntadata nrata lanit ma nanak ma dodun,
beti nfalak ne,
“Efata!”
Ihin ne:
“Natvadil lahir!”
35 Brian munuk,
na arun ra lolin lahir ma nafrenar,
ovu earn maraan vali ma nangrihi ma lyawan roak.
36 Yesus nfalak teri tamata ovi rna'a inyai ma deka rfamalik afa yai verin tamata iki watan.
Velik ne Yesus nfalak teri ira,
na'uk rfamalik lalawatan afa yai na'a inba watan.
37 Tamata ra rtalkaka lahir ma rfalak ne,
“Ya'i yo!
Ia notu munuk afa ovi ma lolin buas,
tevek notu ma tamata i naktun bisma nafrenar,
ovu notu ma tamata i nmanu bisma nangrihi.”