Yesus nair na'a i wean inba ma tlobang tamata
1 Yesus ntafal ma nfalak ne,
“Msyi'ik wabira ma lolin,
boma deka fyaturu afa lolin ovi myotu ra verin tamata ra.
Wean i wol myorang afa i ufalak verin mia ini,
na Yamad i na'a lanit ratan a veka wol naval mia na'a bira rala lolin.*
2 Ba wean i myala afa boku verin tamata kasian ra,
na deka fyamalik verin tamata ra,
wean tamata ovi rfalak afa isa,
na'uk rotu afa liak.
Deka myotu wean tamata avyai,
tevek rti rahan falurut ra ovu rdiri linga'an ralan ra,
boma tamata liak ra rsi'ik afa ovi rotu ra ma raraning ira.
Afa i ufalak verin mia ini,
kena urun!
Tamata avyai enarira na'a roak,
tevek tamata ra raraning ira,
ba Ubu wol nala akataka roak verin ira.
3 Na'uk wean i myala afa verin tamata kasian ra ovu limabira mela,
na limabira balit deka nka'a,
ba deka fyamalik afa yai verin tamata liak.
4 Myala fanfonak watan,
tevek Yamabira i nka'a munuk afa fanfonak ra veka naval mia na'a bira rala lolin.”
Wean inba ma taflurut verin Ubu
5 “Wean i miflurut,
na deka myot-orang tamata ovi rfalak afa isa,
na'uk rotu afa liak.
Tamata avyai inar ma rdiri Yahudi rira rahan falurut ra te na'a linga'an sinutun ra ma raflurut,
boma tamata ra rsi'ik ira.
Ba afa i ufalak verin mia ini kena urun!
Ira enarira ra rna'a roak,
ba Ubu wol nala akataka verin ira.
6 Na'uk wean i mane miflurut,
na miti kamar ralan ma fyolat falfolat a veki,
beti miflurut verin Yamadida i wol trea Ia.
Tevek Ia nsi'ik afa fanfonak ra munuk,
ovu Ia veka naval mia na'a bira rala lolin.
7 Ba ti ma miflurut,
na deka tia ma watan mia na'a afa ovi fyalak ra,
wean tamata ovi wol rorang Ubu.
Ira ranovak ne,
rira falurut ra blawat,
ba Ubu veka nrenar ira.
8 Deka myot-orang ira,
tevek wol myera verin Ia obin,
na Yamadida nka'a roak afa ovi ralabira rfalak ra.
9 Miflurut wean ini:
Yamamami,
Oa mdoku lanit ratan.
Ami amalang Oa,
tevek naram a nmerat urun.
10 Mwa ovu Mu Fareta a ma fwareta ami.
Fara amot-orang afa ovi ralam nfalak a
na'a lanit ivavan a,
wean lahir i na'a lanit ratan a.
11 Amera ma mala afamtahan verin ami ma naran ma ama'an amar ini.
12 Fara ma'i vatuk mami salasilan ra,
wean ami amabun roak tamata ovi rotu salasilan verin ami.
13 Deka mtorung ma tamata te nitdawan nlabir teman* ami,
ba fwaroa tali ami nitdawan ovu ni siweang.
[Tevek Oa mtaha fareta,
Oa Mua ngrebat a,
ovu vanam a nfitik nyadat ma ti wol ni wahan.
Kena urun!]
14 Wean i myabun tamata ovi rotu salasilan verin mia,
na Yamadida i na'a lanit ratan veka na'i vatuk vali bira salasilan ra.
15 Na'uk wean i mifena ma myabun tamata ovi rotu salasilan verin mia,
na Yamadida i na'a lanit ratan veka wol na'i vatuk vali bira salasilan ra.”
Mtyolat ovu ralabira urun
16 “Wean i mtyolat,
na deka myotu ma felabira ra wean tamata ovi rfalak afa isa,
na'uk rotu afa liak.
Wean i tamata avyai rtolat,
na rotu ma felarira sian ovu wol rmadua tenarira ra,
boma tamata ra rsi'ik,
na rtolat.
Afa i ufalak verin mia ini,
kena urun!
Ubu veka wol nala akataka verin ira.
17 Ba wean i mtyolat,
na msyisir bira vut ra ovu miflarut wahabira ra,
18 boma tamata ra deka rka'a ne,
mtyolat.
Yamabira i tamata ra wol rarea Ia yai sa'i nka'a ne,
mtyolat.
Ia sa'i nrea nka'a munuk afa fanfonak ovi myotu ra,
ba veka naval mia na'a bira rala lolin.”
Metan ovi wol rmamu ra
19 “Deka misdovuk bira metan ra na'a lanit ivavan ini,
tevek ngafat ovu arawan ra rot-visal ira,
ovu tamata barborin ra veka rti bira rahan ra ma rbori bira metan ra.
20 Ni lolin ana,
misdovuk bira metan ra na'a lanit ratan,
tevek ngafat ovu arawan ra wol rna'a ma rot-visal bira metan ra.
Tamata barborin ra vali wol rti bira rahan ralan ma rbori bira metan ra.
21 Tevek wean i fyadoku bira metan ra na'a wan isa,
na ralabira ra veka rna'a vali inyai.”
Lyawan na'a tenad ra
22 “Matadida ra reluk damar verin tenadida ra,
ba wean i matabira ra lolin,
na lyawan a nsoru lahir tenabira ra.
23 Na'uk wean i matabira ra lavlova,
na mnya'a dedan ralan watan.
Ba wean i lyawan i na'a tenabira ra wol lyawan roak ma dedan watan,
na veka deda fafyat lahir.*
24 Wol tamata isa bisma nkarya verin duan irua.
Ia veka wol inan lahir isa,
na'uk nlobang isa.
Te veka not-orang lalawatan afa ovi nfalak ra verin isa,
na'uk isa wahal.
Mia weabira vali inyai,
ma wol bisma myala bira vava'at ra verin Ubu,
ovu vali myala bira vava'at ra verin bira metan ra.”
Ralabira deka kako'u na'a bira vava'at ra
25 “Ba ufalak verin mia ne,
deka ralabira kako'u na'a bira vava'at ra,
ovu bira fana'an-fanenu ra.
Deka ralabira kako'u vali na'a afa ovi veka myung a myeluk ra,
tevek bira vava'at a fyawan lia bira fana'an ra te bira kadaravit ra.
26 Eka msyi'ik manut nangan ra.
Ira wol ravuri-rava nabat ra,
wol rafdiar,
ovu vali wol rasdovuk afamtahan na'a manlenan ra,
na'uk Yamabira na'a lanit ratan nala afamtahan verin ira ma ra'an.
Mia wol mkya'a ne,
fyawabira nlia manut nangan ra,
ovu Ia nlobang mia nlia manut nangan ra?
27 Wean i tamata isa ralan kako'u na'a ni vava'at a,
na ia veka wol ntafal amar isa vali na'a ni vava'at a.
28 Afakinimi ralabira kako'u na'a afa ovi myung a myeluk mia i?
Eka msyi'ik aa ovi rira fafun ra na'a va'i ra.
Ira wol rkarya te rafedu ma rotu rira kadaravit ra.
29 Mryenar ma lolin afa i ufalak ini!
Raja Salomo nka'i urun,
na'uk ni kadaravit ovi neluk ra,
wol isa vali lolin lia tali fafun avyai.
30 Ubu notu ria ovi rna'a va'i ra ma felarira lolin,
velik ne amar ini rva'at obin,
na'uk ilyan te ravrua,
na rasnuri roak ira.
Mia fyawabira nlia munuk ira!
Ia nsi'ik mia nlia tali ria avyai.
Na'uk wol myorang ne,
Ubu nlobang mia nlia ria avyai!
31 Ba ralabira deka kako'u na'a bira fana'an-fanenu ra,
te na'a kadaravit ovi veka myala ma al myung a myeluk mia.
32 Tamata ovi wol rorang Ubu rdava lalawatan afa avyai,
na'uk mia deka myotu wean inyai,
tevek Yamabira i na'a lanit ratan nka'a munuk afa ovi mdyava na'a bira vava'at ra.
33 Ba mtyorung ma Ubu nfareta mia wean lahir Raja,
ovu myot-orang afa ovi ralan nfalak ra.
Myotu wean inyai,
na Ia veka nala munuk afa ovi mdyava ra.
34 Ba ralabira ra deka kako'u na'a ilyan te ravrua,
tevek ilyan,
na ni angangal ra rna'a vali.
Dida susa rivun na'a amar ini,
ba tanovak watan amar ini.”