Dawan Yahudi ra rdava linga'an mane rfedan Yesus
1 Amar dawan i tamata Yahudi ra ba'i rotu snoba ma ra'an roti i wol rfadoku ragi na'a yai sarseri roak.
Yahudi rfanara amar yai ne,
amar Paskah.*
2 Yahudi rira dawan mela falurut ra ovu rira dawan ovi rair Musa ni inukun ra rdava linga'an mane rfedan fanfonak Yesus,
tevek rbobar tamata rivun ovi rna'a inyai.
Yudas nfedi Yesus
3 Nata nitdawan nana'a roak Yudas i rfanara vali ia ne,
Iskariot.
Ia ini ntali vali Yesus Ni tamata vutu rahin irua ovi rorang Ia.
4 Ba Yudas nati ma ntuan Yahudi rira dawan mela falurut ra ovu dawan ovi rban-ulu verin suldadu ovi rwanar Yahudi rira Rahan Dawan Falurut a,
ma irmunuk rdava linga'an,
boma nfedi Yesus verin ira.
5 Tamata avyai inar urun ovu ra'an vai isa ma ki rala kubang verin ia.
6 Yudas ntorung afa yai,
ba na'ut inyai,
na ndava amar kena mane nfedi Yesus verin ira,
na'uk rotu ma tamata rivun deka rka'a.
Yesus ovu Ni tamata ovi rorang Ia rotu rira snoba Paskah, ma rangnanang amar i uburir-nusirira ra rdir-talik Mesir
7 Ni amar kena roak ma Yahudi ra rotu snoba ma ra'an roti i wol rfadoku ragi na'a.
Na'a amar yai vali,
na tamata ra musti rfedan domba Paskah ra.
8 Ba Yesus nsinir Petrus irua Yohanes ma nfalak ne,
“Miti ula mia ma misusan afamtahan Paskah verin ita,
boma did tinemun tafna'an.”
9 Ira rorat Yesus ne,
“Bapa,
inam ma amasusan na'a inba?”
10 Yesus nfalak ne,
“Na'ut i miti kota eri ralan a,
na veka mtyuan brana isa ntaha suran i nsa'a roak wear a.
Myorang ia miti rahan i nti ralan a.
11 Myorat rahan duan yai ne,
‘Tuan Guru norat ne:
Ya'a veka ufna'an Paskah ovu Ning tamata ovi rorang Ya'a na'a inba?’
12 Rahan duan yai veka nfaturu verin mia kamar dawan i nana'a ratan a,
na'a ni rahan yai.
Ira rasusan munuk roak kamar yai,
ba mia musti misusan watan dida fana'an fanenu ra.”
13 Yesus nfalak munuk wean inyai,
beti irua rti.
Ira rti ma rtuan munuk afa avyai wean lahir i Yesus nfalak roak a.
Nata rasusan afamtahan Paskah yai.
Yesus nafna'an Paskah ovu Ni tamata ovi rorang Ia
14 Naran roak amar i Yahudi rafna'an na'a amar dawan Paskah yai,
na Yesus ndoku ma nafna'an ovu Ni rasul ra.
15 Ia nfalak verin ira ne,
“Ya'a inak urun i lahir ma ufna'an ovu mia na'a amar dawan Paskah ini,
beti utuan susa dawan.
16 Ufalak verin mia,
boma mkya'a ne,
Ya'a veka wol uan roak afamtahan Paskah ini,
ti naran i Ubu nfakena snoba ini ihin a,
na'ut i Ia neluk Raja ma nfareta lanit ivavan a.”*
17 Yesus nfalak munuk wean inyai,
beti nala kobi i nsa'a anggur a ma nfalak fara weninyai verin Ubu,
beti nfalak ne,
“Myala kobi ini ma msyikati mia al myenu,
18 tevek ufalak verin mia,
boma mkya'a ne:
Amar ini lahir,
na Ya'a veka wol enu roak anggur ini,
ti naran i Ubu Ni Fareta nma.”
19 Yesus nfalak munuk wean inyai,
na nala vali roti a ma nfalak fara weninyai verin Ubu,
beti nvisul roti yai ma nsiduk verin ira ma nfalak ne,
“Roti ini Ya'a tenang a ma ala verin mia.
Mian ma al nfangnanang mia na'a Ning matmatan a.”
20 Yesus notu munuk wean inyai,
na nala vali kobi i nsa'a anggur a ma nfalak ne,
“Anggur i na'a kobi ini nfaturu Ubu Ni tnorung ngorva'an a.
Tnorung yai nana'a larang i veka nvoat verin mia.*
21 Na'uk tamata i veka nfedi Ya'a,
fiang ini ndoku vali na'a ini ma nafna'an ovu Ya'a!
22 Ya'a,
Tamata Yanan Ya'a,
veka umata wean lahir i Ubu nfadoku roak a,
na'uk veka sian urun i lahir verin tamata i nfedi Ya'a.”
23 Ba ka'i rsiforat roak ira ne,
iki veka notu wean inyai.
Yesus Ni tamata ovi rorang Ia rsitaku ulurira na'a rira fikiran ra ma rdava ne, iki veka dawan lia munuk tali ira
24 Ba Yesus Ni tamata ovi rorang Ia rsitaku ulurira na'a rira fikiran ra ma rdava ne,
iki veka dawan lia munuk tali ira.
25 Yesus ntabu ira ma nfalak ne,
“Raja ovi rfareta na'a nuhu dawan ovi wol rka'a Ubu,
ira ka'i rfareta watan rira tamata ra ovu limarira tma'an.
Tamata dawan ra inar ma tamata liak ra rfalak ira ne,
‘Tamata ovi rlobang tamata ra.’
26 Na'uk mia deka weabira inyai.
Wean i iki inan ma dawan lia munuk tamata ra,
na ia musti nfakabava tenan a ma wean tamata ovi ko'u rahi lia munuk tamata ra.
Tamata ovi rban-ulu verin tamata ra,
musti rfakabava vali tenarira ra wean tamata sansinir ra.
27 Eka minovak ne,
iki veka dawan lia munuk?
Tamata i ndoku nafna'an,
te tamata sansinir i ntanang afamtahan?
Tamata i ndoku nafna'an yai sa'i dawan ia.
Na'uk Ya'a una'a ovu mia ma eluk tamata sansinir.
28 Mia fyatuang Ya'a lalawatan na'a Ning angangal ra munuk.
29 Ba wean lahir i Yamang a nala ngrebat verin Ya'a ma ufareta wean raja,
na Ya'a veka ala ngrebat verin mia ma fyareta vali wean Ya'a.
30 Wean inyai,
na mia veka myotu inabira lolin ovu Ya'a na'a Ning Fareta a.
Inabira lolin yai wean lahir tamata ovi inarira lolin na'ut i rdoku ma rafna'an na'a meja isa.
Mia veka mdyoku wean raja ra na'a wan vutu rahin irua ma fyareta.
Na'a wan avyai vali,
na mia veka fyaleka inukun verin Israel ni arun dawan vutu rahin irua.”
Yesus nfalak lahir ne, Simon Petrus veka nalak ia ne, wol nka'a Ia
31 Nata Yesus nfalak verin Simon Petrus ne,
“Simon,
Simon,
eka mrenar ma lolin!
Ubu ntorung roak ma nitdawan veka nlabir teman mia.
Ia veka nwi-nwa mia,
ma wean lahir gandum ovi tamata ra rtafi.
32 Na'uk uflurut roak verin oa ma fara mu inorang a na'a lalawatan Ya'a.
Wean i mahil roak ma morang Ya'a,
na fwangrebat vali teram a valim tamata inorang ra ma rira inorang a nana'a lalawatan Ya'a.”
33 Petrus nfalak ne,
“Duila'a,
ya'a utorung roak ma wean i ra'abu'i te rfedan Oa,
na ya'a veka ovu vali ma una'a bu'i ralan te umata ovu Oa!”
34 Yesus nfalak ne,
“Petrus,
ufalak verin oa ma mka'a ne,
ovan ini lahir manut wol nkukuwai obin,
na oa malak nala fatelu roak ne,
wol mka'a Ya'a.”
35 Yesus norat Ni tamata ovi rorang Ia ne,
“Na'ut i usinir mia ma ti fyamalik Ubu Ni Ivar Lolin a,
na ufalak teri roak ma deka mtyaha sadawan,
kubang ovu tatea,
na mtyuan susa aka?”
36 Ira rfalak ne,
“Wol amtuan susa isa vali.”
Ba Yesus nfalak verin ira ne,
“Na'uk fiang ini,
iki ni sadawan te kubang,
na ntaha watan.
Iki wol ni nahin blawat,
na nfedi ni ravit blawat a ma nfaha.
37 Mryenar ma lolin afa ovi ufalak ini!
Ubu veka nfakena afa ovi rtulis roak na'a Surat Ralan a ne,
‘Tamata ra veka rwi-rwa Ya'a wean tamata ovi rangal fareta a,’
tevek afa avyai fiang ini vali Ubu mane nfakena lahir na'a Ya'a.”*
38 Ira rfalak ne,
“Duila'a,
nahin blawat irua ini.”
Yesus nfalak ne,
“Naran roak.”
Yesus naflurut na'a vuar Zaitun
39 Nata Yesus nban-talik Yerusalem ma nti vuar Zaitun a,
wan i ba'i nti.
Ni tamata ovi rorang Ia rovu vali.
40 Ti ma raran roak wan yai,
na nfalak verin ira ne,
“Miflurut,
boma nitdawan deka nlabir nala mia ma myotu salasilan.”
41 Ba Yesus nbana ma nfaroa kedan Ia tali ira,
snain a meter vututelu,
beti nsangatur ma naflurut ne,
42 “Bapa,
wean i ralam nfalak,
na fara maling vatuk varvara i aleman urun ini tali Ya'a,
na'uk deka wean i ralang a nfalak a,
ba wean watan i ralam a nfalak a.” [
43 Ba Ubu Ni sansinir isa ntali lanit ratan nvotuk ovu Ubu Ni ngrebat ma nfangrebat Ia.
44 Na'uk Yesus ralan a lalau urun i lahir,
ba ntafal ma naflurut ila'a.
Ratin ra wean lara ma rditi rsuta lanun.]*
45 Naflurut munuk roak,
beti newal Ia nti Ni tamata ovi rorang Ia.
Ti ma nsi'ik ira,
na rtub-lufa munuk roak,
tevek ralarira ra lalau urun i lahir.
46 Ba nfalak verin ira ne,
“Afakinimi mtyub-lufa i?
Byatar ma miflurut,
boma nitdawan deka nlabir nala mia ma myotu salasilan.”
Yahudi ra rtaha Yesus
47 Na'ut i Yesus nangrihi obin,
na Yudas nbana ula ia verin sidovung isa i rma ma rtuan Ia.
Yudas ini ntali Yesus Ni tamata vutu rahin irua yai.
Ia ti nfaseri lahir Yesus ma nvoan Ia.
48 Na'uk Yesus nfalak verin ia ne,
“Yudas,
bwoan Ya'a ma al fwaturu ne,
fwedi Ya'a,
Tamata Yanan Ya'a ini?”
49 Ti ma Yesus Ni tamata ovi rorang Ia rsi'ik afa i tamata rivun avyai mane rotu a,
na rfalak verin Yesus ne,
“Duila'a,
amangal a'uk ira ovu mami nahin blawat ra?”
50 Tamata isa tali Yesus Ni tamata ovi rorang Ia,
nala nahin blawat ma nafat vatuk lahir Yahudi rira Mela Falurut Ila'a ni tamata sansinir isa arun mela a.
51 Na'uk Yesus nfalak ne,
“Mtalik kikyai!”
Nata Yesus nkena tamata yai arun ma notu ma lolin ewal ia.
52 Yahudi rira dawan mela falurut ra,
ovu dawan ovi rban-ulu verin suldadu ovi rwanar Yahudi rira Rahan Dawan Falurut a,
ovu vali dawan Yahudi ra rma ma rtaha Yesus.
Ba Ia nfalak verin ira ne,
“Mia mnyarin ne,
usdovu tamata ra ma amangal fareta a,
ba mya lahir ovu bira nahin blawat ra ovu navnaval ra ma mtyaha Ya'a?
53 Lokat amar,
na itmunuk tna'a Rahan Dawan Falurut a,
na wol mtyaha Ya'a.
Na'uk fiang ini bira amar ma myorang bira ininan sian ra,
tevek Ubu ntorung ma nitdawan ni amar vali ma nfabana ngarmeran ni ngrebat a.”
Petrus nalak nala fatelu ia ne wol nka'a Yesus
54 Ira rtaha roak Yesus,
beti rovun Ia rti Yahudi rira Mela Falurut Ila'a ni rahan a.
Petrus nban-orang vali tali raroa watan.
55 Na'a rahan yai ni lean a fruan a,
na tamata ra rsidovuk yafu ma rdok-lilit yafu yai.
Petrus ti ndoku vali ovu ira.
56 Vata sansinir isa nrea Petrus ndoku yafu yai nelan a,
ba nsi'ik nanuang ia ma nfalak ne,
“Tamata ini irmunuk Yesus vali!”
57 Na'uk Petrus nalak ia ma nfalak ne,
“Ya'a wol uka'a lahir tamata yai!”
58 Wol ka'i mnanat obin,
na tamata isa nsi'ik vali Petrus,
ba nfalak ne,
“Oa ini mimunuk Yesus vali!”
Na'uk Petrus nfalak ne,
“Ya'a wahal!”
59 Ka'a bi jam isa nelak,
na tamata liak isa vali nfalak ne,
“Ita tka'a roak ne,
tamata ini irmunuk Yesus,
tevek ia ntali Galilea vali!”
60 Na'uk Petrus nfalak ne,
“Wahal!
Ya'a wol uka'a ne,
oa fwalak afakinyai!”
Ia nangrihi obin,
na manut nkukuwai lahir.
61 Nata Yesus nfulak Ia ma nsi'ik Petrus,
beti Petrus nangnanang nala ewal afa i Duila'a nfalak roak verin ia ne,
“Ovan ini manut wol nkukuwai obin,
na oa malak nala fatelu roak ne,
wol mka'a Ya'a.”
62 Ba Petrus nbana nti murin ma nvakar ma na'a samsekur.
Tamata ra rangrihi ma rworuk-rwak Yesus ovu rvaval Ia
63 Tamata ovi rwanar Yesus rangrihi ma rworuk-rwak Ia,
ovu rvaval Ia.
64 Ira rkum-teri wahan a beti rorat Ia ne,
“Wean i nabi Oa,
na eka fwalak ne,
iki nvaval Oa yai?”
65 Nata rtafal ma rfama'it ila'a Ia.
Yesus ndiri Yahudi rira sidovung dawan waharira ralan ra
66 Ti ma varverak,
na dawan Yahudi ra,
ovu rira mela falurut ra,
ovu vali rira dawan ovi rair Musa ni inukun ra,
rasdovu ira na'a rira sidovung dawan a.
Tamata ovi rwanar Yesus rovun Ia nti sidovung dawan yai.*
67 Ira rorat Ia ne,
“Fwalak lahir verin ami ne,
Oa ini Raja i veka mtevut tamata ra rira salasilan ra?”
Yesus nfalak ne,
“Velik ne ufalak wean inyai verin mia,
na'uk veka wol myorang,
68 ovu velik ne orat afa tali mia,
na veka wol byalat.
69 Ba tali amar ini,
* na Ya'a,
Tamata Yanan Ya'a,
udoku Ubu i nfareta munuk afakataka Ni lihir mela a.”
70 Ira munuk rorat Yesus ne,
“Ba wean inyai,
na Oa ini Ubu Yanan a?”
Yesus nfalak ne,
“Mia ka'i fyalak roak yai.”
71 Ti nata ira rfalak ne,
“Ita wol tdava roak tamata ma rfamalik na'a afa i nfalak ini,
tevek ita ka'i trenar lahir Ni sala tali sumarn a!”