Yahudi rira dawan ra rovun Yesus nti verin Gubernur Pilatus
1 Varverak sumatan,
na Yahudi rira dawan ra rasdovu munuk ira na'a rira sidovung dawan.
Yahudi rira dawan avyai rtali dawan mela falurut ra,
dawan Yahudi ra,
Yahudi rira dawan ovi rair Musa ni inukun ra,
ovu rira dawan liak ra vali.
Ira ranovak ma ra'an vai isa na'a afa ovi mane rotu verin Yesus.
Ba rkeak Yesus,
beti rovun Ia rti verin Pilatus.*
2 Pilatus norat Ia ne,
“Yahudi rira raja verin Oa?”
Yesus nfalak ne,
“Oa ka'i fwalak roak yai.”
3 Ba Yahudi rira dawan mela falurut ra rmangadu Yesus na'a afa rivun.
4 Nata Pilatus norat ewal Yesus ne,
“Wol bwalat ira?
Eka mrenar ngrihi sian ovi rala al rmangadu Oa yai!”
5 Na'uk Yesus wol nvalat lahir,
ba Pilatus ntalkaka.
6 Lokat varat na'ut amar dawan Paskah,
na tamata ra ba'i rera verin Pilatus ma nfatalik tamata isa tali bu'i ralan.
7 Na'ut inyai,
na tamata isa naran Barabas ovu tamata ovi rangal fareta rna'a bu'i ralan.
Ira rfedan tamata na'ut i rotu vangoa-vanga.
8 Tamata rivun rasdovu ira ma ti rera verin Pilatus,
ma nfatalik tamata isa tali bu'i ralan,
wean i ba'i notu a.
9 Pilatus norat ira ne,
“Ba mtyorung ma ufatalik Yahudi rira raja ini verin mia?”
10 Pilatus nka'a roak ne,
Yahudi rira dawan mela falurut ra ralarira sian Yesus,
* ba rovun Ia verin Pilatus.
11 Na'uk Yahudi rira dawan mela falurut ra rtuar tamata rivun,
boma rera verin Pilatus ma nfatalik Barabas verin ira.
12 Nata Pilatus norat ewal ira ne,
“Ba wean inyai,
na inabira ma otu afaka verin tamata i fyalak Ia ne,
Yahudi rira Raja?”
13 Tamata rivun yai rafwak ma rfalak ne,
“Bwaku Ia na'a aa walwalur!”
14 Pilatus nfalak verin ira ne,
“Afakinimi?
Notu sala afaka?”
Na'uk rafwak ma vairira dawan ila'a ne,
“Bwaku Ia na'a aa walwalur!”
15 Pilatus inan ma nfakena watan ralarira ra,
ba nfatalik Barabas verin ira.
* Nata nsinir ma Roma rira suldadu ra rasveva Yesus veki,
beti nala Ia verin ira,
ma veka rbaku Ia na'a aa walwalur.
Roma rira suldadu ra rworuk-rwak Yesus
16 Roma rira suldadu ra rovun Yesus rti Pilatus ni rahan fareta dawan a,
beti rasdovu rira suldadu liak ra munuk.
17 Ira rala ravit blawat ungu isa ma ra'adoru na'a Ia,
ovu ranan aa anan ovi imarira ra ma na'a sabe'u ma rfadoku na'a Yesus ulun a.
18 Nata rsiklabir ma rotu ma felarira ra wean i ralang Ia ma rafwak ne,
“Yahudi rira raja verin Oa,
ba fara nam a blawat!”
19 Ira rsikati ira ma al rvaval Yesus ulun ovu takil isa,
rafnit na'a Ia,
ovu rsangatur na'a wahan ralan a ma raraning waweang Ia.
20 Ba ti ma rworuk-rwak munuk Yesus,
na raling ewal ravit blawat ungu i neluk a,
ma ra'adoru ewal Ni kadaravit ra na'a Ia.
Nata rovun Ia mane rbaku Ia na'a aa walwalur.
Roma rira suldadu ra rbaku Yesus na'a aa walwalur
21 Na'ut inyai,
na rtuan tamata isa ntali kota Kirene,
naran Simon.
Simon ini yanan verin Aleksander ovu Rufus.
Ia ntali ni kota mane nti Yerusalem,
na suldadu ra rkiwal ia ma nvara Yesus Ni aa walwalur a.
22 Ira rovun Yesus rti wan isa naran Golgota.
Vaivatul yai ihin a,
“Kalkulun Wan.”
23 Rala anggur i nsileti ovu afa isa naran mur verin Yesus ma nenu,
na'uk nafena.*
24 Ba rbaku Ia na'a aa walwalur,
nata rotu undi ma rsiduk Ni kadaravit ra.
25 Na'ut inyai jam sembilan varverak,
na rbaku Ia na'a aa walwalur.
26 Rtulis vali vaivatul ra na'a aa walwalur,
ma nfalyawang ne,
afakinimi rukun Ia.
Rtulis ne,
“Yahudi rira Raja verin Ia.”
27 Amar yai,
na rbaku vali tamata ktufan irua na'a aa walwalur.
Isa na'a Yesus Ni lihir mela a,
na isa na'a Ni lihir balit a. [
28 Ba wean inyai,
boma nfakena lahir afa ovi rtulis roak na'a Surat Ralan a ne,
“Tamata ra veka ranovak ne,
tamata ktufan Ia.”]*
Ira rbaku Yesus ovu tamata ktufan irua na'a aa walwalur ra (Markus 15:27)
29 Tamata ovi rahu inyai rarwa'ung ulurira ra ma rfalak sian Yesus.
Ira rfalak ne,
“Oa fwalak ne,
bisma ma'ar vatuk dida Rahan Dawan Falurut ovu fwadiri ewal ia na'a amar itelu!
30 Ba wean inyai,
na msuta tali aa walwalur yai,
boma deka mwata!”
31 Yahudi rira dawan mela falurut ra ovu rira dawan ovi rair Musa ni inukun ra rdiri vali wan yai ma rworuk-rwak Yesus.
Ira rfalak ne,
“Ia not-nala ma tamata liak wol rmata,
na'uk wol not-nala ma deka nmata.
32 Wean i Israel rira raja verin Ia,
ovu Ia Raja i ntevut dida salasilan ra,
na eka nsuta tali aa walwalur yai,
boma tsi'ik ovu torang Ia.”
Tamata ktufan irua i rbaku roak ira na'a aa walwalur ma rna'a Yesus Ni lihir mela ovu balit yai,
rfalak sian vali Ia.
Yesus nmata
33 Na'ut inyai lera ndirlola,
na deda fafyat nsoru munuk wan yai,
ti naran jam itelu.*
34 Ba na'ut jam tiga lersian,
na Yesus nafwak ne,
“Eloi,
Eloi lama sabaktani?”
Yesus Ni vaivatul avyai ihin a wean ini,
“O Ubu i uraning a!
O Ubu i uraning a!
Afakinimi muti talik Ya'a i?”*
35 Tamata ovi rdiri inyai rarenar afa i Yesus nfalak a,
ba rfalak ne,
“Eka tfatlina ma lolin!
Ia nera nabi Elia.”
36 Ba tamata isa ti nala spons etal isa* ma nsovu na'a anggur i nakbia.
Nata nngatan teri spons yai na'a aa etal isa ni tutul a,
ma nlauk rata verin Yesus ma nbuk,
beti nfalak ne,
“Tnaban veki!
Eka tsi'ik,
beta ne Elia nma ma nfasuka Ia tali aa walwalur yai.”
37 Nata Yesus nafwak ma vain a dawan,
na nan nakbosal lahir.
38 Na'ut inyai vali,
na maloli dawan amafal i naklo'i Yahudi rira Rahan Dawan Falurut ralan a namadir lahir na'ut irua,
tali ratan nsuta naran fun.
39 Dawan i nfareta Roma rira suldadu ra ndiri Yesus wahan ralan,
ma nsi'ik Ia,
nata ti naran nan nakbosal,
ba nfalak ne,
“Kena urun,
tamata ini Ubu Yanan a!”
40 Vata boku rsi'ik afa avyai tali raroa watan.
Vata avyai nararira Maria Magdalena,
Salome,
Maria i yanan marmuri Yakobus ovu Yoses.
41 Na'ut i Yesus nana'a propinsi Galilea,
na vata avyai rorang ovu rlobang Ia.
Vata liak rivun vali rorang Yesus rti Yerusalem,
ma rna'a vali inyai.
Yusuf i ntali ahu Arimatea nala Yesus tenan ma nfanuba Ia na'a van matmatan isa ralan a
42 Na'a amar yai,
na tamata Yahudi ra rasusan warira*,
tevek ni ilyan a,
na rira amar ma ryari ira.
Ya'i laflofan roak, na
43 tamata isa naran Yusuf ntali ahu Arimatea nma mane ntuan Pilatus.
Yusuf ini ndoku Yahudi rira sidovung dawan,
ovu tamata ra ralang ma dawan ia.
Yusuf nanaban vali ma Ubu nfareta tamata ra wean lahir Raja.
Ba Yusuf nfabrahi tenan ma ti ntuan Pilatus ma nera Yesus tenan a*.
44 Pilatus ntalkaka,
tevek nrenar ne,
Yesus nmata roak.
Ba nera dawan i nfareta Roma rira suldadu ra ma norat ia ne,
Yesus nmata roak.
45 Ti ma Pilatus nrenar Roma rira suldadu dawan yai nfalak ne,
Yesus nmata roak,
ba ntorung ma Yusuf ti nala Yesus tenan a.
Yusuf ti nfadoku Yesus tenan a na'a vatu i rtivan roak ia ma wean van (Markus 15:46)
46 Ba Yusuf nfaha maloli ngangiar isa ma ti nfasuka Yesus tenan tali aa walwalur,
ma nkuma Ia ovu maloli yai.
Nata Yusuf ti ma nfanuba Yesus tenan a na'a vatu i rtivan roak ia ma wean van,
beti nlawar vatu dawan al nulang teri van ngoran yai.
47 Maria Magdalena ovu Maria i yanan Yoses ti rsi'ik wan i rfadoku Yesus na'a.