Yahudi rira dawan ra rovun Yesus ti verin Pilatus
1 Ti ma varverak sumatan,
na Yahudi rira dawan mela falurut ra munuk ovu dawan Yahudi liak ra vali rasdovu ira ma ranovak ma ra'an vai isa mane rfedan Yesus.
2 Ba rkeak Yesus,
beti rovun Ia ti verin Pilatus,
tamata Roma i nfareta propinsi Yudea.
3 Ti ma Yudas i nfedi Yesus nsi'ik ne,
rvolan roak ma rfedan Yesus,
na ralan lalau urun na'a ni sala i notu a.
Ba nal-ewal kubang perak vututelu yai verin Yahudi rira dawan mela falurut ra ovu dawan Yahudi liak ra.
4 Ba nfalak verin ira ne,
“Ya'a sala roak ya'a,
tevek ufedi tamata i wol Ni sala ma rukun roak Ia ma nmata.”
Na'uk Yahudi rira dawan avyai rfalak ne,
“Ami wol amkamlabir afa yai.
Inyai oa mu varvara.”
5 Ba Yudas nasba vatuk kubang avyai rti Rahan Dawan Falurut ralan a.
Ia nban-talik wan yai ma ka'i ti nesa relan a ma naklo'i ma nmata.
6 Nata Yahudi rira dawan mela falurut ra rala kubang avyai ma rfalak ne,
“Ita wol bisma tfadoku ewal kubang ovi na'a vatvatat i tamata ra ba'i rfadoku rira kubang ra,
ma reluk rira persembahan verin Ubu.
Ita tala roak kubang avyai ma al rotu ma tamata laran nvoat.”*
7 Ba rasdovu ira ma ra'an vai isa ma rala kubang avyai al rfaha lanun i ba'i rala ma al rotu suran.
Ba rfaha lanun yai,
boma wean i tamata dakan ra rmata,
na roving ira na'a inyai.
8 Wean inyai bi ma naran amar ini,
na tamata ra rfanara wan yai ne,
lanun i tamata laran nvoat na'a.
9 Ba afa yai nfakena lahir afa ovi lan a nabi Yeremia ntulis ne,
“Ira rala roak kubang perak vututelu.
Ira rfadoku roak fyawan wean inyai verin tamata ovi rna'a Israel.
10 Ira rala vali kubang avyai ma al rfaha lanun i ba'i rala ma al rotu suran,
wean lahir i Duila'a nfalak roak verin ya'a.”*
Dawan Yahudi ra rovun Yesus nti verin Gubernur Pilatus
11 Na'ut i Yesus ndiri Gubernur Pilatus wahan ralan a,
na Pilatus norat Ia ne,
“Yahudi rira raja verin Oa?”
Yesus nfalak ne,
“Oa ka'i fwalak roak yai.”
12 Yahudi rira dawan mela falurut ra ovu dawan Yahudi liak ra rmangadu Yesus,
na'uk Ia wol nangrihi vaivatul isa vali.
13 Ba Pilatus norat ewal Yesus ne,
“Wol mrenar ngrihi sian ovi rala al rmangadu Oa yai!”
14 Na'uk Yesus wol nala vaivatul isa vali,
ba Pilatus ntalkaka lahir.
15 Lokat varat na'ut amar dawan Paskah,
na gubernur ba'i nfatalik tamata isa.
Yahudi ra rfili tamata yai tali bu'i ralan.*
16 Na'ut inyai,
na tamata isa nana'a bu'i ralan naran Yesus Barabas.
Tamata ra munuk rka'a roak ia,
tevek afa sian ovi notu ra.
17 Ba ti ma tamata rivun rasdovu ira,
na Pilatus norat ira ne,
“Inabira ma ufatalik iki verin mia?
Yesus Barabas te Yesus i rfanara Ia ne,
Kristus?”
18 Pilatus nka'a roak ne,
Yahudi rira dawan ra ralarira sian Yesus,
ba rovun Ia verin Pilatus.
19 Na'ut i Pilatus ndoku kadera i ba'i ndoku ma nfaleka inukun verin tamata ra,
na awan a nsinir tamata isa ma nfalak verin ia ne,
“Deka movu ma mukun tamata i wol ni sala yai,
tevek Ia bi indean a umdedar lalean na'a ning mifi a.”
20 Na'uk Yahudi rira dawan mela falurut ra ovu Yahudi rira dawan liak ra rtuar tamata rivun avyai,
boma rera verin Pilatus ma nfatalik Barabas verin ira,
ovu nsinir ma rfedan Yesus.
21 Nata Gubernur Pilatus norat ira ne,
“Ba tali tamata irua ini,
na inabira ma ufatalik iki verin mia?”
Ira rfalak ne,
“Barabas.”
22 Pilatus norat ewal ira ne,
“Ba wean inyai,
na ya'a musti otu afaka verin Yesus i rfanara Ia ne,
Kristus?”
Ira munuk rafwak ne,
“Bwaku Ia na'a aa walwalur!”
23 Pilatus nfalak verin ira ne,
“Afakinimi?
Notu sala afaka?”
Na'uk rafwak ma vairira dawan ila'a ne,
“Bwaku Ia na'a aa walwalur!”
24 Pilatus nsi'ik roak ne,
veka wol not-nala roak tamata rivun avyai,
tevek mane rotu vangoa-vanga.
Ba nala wear ma nraming liman a na'a waharira ralan ra ma nfalak ne,
“Ya'a wol ning varvara na'a tamata ini ni matmatan a.
Mia bira varvara ini.”
25 Tamata rivun avyai rafwak ne,
“Ami ovu yanamami ra ki amvara tamata ini laran a.”
26 Nata Pilatus nfatalik Barabas verin ira.
Na'uk ia nfalak verin ni suldadu ra ma rasveva Yesus veki,
beti nala Ia verin ira ma rbaku Ia na'a aa walwalur.
Roma rira suldadu ra rwi-rwa Yesus
27 Gubernur Pilatus ni suldadu ra rovun Yesus rti Pilatus ni rahan fareta dawan,
beti rasdovu rira suldadu liak ra munuk ma rdir-lilit Yesus.*
28 Nata ira raling Ni kadaravit ra,
ma rala ravit blawat ungu isa ma ra'adoru na'a Ia.*
29 Ira ranan aa anan ovi imarira ra na'a sabe'u ma rfadoku na'a Yesus ulun a.
Ira rala vali takil isa ma ntaha na'a liman mela a,
beti rsangatur na'a wahan ralan a ma rworuk-rwak Ia ma rfalak ne,
“Yahudi rira Raja verin Oa,
ba fara nam a blawat!”
30 Ira rafnit na'a Ia,
ovu rala takil i ntaha yai ma rsikati ira al rvaval ulun a.
31 Ba ti ma rworuk-rwak munuk Ia,
na raling ewal ravit blawat ungu i neluk a,
beti rung a reluk ewal Ia ovu Ni kadaravit ra.
Nata rovun Ia nti murin ma rbaku Ia na'a aa walwalur.
Suldadu ra rworuk-rwak Yesus (Matius 27:31)
Roma rira suldadu ra rbaku Ia na'a aa walwalur
32 Na'ut i mane rbana rti kota Yerusalem murin a,
na rtuan tamata isa ntali kota Kirene naran Simon.
Suldadu ra rkiwal ia ma nvara Yesus Ni aa walwalur a.
33 Nata ti raran wan isa naran Golgota.
Vaivatul yai ihin a,
“Kalkulun Wan.”
34 Tamata avyai rala anggur i rsileti ovu afa i kfera,
beti rala verin Yesus ma nenu.
Na'uk ti ma Yesus nfatemang,
na nafena ma nenu.*
35 Rbaku Yesus na'a aa walwalur,
beti rbataru ma rsiduk ni kadaravit ra.
36 Nata rdoku aa walwalur nelan a ma rwanar Ia.
37 Na'a aa walwalur ni tutul a,
na rtulis vaivatul ra na'a kba etal isa ma nfalyawang ne wean inbinimi rukun Yesus.
Vaivatul avyai ngoarira ra wean ini,
“Yahudi rira Raja verin Yesus.”
38 Amar yai,
na rbaku vali tamata ktufan irua na'a aa walwalur.
Isa na'a Yesus Ni lihir mela a,
na isa na'a Ni lihir balit a
39 Tamata ovi rahu inyai rarwa'ung ulurira ra ma rfalak sian Yesus.
40 Ira rfalak ne,
“Ya'i yo!
Oa fwalak ne,
bisma ma'ar vatuk dida Rahan Dawan Falurut a ovu fwadiri ewal na'a amar itelu.
Wean i Ubu Yanan urun Oa,
na msuta tali aa walwalur yai,
boma deka mwata.”
41 Yahudi rira dawan mela falurut ra ovu rira dawan ovi rair Musa ni inukun ra,
ovu vali rira dawan liak ra rdiri vali wan yai ma rworuk-rwak Ia.
Ira rfalak ne,
42 “Ia not-nala ma tamata liak wol rmata,
na'uk wol not-nala ma deka nmata.
Wean i Israel rira Raja verin Ia,
na nsuta tali aa walwalur yai,
boma torang Ia.
43 Ia norang Ubu ovu nfalak ne,
Ubu Yanan Ia.
Eka tsi'ik,
wean i Ubu veka nala Ia,
na nva'at te wahal?”
44 Tamata ktufan irua i rbaku roak ira na'a aa walwalur ma rna'a Yesus Ni lihir mela ovu balit yai,
rangrihi visal-vasil vali Ia wean inyai.
Yesus nmata
45 Na'ut inyai lera ndirlola,
na deda fafyat nsoru munuk wan* yai,
ti naran jam tiga lersian.
46 Ba na'ut jam tiga lersian,
na Yesus nafwak ne,
“Eli,
Eli lama sabaktani?”
Yesus Ni vaivatul avyai ihin a wean ini,
“O Ubu i uraning a,
O Ubu i uraning a!
Afakinimi muti talik Ya'a i?”
47 Tamata ovi rdiri inyai rarenar afa i Yesus nfalak a,
ba rfalak ne,
“Ia nera nabi Elia!”
48 Ba tamata isa ti nala spons etal isa ma nsovu na'a anggur i nakbia,
ma nngatan teri spons yai na'a aa etal isa ni tutul a ma nlauk rata verin Yesus ma nbuk.*
49 Na'uk tamata boku rfalak ne,
“Tnaban veki!
Eka tsi'ik,
beta ne Elia nma ma nlobang Ia ma deka nmata.”
50 Nata Yesus nafwak ewal ma vain a dawan,
na nan nakbosal lahir.
51 Na'ut inyai vali,
na maloli dawan amafal i naklo'i Yahudi rira Rahan Dawan Falurut ralan a namadir lahir na'ut irua,
tali ratan nsuta naran fun.
Ruru dawan vali,
ba vatu dawan ra rablihir munuk.
52 Van ovi rfadoku matmatan ra ratvadil,
ba tamata rivun ovi rorang urun Ubu,
na'uk rmata roak yai,
Ubu nfava'at ewal ira.
53 Tamata matmatan avyai rva'at ewal ma rti talik warira ra na'a van ra.
Ti ma Yesus nva'at ewal tali matmatan,
na ira rti Yerusalem,
kota i nmerat urun,
ma tamata rivun rsi'ik ira.
Maloli dawan amafal i naklo'i Yahudi rira Rahan Dawan Falurut ralan a namadir lahir na'ut irua (Matius 27:51)
54 Roma rira suldadu dawan isa ovu ni suldadu ovi rwanar Yesus,
rsi'ik Yesus ti naran i nan a nakbosal a,
ovu rfarnuang ruru i dawan a,
ba rbobar urun i lahir.
Ba rfalak ne,
“Kena urun,
tamata ini Ubu Yanan a!”
55 Na'a wan yai,
na vata rivun rsi'ik afa avyai tali raroa watan.
Vata avyai rorang Yesus tali Galilea,
boma rlobang Ia.
56 Tali vata avyai,
na boku nararira Maria Magdalena,
Maria i yanan verin Yakobus ovu Yusuf,
ovu vali Zebedeus awan a.
Zebedeus irua awan a yanarira verin Yohanes ovu Yakobus.
Yusuf i ntali ahu Arimatea nala Yesus tenan ma nfanuba Ia na'a van matmatan isa ralan a
57 Ya'i laflofan roak,
na tamata ka'i isa naran Yusuf,
ntali ahu Arimatea nma.
Ia norang roak Yesus.
58 Ia ti ntuan Pilatus ma nera Yesus tenan a.
Ba Pilatus nsinir ni tamata ra ma rala Yesus tenan a verin Yusuf.
59 Yusuf nala Yesus tenan a ma nkuma Ia ovu maloli* ngangiar marmerat i naran lenan.
60 Nata Yusuf nti ma nfanuba Yesus tenan a na'a vatu i rtivan roak ia ma wean van.
Van yai,
Yusuf nia ovu ngorva'an obin.
Ia nlawar vatu dawan isa ma al nulang teri van ngoran a,
beti nti talik wan yai.
61 Maria Magdalena ovu Maria isa vali rna'a inyai.
Ira rdoku van yai ngoran a.
Pilatus nsinir ni suldadu ra ma rwanar van i rfanuba Yesus tenan a na'a
62 Ni ilyan a,
na'a amar i Yahudi ra ryari ira,
* na Yahudi rira dawan mela falurut ra ovu tamata Farisi ra,
irmunuk rti ma rtuan Pilatus.
63 Ira rfalak verin Pilatus ne,
“Baba,
ami amangnanang na'ut i tamata siklabir eri nva'at obin,
na nfalak roak ne,
‘Ti ma amar itelu nelak,
na veka uva'at ewal.’
64 Ba wean inyai bi fwareta mu suldadu ra ma ti rwanar van i rfanuba Ia na'a,
ti naran amar itelu.
Tevek wean i wahal,
na Ni tamata ra veka rti ma rbori tenan a ma rfalak verin tamata rivun ne,
‘Ia nva'at ewal roak tali matmatan!’
Ba wean i afa yai nvotuk,
na rira siklabir ra veka ntafal ma dawan ila'a.”*
65 Pilatus nfalak verin dawan Yahudi avyai ne,
“Myovun suldadu ra miti ma myanar kakiwal van yai.”
66 Ba rati van yai ma rfadoku faneak na'a vatu i nteri van ngoran a,
boma wean i tamata ra rlabir van yai,
na rka'a.
Rotu munuk wean inyai,
beti rfalak ma suldadu avyai rwanar ma lolin van yai.