Kitab ini nfamalik
Yesus Ni Rasul ra ovu afa ovi rotu ra
Ubu veka nala Ni Roh verin tamata ovi rorang Yesus
1 Kida Teofilus,
na'a ning kitab i ususan lan a,
ufamalik munuk roak afa ovi Yesus notu ovu nair ra,*
2 ti naran amar i Ubu notu ma Yesus nrata lanit ratan.
Yesus wol nrata lanit ratan obin,
na Ubu Ni Roh nala ngrebat verin Ia,
ma nsurak Ni rasul ovi nfili ra.
3 Tamata ra rotu sian Ia ma rfedan Ia,
na'uk nva'at ewal.
Ia notu ma faneak rivun ovu nfavotuk ma rivun tenan a verin rasul ra,
ti naran amar vutfa'at,
boma rka'a basil ne,
Ia nva'at ewal roak.
Ia nfamalik verin ira na'a i wean inba ma Ubu nfareta tamata ra wean lahir Raja.
4 Amar isa,
na irmunuk Yesus rasdovu ira ma rafna'an,
ma nfalak ne,
“Deka miti talik Yerusalem veki,
ma mnyaban watan na'a ini,
ti naran i Ubu nfakena Ni tnorung a ma nala Ni Roh verin mia.
Ya'a ufamalik lan roak Ubu Ni Roh verin mia.
5 Yohanes nbaptis tamata ra ovu wear watan,
na'uk wol mnanat,
na Ubu veka nbaptis mia ovu Ni Roh.”*
Na'ut i Yesus nrata lanit ratan
6 Na'ut i rasul ra rasdovu ira,
na rorat Yesus ne,
“Duila'a,
fiang ini mane fwatalik ami tali Roma ni fareta ma fwadiri ewal Israel ni fareta?”
7 Yesus nfalak verin ira ne,
“Yamang sa'i nfadoku amar yai ovu Ni ngrebat a.
Mia wol bisma mkya'a.
8 Na'uk Ubu Ni Roh veka nleal mia ma nala ngrebat verin mia.
Na'ut inyai,
na veka ti fyamalik Ya'a na'a Yerusalem,
propinsi Yudea munuk ovu Samaria,
ti nsoru munuk lanit ivavan a.”
9 Yesus nfalak munuk afa yai verin ira,
na rsi'ik lahir i Ubu notu ma nrata lanit.
Ia nrata ma mutan nteri ma wol rarea roak Ia.
10 Ira rtadata rata lanit obin,
na brian munuk,
na brana irua roru kadaravit ngangiar rdir-ebang ira.
11 Irua rfalak ne,
“Tamata Galilea averi,
notu afakinimi mdyiri ini ma mtyadata mirata lanit i?
Amar isa,
na Yesus i Ubu notu ma nrata lanit ratan yai veka newal Ia,
wean i beti mryea Ia nrata lanit ratan.”
Tamata ovi rorang Yesus rasdovu lalawatan al raflurut (Kisah 1:11)
Tamata ovi rorang Yesus rfili Matias al nkati Yudas
12 Nata rasul ra rewal ira tali vuar Zaitun rti Yerusalem.
Ntali vuar ini nti Yerusalem kil isa teran.
13 Rewal ira ti raran rahan i rna'a teri na'a Yerusalem,
na rarata kamar i na'a ratan.
Tamata ovi rna'a inyai nararira:
Petrus,
Yohanes,
Yakobus,
Andreas,
Filipus,
Tomas,
Bartolomeus,
Matius,
Yakobus i yaman Alfeus,
Simon i ntali sidovung Zelot ovu Yudas i yaman a naran vali Yakobus.*
14 Rir tinemun ralarira isa ma rasdovu ira lalawatan al raflurut.
Irmunuk vata boku ovu Yesus renan ovu vali Yesus warin ra.
15 Na'ut inyai,
na Petrus ti ndiri tamata ovi rorang Yesus fruarira ra.
Na'a wan yai,
na tamata ka'a bi ratut isa vutrua.
16 Ia nfalak ne,
“Terang a valing averi,
Ubu nfakena roak afa ovi Raja Daud ntulis na'a Surat Ralan.
Lalan ana,
Ubu Ni Roh nangrihi ovu Daud ma nfamalik Yudas i nban-ulu verin tamata ovi rtaha Yesus.
17 Yudas ini lan a itmunuk vali,
tevek Yesus nfili ia ma neluk rasul.”
18 (Yudas nala kubang i Yahudi ra rala verin ia tevek nfedi Yesus,
ma al nfaha lanun.
Na'a lanun yai,
na nleka fangofak ia,
ma nmata.
Evun a nakfefar lahir ovu tnean ra rma murin.
19 Tamata ovi rna'a Yerusalem ra munuk rka'a afa ini,
ba rfanara lanun yai na'a rira vai ne,
“Hakal-Dama.”
Ihin a ne,
lanun i tamata laran a nvoat na'a.)
20 Petrus ntafal ma nfalak ne,
“Raja Daud ntulis na'a kitab Mazmur ne,
*
‘Ni lolin ana,
ni rahan a vu watan ma deka tamata isa ti nleal.’
Daud ntulis vali ne,
‘Ni lolin ana, tamata liak nkati ia na'a ni van a.’
21 Ba did tinemun,
ita musti tfili brana isa ma nkati Yudas.
Tamata yai norang lalawatan ita na'ut i Duila'a Yesus nva'at obin,
22 ntali amar ovi Yohanes nbaptis* tamata ra,
ti naran amar i Ubu notu ma Yesus nti talik ita ma nrata lanit ratan.
Tamata i veka tfili ia yai musti nkarya ovu ita ma nfamalik ne,
Yesus nva'at ewal roak.”
23 Nata rir tinemun rfaturu tamata irua.
Isa naran Yusuf i boku rfanara ia ne Barsabas,
ovu vali boku rfanara ia ne Yustus,
ovu tamata isa vali naran Matias.
24 Ira raflurut ma rfalak ne,
“Duila'a Yesus,
Oa mka'a munuk tamata ralarira ra.
Ba fara fwaturu verin mam tinemun na'a tamata irua ini ne,
ralam nfalak iki,
25 boma neluk rasul ma nkati Yudas i nti talik roak ni karya i mala verin ia,
ba nti wan i inovan ovu afa i notu.”*
26 Nata rotu undi na'a irua nararira ra,
na Matias naran nvotuk,
ba nti ma ntafal rasul vutu rahin isa yai.