Ubu Ni Roh nma na'ut i amar dawan Pentakosta
1 Ti naran amar dawan Pentakosta*,
na tamata ovi rorang Yesus rasdovu munuk ira na'a wan isa.
2 Brian munuk,
na rarenar afa isa ngoan wean nait dawan ila'a tali lanit nsuta ma nsoru munuk lahir na'a rahan i rdoku a.
3 Nata rarea afa ovi wean yafongan ra ma felarira ra wean tamata earn.
Yafongan ra rsialing ira ma ti rturat tamata ra munuk.
4 Ubu Ni Roh a ti ma nsoru lahir ralarira ra,
ba betfasa rangrihi ovu vai ovi wol rka'a ra,
tevek Ubu Ni Roh a notu ma rangrihi.
Yafongan ra rsialing ira ma ti rturat tamata ovi rorang Yesus (Kisah 2:3)
5 Na'ut inyai,
na Yahudi ovi rot-orang afa ovi Ubu ralan nfalak ra rtali negara munuk na'a lanit ivavan a rna'a Yerusalem.
6 Na'ut i rarenar afa ngoan dawan i wean a nait yai,
na tamata rivun rasdovu ira.
Yahudi avyai rtalkaka,
tevek rarenar tamata ovi rorang Yesus rala rira vai ra al rangrihi.
7 Ira rtalkaka lahir ma rfalak ne,
“Ya'i yo,
ita tka'a roak ne,
tamata ovi rangrihi ini rtali munuk Galilea!
8 Wean inba ma ita trenar ira rala dida vai ra al rangrihi?
9 Boku tatali Partia,
* Media,
Elam,
Mesopotamia,
Yudea,
Kapadokia,
Pontus,
Asia,
10 Frigia,
Pamfilia,
Mesir ovu wan ovi rna'a Libia ma rfaseri kota Kirene.
Boku vali tatali kota Roma.
11 Ita boku tamata Yahudi ovu boku vali wol Yahudi ira,
na'uk rorang roak dida agama.
Boku vali tatali Kreta* ovu Arab,
na'uk trenar ira rala dida vai ra ma rfamalik afa dawan ovi Ubu notu ra!”
12 Rir tinemun rtalkaka ovu wol rka'a ma raroal te rara,
ba rsiorat ira ne,
“Afa ini ihin aka?”
13 Na'uk tamata boku rangrihi lablabir ira ma rfalak ne,
“Tamata avyai renu anggur* ma ranavut watan!”
Petrus nfamalik Ubu Ni vaivatul ra verin tamata rivun
14 Ba Petrus ndiri ovu rasul vutu rahin isa yai ma nangrihi verin tamata rivun avyai ovu vain dawan ma nfalak ne,
“Terang a valing Yahudi averi ovu tamata ovi mnya'a Yerusalem!
Eka mryenar ma lolin afa ovi veka ufalak verin mia.
15 Mia mnyarin ne,
tamata ovi ranavut.
Wahal,
tevek lera ndata roak,
na'uk wol ka'i ngnea obin!
16 Na'uk afa ovi beti mryea yai,
Ubu nfalak lan roak verin nabi Yoel ma ntulis ne,
17 Ubu nfalak ne,
‘Amar ra mane rlia roak,
ba Ya'a veka ala Ning Roh verin tamata ra munuk.
Ba yanabira vata ovu brana ra veka rarenar lahir tali Ya'a ma ti rfamalik Ning vaivatul ra,
ovu bira varverun ra veka wean i ramifi na'uk wol rtub-lufa,
ovu itrana ra veka ramifi lahir.
18 Na'a amar avyai,
na veka ala lahir Ning Roh verin Ning sansinir vata ra ovu brana ra,
boma ira ki rfamalik afa ovi rarenar lahir tali Ya'a.
19 Ya'a veka otu mujizat ra na'a lanit
ovu faneak ovi tamata ra wol rot-nala na'a lanit ivavan a;
veka lara,
yafu,
ovu yafuman nafkoval.
20 Lera veka wol vanan lahir,
ovu vulan veka navuli ma wean lara,
beti Duila'a Ni amar dawan nma.
Na'a amar yai,
na Ia veka nma ma nfavotuk Ni ngrebat a.*
21 Tamata ovi rera lablobang verin Duila'a,
na Ia veka nsikat ira tali rira salasilan ra,
ma rira vava'at kakiwal.’*
22 Terang a valing Israel averi,
eka mryenar afa ovi ufalak ini!
Yesus i ntali ahu Nazaret yai,
Ubu nsinir roak Ia ma nma verin mia.
Ubu nala ngrebat verin Ia ma notu mujizat ra ovu faneak ovi tamata ra wol rot-nala,
ovu vali nfaturu Ni ngrebat a ma tamata ra rtalkaka.
Bir tinemun mkya'a roak afa ovi notu ra,
tevek msyi'ik munuk roak.
23 Ubu ralan nfalak roak ma nala Yesus verin mia.
Ia nka'a roak afa ovi tamata ra mane rotu verin Yesus.
Ba mia ovu tamata ovi wol rorang Ubu byaku Ia na'a aa walwalur ma fyadiri Ia ma fyedan Ia.
24 Yesus ntuan wawa'uk i dawan urun,
beti nmata.
Na'uk Ubu nfava'at ewal Ia tali matmatan,
tevek matmatan a wol bisma ntahang teri Ia.
25 Raja Daud nfamalik lan roak Yesus ne,
*
‘Ya'a usi'ik lalawatan Duila'a nban-ulu verin ya'a.
Ia ndiri ning lihir mela,
ba tamata ra wol rweang nala ya'a.
26 Wean inyai,
bi ralang lolin urun ma uraning Oa.
Uka'a basil ne,
velik ne umata,
na'uk veka ning vava'at kakiwal.
27 Velik ne umata,
na'uk wol mtalik Ya'a ma umata watan.
Wol mtorung ma Mu Sansinir i ralan nmerat urun,
tenan a nakvisal.
28 Oa fwaturu roak linga'an verin Ya'a ma veka ning vava'at kakiwal.
Oa veka motu ma ralang lolin urun,
tevek movun Ya'a.’ ”*
29 Petrus ntafal ma nfalak ne,
“Terang a valing averi,
ya'a wol ufonak ralang verin mia ma ufamalik ubud-nusid i Raja Daud.
Ia nmata roak,
ma wan i roving ia tali lalan ma naran amar ini nana'a obin.
30 Daud nabi ia,
ba nka'a roak ne,
Ubu nala tnorung verin ia ovu nafwaba verin ia ne,
tali Daud ubun nusin ra,
na veka nsikat tamata isa ma neluk Raja i ntevut dida salasilan ra,
ma ndoku wan i Daud ndoku ma nfareta.
31 Ubu notu ma Daud nka'a lan afa i Ubu veka notu a,
ba Daud nfalak ne,
Ubu veka nfava'at ewal Raja i ntevut dida salasilan ra tali matmatan.
Ubu wol ntalik Ia ma nmata watan,
ba tenan wol nakvisal.
32 Ubu nfava'at ewal Yesus tali matmatan,
ma mam tinemun amsi'ik ovu matamami ra ne,
Ia nva'at.
33 Ubu nalang ma dawan Yesus,
ba nsikat Ia ma ndoku Ni lihir mela na'a lanit ratan.
Ubu nfakena Ni tnorung ma nala roak Ni Roh verin Yesus.
Nata Yesus nala Ubu Ni Roh ma nsoru ralamami ra,
ma amar ini msyi'ik ovu mryenar afa ovi Ni Roh notu a.
34 Daud tenan wol nrata lanit ratan,
na'uk nfamalik ne,
‘Ubu nfalak verin ning Duila'a ne,
“Mdoku Ning lihir mela,
35 ti naran i otu ma tamata ovi rira sian Oa rsoak nulu Oa.” ’*
36 Ba Israel averi,
wean inyai,
na bir tinemun musti mkya'a ne,
Yesus i byaku Ia na'a aa walwalur ma fyadiri Ia yai,
Ubu notu ma neluk Duila'a verin mia,
ovu neluk Raja i ntevut dida salasilan ra.”
37 Ti ma rarenar afa avyai,
na ralarira lalau urun,
ba rorat vali Petrus ovu rasul liak ra ne,
“Kida averi,
ki amotu aka?”
38 Petrus nfalak verin ira ne,
“Mia munuk musti myahil ma mtyalik tali bira salasilan ra,
ovu mtyorung ma ambaptis mia na'a Yesus Kristus naran a ovu Ni ngrebat,
boma Ubu veka na'i vatuk bira salasilan ra.
Nata Ubu veka nala Ni Roh verin mia.
39 Ubila'a i traning a nala tnorung ini verin tamata ovi nfili ra,
ba nala verin mia ovu yanabira ovu ububira ra,
ovu vali verin tamata ovi raroa tali ini.”
40 Petrus nangrihi verin ira wean inyai,
ovu nala vali vaivatul rivun ma nsurak ovu nfangnanang ira ne,
“Deka myorang tamata ktufan ovi rva'at fiang ini,
boma Ubu deka nukun mia na'ut i veka nukun tamata ovi wol rorang Ia.”
Tamata ovi rorang Yesus rira sidovung
41 Amar yai tamata rivun rorang afa ovi Petrus nfalak na'a Yesus,
ba ti rbaptis ira.
Rarekan tamata ovi beti rorang Yesus amar yai,
na tamata rivun itelu.
42 Tamata avyai iva'ur urun ma rorang ma dawan afa ovi rasul rair verin ira.
Ira ralar isa ma ba'i rasdovu ira ma rafna'an kida ovu raflurut.
Tamata ovi rorang Yesus ba'i rasdovu ira ma ralar isa na'a Yesus (Kisah 2:44)
43 Rasul ra rotu mujizat ra ovu faneak rivun ovi tamata ra wol rot-nala,
ba tamata ra munuk ralang ma dawan Ubu.
44 Tamata ovi rorang Yesus ba'i rasdovu ira,
ma rala rira metan ra munuk ma irmunuk rira watan.
45 Amar boku,
na tamata boku tali ira rfedi rira lanun ovu rira metan ra,
ma rtanang kubang yai verin tamata inorang ovi rira kubang mamahin.
46 Lokat amar,
na rasdovu ira na'a Yahudi rira Rahan Dawan Falurut ni lean.
Ira rafna'an kida na'a rira rahan ra ovu ralar lolin,
ovu vali wol rfakaratat tenarira ra.
47 Ira rfadawang Ubu lalawatan ma tamata ovi rna'a Yerusalem inar ira.
Lokat amar,
na Duila'a notu ma tamata ra rtafal ma rorang Yesus,
ma Ubu nsikat ira tali rira salasilan ra,
ma rira vava'at kakiwal.