Petrus notu ma lolin brana laklukut isa
1 Amar isa,
na lera mane sian roak,
na Petrus irua Yohanes rarata Yahudi rira Rahan Dawan Falurut.
Lokat amar lera wean inyai,
na Yahudi ra ba'i rti ma raflurut na'a inyai.*
2 Tamata ra rvara brana isa i natlukut tali amar i rarali ia.
Lokat amar,
na rvara ia ma rfadoku ia na'a Rahan Dawan Falurut ni tembok dawan ni falfolat ila'a i rfanara ia ne Falfolat i Felan Lolin Buas.
Brana yai ndoku falfolat yai ngoran a ma nera kubang tali tamata ovi rti Rahan Dawan Falurut.
3 Ia nsi'ik Petrus irua Yohanes rbana mane rti Rahan Dawan Falurut ni lean ralan,
ba nera kubang tali ira.
4 Ira rsi'ik nanuang ia,
ma Petrus nfalak verin ia ne,
“Eka msi'ik ami!”
5 Ba brana yai nsi'ik nanuang ira ma nanovak roak na'a ralan ne,
veka rala afa boku verin ia.
6 Ba Petrus nfalak verin ia ne,
“Ya'a wol ning kubang,
na'uk afa ovi rna'a ya'a ini veka ala verin oa.
Yesus Kristus i ntali ahu Nazaret nala ngrebat verin ya'a,
ba ufalak ne,
bwana kikyai!”
7 Ba ntaha brana laklukut yai liman mela ma nfadiri ia.
Notu wean inyai,
na brana yai ean a ovu ni kamuku ra rangrebat lahir.
8 Ba naswatil ma ndiri ovu nbana lahir.
Nata ia ovu Petrus irua Yohanes rti Rahan Dawan Falurut ni lean ralan.
Ia nbana naswatil watan ia ma nraning Ubu.
9 Tamata ovi rna'a inyai munuk rsi'ik brana yai nbana nala roak ovu nraning Ubu.
10 Ira ref nala ia ne,
brana laklukut i ba'i ndoku Rahan Dawan Falurut ni falfolat i rfanara ia ne “Falfolat i Felan Lolin Buas,”
ma nera kubang tali tamata ra.
Irmunuk rtalkaka lahir,
tevek lolin roak ia.
Petrus nangrihi na'a Yahudi rira Rahan Dawan Falurut
11 Brana laklukut yai ntaha Petrus irua Yohanes ma irtelu rti wan i rfanara ia ne,
Salomo ni abelus.
Tamata rivun avyai rtalkaka lahir,
ba rafla ti ma rfaseri ira.
12 Petrus nsi'ik tamata rivun avyai ma nfalak ne,
“Hoi,
Israel averi,
afakinimi msyi'ik afa yai,
na mtyalkaka,
ovu msyi'ik nanuang ami?
Mia mnyarin ne,
mami ngrebat te mami vava'at nmerat urun notu ma tamata yai nbana?
13 Ubu i Abraham,
Ishak,
Yakub ovu ubud-nusid ra ba'i raraning,
nalang ma dawan Ni sansinir a.
Ni sansinir yai Yesus i lan ana,
mia myala roak Ia verin fareta ra ma rfedan Ia,
ovu mila'ing Ia na'a gubernur Pilatus wahan ralan,
velik ne Pilatus mane nfatalik Ia.
14 Ia ralan nmerat urun ovu Ni vava'at nmalola,
na'uk mifena Ia,
ba myera tali Pilatus ma nfatalik tamata isa i ba'i nsifedan verin mia.
15 Mia fyedan Ia i nala vava'at kakiwal verin tamata ra,
na'uk Ubu nfava'at ewal roak Ia tali matmatan.
Ami amsi'ik lahir Ia nva'at ewal tali matmatan.
16 Yesus Ni ngrebat notu ma brana laklukut ini ean ra rangrebat roak,
tevek norang Ia.
Mia munuk mkya'a ovu msyi'ik roak brana laklukut ini.
Ia norang Yesus,
ba Yesus notu ma lolin lahir ia na'a wahabira ralan ra.
17 Kida averi!
Fiang ini uka'a roak afa sala ovi mimunuk bira dawan ra myotu verin Yesus,
na'uk wol fyan-aran afa ovi myotu ra.
18 Na'uk wean inyai,
boma Ubu nfakena afa ovi lalan a Ia nfalak verin nabi ra,
ma ti rfamalik Raja i ntevut dida salasilan ra.
Ira rfalak ne,
Ia musti ntuan susa rivun.
19 Ba terang a valing averi,
myahil kikyai ma mtyalik tali bira salasilan ra ma myorang Ubu,
boma na'i vatuk bira salasilan ra.
20 Myotu wean inyai,
boma Duila'a novun mia ma nfaloling ralabira ra.
Ia veka nsinir Yesus nti verin mia,
tevek nfili roak Ia ma neluk Raja i ntevut dida salasilan ra.
21 Ia nana'a lanit ratan watan,
nata ti naran amar i Ubu notu ma afa ra munuk ngorva'an ewal,
wean i nfalak roak na'a Ni Tnorung a,
nahu Ni nabi ovi ralarira ra rmerat urun.
22 Lalan ana,
Musa nfalak ne,
‘Ubila'a i mryaning a veka nfili nabi isa tali bira sidovung a.
Ia veka wean ya'a,
ba mia musti mryenar ma lolin afa ovi nfalak ra verin mia na'a afaka watan.
23 Tamata iki watan wol nrenar nabi yai ma norang Ia,
na Ubu veka naling ia tali Ni tamata ovi rorang Ia,
ma nfedan ia.’*
24 Tali nabi Samuel ti naran nabi ovi marmuri ra,
na ira munuk rfamalik afa ovi fiang ini tamata ra rsi'ik a.
25 Lalan a,
Ubu nala tnorung verin Ni nabi ra.
Ia nala vali tnorung ini ma naflahar ububir-nusibira ra.
Tnorung ini verin mia vali.
Ubu nfalak verin Abraham ne,
‘Ya'a veka ala ubum-nusim isa ma uflahar tamata ra munuk na'a lanit ivavan ini.’*
26 Ba Ubu nsinir lan Ni sansinir verin mia.
Inyai Yesus i naflahar mia,
ovu notu ma myahil ma mtyalik tali bira afa sian ovi myotu ra.”