Ubu nfava'at ewal Yesus
1 Amar i Yahudi ra ryari ira nelak roak,
na Maria Magdalena,
Maria i yanan Yakobus ovu Salome rfaha ngul ovi voarira lolin,
mane rti ra'ung na'a Yesus tenan a.
2 Ba ti ma lera ndata roak na'a amar kareda,
na rti van matmatan i rfanuba Yesus tenan a.
3 Rna'a rira banbanan obin,
na rsiforat ira ne,
“Tamata iki veka nlawar nala vatu i nulang teri van ngoran eri?”
4 Na'uk rti ma raran inyai ma rsi'ik,
na vatu i dawan urun yai natsuar roak tali van matmatan ngoran a.
5 Ba rti van ralan ma rsi'ik,
na varverun isa noru ravit blawat ngangiar ma ndoku rira lihir mela.
Vata avyai rabrian urun.
6 Varverun yai nfalak verin ira ne,
“Deka byobar.
Uka'a roak ne,
mya ma mdyava Yesus ntali Nazaret i rbaku roak Ia na'a aa walwalur.
Ia wol nana'a roak ini,
tevek nva'at ewal roak.
Eka msyi'ik wan i rfanuba Ia na'a yai.
7 Myewal a'uk mia ma miti fyamalik verin Petrus ovu Yesus Ni tamata liak ovi rorang Ia ne,
‘Yesus veka ula Ia nti propinsi Galilea.
Mia veka mtyuan Ia na'a ineri,
wean lahir i nfamalik roak verin mia.’ ”
Vata ra rtuan Ubu Ni sansinir isa ntali lanit ratan na'a van matmatan ralan (Markus 16:5)
8 Vata avyai rbobar ma raruru lalean ira,
ba rti murin ma rafla talik van matmatan yai.
Ira wol rfalak akataka verin tamata ra,
tevek rbobar.
[Ira rfamalik munuk ivar yai verin Petrus ovu ni kida ra,
na'uk wol mnanat.
Rotu munuk afa avyai,
beti Yesus nsinir Ni tamata ovi rorang Ia ma rtali timur rti varat,
ma ti rfamalik Ubu Ni Ivar mnga'un i wol bisma nmamu.
Ivar yai nfamalik na'a i wean inba ma Ubu nsikat tamata ra tali rira salasilan ra,
ma rira vava'at kakiwal].
*
Yesus nfavotuk Ia verin Maria Magdalena
[
9 Ti ma Yesus nva'at ewal na'ut varverak sumatan na'a amar kareda,
na nfavotuk lan Ia verin Maria Magdalena.
Vata yai lan a,
Yesus naling vatuk nait sian ifitu tali ia.
10 Ba Maria ti ma nfamalik ivar yai verin Yesus Ni tamata ovi rorang Ia.
Tamata avyai ralarira lalau ma rvakar.
11 Ira rarenar ne,
Yesus nva'at ewal roak,
ovu Maria nrea lahir Ia,
na'uk ira wol rorang.]
Yesus nfavotuk Ia verin Ni tamata irua i rorang Ia
[
12 Yesus notu wean inyai,
beti ti nfavotuk vali tenan ovu felan naling Ia verin tamata irua tali tamata ovi rorang Ia.
Rarea Ia na'ut amar i rbana rti talik kota ma rti wan liak.
13 Ba rewal ira ma rfamalik ivar yai verin rira kida ra,
na'uk wol rorang.
14 Nata Yesus ti nfavotuk vali tenan verin Ni tamata vutu rahin isa ovi rorang Ia,
na'ut i rafna'an.
Yesus ntabu ira,
tevek rira inorang wol nangrebat ovu vali rafena lahir ma rorang tamata ovi rarea Ia ma rfamalik ne,
Yesus nva'at ewal roak.
15 Ia nfalak verin ira ne,
“Byan-soru munuk lanit ivavan a,
ma fyamalik Ubu Ni Ivar Lolin verin tamata ra munuk.
16 Tamata ovi rorang Ubu Ni Ivar Lolin yai ovu rtorung ma rbaptis ira,
na Ubu veka nsikat ira tali rira salasilan ra,
ma rira vava'at kakiwal.
Na'uk tamata ovi wol rorang Ia,
Ubu veka nukun ira.
17 Tamata ovi rorang Ya'a,
Ubu veka nala ngrebat ma neluk faneak verin ira,
ma rala narang a al raling vatuk nait sian ra,
ovu vali veka rangrihi ovu vai ovi wol rka'a ra.
18 Ira veka rtaha nala nifa te renu alanu,
na'uk wol rtuan akataka.
Ira veka rfadoku limarira ra na'a tamata ovi rira suhut ra,
na tamata avyai lolin ewal ira.”]
Yesus nrata lanit ratan
[
19 Ti ma Duila'a Yesus nangrihi munuk verin ira,
na Ubu notu ma nrata lanit ratan,
ma ndoku Ni lihir mela a.
20 Nata Yesus Ni tamata ovi rorang Ia rti ma rfamalik Ubu Ni Ivar Lolin na'a wan inba watan.
Duila'a novun ira,
ma rotu mujizat ra ma al rfalyawang ne,
afa ovi rfamalik ra kena.]
Yesus nrata lanit ratan (Markus 16:19)