Ubu yanan ra
1 Eka minovak!
Yamadida Ubila'a Ni silobang a dawan urun verin ita,
ba nala ita ma teluk yanan ra.
Ubu yanan urun ita.
Tamata ovi rna'a lanit ivavan ini wol rka'a ne,
Ubu yanan ita,
tevek ira wol rka'a Ubu.
2 Terang a valing averi,
ulobang urun mia!
Fiang ini Ubu nala roak ita ma teluk yanan ra.
Ita wol tka'a mnga'un ne,
dida vava'at veka felan aka na'a amar i Yesus nma ewal.
Na'uk tka'a roak ne,
na'a amar i veka nma ewal,
na ita veka wead Ia,
tevek ita veka tsi'ik lahir felan mnga'un a.
3 Tamata iki watan nfaklo'i a'uk ni vava'at a wean inyai verin Kristus,
na nfaroa tenan a tali salasilan ra,
boma ni vava'at nmerat urun,
wean Kristus.
4 Tamata iki watan notu salasilan,
na ia nangal roak Ubu Ni inukun ra,
tevek tangal Ubu Ni inukun ra,
na salasilan roak.
5 Mia mkya'a roak ne,
Yesus Kristus nma lanit ivavan ini ma na'i vatuk dida salasilan ra,
ovu mkya'a vali ne,
Ia wol Ni salasilan lahir.
6 Ba tamata iki watan ni vava'at isa roak ovu Kristus,
na ia wol notu roak salasilan ra.
Na'uk iki watan wol ntalik tali ni salasilan ra,
na ia wol nrea lahir ovu wol nka'a lahir Kristus.*
7 Yanak averi,
msyi'ik wabira ma lolin,
boma tamata ra deka rweang nala mia.
Tamata ovi rot-orang afa ovi Ubu ralan nfalak ra,
na rira vava'at ra rmalola,
wean lahir Yesus.
8 Tamata ovi rotu lalawatan salasilan ra,
na ira rtali nitdawan a,
tevek na'ut i Ubu beti notu lanit ivavan ini,
na nitdawan notu vali salasilan ra.
Wean inyai bi,
Ubu Yanan a nma lanit ivavan ini ma not-visal nitdawan ni karya ra.
9 Tamata ovi Ubu nala roak ira ma reluk yanan ra,
na ira wol rotu roak salasilan,
tevek Ia nala roak vava'at ngorva'an verin ira.
Ira wol bisma rotu roak salasilan ra,
tevek yamarira verin Ubu.
10 Faneak verin Ubu yanan ra ovu nitdawan yanan ra rsialing ira.
Iki watan wol not-orang afa ovi Ubu ralan a nfalak a,
ovu wol ralan urun al nlobang teran a valin ra,
na Ubu wol yanan ia.
Ubu yanan verin ita, ba tlobang terad a valid ovi rorang Yesus
11 Ivar i mryenar roak tali amar i beti myorang Yesus wean ini:
musti tsilobang ita.
12 Bira vava'at a deka wean Kain,
tevek nitdawan na'a roak ralan a ma nfedan warin a.
Notu afakinimi nfedan warin a?
Tevek afa ovi notu ra sian lalawatan,
na'uk afa ovi warin a notu ra kena ovu Ubu ralan a.*
13 Terang a valing averi,
deka mibrian,
wean i tamata ovi rna'a lanit ivavan ini wol inar lahir mia.
14 Wean i tlobang terad a valid* ra,
na tka'a roak ne,
matmatan wol ntaha roak ita,
ma veka dida vava'at kakiwal.
Na'uk iki watan wol nlobang teran a valin ra,
na matmatan ntaha ia obin.*
15 Tamata i wol inan lahir teran a valin ra,
ia wean watan tamata ovi rsifedan roak a.
Mia mkya'a roak ne,
tamata ovi rsifedan ra veka wol rira vava'at kakiwal.
16 Yesus nala tenan a verin ita,
boma ita bisma dida vava'at kakiwal.
Ia notu wean ini ma nfaturu ne,
wean inba ma tlobang tamata ra.
Ba ita vali musti tala dida vava'at ra ma al tlobang terad a valid ra.
17 Iki watan ni metan ra na'a lanit ivavan a,
ma nsi'ik teran a valin a ni metan ra wol naran ma nva'at,
na'uk wol nkamlabir ia,
na Ubu Ni silobang wol nana'a roak ralan a.
18 Yanak averi,
deka fyalak watan na'a sumarbira ra ne,
mlyobang tamata ra.
Na'uk fyaturu lahir bira silobang verin tamata ra tali afa ovi myotu ra,
tevek inyai silobang mnga'un a.
19 Wean i tlobang terad a valid ra,
na tka'a roak ne,
tot-orang afa ovi kena ra,
ovu vali raladida ra malinan na'a Duila'a wahan ralan a.
20 Wean i raladida ra rfasala ita na'a afa sala ovi totu ra,
na raladida ra bis malinan vali.
Ubu sa'i dawan Ia,
ovu Ni kaka'a dawan rahi afa ovi tka'a na'a raladida ra.
21 Terang a valing averi,
ulobang urun mia.
Wean i raladida ra wol rfasala ita,
na raladida ra dawan ma tdiri Ubu wahan ralan a,
22 ovu wean i tera afaka watan tali Ubu,
na veka nala verin ita,
tevek tot-orang roak afa ovi nfalak ma totu ra,
ovu dida vava'at ra rotu ma ralan lolin watan.
23 Ia nfalak verin ita ma tot-orang afa ovi:
torang a'uk Yanan a Yesus Kristus,
ovu tsilobang ita,
wean i nfareta roak ma totu a.
24 Tamata iki watan not-orang afa ovi Ubu nfareta,
na ni vava'at isa roak ovu Ubu,
ovu vali Ubu ralan isa ovu ia.
Ia nala roak Ni Roh a ma nleal raladida ra,
ma nfaturu verin ita ne,
Ia ralan isa ovu ita.