Ita musti tka'a afa ovi rangal Ubu Ni Roh
1 Terang a valing averi,
ulobang urun mia.
Deka myorang tia ma watan tamata ovi rfalak ne,
Ubu Ni Roh a nleal ralarira ra.
Mlyabir teman veki ne,
roh avyai rtali Ubu te wahal,
tevek na'a inba watan,
na tamata rivun rlabir tamata ra ma rfalak ne,
nabi mnga'un ira.
2 Myotu wean ini,
boma mkya'a ne,
tamata ovi Ubu Ni Roh nleal ira yai:
Tamata ovi rtorung ne,
Yesus Kristus nma roak lanit ivavan ini ma neluk tamata,
na ira rtali Ubu.
3 Na'uk tamata ovi wol rtorung ne,
Yesus Kristus nma lanit ivavan ini ma neluk tamata,
na tamata avyai rira roh a wol ntali Ubu.
Rira roh a nangal roak Kristus.
Mia mryenar lan roak ne,
roh i nangal Kristus veka nma,
ma fiang ini nana'a roak lanit ivavan ini.
4 Yanak averi,
mia mtyali Ubu,
ba utubira roak tamata ovi rlabir tamata ra ma rfalak ne,
nabi mnga'un ira.
Tevek Ubu Ni Roh i nleal ralabira ra,
veran lia nitdawan ovu ni roh ovi rna'a lanit ivavan ini.
5 Ira rtali lanit ivavan ini.
Ba wean inyai,
na rair watan afa ovi rtali lanit ivavan ini,
ma tamata ovi wol rorang Ubu rarenar ma rorang ira.
6 Na'uk ami amtali Ubu.
Tamata ovi rka'a Ia,
rarenar vali afa ovi amfalak ra.
Tamata ovi wol rtali Ubu wol rarenar vali afa ovi amfalak ra.
Afa avyai reluk faneak verin ita ma tka'a ne,
roh inba kena,
ovu roh inba wol kena.
Ubu Ni silobang a dawan, ba fara tsilobang ita
7 Terang a valing averi,
ulobang urun mia!
Fara tsilobang ita,
tevek dida silobang a ntali Ubu.
Tamata ovi rlobang tamata liak ra,
na tamata avyai Ubu yanan ira,
ovu ira rka'a roak Ubu.
8 Tamata ovi wol rlobang tamata liak ra wol rka'a Ubu,
tevek Ni silobang verin tamata ra nana'a lalawatan.
9 Ubu nfaturu roak Ni silobang i dawan a verin ita.
Yanan a ikisa watan.
Nsinir Ia ma nma lanit ivavan ini,
boma dida vava'at kakiwal ovu Ia.
10 Ubu Ni silobang yai wean ini:
Ita wol tlobang lan Ubu,
na'uk Ubu nlobang lan roak ita,
ba nsinir roak Yanan a,
ma nma lanit ivavan ini,
ma nmata al nakvanak ita tali dida salasilan ra.
11 Terang a valing averi,
ulobang urun mia!
Wean i Ubu nlobang roak ita wean inyai,
na ita vali musti tsilobang ita.
12 Wol tamata isa vali nsi'ik roak Ubu.
Wean i tsilobang ita,
na Ubu nleal roak raladida ra,
ovu nfangora raladida ra ovu Ni silobang a.
13 Ubu nala roak Ni Roh a verin ita,
boma tka'a ne,
Ia nleal roak raladida ra,
ovu ralad isa ovu Ia.
14 Ami amsi'ik roak Ubu Yanan a,
ba amfalak verin mia ne,
Yamadida Ubila'a nsinir roak Yanan a ma nma lanit ivavan ini,
ma neluk Raja ma nsikat ita tali dida salasilan ra,
ma dida vava'at kakiwal.
15 Tamata ovi rtorung ne,
Yesus,
Ubu Yanan Ia,
na Ubu nleal ralarira ra,
ovu ira ralar isa roak ovu Ia.
16 Ita tka'a roak ovu torang vali ne,
Ubu nlobang ita.
Ubu Ni silobang verin tamata ra nana'a lalawatan.
Tamata iki watan nlobang tamata ra,
na ia ralan isa ovu Ubu,
ovu Ubu nleal roak ralan a.
17 Wean inyai,
na Ubu nfangora lahir raladida ra ovu Ni silobang.
Ba na'a amar i Ubu veka nma ma nfaleka inukun verin tamata ra,
na raladida dawan watan,
tevek afa ovi totu ra na'a lanit ivavan ini wean vali afa ovi Yesus notu ra.
18 Tamata ovi Ubu nlobang roak ira,
wol rbobar roak Ia.
Ni silobang a nfangora lahir raladida ma nfangrebat raladida ra,
boma deka tbobar kikyai.
Tamata ovi rbobar ne,
Ubu veka nukun ira,
wol rka'a obin Ni silobang i nala roak verin ira.
19 Ita tlobang tamata ra,
tevek Ubu nlobang lan roak ita.
20 Tamata i nfalak ne,
“Ya'a ulobang Ubu,”
* na'uk wol inan lahir teran a valin ra,
na tamata yai nsiklabir.
Tevek wean i tamata yai wol nlobang teran a valin ovi nrea ra,
na veka wol nlobang Ubu i wol nrea Ia.
21 Ba Ia nfareta ami ma nfalak ne,
tamata ovi rlobang Ubu,
na ira musti rlobang vali terarir-valirira ra.