Ubu notu ma tamata Yahudi ra uturira roak, na'uk nfasala watan ira
1 Terang a valing averi,
mane utafal ma ufalyawang na'a ning tamata Yahudi ra.
Tamata Yahudi ra uturira aka nlia tamata liak ra?
Wean i rsunat ira,
na uturira aka?
2 Tamata Yahudi ra uturira urun,
tevek Ubu nala lan lalean Ni vaivatul ra verin ira.*
3 Wean i tamata Yahudi boku wol rot-orang Ubu Ni vaivatul ovi rtorung roak ma rot-orang,
na wean inba verin ira?
Wean i tamata Yahudi boku wol rot-orang afa ovi rfalak ra,
na inyai notu ma Ubu wol notu afa ovi ntorung roak ma notu ra?
4 Wol wean inyai!
Ubu nfalak afa ovi kena ra watan,
velik ne tamata ra munuk rsiklabir.
Rtulis roak wean ini na'a Surat Ralan ne,
“Afa ovi Ubu nfalak ra kena lalawatan,
ovu wean i mane rfasala Ia,
na wol rfasala nala Ia,
ovu utun lalawatan.”*
5 Na'uk wean i afa kena ovi Ubu notu ra rtafal ma lyawan,
tevek totu afa ovi wol kena ra,
na ita veka tfalak afaka?
Ita mane tfalak ne,
Ubu wol kena Ia,
tevek mane nfaturu Ni ngrova verin ita?
Kena,
ma afa yai ntali tamata rira fikiran ra watan,
6 na'uk fikiran ovi wearira inyai wol kena lahir!
Wean i Ubu wol kena Ia,
na wean inba ma bisma nfaleka inukun verin tamata ra munuk na'a lanit ivavan ini?
7 Na'uk wean i dida siklabir ovi totu ra rotu ma afa kena ovi rtali Ubu rtafal ma rvotuk,
ma tamata ra rfadawang Ia,
na afakinimi Ubu nfasala ita ne,
tamata salasilan ita?
8 Wean inyai,
na tfalak ne,
“Mya ma totu afa ovi sian ra,
boma nvua afa lolin ma traning Ubu.”
Tamata boku rfalak sian roak ya'a ne,
ufalak wean inyai.
Tamata ovi wearira inyai,
inovan ma Ubu nukun ira.
Tamata ovi rna'a lanit ivavan ini munuk rotu salasilan
9 Ita tamata Yahudi ita,
na utud aka nlia tamata liak ra na'a Ubu wahan ralan a?
Ita wol utud akataka,
tevek ufalak lan roak ne,
tamata ovi rna'a lanit ivavan a munuk rotu salasilan,
ma salasilan nfareta rira vava'at ra,
velik ne Yahudi te wol Yahudi ira.
10 Rtulis roak na'a Surat Ralan ne,
“Wol tamata isa na'a ni vava'at a,
not-orang munuk afa ovi Ubu ralan nfalak a,
ma ni vava'at a nmalola.*
11 Wol tamata isa vali nka'a mnga'un afa ovi kena ra,
ovu wol tamata isa vali nkiwal ma nka'a afa ovi Ubu ralan nfalak.
12 Tamata ra munuk rfaroa roak ira tali Ubu.
Ira munuk lahir rotu sian a ma rira vava'at ra wol fyawan lahir.
Wol tamata isa vali kena ia!”
13 “Wean i rangrihi,
na rira vaivatul ra ngra da'in,
wean wan matmatan i natvelar watan ma voan sian urun.
Ira rala vaivatul ovi rlabir waweang tamata ra,”
“ovu rfalak watan vaivatul sian ovi wearira nifa ni bisa a ma rfamngala tamata liak ra.”*
14 “Rira vaivatul ovi rtali sumarira ra rngora lahir ovu vaivatul ovi ba'i rala al rear rfasoba tamata ra,
ovu vali vaivatul ovi rfalak sian tamata ra.”*
15 “Rasnga'ut urun mane rti rfedan tamata ra.*
16 Rti inba watan,
na rot-visal tamata liak rira vava'at ra,
ovu rotu ma tamata ra ralarira lalau urun.
17 Ira wol rka'a ne,
wean inba ma rira vava'at ra malinan ovu tamata liak ra.”
18 “Ira wol ralang lahir Ubu.”*
19 Ba ita tka'a ne,
Ubu nfalak lahir vaivatul avyai na'a Musa ni inukun ra verin tamata Yahudi ra,
ma rasusan rira vava'at ra tali inukun avyai.
Wean inyai,
na wol tamata isa vali na'a lanit ivavan ini bisma ndava ni lola,
ma Ubu deka nukun ia.
20 Ba Ubu wol nfadoku tamata isa vali ma nala ia wean tamata i ni vava'at nmalola,
tevek not-orang Musa ni inukun ra.
Na'uk velik aba,
tali inukun avyai,
bi tamata ra rka'a ne,
rotu roak salasilan.
Dida vava'at ra rmalola na'a Ubu wahan ralan a, wean i torang Yesus
21 Na'uk fiang ini,
Ubu nfaturu roak linga'an verin tamata ra ma rira vava'at ra rmalola na'a wahan ralan a.
Na'uk tamata ra wol rira vava'at i nmalola na'a Ubu wahan ralan tevek rot-orang Musa ni inukun ra.
Velik aba,
linga'an yai rfadoku roak na'a Musa ni inukun ra,
ovu vali nabi liak rira kitab ra rfalak ne,
22 tamata rira vava'at ra bisma rmalola na'a Ubu wahan ralan a,
tevek rorang Yesus Kristus.
Ubu notu wean inyai verin tamata ovi rorang munuk Yesus Kristus,
ovu Ia wol nfili tamata,
tevek ita weadida isa watan.
23 Ubu inan ma tamata ra munuk rovu Ia na'a vanan i nfitik nyadat.
Na'uk tamata ra munuk lahir na'a lanit ivavan a rotu roak salasilan,
bi notu ma rfaroa lahir ira tali vanan i nfitik nyadat a.*
24 Ubu nala Ni rala lolin verin ita,
ovu ntorung ma nala ita wean tamata ovi rira vava'at ra rmalola,
ovu ita wol tbahir akataka,
ovu afa yai wol ntali afa lolin ovi totu ra.
Ubu notu munuk afa ini nahu Yesus Kristus i ntevut dida salasilan ra.
25-26 Ubu nfadoku ma Yesus ntuan inukun ma al nkati inukun i musti tatuan tevek dida salasilan ra,
ma ka'i nala tenan ma nmata ovu laran a nvoat ma ntevut dida salasilan ra,
wean i torang Yesus.
Ubu kena Ia,
na'uk tali lalan ana,
wol nukun tamata ra na'a rira salasilan ra,
tevek ntahang nal ralan na'a rira salasilan ra.
Na'uk fiang ini,
nahu Yesus Ni matmatan a,
na Ubu nfaturu ne,
Ia nukun lahir tamata ra na'a rira salasilan ra,
ovu wean i rorang Yesus,
na ntorung ma nala ira wearira tamata ovi rira vava'at ra rmalola.
27 Wean inyai,
na tamata ra wol bisma rfakaratat tenarira ra.
Ubu ntorung ma nala ita wean tamata ovi rira vava'at ra rmalola na'a wahan ralan a.
Ia wol mane notu wean inyai tevek tot-orang Musa ni inukun ra,
na'uk notu wean inyai tevek torang Yesus.
28 Ita torang ne,
Ubu notu ma tamata rira vava'at ra rmalola,
tevek rira inorang a verin Yesus Kristus.
Ia wol mane notu wean inyai tevek rot-orang Musa ni inukun ra.
29 Ubu wol nlobang tamata Yahudi ra watan,
na'uk Ia nlobang tamata ra munuk,
velik ne tamata Yahudi te wol Yahudi.
30 Ubu ikisa watan.
Ia sa'i notu ma tamata Yahudi ra ovu vali wol Yahudi ra rira vava'at ra rmalola,
tevek rorang Yesus Kristus.
31 Inyai wol nfaturu ne,
torang roak Yesus Kristus,
ba tvatuk Musa ni inukun ra,
tevek dida inorang a notu ma talang inukun avyai.