Ubu veka nfaleka inukun verin tamata ra munuk, ovu wol nfili tamata
1 Ba wean inyai,
na terang a valing averi,
iki mia ma fyaleka inukun verin tamata liak ra?
Mia wol bira akataka ma al mlyotar tenabira ra ma fyalak ne kena mia,
tevek myotu sala vali.
Wean i fyaleka inukun verin tamata liak ra,
na inyai nfaturu ne,
mia ka'i fyaleka inukun verin tenabira ra,
tevek mia myotu vali afa ovi tamata avyai rotu ra.
2 Ita tka'a ne,
Ubu kena urun Ia na'ut i nukun tamata ovi rotu sian wean inyai.
3 Wean i fyaleka inukun verin tamata liak na'a afa ovi rotu ra,
na'uk mia myotu vali afa avyai,
na deka fyikir ne,
Ubu Ni inukun a veka wol nkena mia.
4 Mia minovak ne,
Ubu nfaturu Ni lolin a verin mia,
ba nanaban ovu ntahang ralan ma wol nukun mia,
na fyikir ne wol akataka?
Wahal lahir!
Mia musti mkya'a ne,
Ubu nfaturu Ni lolin verin mia,
tevek inan ma myahil ma mtyalik tali bira salasilan ra.
5 Mia ulubira vatu ma mifena ma myahil ma mtyalik tali afa sian ovi myotu ra.
Wean inyai,
na mtyafal ma fyalemang inukun i veka nkena mia,
na'a amar i Ubu veka nma ma nfaturu lahir Ni ngrova a ovu nfaleka inukun verin tamata ra ovu ni malolan.
6 Ia veka nukun tamata ra munuk ma inovan ovu afa ovi rotu ra.*
7 Ubu veka nala vava'at kakiwal verin tamata ovi ralarira urun lalawatan ma rotu a'uk afa ovi lolin ra,
tevek inarira ma veka nfadawang ira,
nalang ira ovu nala vava'at i wol bisma nakvisal.
8-9 Na'uk Ubu veka nangrova urun ovu veka nfaleka inukun i aleman verin tamata ovi rfikir watan tenarira ra,
ovu tamata ovi rafena ma rot-orang afa ovi kena ra,
na'uk rotu watan afa ovi tamata ktufan rotu ra.
Tamata ovi ba'i rotu wean inyai,
ira veka rtuan wawa'uk ovu susa i dawan urun a.
Susa ovu wawa'uk avyai veka rkena lan tamata Yahudi ra,
beti tamata ovi wol Yahudi ra.
10 Na'uk tamata ovi ba'i rotu afa ovi lolin ra,
Ubu veka nfadawang munuk ira ovu nalang ira,
ovu vali nala Ni malinan a verin ira.
Ia notu lan afa avyai verin tamata Yahudi ra,
beti notu vali verin tamata ovi wol Yahudi ra.
11 Wean inyai,
na Ubu nsi'ik tamata ra munuk ma wearira isa,
ovu wol nfili tamata.*
12 Tamata ovi wol Yahudi ra,
wean i rotu salasilan,
na Ubu veka nukun munuk ira ma rmata,
na'uk wol nukun ira tevek rangal Musa ni inukun ra.
Na'uk tamata Yahudi ra,
wean i rotu salasilan,
na Ubu veka nfaleka inukun verin ira munuk,
tevek rangal Musa ni inukun ra.*
13 Tamata ra rira vava'at ra wol rmalola na'a Ubu wahan ralan,
wean i rarenar watan Musa ni inukun ra.
Na'uk Ia ntorung ma tamata ovi rot-orang Musa ni inukun avyai,
rira vava'at ra rmalola na'a wahan ralan a.
14 Tamata ovi wol Yahudi ira wol rka'a Musa ni inukun ra.
Na'uk ti ma tamata avyai ralarira ila'a ra ka'i rfalak na'a afa ovi musti rotu,
ovu afa ovi wol bisma rotu a,
wean lahir Musa ni inukun avyai,
na afa yai ihin a ne,
ni inukun avyai rna'a roak ralarira ila'a ra.
Afa yai kena,
velik ne tamata ovi wol Yahudi ra wol rira Musa ni inukun avyai.
15 Rotu wean inyai ma rfaturu ne,
afa ovi rfadoku roak na'a Musa ni inukun ra,
Ubu ntulis roak na'a ralarira ra ma musti rot-orang.
Ralarira ila'a vali rfalak lahir wean inyai,
tevek amar boku,
na rira fikiran ra ka'i rfasala tenarira ra,
ovu amar boku vali ka'i rlotar tenarira ra.
16 Ba veka wean vali inyai na'ut i Ubu nfadoku roak ma nfaleka inukun verin tamata ra.
Na'ut inyai,
na Ubu veka nala ngrebat verin Kristus Yesus ma nfaleka inukun verin tamata ra munuk rira fikiran fanfonak ra.
Afa yai wean lahir afa ovi ufamalik na'a Ubu Ni Ivar Lolin a.
Tamata Yahudi rka'a roak Musa ni inukun ra, na'uk rotu watan afa ovi sala ra na'a Ubu wahan ralan a
17 Ya'a mane ala snurak verin ning tamata Yahudi ra.
Mia fyalak ne,
tamata Yahudi mia ovu myorang ne,
Musa ni inukun ra veka rlobang mia na'a afaka watan.
Mia vali ralabira dawan roak ne,
myeluk Ubu Ni tamata ovi rorang Ia.
18 Tamata rair inukun avyai verin mia,
ba mkya'a afa ovi Ubu ralan nfalak,
ovu mkya'a vali ne,
inba kena ovu inba sala.
19 Mia myorang urun ne,
mia ini tamata ovi fyabana tamata kibu,
ovu myeluk lyawan verin tamata ovi rna'a dedan ralan.
20 Fyikir ne,
mkya'a munuk roak afa ovi Musa ntulis na'a ni inukun ra,
ma bira munuk kaka'a ovu afa ovi kena ra munuk lahir.
Ba tali afa avyai,
na minovak ne,
bisma myair tamata ovi rboda ra,
ovu myeluk tuan guru verin tamata ovi wol raftibang obin.
21 Mia myair nala tamata liak ra,
na'uk wean inbinimi wol myair tenabira ra?
Mia myair tamata ra ma fyalak ne,
“Deka byori,”
na'uk afakinimi byori?
22 Myair tamata ra ma fyalak ne,
“Tamata ovi msyifa roak,
deka mtyuba ovu tamata ovi wol awabira verin ira,”
na'uk afakinimi mtyuba ovu tamata ovi wol awabira verin ira?
Mia fyalak verin tamata ra ma deka inar lahir walut ra,
na'uk afakinimi byori walut ra tali warira ovi tamata ba'i rfadawang walut avyai?
23 Mia fyadawang tenabira ra ne,
bira roak Musa ni inukun ra,
na'uk afakinimi wol myot-orang ni inukun ra?
Tali afa ovi myotu ra,
na mia fyaturu lahir ne,
wol myalang Ubu!
24 Wean i rtulis roak na'a Surat Ralan ne,
“Mia tamata Yahudi mia,
bira afa ovi myotu ra rotu ma bangsa liak ra rfalak sian Ubu.”*
Tamata Yahudi rsunat roak rira tamata ra, na'uk Ubu nfasala watan ira
25 Mia tamata Yahudi ra,
wean i myot-orang Musa ni inukun ra,
na sunat i rotu verin mia,
fyawan.
Na'uk wean i wol myot-orang inukun avyai,
na bira sunat yai wol fyawan akataka.*
26 Wean i tamata isa i wol Yahudi ia ma wol rsunat ia,
na'uk ba'i not-orang Musa ni inukun ra,
na Ubu nfadoku ne,
tamata yai wean tamata ovi rsunat roak ira.
27 Ba wean inyai,
na tamata ovi wol rsunat ira,
na'uk rot-orang Musa ni inukun ra,
na ira veka rfaturu mia,
tamata Yahudi ovi rsunat roak mia bira sala ra.
Rotu wean inyai,
tevek mia bira inukun ra ovu rsunat roak mia,
na'uk wol myot-orang inukun avyai.
28 Mia wol tamata Yahudi mnga'un mia tevek renabir-yamabira ra Yahudi watan ira,
ovu vali wol Yahudi mia tevek tamata ra rsunat roak tenabira ra.*
29 Na'uk tamata Yahudi ovi reluk Ubu Ni tamata ra,
ira tamata Yahudi mnga'un ira na'a ralarira ra,
ovu sunat i kena nana'a watan ralarira ra.
Ba wean inyai,
na Ubu Ni Roh nkarya na'a tamata avyai ralarira ra,
boma reluk Ni tamata ra.
Ira wol reluk Ni tamata ra tevek rot-orang Musa ni inukun ra.
Velik ne tamata ra wol rfadawang tamata avyai,
na'uk Ubu veka nfadawang ira.