Herodes wol inan tamata ovi rorang Yesus, ba nsinir ni suldadu ra ma ti rfedan Yakobus ovu ra'abu'i Petrus
1 Ka'a bi na'a amar yai vali,
na Raja Herodes nsinir ni suldadu ra ma rotu sian tamata boku tali ovi rorang Yesus.*
2 Ia nsinir ni suldadu ra ma rtaha nahin blawat ra,
ma ti rfedan Yohanes warin a naran Yakobus.
3 Herodes nka'a roak ne,
Yahudi ra inar urun,
ba nfareta ni suldadu ra ma rtaha Petrus vali.
Notu afa avyai na'ut amar i Yahudi ra rotu snoba ma ra'an roti i wol rfadoku ragi na'a.
4 Ba rtaha roak Petrus ma Herodes nfareta ma ti rfadoku ia na'a bu'i ralan a.
Suldadu vutu rahin inean rwanar ia na'a inyai,
ba rsiduk ira na'a sidovung ko'u ifa'at ma tamata fanfa'an lokat sidovung.
Herodes nanovak ma wean i Yahudi rira snoba roak munuk roak,
beti nukun Petrus ma tamata rivun rsi'ik.*
5 Ba Petrus nana'a roak bu'i ralan,
na'uk sidovung tamata ovi rorang Yesus raflurut ovu ralarira urun verin Ubu ma nlobang ia.
Ubu nsinir Ni sansinir isa tali lanit ratan ma nfatalik Petrus tali bu'i ralan
6 Teran ovan isa,
na Herodes mane nukun Petrus.
Rdadul Petrus ovu kakeak tma'an irua,
ma ntuba suldadu irua fruarira ra.
Suldadu liak ra rwanar bu'i ni falfolat a.
7 Brian munuk,
na Ubu Ni sansinir isa ntali lanit ratan nsuta ma ndir-ebang Petrus ma wan i ntuba yai lyawan.
Sansinir yai nkafir nelan a ma nfalak ne,
“Hei,
bwatar kikyai!”
Ubu Ni sansinir isa ntali lanit ratan nsuta ma ndir-ebang Petrus (Kisah 12:7)
Nfalak munuk wean inyai, na kakeak tma'an avyai rleka lahir tali Petrus liman a.
8 Ba sansinir yai nfalak verin Petrus ne,
“Meluk mu kadaravit a ovu bwaki mu tatea.”
Ba Petrus not-orang lahir afa avyai.
Sansinir yai nfalak ewal verin ia ne,
“Moru mu ravit a blawat ma morang ya'a.”
9 Nata ia norang sansinir yai ma rban-talik bu'i yai,
na'uk Petrus wol nka'a obin ne,
afa ovi sansinir notu ra kena te wahal,
tevek nanari ne wean i namifi na'uk wol ntub-lufa.
10 Ba irua rbana lia suldadu boku na'a bu'i yai,
beti rbana lia suldadu liak boku vali ma raran falfolat tma'an i mane rahu rti kota.
Ti raran ana,
falfolat yai ka'i natvadil watan,
ba rbana ma rti raran murin ma rahu linga'an isa.
Brian munuk,
na sansinir yai nti talik roak ia.
11 Nata Petrus ni fikiran lyawan roak ma nfalak ne,
“Uka'a urun roak ne,
inlangin a Ubu nsinir Ni sansinir isa ntali lanit ratan nma nlobang ya'a ma nfatalik ya'a tali Herodes liman ralan,
boma deka utuan afa sian ovi Yahudi ra ranovak na'a ya'a.”
12 Ba ti ma nka'a roak ne,
Ubu nlobang ia,
na nti lahir Maria i yanan verin Yohanes ni rahan a.
Yohanes ini rfanara vali ia ne,
Markus.
Na'a inyai,
na tamata rivun ovi rorang Yesus rasdovu ira ma raflurut.
13 Petrus nevan falfolat i na'a murin a,
ba vata sansinir isa naran Rode i nkarya na'a rahan yai nma ma nfatlina ne,
iki nevan falfolat a.
14 Vata yai nef-nala Petrus vain a,
na inan urun i lahir,
ba wol nvadil falfolat a.
Ia nafla lahir ma ti nfalak verin tamata ovi rna'a rahan ralan yai ne,
Petrus ndiri murin.
15 Na'uk tamata avyai wol rorang,
ba rfalak ne,
“Beta ne fwoar!”
Ba vata yai nfalak lalawatan verin ira ne,
“Ufalak urun!”
Na'uk ira rfalak ne,
“Inyai Ubu Ni sansinir i nwanar Petrus!”
16 Na'uk Petrus nevan lalawatan falfolat a,
ba rvadil ma rsi'ik,
na rtalkaka urun i lahir.
17 Petrus nala liman a ma al notu faneak ma deka vair,
beti nfamalik verin ira na'a i wean inba ma Ubu nfatalik ia tali bu'i a.
Nfamalik munuk,
na nfalak verin ira ne,
“Fyamalik vali afa ini verin Yakobus ovu tamata liak ovi rorang Yesus.”
Nata nban-talik ira ma nti wan liak.
18 Ti ma ni ilyan varverak ana,
vangoa-vanga dawan na'a bu'i,
tevek suldadu ovi rwanar bu'i yai wol rka'a ne,
Petrus nahu ba nti.
19 Herodes nrenar roak ne,
Petrus wol nleal,
ba nsinir ni suldadu ra ti rdava ia,
na'uk wol rdav-nala ia.
Ba ia norat suldadu ovi rwanar Petrus a,
beti nfareta ni suldadu liak boku vali ma ti rfedan suldadu ovi rwanar Petrus.
Notu munuk wean inyai,
beti nban-talik Yudea ma nti kota Kaisarea.
Ia ya'i mnanat vali ia na'a inyai.
Herodes nmata, tevek wol nalang Ubu
20 Herodes nangrova urun tamata ovi rleal kota Tirus ovu kota Sidon.
Tamata avyai rva'at ovu afamtahan i ntali Herodes ni negara,
ba rasdovu ira ma ra'an vai isa,
beti rsinir rira tamata boku ma ti rdiri wahan ralan a,
ma rera verin ia boma irmunuk rsimaklivur ewal ira.
Ira rti lan ma rlolak Blastus ma rotu kida ovu ia.
Blastus ini nsi'ik Herodes ni rahan dawan a.
21 Naran roak amar i Herodes nfadoku ma rsituan ira,
ba neluk ni kadaravit mela ra ma ndoku kadera i ndoku ma nfareta a,
ma nangrihi verin ira.
22 Tamata ovi rarenar Herodes rfadawang ia ma rafwak ne,
“Vaivatul avyai wol rtali tamata,
na'uk rtali ubu isa!”
23 Brian munuk,
na Duila'a Ni sansinir isa ntali lanit ratan nsuta notu ma Herodes nawar ma dawan ia,
tevek nfakaratat tenan ma wol nalang Ubu.
Ba masrat ra'an ia,
nata ti naran i nmata.
24 Nata tamata ovi rarenar ovu rorang Ubu Ni vaivatul ra rtafal ma rivun ira.
25 Barnabas irua Saulus rala roak kubang i ntali tamata ovi rorang Yesus na'a Antiokhia verin kareda i na'a Yerusalem.
Rewal ira rti Antiokhia,
na rovun Yohanes i rfanara vali ia ne,
Markus.