Petrus nfalyawang afa ovi notu roak verin tamata ovi rorang Yesus na'a Yerusalem
1 Rasul ra ovu tamata liak ovi rorang vali Yesus na'a propinsi Yudea rarenar ne,
tamata ovi wol Yahudi rorang roak Ubu Ni vaivatul ra.
2 Ba Petrus nti ma naran Yerusalem,
na tamata Yahudi ovi rorang Yesus rfasala ia,
3 ma rfalak ne,
“Wol kena lahir ma muti tamata ovi wol Yahudi rira rahan ra ma mimunuk mifna'an!”
4 Ba Petrus nfamalik ma al nfalyawang afa avyai munuk verin ira.
5 Ia nfalak ne,
“Amar isa,
na uflurut na'a kota Yope,
na brian munuk wol uka'a wang roak,
ma wean i umifi na'uk wol utub-lufa ma urea afa boku.
Urea afa isa wean maloli dawan ni susun ifa'at,
ntali lanit ratan nsuta ma naklo'i na'a ni susun ifa'at nebang nelang a.
6 Usi'ik maloli yai ralan a,
na urea afwatan ovi earira ifa'at ra,
afwatan ovi ralar ra,
afwatan ovi rla'a ra,
ovu vali manut nangan ra.
7 Urenar vali vai isa nfalak verin ya'a ne,
‘Petrus,
mdiri kikyai ma fwedan afa avyai ma muan!’
8 Na'uk ufalak ne,
‘Wahal ta Duila'a!
Ya'a wol uan afa avyai,
tevek mami inukun ra rfalak ma deka ama'an afa ovi ngra te malmoli ra.’
9 Na'uk vai i ntali lanit ratan yai nfalak ewal ne,
‘Afa ovi Ubu nfalak ne rmerat yai,
deka fwalak ne ngra te malmoli.’
10 Afa i urea yai nma nala fatelu,
beti maloli yai nrata ewal lanit ratan.
11 Brian munuk,
na tamata itelu rma raran rahan i amna'a teri.
Kornelius nsinir tamata avyai tali Kaisarea ma rma.
12 Ba Ubu Ni Roh nfalak ma orang ira,
velik ne wol Yahudi ira,
na'uk deka ralang raruan.
Tamata inean ovi rorang Yesus rovu vali ma amati Kaisarea.
Amaran inyai,
na amati Kornelius ni rahan.
13 Nata ia nfamalik verin ami ne,
ia nsi'ik Ubu Ni sansinir isa ntali lanit ratan nma ma ndiri ni rahan a ma nfalak ne,
‘Msinir tamata ra ma rti Yope,
ma rera tamata isa naran Simon Petrus ma nma.
14 Ia veka nfamalik ivar isa verin mia.
Ivar yai nfalyawang ne,
wean inba ma Ubu veka nsikat oa ovu mu rahan teta tali bira salasilan ra,
ma bira vava'at kakiwal.’ ”
15 Petrus ntafal ma nfalak ne,
“Bet mane ungrihi,
na Ubu Ni Roh nsuta ma nleal lahir ira,
wean i betfasa nleal ita na'a amar ovi rti roak veli.
16 Nata ungnanang nala ewal Duila'a nfalak ne,
‘Yohanes nbaptis tamata ra ovu wear,
na'uk Ubu veka nbaptis mia ovu Ni Roh.’*
17 Ubu nala Ni Roh verin ovi wol Yahudi ra,
wean basil i nala verin ita na'ut i torang Duila'a Yesus Kristus,
ba ya'a wol bisma angal Ubu!”
18 Ti ma rarenar afa ovi Petrus nfalak ra,
na wol rfasala roak ia,
ba rfadawang a'uk Ubu.
Ira rfalak ne,
“Ubu nala vali amar verin tamata ovi wol Yahudi ra ma rahil ma rtalik tali rira salasilan ra ma rorang a'uk Ubu,
boma rira vava'at kakiwal.”
Tamata ovi rorang Yesus rira sidovung na'a kota Antiokhia
19 Tamata ra rfedan roak Stefanus,
beti tamata ovi wol rorang Yesus rwi-rwa lalawatan tamata ovi rorang Yesus.
Ba rivun ira rafla rti wan liak.
Boku rti propinsi Fenisia,
nuhu Siprus ovu boku rti kota Antiokhia.
* Ira rfamalik Ubu Ni Ivar Lolin verin tamata Yahudi ra watan.
20 Tamata boku vali rtali nuhu Siprus ovu kota Kirene.
Ira rti Antiokhia ma rfamalik Ivar Lolin na'a Duila'a Yesus verin tamata ovi wol Yahudi ra.
21 Ubu nala ngrebat verin ira,
ba tamata ovi wol Yahudi ra,
rivun ila'a rorang afa ovi rfalak ra ma rorang Duila'a.
22 Tamata ovi rorang Yesus na'a Yerusalem rarenar afa yai,
ba rsinir Barnabas ma nti Antiokhia.
23 Barnabas ti naran Antiokhia,
na nsi'ik i Ubu naflahar tamata ovi wol Yahudi ra,
ba inan urun i lahir.
Ia nfalak verin ira ne,
“Myorang lalawatan Duila'a ovu ralabira urun.”
24 Barnabas ini tamata lolin ia.
Ubu Ni Roh nfangrebat ia ovu norang urun Ubu.
Ba wean inyai bi tamata rivun rorang Duila'a.
25 Nata Barnabas nban-talik Antiokhia ma nti kota Tarsus ma ndava Saulus.*
26 Ti ma ndav-nala Saulus,
na novun ia nti Antiokhia ma rna'a inyai varat isa.
Irua rasdovu ira ovu tamata ovi rorang Yesus ma rair ira.
Na'a inyai,
na betfasa rfanara tamata ovi rorang Yesus ne,
tamata Kristen.
27 Na'ut inyai,
na nabi boku rtali Yerusalem rti vali Antiokhia.
28 Tali tamata avyai,
na tamata isa naran Agabus.
Ubu Ni Roh nleal ia,
ba ndiri ma nfalak verin tamata ra ne,
Roma rira negara ra munuk veka lafar dawan.
Lafar dawan yai nkena ira na'ut i Kaisar Klaudius nfareta Roma rira negara rivun.*
29 Ba tamata ovi rorang Yesus na'a Antiokhia ra'an vai isa ma rala rira kubang ra verin terarir-valirira ovi rorang Yesus na'a Yudea,
na'uk wol nlia rira ngrebat ra.
30 Ira rasdovuk kubang avyai ma rala verin Barnabas irua Saulus ma rtaha rti Yerusalem ma rala verin dawan kareda ovi reluk penatua.*