Kornelius wean i namifi, na'uk wol ntub-lufa
1 Na'a kota Kaisarea,
na brana isa naran Kornelius.
* Ia neluk suldadu dawan isa na'a Roma rira sidovung suldadu dawan isa naran Italia.
2 Tamata yai not-orang afa ovi Ubu ralan nfalak ra,
ovu ia ovu ni rahan a teta ba'i ralang ma dawan Ubu.
Ia naflurut lalawatan verin Ubu,
ovu vali nala kubang rivun ma nlobang tamata Yahudi ovi kasian ira.
3 Amar isa,
na ka'a bi lera mane sian roak,
na Kornelius wean i namifi na'uk wol ntub-lufa ma nrea Ubu Ni sansinir isa ntali lanit ratan nma verin ia ma nfalak ne,
“Kornelius!”
4 Kornelius nsi'ik sansinir yai,
na nbobar urun i lahir,
ba norat ne,
“Afaka ta Duila'a?”
Sansinir yai nfalak ne,
“Oa motu ma Ubu ralan a lolin,
tevek muflurut lalawatan verin Ia ovu mlobang tamata kasian ra.
Ba Ia nangnanang afa ovi motu avyai.
5 Ba fiang ini msinir lahir tamata ifira ma rti kota Yope ma rera tamata isa naran Simon Petrus.
6 Ia nlolak tamata liak isa naran Simon vali,
ni rahan a nebang tahat.
Tamata yai ba'i nvinit afwatan ulin ra ma nfaear ira.”
7 Ti ma Ubu Ni sansinir i nangrihi nulu Kornelius yai nti,
na ia nera ni tamata irua ovi rkarya na'a ni rahan a ovu ni suldadu isa i nwanar ia.
Ni suldadu ini norang vali Ubu.
8 Ia nfamalik munuk verin ira na'a afa ovi Ubu Ni sansinir nfalak verin ia,
beti nsinir ira ma rti Yope.
Petrus wean i namifi na'uk wol ntub-lufa ma nrea maloli dawan isa
9 Ti ma ni ilyan ana,
lera ndirlola roak,
beti tamata ovi Kornelius nsinir ira yai rbana ma rfaseri Yope,
na Petrus nrata vali ma naflurut na'a rira rahan ratan.*
10 Ia nfarnuang ne nablafar roak,
ba inan ma nafna'an.
Ira rafva'ak obin,
na brian munuk Petrus wol nka'a wan roak ma wean i namifi na'uk wol ntub-lufa ma nrea afa isa.
11 Ia nrea lanit natvadil ma afa isa wean maloli dawan nsuta lanit ivavan ma naklo'i na'a ni susun ifa'at.
12 Na'a maloli yai ralan a,
na afwatan rivun ovi earira ifa'at ra,
ovi rla'a ra,
ovu vali manut nangan ra.
13 Nata vai isa nfalak verin ia ne,
“Petrus,
bwatar ma fwedan afa avyai ma muan!”
Petrus wean i namifi na'uk wol ntub-lufa ma nrea afwatan rivun (Kisah 10:12)
14 Ia nfalak ne,
“Wahal ta Duila'a!
Ya'a wol uan afa avyai,
tevek mami inukun ra rfalak ma deka ama'an afa ovi ngra te malmoli* ra.”
15 Vai yai nfalak ewal ne,
“Afa ovi Ubu nfalak ne rmerat yai,
deka fwalak ne ngra te malmoli.”
16 Afa i Petrus nrea wean mifi yai nma nala fatelu,
beti maloli yai nrata ewal lanit ratan.
17 Ba Petrus nanovak afa i beti nrea yai na'a ralan a.
Brian munuk,
na tamata ovi Kornelius nsinir ira yai rma ma raran Yope.
Ira rorat ma al rdava ne,
Simon ni rahan na'a inba,
ba rfaturu rahan verin ira ma ti rdiri lahir falfolat ngoran.
18 Ira rera tamata ra ma rorat ne,
“Beta ne Simon Petrus nana'a teri rahan ini?”
19 Na'ut inyai,
na Petrus nanovak na'a ralan obin ma al nka'a afa i nrea yai ihin a.
Ba Ubu Ni Roh nfalak verin ia ne,
“Tamata itelu rdava oa.
20 Bwatar ma msuta kikyai ma mimunuk miti.
Ira wol Yahudi ira,
na'uk deka ralam raruan,
tevek usinir ira ma rma.”
21 Ba Petrus nsuta ma nfalak verin tamata avyai ne,
“Kida averi,
ya'a ini tamata i mdyava a.
Afakinimi mya ini?”
22 Ira rfalak ne,
“Roma rira suldadu dawan isa naran Kornelius nsinir ami ma amama ini.
Ia ni vava'at nmalola ovu nalang ma dawan Ubu,
ovu vali Yahudi ra rfalak ne,
lolin ia.
Ubu Ni sansinir isa tali lanit ratan nma ma nfalak verin ia ma nera oa muti ni rahan a,
ma nrenar afa ovi fwalak ra.”
23 Ba Petrus nfalak ma tamata avyai rna'a rahan yai ovan isa veki.
Ni ilyan ana,
irmunuk Petrus rban-talik ahu yai.
Tamata ovi rorang Yesus,
boku rtali Yope rban-orang ira vali.
24 Amar isa nelak,
beti raran Kaisarea.
Kornelius nasdovu roak ni tiniman ra,
ovu vali ni kidabela ra ma al rnaban ira.
25 Na'ut i Petrus nti rahan ralan,
na Kornelius nti ma nsangatur na'a Petrus wahan ralan a,
tevek nalang ia.
26 Na'uk Petrus nlobang ia ma ndiri ma nfalak ne,
“Mdiri ta baba!
Ya'a ini tamata watan ya'a wean oa.”
27 Irua rdiri rangrihi obin,
na Petrus nti rahan ralan ma nsi'ik tamata rivun rasdovu roak ira.
28 Ba nfalak verin ira ne,
“Terang a valing averi,
mia mkya'a roak ne,
mami inukun ra rfalak teri lahir ma tamata Yahudi ra deka rasdovu ovu tamata ovi wol Yahudi ra,
te ralola ira na'a rira rahan ra.
Na'uk Ubu nfaturu roak verin ya'a ne,
itmunuk wead isa watan,
ba deka ufalak ne,
tamata ra ngra ira.
29 Wean inyai,
bi mera ya'a,
na uma lahir.
Ba fiang ini mane uka'a ne,
afakinimi mera ya'a ma uma ini?”
30 Kornelius nfalak ne,
“Amar ifa'at nti roak veli,
ka'a bi lera sian roak ma wean amar ini,
* na uflurut obin na'a ning rahan.
Brian munuk,
na tamata isa nma ma ndiri wahang ralan a.
Ni ravit vanan urun.
31 Ia nfalak verin ya'a ne,
‘Kornelius,
Ubu nrenar roak mu falurut a,
ovu nsi'ik roak ne,
mlobang tamata ovi kasian ira.
32 Ba msinir tamata ra ma rti Yope,
ma rera Simon Petrus ma nma.
Ia nlolak tamata liak isa vali naran Simon,
ni rahan a nebang tahat.
Tamata yai ba'i nvinit afwatan ulin ra ma nfaear ira.’
33 Ba usinir lahir brana boku ma rera oa ta baba.
Ralam a lolin bi mwa ini.
Fiang ini amasdovu munuk roak ami na'a Ubu wahan ralan a ma amrenar afa ovi nfareta verin oa ma fwalyawang verin ami.”
Petrus nfamalik Ubu Ni Ivar Lolin verin Kornelius ovu tamata ovi rna'a ni rahan
34 Nata Petrus nfalak ne,
“Did tinemun,
uka'a roak ne,
Ubu wol nlobang a'uk tamata Yahudi ra,
35 na'uk na'a lanit ivavan a,
Ia inan tamata iki watan i notu afa ovi lolin ra ovu nalang Ia,
velik ne ntali bangsa inba watan.
36 Ba terang a valing averi,
mia mkya'a roak Ubu Ni Ivar i nfalak verin tamata Israel ra.
Ivar yai wean ini:
tamata ralarira ra veka malinan ovu Ubu,
nahu Yesus Kristus i tamata ra munuk rira Duila'a verin Ia.
37 Mia mkya'a munuk roak afa ovi Yesus notu ra na'a propinsi Yudea munuk.
Ia notu lan na'a propinsi Galilea,
na'ut i Yohanes i nbaptis tamata ra nfalak ma tamata ra rahil ma rtalik tali rira salasilan ra,
boma nbaptis ira.
38 Bir tinemun mkya'a roak Ivar na'a Yesus i ntali ahu Nazaret.
Ubu nfili Ia ma nala Ni Roh ma nleal Ia,
ovu nala ngrebat verin Ia.
Ubu novun Ia,
ba ti notu afa lolin rivun na'a wan inba watan na'a Israel,
ovu notu ma tamata ovi nitdawan nleal ira,
lolin ewal ira munuk.
39 Did tinemun,
ami ini amsi'ik roak afa ovi Yesus notu ra na'a Yerusalem ovu na'a wan liak ovi tamata Yahudi ra rleal.
* Ti nata rfaklo'i Ia na'a aa walwalur ma rfedan Ia.
40 Na'uk ti ma amar itelu nelak,
na Ubu nfava'at ewal Ia tali matmatan ma nfaturu Ia verin tamata ra.
41 Ubu wol nfaturu Yesus verin tamata ra munuk,
na'uk verin ami tamata ovi nfili roak a ma amfamalik Ia.
Nva'at ewal tali matmatan,
beti amafna'an ovu amafnenu ovu Ia.
42 Ia nfareta ami ma amfamalik Ni Ivar Lolin verin tamata ra,
ovu vali amfalak verin ira ne,
Ubu nfili roak Ia ma nfaleka inukun verin tamata ovi rva'at ra ovu ovi rmata roak a.
43 Tali lalan ana,
nabi ra munuk rfamalik Yesus.
Ira rfamalik ne,
Ubu veka na'i vatuk tamata iki watan i norang Yesus,
ni salasilan ra nahu Yesus Ni ngrebat a.”
Ubu nala vali Ni Roh a verin tamata ovi wol Yahudi ra
44 Na'ut i Petrus nangrihi obin,
na Ubu Ni Roh nsuta ma nleal munuk tamata ovi rarenar ni vaivatul ra.
45 Tamata Yahudi* ovi rorang Yesus ma irmunuk Petrus rtali Yope rma yai rtalkaka,
tevek Ubu nala Ni Roh verin tamata ovi wol Yahudi ra vali.
46 Ira rka'a roak ne,
Ubu Ni Roh nleal vali tamata ovi wol Yahudi ra,
tevek rarenar ira rangrihi ovu vai ovi wol rka'a ra* ma rfadawang Ia.
Ba Petrus nfalak ne,
47 “Did tinemun,
eka msyi'ik.
Ubu Ni Roh a nleal roak tamata ovi wol Yahudi ra,
wean i nana'a ita,
tamata Yahudi.
Ba deka totu teri ma rbaptis ira ovu wear.”
48 Ba ia nfalak verin tamata ovi rorang Yesus ma rbaptis ira na'a Yesus Kristus naran a ovu Ni ngrebat a.
Rbaptis roak ira,
beti rera verin Petrus ma nlolak ira amar ifira vali.