Saulus nahil ma ntalik tali ni salasilan ra ma norang Yesus
1 Na'uk Saulus ndava watan linga'an obin mane nwi-nwa ovu nfedan tamata ovi rorang Duila'a Yesus.
Ba ia ti nlolak Yahudi rira Mela Falurut Ila'a.
2 Saulus nera surat kuasa tali ia ma ntaha verin Yahudi rira dawan ovi rna'a rira rahan falurut ra na'a kota Damsyik,
boma wean i ntuan vata te brana ovi rorang Duila'a Yesus Ni Linga'an a,
* na ntaha ira ma novun ira rti Yerusalem.
3 Saulus nbana ma ti nfaseri roak Damsyik,
na brian munuk lyawan ntali lanit nsuta ma nlilit ia.
4 Ba nleka lahir nsuta lanun,
beti nrenar vai isa nfalak verin ia ne,
“Saulus,
Saulus!
Afakinimi mwi-mwa Ya'a i?”
5 Saulus norat ne,
“Iki Oa ta Duila'a?”
Ba vai yai nfalak ne,
“Ya'a ini Yesus i mwi-mwa a.
6 Bwatar kikyai ma muti kota ralan eri,
tevek na'a ineri,
na tamata isa veka nfalak verin oa na'a afa ovi musti motu ra.”
7 Brana ovi rovu Saulus rdir-teri ma wol vair lahir,
tevek rarenar vali vai yai,
na'uk wol rarea tamata isa vali.
8 Saulus ndiri ma nvelar matan a,
na'uk wol nrea afa isa vali.
Ba rtaha liman a ma rfabana ia rti Damsyik.
9 Amar itelu,
na ia wol nsirea ovu wol nafna'an-nafnenu vali.
10 Na'a Damsyik,
na tamata isa naran Ananias.
Ia norang Yesus.
Amar isa,
na wean i namifi na'uk wol ntub-lufa ma nrenar ne,
Duila'a* nera ia ma nfalak ne,
“Ananias!”
*
Ananias nvalat ne, “Ya'a ini ta Duila'a.”
11 Duila'a nfalak verin ia ne,
“Mdiri ma bwana lahir muti linga'an i rfanara ia ne,
‘Linga'an i Nmalola’,
ma mwelat tamata isa naran Yudas ni rahan.
Morat al mdava tamata isa naran Saulus i ntali kota Tarsus.
Tamata yai naflurut verin Ya'a obin.
12 Ia wean i namifi na'uk wol ntub-lufa ma nsi'ik roak tamata isa naran Ananias nma ma nfadoku liman na'a ia ma nsirea ewal.”
13 Ba Ananias nfalak ne,
“Duila'a,
ya'a urenar roak tamata rivun rfamalik tamata ini ne,
notu afa sian rivun ila'a roak na'a Yerusalem verin tamata ovi rorang Oa.
14 Yahudi rira dawan mela falurut ra rtorung roak ma rala fareta verin ia ma ntaha munuk tamata ovi rorang Oa.”
15 Na'uk Duila'a Yesus nfalak verin ia ne,
“Muti a'uk,
tevek Ya'a ufili roak ia ma nfabana Ning karya,
ma ti nfamalik Ya'a verin tamata Israel ra ovu vali tamata ovi wol Yahudi ra,
ntafal vali rira raja ra.
16 Ya'a veka ufalyawang verin ia na'a angangal rivun ovi rotu ma musti nfarnuang wawa'uk,
tevek norang Ya'a.”
17 Ba Ananias nti rahan yai ma nti ralan ma nfadoku liman a na'a Saulus,
ma nfalak verin ia ne,
“Terang i Saulus,
Duila'a Yesus i mrea Ia na'a linga'an i mahu mwa ini,
nsinir ya'a ma uma,
boma msirea ewal,
ovu vali Ubu Ni Roh nsoru lahir ralam a.”
18 Ananias nfalak munuk wean inyai,
na brian munuk afa boku wean ian ki'in ra rleka tali matan a ma nsirea lahir.
Ba nbatar ma Ananias nbaptis ia.
19 Nata nafna'an ma nangrebat ewal roak.
Saulus nfamalik Ubu Ni Ivar Lolin a na'a Yahudi rira rahan falurut ra (Kisah 9:20)
Saulus nsiair na'a kota Damsyik
Saulus nlolak tamata Damsyik ovi rorang Yesus ma ni amar ifira na'a inyai.
20 Ia nti lahir Yahudi rira rahan falurut ra ma nfamalik Yesus verin tamata ra ne,
Ubu Yanan Ia!
21 Tamata ovi rarenar ia rtalkaka munuk,
ba rfalak ne,
“Ya'i yo,
tamata ini lan a notu sian tamata ovi rorang Yesus na'a Yerusalem.
Ia nma ini ma ntaha tamata ovi rorang Yesus,
ma novun ira ti ma rdiri Yahudi rira dawan mela falurut waharira ralan ra.”
22 Na'uk Ubu ntafal ngrebat verin Saulus ma nsiair,
ba notu ma tamata Yahudi ovi rna'a Damsyik wol rangal nala ia,
tevek nfalyawang lahir verin ira ne,
Yesus yai Raja i ntevut dida salasilan ra.
23 Amar rivun relak roak,
na Yahudi rira dawan ovi rna'a Damsyik ra'an vai isa ma rfedan ia.
24 Na'uk Saulus nka'a roak ne,
mane rfedan ia,
tevek ovan-amar,
na tamata Yahudi ra rwan lalawatan ia na'a kota ni falfolat ila'a ovi na'a rira fidu ra,
boma rfedan ia.
25 Ba ovan isa,
na Saulus ni kida ra rma ma rala ia ma rfadoku ia na'a ahir dawan isa ralan a,
beti rtolar ia tali kota ni tembok dawan.
Tamata ovi rorang Yesus rtolar Saulus tali kota Damsyik ni tembok dawan (Kisah 9:25)
Saulus nlolak tamata ovi rorang Yesus na'a Yerusalem
26 Saulus ti naran Yerusalem,
na ndava mane ti nasdovu ia ovu tamata ovi rorang Yesus,
na'uk rbobar ia,
tevek wol rorang ne,
ia ralan urun roak ma norang Yesus.
27 Na'uk Barnabas ntorung ma nala ia,
ma novun ia ti nfavotuk verin rasul ra,
ma nfamalik verin ira na'a i wean inba ma Saulus nrea Duila'a na'a ni banbanan a,
ovu Duila'a nangrihi verin ia.
Ia nfamalik vali ne,
wean inba ma Saulus nabrahi ma nala Yesus naran a ala nsiar na'a Damsyik.
28 Ba Saulus nlolak ira ma irmunuk tia ma ira na'a Yerusalem.
Ia wol nbobar ma nala Duila'a naran a al nsiair.
29 Saulus nangrihi verin Yahudi ovi rala vai Yunani ovu rsisoal ira,
ba rdava linga'an mane rfedan ia.
30 Nata teran a valin ovi rorang Yesus rarenar afa avyai,
ba rovun ia rti kota Kaisarea,
beti rlobang ia ma nti kota Tarsus.
31 Ba na'a amar avyai,
na tamata ovi rorang Yesus na'a propinsi Yudea,
propinsi Galilea ovu propinsi Samaria malinan watan.
Na'ut inyai,
na Ubu Ni Roh nfangrebat tamata ovi rorang Yesus na'a rira inorang ovu nfaloling ralarira ra,
ma rira sidovung ra rtafal ma rivun,
ovu vali ralang ovu rfadawang Ia.
Petrus notu mujizat na'a kota Lida ovu kota Yope
32 Petrus nbana nti wan rivun,
ma nalola tamata ovi rorang Yesus.
Amar isa,
na ti nalola tamata ovi rorang Yesus na'a kota Lida.
33 Nana'a inyai,
na ntuan brana isa naran Eneas.
Brana ini varat iwalu roak ntuba watan ni ko'i a,
tevek naklukut.
34 Petrus nfalak verin ia ne,
“Eneas,
Yesus Kristus notu ma lolin ewal roak oa.
Bwatar ma mususan wam i mtuba yai.”
Na'ut inyai vali,
na Eneas nbatar lahir.
35 Tamata rivun ovi rleal Lida ovu Saron rsi'ik Eneas,
na lolin roak ia,
ba rivun ira rorang Duila'a.*
36 Na'a kota Yope,
na vata isa naran Tabita norang vali Yesus.
Naran na'a vai Yunani ne,
Dorkas.
* Ia ba'i notu a'uk afa lolin ovu nlobang tamata kasian ra.
37 Na'ut inyai,
na nawar ia ma nmata,
ba rliru ia beti rfadoku ia na'a kamar i na'a ratan.
38 Lida ovu Yope rsifaseri watan ira,
ba Yesus Ni tamata ovi rna'a Yope rarenar ne Petrus nana'a Lida,
ba rsinir tamata irua ma ti rera ia.
Rtuan ia ma rfalak verin ia ne,
“Baba,
mwa ma tati Yope kikyai.”
39 Ba Petrus nasusan wan ma irmunuk rti.
Raran Yope,
na rovun ia rarata kamar i Dorkas ntuba a.
Vata varu ovi rna'a inyai rdir-lilit ia ma rvakar,
ovu rfaturu verin ia ravit ovu kadaravit liak ovi Dorkas noar verin ira na'ut i nva'at obin.
40 Petrus nsinir ira munuk ma rti murin,
beti nsangatur ma naflurut.
Naflurut munuk,
beti nsi'ik matmatan yai ma nfalak ne,
“Tabita,
bwatar kikyai!”
Ba Tabita nvelar matan a ma nsi'ik Petrus,
na nbatar ma ndoku lahir.
41 Ba Petrus ntaha liman a ma nfadiri ia,
beti nera varu avyai ovu tamata liak ovi rorang Yesus ma nfaturu verin ira ne,
Tabita nva'at ewal roak.
42 Ivar ini nsoru lahir Yope,
ba tamata rivun rorang Duila'a.
43 Petrus ya'i mnanat ia na'a inyai,
ma nlolak tamata isa naran Simon i ba'i nvinit afwatan ulin ra ma nfaear ira.