1 Saulus ntorung vali ma rfedan Stefanus.
Saulus nwi-nwa tamata ovi rorang Yesus na'a Yerusalem
Na'a amar yai vali,
na tamata ra mulai ma rwi-rwa ma dawan tamata ovi rorang Yesus na'a Yerusalem,
ba rafla tia ma watan ma ti rleal ahu ovi rna'a propinsi Yudea ovu propinsi Samaria.
Na'uk rasul ra rna'a watan Yerusalem.
2 Tamata ovi rot-orang afa ovi Ubu ralan nfalak ra,
boku ti ma roving Stefanus.
Ira ralarira lalau urun,
ba rvakar ma rfaktanit lahir.
3 Na'uk Saulus nkiwal ma nwi-nwa tamata ovi rorang Yesus.
Ba ntali rahan isa nti rahan isa ma nving vatuk vata ovu brana ovi rorang Yesus,
ma nala ira rti bu'i ralan.
Filipus nfamalik Ubu Ni Ivar Lolin ma ti nsoru munuk roak propinsi Samaria
4 Tamata inorang ovi rafla talik roak Yerusalem,
rti inba watan ma rfamalik Ubu Ni Ivar Lolin verin tamata ra.
5 Ba Filipus nti kota isa na'a Samaria ma nfamalik Raja i ntevut dida salasilan ra verin tamata ovi rna'a inyai.*
6 Ti ma tamata rivun avyai rarenar afa ovi Filipus nfamalik ra,
ovu rsi'ik faneak ovi notu ra ma al rfaturu Ubu Ni ngrebat a,
na irmunuk ralarira isa ma rtorung afa ovi nfalak ra.
7 Filipus nfareta nait sian ra ma rti talik tamata rivun ovi nait sian ra rleal ira.
Nait sian avyai rafwak urun ia,
beti rati.
Tamata rivun ovi raklukut ovu tamata ovi rtakil ra lolin lahir ira.
8 Ba tamata ovi rna'a kota yai ralarira lolin urun i lahir.
9 Na'a kota yai,
na tamata isa naran Simon.
Ia ntaha afa te notu ni afnitu ra ma mnanat roak ia na'a inyai,
ba nfabriang tamata Samaria ra,
ovu vali nfakaratat tenan ma nfalak ne,
tamata dawan ia.
10 Ba tamata ko'u ovu dawan ra munuk rorang ia ma rfalak ne,
“Tamata ini ni ngrebat tali Ubu,
ba tfanara ia ne Ngrebat Ila'a.”
11 Ira rorang ia,
tevek mnanat roak nfaturu ni ngrebat ma notu ma tamata ra rtalkaka ovu ni afnitu ra.
12 Na'uk ti ma Filipus nfamalik Ivar Lolin na'a i wean inba ma Ubu nfareta tamata ra wean lahir Raja ovu nfamalik vali Yesus,
Raja i ntevut dida salasilan ra,
na vata ovu brana rivun ira rorang afa ovi nfalak ra ma nbaptis ira.
13 Simon norang afa ovi Filipus nfalak ra,
ba Filipus nbaptis vali ia.
Nbaptis munuk ia,
na norang Filipus nti inba watan.
Ia nrea Filipus notu mujizat dawan ra ovu faneak dawan ovi tamata ra wol rot-nala,
ba Simon ntalkaka lahir.
14 Na'a Yerusalem,
na rasul ra rarenar roak ne,
tamata rivun na'a propinsi Samaria rtorung roak ma rala Ubu Ni vaivatul ra na'a ralarira ra,
ba rsinir Petrus irua Yohanes ma rti ineri.
15 Ti ma raran Samaria,
na raflurut verin Ubu ma nala Ni Roh ma nleal tamata ovi beti rorang Yesus,
16 tevek tali ira,
na Ubu Ni Roh wol nleal tamata isa vali obin.
Rbaptis roak ira,
na'uk rala watan Duila'a Yesus naran a.
17 Ba Petrus irua Yohanes rfadoku limarira na'a ira,
na Ubu nala Ni Roh ma nleal lahir ira.
18 Simon nsi'ik,
na rasul avyai rfadoku roak limarira na'a tamata ra ma Ubu nala Ni Roh verin ira,
ba ntaha kubang ti verin Petrus ovu Yohanes ma nfalak ne,
19 “Era verin mia ma myala ngrebat yai verin ya'a vali,
boma wean i ufadoku limang na'a tamata iki watan,
na Ubu veka nala Ni Roh verin ira.”
20 Na'uk Petrus nfalak verin ia ne,
“Fara Ubu not-visal oa ovu mu kubang a!
Oa munovak ne,
bisma fwaha Ubu Ni Roh ovu kubang?
21 Oa wol mu hak ma movu ami na'a mami karya ini,
tevek ralam wol kena lahir na'a Ubu wahan ralan a.
22 Ba mahil ma mtalik tali afa sian i ralam a nlewan yai ma mera verin Duila'a,
boma na'i vatuk afa sian i munovak yai.
23 Ya'a uka'a roak ne,
ralam a sian da'in,
ovu vali mu salasilan ra rkeak teri roak oa.”
24 Ba Simon nera verin ira ne,
“Kida averi,
miflurut verin Ubu,
ma fara ne afa ovi beti fyalak yai deka rkena ya'a.”
25 Ti ma irua rfamalik munuk roak Ubu Ni vaivatul ra,
beti rewal ira rti Yerusalem.
Wol raran Yerusalem obin,
na rfamalik vali Ubu Ni Ivar Lolin yai na'a ahu rivun ovi rna'a Samaria.
Filipus nbaptis fareta dawan isa ntali Etiopia
26 Amar isa,
na Ubu Ni sansinir isa ntali lanit ratan nfalak verin Filipus ne,
“Bwatar kikyai!
Mahu tranan ma muti linga'an i ntali Yerusalem nsuta ma naran Gaza.
Linga'an yai nana'a wan lean vu dawan,
ba wol tamata rna'a inyai.”
27 Ba Filipus nbatar ma nbana roak.
Ia nbana ma ntuan tamata isa ntali negara Etiopia.
Tamata yai dawan fareta ia ma nkarya verin rira raja vata i naran Kandake.
* Ia nsi'ik munuk lahir negara yai ni metan ra.
Ia nti Yerusalem ma nfadawang Ubu.
28 Tamata yai navul ni kareta ma newal ia nti Etiopia.
Na'a ni kareta a,
na nbas kitab i lalan a nabi Yesaya ntulis a.
29 Ubu Ni Roh a nfalak verin Filipus ne,
“Muti ma mebang kareta yai!”
30 Ba Filipus ti ma nebang kareta yai ma nrenar tamata yai nbas tali Yesaya ni kitab a.
Filipus norat ia ne,
“Baba,
oa mka'a afa ovi bwas yai ihin a te wahal?”
31 Ia nfalak ne,
“Wean inba ma uka'a,
wean i wol tamata ma nfalyawang kitab ini ihin a verin ya'a?”
Ba nera ma Filipus nrata ma irua rdoku ni kareta.
32 Ubu Ni vaivatul ovi nbas yai ngoarira wean ini:
“Ia wean domba isa i rovun Ia ma ti rfedan Ia.
*
Ia wean domba ko'u i rngotal vulun a, na'uk wol vain.
33 Ira rfalak sian Ia ma rfama'it Ia,
ovu vali wol kena lahir ma rukun Ia.
Wol tamata isa rfamalik Ia ubun a nusin ra,
Tevek rfedan roak Ia ma wol nana'a lanit ivavan a.”*
Filipus nfamalik Surat Ralan verin Etiopia ni tamata dawan fareta isa na'a ni kareta ralan (Kisah 8:32)
34 Tamata yai norat Filipus ne,
“Baba,
eka fwalak verin ya'a ne,
Yesaya ka'i nfamalik ia,
te tamata liak?”
35 Ba Filipus mulai ma nair ia,
na nala lan vaivatul avyai,
ma nfalyawang Ubu Ni Ivar Lolin i nfamalik Yesus verin ia.
36 Ira rbana nata ti ma raran wan isa i wear nana'a.
Tamata yai nfalak verin Filipus ne,
“Baba,
eka msi'ik wear ini!
Afaka wol kena obin ma wol bwaptis ya'a?”
Tamata yai nfalak ne,
“Ya'a orang urun ne,
Yesus Kristus yai Ubu Yanan a.”]*
38 Nata nfareta tamata i ntaha ni kareta ma na'a teri veki,
beti irua rsuta ma rti wear yai ralan ma Filipus nbaptis ia.
39 Ti ma irua rdata tali wear yai,
na brian munuk Ubu Ni Roh a nala Filipus tali wan yai.
Ba dawan fareta Etiopia yai wol nrea roak ia,
na'uk newal watan ia ovu ralan lolin urun.
40 Brian munuk,
na Filipus na'a roak kota Asdod.
Ia nbana ma ti nfamalik Yesus na'a ahu ovi rna'a inyai,
nata ti naran kota Kaisarea.