Stefanus nangrihi verin tamata Yahudi ra na'a rira sidovung dawan
1 Yahudi rira Mela Falurut Ila'a norat Stefanus ne,
“Ba afa ovi rfalak ra kena te wahal?”
2 Stefanus nfalak ne,
“Terang a valing ovu yamang averi,
eka mryenar!
Ubud-nusid Abraham wol nleal ahu Haran obin,
na nleal wan dawan isa naran Mesopotamia.
Na'ut inyai,
na Ubu i sa'i dawan Ia nfavotuk Ia verin Abraham.
3 Ubu nfalak verin ia ne,
‘Muti talik mu negara ovu mu tiniman ra,
ma muti wan i veka ufaturu verin oa.’*
4 Ba Abraham nban-talik negara i rfanara ia ne Kasdim,
* ma nti ahu isa naran Haran ma nleal inyai.
Ia nana'a inyai ti naran i yaman nmata,
beti Ubu nsinir ia ma nma wan i fiang ini tleal.
5 Na'ut inyai,
na Ubu wol nala lanun kedan a vali verin ia.
Na'uk Ubu notu tnorung verin ia.
Ubu nfalak na'a Ni Tnorung ne,
Ia veka nala lanun verin Abraham ovu ubun nusin ra,
velik ne na'ut inyai,
na wol yanan obin.
6 Ubu nfalak verin ia ne,
‘Ubum-nusim ra veka reluk tamata dakan na'a negara liak.
Tamata ovi rna'a negara yai veka rotu sian ububir-nusibira ra ma reluk tamata sansinir,
ti naran varat ratut ifa'at.
7 Na'uk Ya'a veka ukun tamata ovi rotu ma tamata Yahudi ra reluk tamata sansinir,
beti ububir-nusibira ra rban-talik negara yai ma rma wan ini ma raraning Ya'a.’*
8 Ba Ubu nala tnorung verin Abraham ma nfalak verin ia ovu brana ra munuk na'a ni rahan ovu ubun nusin brana ra ne,
veka rsunat ira al nfaneak ne,
Ubu yanan ira.
* Ni amar kena ma rarali Abraham yanan naran Ishak,
ma ni amar iwalu,
na Abraham nsunat ia.
Ishak yanan Yakub,
nata Yakub yanan brana vutu rahin irua,
na nsunat vali ira.
Yakub yanan avyai reluk ubud-nusid ra.
9 Yakub yanan isa naran Yusuf.
A'an ra ralar sian ia,
ba rfedi ia verin tamata Mesir ra,
ma neluk tamata sansinir.
Na'uk Ubu nfatuang ia,
10 ovu nfatalik ia tali ni susa ra munuk.
Ubu nala kaka'a dawan verin ia,
ma notu ma Mesir rira Raja Firaun inan ia.
Ba Firaun nsikat ia ma nfareta Mesir ovu nsi'ik munuk afa ovi rna'a ni rahan dawan.
11 Nata lafar dawan nkena Mesir ovu Kanaan,
ba rtuan susa dawan ila'a.
Na'ut inyai,
na ubud-nusid ra vali wol rira afamtahan roak ma ra'an.
12 Amar isa,
na Yakub nrenar ne,
gandum na'a Mesir,
ba nsinir ubud-nusid ra rti ma rfaha gandum.
Ira betfasa rti Mesir.*
13 Na'ut i rti ewal Mesir,
na Yusuf nfalyawang ia verin a'an a warin ra.
Ba tamata Mesir ra rfamalik Yusuf a'an a warin ra verin Raja Firaun.
14 Nata Yusuf nsinir ira ma rti ma rfalak verin yaman i Yakub,
ma irmunuk ni tiniman ra rti Mesir.
Ni tiniman ra munuk tamata vutfitu rahin ilima.
15 Ba Yakub ovu ni tiniman ra rti Mesir.
Ira rleal inyai,
ti naran ia ovu ubud-nusid ra rmata.
16 Tamata ra rtaha luririra ra rti ahu i naran Sikhem,
ma rfadoku na'a van isa ralan a.
Van ini lalan a Abraham nfaha ovu kubang perak tali Hemor yanan ovi rna'a Sikhem.*
17 Sarseri roak ma Ubu nfakena Ni tnorung verin Abraham,
na dida tamata Yahudi ovi rna'a Mesir rtafal ma rivun ila'a roak ira.
18 Nata rsikat raja liak isa ma nfareta Mesir.
Raja ngorva'an yai wol nka'a akataka na'a Yusuf.
19 Raja yai nweang ubud-nusid ra,
ma notu sian ira.
Ia nsinir ira ma rvatuk rira kasiko'u yanat ovi beti rarali ra ma rmata.
20 Na'ut inyai,
na beti rarali Musa,
ovu Ubu notu ma felan a lolin urun.
Ba renan ovu yaman a rwanar fanfonak ia na'a rira rahan,
ti naran vulan itelu.
21 Nata rfadoku ia na'a murin ma raja Firaun yanan vata nrea ia,
ba nala lahir ma nsiwota ia neluk yanan.*
22 Tamata Mesir ra rair rira kaka'a munuk verin Musa.
Dawan roak ia,
na nka'a urun ma nangrihi ovu ni ngrebat na'a afa ovi notu ra.
23 Musa ni varat vutfa'at roak,
na amar isa ia nanovak na'a ralan a ne,
inan ma ti nalola teran a valin tamata Israel ra.
24 Ti ma nsi'ik tamata Mesir isa notu sian tamata Israel isa,
ba nlotar ni tamata yai ovu nbalas afa ovi tamata Mesir yai notu ma nfedan ia.
25 Musa nanovak ne,
tamata Israel ra veka rka'a roak ne,
Ubu nsinir ia ma nfatalik ira tali Mesir,
boma deka reluk tamata sansinir kikyai.
Na'uk wol rka'a.
26 Ni ilyan ana,
ia nrea brana Israel irua rsitaha,
ba inan ma notu ma rsiotu lolin ewal ira.
Ia nfalak ne,
‘Terang a valing averi,
eka mryenar!
Mirua ini iya'an iwarin mia,
ba notu afakinimi msyiotu sian mia?’
27 Na'uk tamata i notu sian tamata liak yai nala'ing Musa,
beti nfalak ne,
‘Iki nsikat oa ma fwaleka inukun verin ami ovu fwareta ami?
28 Beta ne oa mane fwedan ya'a,
wean i inravin fwedan tamata Mesir yai?’*
29 Musa nrenar vaivatul avyai,
na nafla talik Mesir ma nti negara isa naran Midian.
Musa neluk tamata dakan roak ma nleal inyai.
Nata nsifa ma yanan brana irua.
30 Varat vutfa'at nelak roak beti amar isa,
na Ubu Ni sansinir isa tali lanit ratan nma ma nfavotuk ia verin Musa na'a wan lean vu dawan i nebang vuar Sinai.
Sansinir yai nvotuk na'a yafu ongan i na'a kadkadir ralan.
31 Musa nsi'ik yafu ongan yai ma ntalkaka lahir,
ba ti nfaseri ma nsi'ik ma lolin,
na nrenar Duila'a nfalak verin ia ne,
32 ‘Ya'a Ubu Ya'a.
Ubum-nusim ra Abraham,
Ishak ovu Yakub raraning Ya'a.’
Musa nbobar ma raruru lalean ia,
ba wol nsi'ik roak kadkadir yai.
33 Nata Duila'a nfalak verin ia ne,
‘Eka maling mu tatea ra,
tevek wam i mdiri yai nmerat urun.*
34 Usi'ik roak ne,
wean inba ma tamata Mesir ra rotu sian Ning tamata ra.
Urenar roak rira maruhuk ra,
ba uma ma ufatalik ira tali rira susa ra.
Ba mwa kikyai ma usinir oa ma muti ewal Mesir.’*
35 Musa ini Israel ra rafena ia,
ma rfalak verin ia ne,
‘Iki nsikat oa ma fwareta ami ovu fwaleka inukun verin ami?’
Na'uk Ubu nsinir Musa ma nban-ulu verin ira ma nfatalik ira,
boma deka reluk tamata sansinir kikyai.
Ubu nsinir Ni sansinir ntali lanit ratan ma nfavotuk ia na'a yafu ongan i na'a kadkadir ralan.
36 Musa notu mujizat ra ovu faneak ovi tamata ra wol rot-nala,
ma novun Israel ra ma rban-talik Mesir.
Ira rbana earira ma retal Tahat Valvulin,
ovu vali rna'a wan lean vu dawan ti naran varat vutfa'at.
37 Musa ini tamata i nfalak verin Israel ra ne,
‘Ubu veka nfili tali bir tinemun nabi isa ma ti nfamalik Ni Ivar Lolin.
Ia nfili tamata yai verin mia wean i nfili ya'a.’*
38 Musa novun ubud-nusid ra ma rasdovu ira na'a wan lean vu dawan.
Ubu Ni sansinir yai nangrihi verin ia na'a vuar Sinai.
Ubu nala vali Ni vaivatul ovi rala vava'at verin tamata ra verin Musa,
ma ti nfamalik verin ita.
39 Na'uk ubud-nusid ra rafena ma rot-orang afa ovi nfalak ra,
ba rala'ing ia,
tevek inar ma rewal ira rti Mesir.
40 Ira rfalak verin Harun ne,
‘Eka motu ubu boku verin ami,
ma rlobang ami ma rfaturu linga'an verin ami.
Amfalak wean ini,
tevek ami wol amka'a roak ne,
afaka nkena Musa i novun ami ma amban-talik Mesir!’*
41 Ba na'ut inyai,
na rotu walut isa,
felan a wean karba yanan.
Nata rfedan afwatan ra ma rasnuri ira al raraning walut yai,
ovu rotu snoba ma al rsoba afa i ira ka'i rot-nala roak yai.
42 Na'uk Ubu nangrova ira,
ba wol nkamlabir ira.
Ia nsi'ik watan ma ira ka'i raraning lera,
vulan ovu nara ra.
Afa avyai rfakena vaivatul ovi nabi ra rtulis roak na'a Surat Ralan.
Nabi Amos nfalak ne,
‘Hoi tamata Israel averi,
mia fyedan afwatan ra ma reluk bira korban ra ma myala roak verin Ya'a?
Na'ut i mnya'a wan lean vu dawan ti naran varat vutfa'at,
na wol myala korban verin Ya'a!
43 Mia byara befak isa miti inba watan,
ma fyadoku bira walut i naran Molokh na'a ralan.
Mia mtyaha bira ubu isa vali i felan wean nara isa i fyan-aran ia ne,
Refan.
Myotu walut ra ma mryaning ira,
ba Ya'a veka otu ma negara liak ra raling vatuk mia tali bira negara,
ma rtaha mia miti wan i na'a kota Babel ni lihir timur veli.’*
44 Na'ut inyai,
na ubud-nusid ra rleal wan lean vu dawan,
na ira rvara rira befak dawan i ba'i raraning Ubu na'a.
Ubu nfareta Musa ma notu befak dawan i nfaturu verin ia,
ba Musa not-orang afa ovi nfalak ra.
45 Ubud-nusid ra rala befak dawan yai tali yamarira ra.
Na'ut i Yosua nfareta ira,
na rvara ia rma lanun ini.
Na'ut inyai vali,
na Ubu notu ma tamata ovi rleal inyai rafla talik rira lanun,
boma ubud-nusid ra rala lanun yai.
Na'ut i Raja Daud nfareta Israel ra,
na befak dawan yai na'a ini obin.
46 Daud notu ma Ubu ralan a lolin,
ba nera verin Ia ma fara ntorung ma nfadiri rahan isa ma Yakub ubun-nusin ra raraning Ubu na'a inyai.
47 Na'uk Salomo nfadiri rahan isa verin Ubu.
Yahudi rira befak dawan i rasnuri rira afwatan ra na'a ma raraning Ubu (Kisah 7:44)
48 Na'uk Ubu i Ni dawan nlia munuk akataka wol nleal rahan ovi tamata ra rotu.
Wean nabi Yesaya nfalak ne,
49 ‘Duila'a nfalak ne:
Ya'a una'a lanit ratan ma ufareta,
ovu lanit ivavan ini neluk wan ma ufadoku eang ra na'a.
Mia mane fyadiri rahan aka verin Ya'a?
Wang i mane uyari Ya'a na'a inba?
50 Mia mkya'a ne,
Ya'a otu munuk afa ovi rna'a lanit ratan ovu lanit ivavan ini vali.’*
51 Mia ulubira vatu,
ralabira rasmotak ovu msyibi arubira ra ma wol mryenar ovu wol myot-orang afa ovi Ubu nfalak ra.
Mia weabira lahir ububir-nusibira ra,
ma myangal lalawatan Ubu Ni Roh!*
52 Ububir-nusibira ra rotu sian munuk lahir nabi ra.
Ira rfedan vali tamata ovi lalan ana rfalak ne,
Ubu Ni Tamata i Ni vava'at nmalola veka nma.
Tamata yai nma roak,
ma fyedi ovu fyedan Ia!
53 Ubu nsinir Ni sansinir tali lanit ratan ra ma rala Ni inukun ra verin mia,
na'uk wol myot-orang vali!”
Tamata Yahudi ra rtev-fedan Stefanus
54 Dawan Yahudi ovi rdoku na'a rira sidovung dawan yai rarenar munuk afa ovi Stefanus nfalak ra,
ba nifarira ra rsitutu ira,
tevek rangrova urun i lahir.
55 Na'uk Ubu Ni Roh nsoru lahir Stefanus.
Ia ntadata nrata lanit ma nsi'ik Ubu vanan i nfitik nyadat,
ovu nrea vali Yesus ndiri Ni lihir mela.
56 Ba nfalak ne,
“Ya'i yo,
eka msyi'ik kikyai!
Usi'ik,
na lanit ratan a natvadil ma Tamata Yanan ndiri na'a Ubu Ni lihir mela.”
57 Ira rarenar ni vaivatul ra,
na rtaha motak arurira ra ma rafwak ila'a ma rafla ti rtaha Stefanus.
58 Nata rlia soli-sasan ia rti kota murin,
beti rteva lahir ia.
Tamata ovi rteva ia raling rira ravit blawat ra ma rfadok-ebang varverun isa naran Saulus.
59 Ira rteva Stefanus obin,
na nera verin Ubu ne,
“Duila'a Yesus,
mala a'uk ning roh a.”
Tamata Yahudi ra rala vatu ma al rtev-fedan Stefanus (Kisah 7:59)
60 Ti nata nsangatur ma nafwak ne,
“Duila'a,
deka mtorung ma ira rvara rira salasilan i rotu ini!”
Nfalak munuk wean inyai,
na nan nakbosal lahir.