Yabi ovi Ubu Ni Roh nala ra rsialing ira, na'uk Ubu Ni Roh ikisa watan
1 Terang a valing averi,
fiang ini,
ya'a Paulus,
inak ma mkya'a urun yabi* ovi Ubu Ni Roh a nala roak verin mia.
2 Mia mingnanang ne,
na'ut i wol mkya'a Ubu obin,
na tamata ra rweang nala roak mia ma msyoak nulu walut ra.
Walut avyai wol rangrihi nala,
na'uk myorang watan ira.
3 Ba inak ma mkya'a ne,
wean i Ubu Ni Roh a nleal tamata isa,
na ia wol mane near nfasoba Yesus.
Wol tamata isa vali bisma nfalak ne,
“Yesus yai Duila'a Ia,”
wean i Ubu Ni Roh a wol nana'a ralan a.
4 Yabi ovi Ubu Ni Roh nala verin ita rsialing ira,
na'uk rtali Roh isa watan,
inyai Ubu Ni Roh.
5 Karya felarira rivun ma tkarya verin Duila'a,
na'uk Duila'a i tkarya verin Ia yai,
ikisa watan.
6 Karya verin Duila'a yai felan a rivun,
na'uk Ubu ikisa watan,
ovu Ia sa'i nala ngrebat verin tamata ra ma rot-nala karya avyai.
7 Ubu nala Ni Roh a ma nkarya na'a lokat tamata,
boma ita dida munuk lolin a,
ma isa nlobang isa.
8 Ubu Ni Roh a nala yabi verin tamata isa ma bis nangrihi ovu kaka'a dawan.
Ubu Ni Roh nala yabi verin tamata isa vali ma nka'a urun ma nfamalik afa ovi rtali Ubu.
9 Ubu Ni Roh a nala yabi verin tamata isa vali ma norang urun Ia,
na verin tamata liak vali,
Ni Roh nala yabi ma notu ma tamata ra lolin ewal ira tali rira suhut ra.
10 Ubu Ni Roh a nala yabi verin tamata isa vali ma notu mujizat,
na verin tamata liak isa vali,
Ni Roh a nala yabi ma bisma nrenar lahir tali Ubu ma ti nfamalik verin tamata ra.
Ni Roh a nala yabi verin tamata liak isa vali ma bisma nka'a nfili ne,
ngrebat ini ntali Ubu Ni Roh a te wahal.
Ni Roh a nala yabi verin tamata boku ma rangrihi vai ovi wol rka'a ra.
Ni Roh a nala yabi verin tamata boku vali ma rfalyawang vai avyai.
11 Na'uk Ubu Ni Roh ikisa watan,
ovu ka'i notu munuk afa avyai.
Ni Roh a nala yabi verin lokat tamata ma rira yabi ra rsialing ira,
wean i Ni Roh a nfadoku roak a.
Ubu nala roak yabi ra verin tamata ovi rorang Yesus, na'uk ita musti inadida urun yabi ovi rlobang tamata liak ra
12 Terang a valing averi,
ki ufalyawang afa ini verin mia.
Tenadida ikisa watan,
ba velik ne ikisa watan,
na'uk ulud ra,
arud ra,
matad ra,
nirud ra,
limad ra,
ovu vali ead ra rna'a munuk tenadida ra.
Ba velik ne rivun,
na'uk tenadida ikisa watan.
Ita munuk tamata ovi torang Kristus weadida vali inyai.
Velik ne rivun ita,
na'uk ita tna'a watan sidovung isa,
inyai Kristus tenan a.
13 Na'ut i rbaptis ita,
Ubu Ni Roh notu ma tna'a roak sidovung isa watan.
Velik ne Yahudi ita,
te wol Yahudi ita,
tamata sansinir te wol sansinir,
wol akataka.
Na'ut i torang Kristus,
na Ubu Ni Roh i ikisa watan yai,
na'a lahir raladida ra munuk.
14 Terang a valing averi,
eka tfikir na'a tamata isa tenan a.
Na'a tenan a,
na wol mane liman a watan,
na'uk ulun a,
arun a,
matan a,
nirun a,
ovu vali afa ovi rna'a tenan a munuk.
15 Wean i tamata isa ean a ka'i nfalak verin tenan a ne,
“Ya'a wol eluk limam a,
ba ya'a wol una'a tenam a,”
na inyai wol kena,
tevek tamata ean nana'a watan tamata tenan a.
16 Wean inyai vali ma tamata arun a ka'i nfalak verin tenan a ne,
“Ya'a wol eluk tamata matam a,
ba ya'a wol una'a tenam a,”
na inyai wol kena,
tevek tamata arun nana'a watan tamata tenan a.
17 Eka minovak!
Wean i tamata isa tenan a munuk lahir neluk matan a,
na arun a na'a inba ma bis nafrenar?
Wean i tamata isa tenan a munuk lahir neluk arun ra,
na nirun a na'a inba ma nfavoa?
18 Na'uk Ubu notu munuk roak tamata ulun a,
matan a,
arun a,
nirun a,
liman a,
ovu vali ean a,
ma rna'a munuk tamata tenan a,
wean lahir i ralan nfalak a.
19 Wean i felarira munuk wear isa watan,
na wean inba ma tfalak ne,
tamata tenan a?
20 Ba afa rivun na'a tenadida ra,
na'uk tenadida ra ikisa watan.
21 Ba wean inyai,
na tamata matan a wol bisma nfalak verin liman a ne,
“Ya'a wol ukamlabir oa,”
ovu vali tamata ulun a wol bisma nfalak verin ean a ne,
“Ya'a wol ukamlabir oa.”
22 Nlia tali inyai,
na tamata ra rfikir ne,
afa boku na'a tamata tenan a wol rangrebat ovu wol ka'i rkamlabir ira.
Velik aba,
ita musti tsi'ik ma lolin afa avyai.
23 Ba na'a tenadida ra,
na afa ovi tfikir ne,
wol fyawarira,
na ita musti talang urun ira.
Na'a tenadida ra vali,
afa ovi tamata wol bisma rsi'ik,
na ita musti tateri ma lolin afa avyai.
24 Afa ovi tsi'ik lolin roak na'a tenadida ra,
na deka tfikir ma tfaloling ira,
tevek lolin roak.
Na'uk Ubu notu roak ma nfadoku afa ovi tamata rsi'ik,
na lolin roak,
ovu vali afa ovi tanovak ne,
wol ka'i talang ira na'a tenadida ra,
na tsi'ik ma lolin ovu talang urun ira.
25 Ubu notu wean inyai,
boma deka tsiduk tenadida ini,
na'uk wean i afa ovi rna'a tenadida ra rsialing ira,
na musti isa nlobang isa.
26 Ba wean i afa ovi rna'a tenadida ra,
isa nfarnuang wawa'uk,
na afa ovi rna'a tenadida ra munuk rfarnuang vali wawa'uk.
Wean i tamata ra ralang afa isa tali tenadida ra,
na afa ovi rna'a tenadida ra munuk rovu vali ma inarira lolin.
27 Ba terang a valing averi!
Mia munuk Kristus tenan a,
ovu vali lokat mia myeluk Kristus liman a,
ean a,
matan a,
arun a,
ba afakataka rna'a munuk Kristus tenan a.*
28 Ubu nfadoku roak na'a tamata ovi rorang Yesus rira sidovung a ma tamata rira karya ra rsialing ira.
Ia nfadoku lan lalean ma tamata boku rna'a rasul,
beti nfadoku ma tamata boku rna'a nabi,
beti nfadoku vali ma tamata boku rair Ubu Ni vaivatul ra.
Nata,
Ia nfadoku vali roak ma tamata boku rira ngrebat ma rotu mujizat,
na boku vali bis rotu ma tamata ra lolin ewal ira tali rira suhut ra.
Ia nfadoku ma tamata boku vali ba'i rlobang a'uk tamata kasian ra,
boku rban-ulu verin tamata ovi rorang Yesus rira sidovung a,
ovu nfadoku vali ma tamata boku rira ngrebat ma rangrihi vai ovi wol rka'a ra.
29-30 Tamata ra munuk wol mane rotu rasul,
nabi,
te tamata ovi rka'a ma rair Ubu Ni vaivatul ra.
Ba deka minovak ne,
ira munuk rira ngrebat ma rotu mujizat,
te rotu ma tamata ra lolin ewal ira tali rira suhut ra,
te rangrihi ma rala vai ovi wol rka'a ra,
te bisma rfalyawang nala vai ovi tamata ra wol rka'a.
31 Ba wean inyai,
na mia veka inabira urun ma bira vali yabi ovi rlobang urun terabir-valibira ra.
Na'uk ya'a mane ufaturu verin mia na'a linga'an i lolin rahi lia munuk yabi avyai.