Tlobang tamata ra
1 Terang a valing averi!
Wean i tamata isa bisma nangrihi ovu vai ovi rna'a lanit ivavan a munuk,
ovu vai ovi Ubu Ni sansinir ra tali lanit ratan ba'i rala,
na'uk wol nlobang tamata liak ra,
na ni vaivatul avyai wol ihir akataka.
Ia wean titir,
ma ngoan dawan watan,
na'uk wol fyawan akataka.
2 Wean i tamata isa ni kaka'a dawan ma ti nfamalik afa ovi nrenar lahir tali Ubu verin tamata ra,
ovu nka'a munuk afa ovi Ubu wol nfavotuk obin verin tamata ra,
na'uk wol nlobang tamata liak ra,
na tamata yai wol fyawan akataka lahir.
Wean i tamata isa nanovak nala munuk afa ovi Ubu nfalak ra,
ovu vali norang urun Yesus ma bisma nfalak ma vuar isa nti talik wan a,
na'uk wol nlobang tamata liak ra,
na tamata yai vali wol fyawan akataka lahir.
3 Velik ne tamata yai nsiduk munuk ni metan ra verin tamata kasian ra,
ovu ntorung watan ma tamata ra rasnuri tenan a,
na'uk wol nlobang tamata ra,
na ia wol fyawan akataka lahir.*
4 Tamata i nlobang tamata liak ra,
ia musti ntahang nal ralan,
ovu nmarkai urun.
Ia wol nbo'itea afa ovi tamata liak rira,
ovu vali wol nraning tenan a ovu wol nfakaratat tenan a.
5 Ia wol vain aleman tamata ra,
ovu wol nkiwal tamata ra ma rorang watan afa ovi nfalak ra,
te rorang watan ni ininan ra.
Ia wol nfarlan ma nangrova,
ovu wol ntonan tamata ovi rotu sala verin ia.
6 Ia wol notu inan lolin na'a afa ovi sian ra,
na'uk notu inan lolin na'a afa ovi kena ra.
7 Tamata i nka'a ma nlobang tamata liak ra,
ntahang nal ralan na'a sala ovi tamata liak rotu verin ia.
Ia nfikir lolin a lalawatan verin tamata liak.
Ia ntahang vali ralan a ma nanaban watan afa ovi lolin ra verin tamata liak.
8 Yabi ovi Ubu Ni Roh nala verin tamata boku ma rfamalik Ni vaivatul verin tamata ra,
na ira veka rtalik ma wol rfamalik roak.
Tamata ovi rira yabi tali Ni Roh ma rangrihi vai ovi wol rka'a ra,
ira veka rtalik ma wol rangrihi roak ovu vai avyai.
Tamata ovi rira kaka'a dawan a,
rira kaka'a yai veka nmamu munuk vali,
na'uk silobang i Ubu nala verin tamata ra ma rsilobang ira,
wol nmamu nala.
9 Tevek dida yabi ma dida kaka'a na'a afaka watan,
ovu dida kaka'a ma tfamalik Ubu Ni vaivatul verin tamata ra wol naran obin.
10 Na'uk Ubu Ni amar veka nma ma Ia veka nfatnemung munuk afa ovi wol ratnemu ra,
ma yabi ra veka rmamu watan.
11 Na'ut i kako'u ya'a obin,
na ungrihi wean kasiko'u ra,
afa ovi unovak ra wean vali kasiko'u ra.
Ning fikiran a vali wean kasiko'u ra.
Na'uk fiang ini umela ma dawan roak ya'a,
ba uvatuk munuk roak ning fikiran ovi wean kasiko'u ra.
12 Afa ovi tsi'ik fiang ini,
inyai wean tamata molan a,
na'a tatal i nakyavu watan a,
na'uk ni amar a veka nma,
ma tsi'ik lahir ovu lyawan.
Fiang ini ya'a wol uka'a munuk obin,
na'uk ni amar a veka naran vali ma veka uka'a munuk,
wean Ubu nka'a munuk ralang a.
13 Ba fiang ini afa itelu musti tot-orang lalawatan.
Afa avyai wean ini:
torang a'uk Kristus,
tatahang nal raladida al tnaban Kristus ma not-nala Ni tnorung ra munuk,
ovu tsilobang ita ovu tlobang vali tamata liak.
Na'uk afa i lolin rahi lia munuk a,
na tsilobang ita ovu tlobang vali tamata liak.