Yabi ovi rtali Ubu Ni Roh ma tamata ra bisma rfamalik vaivatul ovi rarenar lahir tali Ubu, ovu notu ma rangrihi vai ovi wol rka'a
1 Terang a valing averi!
Fara msyilobang mia ovu tamata liak ra,
ovu vali inabira urun ma bira yabi ovi Ubu Ni Roh nala verin tamata inorang ra.
Tali afa avyai,
na myera lan yabi,
ma bisma fyamalik vaivatul ovi rtali lahir Ubu.
2 Tamata i nangrihi ovu vai i wol nka'a,
na ia wol nangrihi verin tamata ra,
na'uk nangrihi verin Ubu,
tevek wol tamata isa vali bisma nfan-aran vai yai.
Ubu Ni Roh a ka'i notu ma tamata yai nfalak afa fanfonak ovi Ubu sa'i nka'a.*
3 Na'uk tamata i ni yabi ma nfamalik vaivatul ovi nrenar lahir tali Ubu,
na ia nfamalik verin tamata ra.
Notu wean inyai,
boma nfangrebat tamata liak ralarira ra,
ovu nsurak ira ma iva'ur ma rorang Yesus,
ovu vali nfaloling ralarira ra.
4 Tamata i nangrihi ovu vai i wol nka'a yai,
na ia ka'i nfangrebat watan tenan a.
Na'uk tamata i nfamalik vaivatul ovi rtali Ubu,
na ia nfangrebat munuk sidovung tamata ovi rorang Yesus.
5 Ya'a inak ma mia munuk mkya'a vali ma mingrihi vai ovi wol mkya'a ra.
Na'uk nlia tali inyai,
na inak ma mia fyamalik Ubu Ni vaivatul ra,
tevek tamata ovi rfamalik Ni vaivatul ra,
ira fyawarira lia tamata ovi rala vai ovi wol rka'a ra.
Na'uk wean i tamata i nangrihi vai i wol nka'a yai,
bisma nfalyawang afa ovi nfalak ra,
na afa yai notu ma sidovung tamata ovi rorang Yesus rfan-aran,
ovu nfangrebat roak ira.
6 Ba,
terang a valing averi!
Wean i uma ma utuan mia,
ovu ungrihi ma ala vai i wol uka'a,
na inyai ihin aka verin mia?
Na'uk wean i ufamalik Ubu Ni Ivar i nfavotuk lahir verin ya'a,
te ungrihi,
boma minovak nala munuk afa ovi Ia nfalak verin mia,
te ufamalik afa ovi urenar lahir tali Ubu ma ti ufamalik verin mia,
te air Ubu Ni vaivatul ra verin mia,
na inyai fyawan urun.
7 Ya'a inak ma ufalyawang verin mia na'a yabi i ntali Ubu Ni Roh a,
ma tamata ra rangrihi vai ovi wol rka'a ra.
Afa yai wean flo'its ovu kecapi.
Ira wol naarira,
na'uk wean i tamata ra rafraik te rma'in ira,
na ngoarira.
Wean i tamata ra wol rka'a ma rafraik te rma'in,
na wean inba ma tka'a ne,
rdedang dadedang aka?
Tamata Yahudi rira kecapi. (14:7)
8 Wean i mane totu rihi,
na'uk tamata i nafraik tvuri a,
nafraik a'ar tia ma watan,
na wean inba ma bisma tka'a ne,
tati totu rihi?
9 Mia weabira vali tamata ovi rangrihi ovu vai ovi wol rka'a ra.
Wean i mingrihi ovu vai avyai,
na wean inba ma tamata ra rfan-aran afa ovi fyalak ra?
Bira vaivatul ra wol ihir akataka,
ma wean i mingrihi lean vu watan!
10 Vai rivun ila'a na'a lanit ivavan ini,
na'uk ihirira ra rna'a munuk.
11 Na'uk wean i wol uka'a tamata isa ni vai a,
na ya'a eluk tamata dakan verin tamata yai,
ovu vali tamata i nala vai yai neluk tamata dakan verin ya'a.
12 Ya'a uka'a ne,
mia mdyava vali ma bira yabi ovi rtali Ubu Ni Roh a.
Na'uk nlia tali inyai,
na mia musti inabira urun ma myala bira yabi avyai ma ala fyangrebat sidovung tamata ovi rorang Yesus.
13 Ba wean inyai,
na iki watan nangrihi ovu vai i wol nka'a,
na fara naflurut verin Ubu,
ma nala ngrebat verin ia,
boma nfalyawang nala afa ovi nfalak ra.
14 Wean i uflurut ovu vai i wol uka'a,
na ning roh a ka'i naflurut,
na'uk ning fikiran a wol nana'a afa ovi uflurut ra.
15 Ba ya'a musti otu afaka?
Ya'a veka uflurut ovu ning roh a,
na'uk veka uflurut vali ovu ning fikiran a.
Ya'a veka udedang ma ufadawang Ubu ovu ning roh a,
na'uk ya'a veka udedang ma ufadawang vali Ubu ovu ning fikiran a.
16 Wean i muflurut ma fwalak fara weninyai verin Ubu ovu mu roh a,
na'uk tamata ovi rarenar ra wol rfan-aran afa ovi fwalak ra,
na wean inba ma bisma rfalak ne,
“Mu falurut yai kena urun?”
Velik aba,
ira wol rfan-aran lahir afa ovi fwalak ra.
17 Velik ne muflurut ma fwalak fara weninyai verin Ubu,
na inyai lolin urun,
na'uk mu falurut yai wol nfangrebat tamata liak ra.
18 Ya'a ufalak fara weninyai verin Ubu,
tevek ungrihi ovu vai ovi wol uka'a ra,
nlia tali mia munuk.
19 Na'uk wean i ita tamata ovi torang Yesus tasdovu ita ma tfadawang Ubu,
na inak urun ma ungrihi ovu vaivatul ifira watan ma lyawan verin tamata ra,
boma rair vali tamata liak ra.
Inak ma otu wean inyai,
nlia tali i ungrihi ma ala vaivatul rivun ila'a ovu vai i wol uka'a.
20 Terang a valing averi!
Bira fikiran ra deka wean kasiko'u ra.
Mia musti weabira kasiko'u yanat ra,
ma wol mkya'a ma myotu afa ovi sian ra,
na'uk bira fikiran a musti naftibang,
wean tamata dawan ra.*
21 Rtulis roak na'a Surat Ralan wean ini,
“Ubu nfalak ne,
‘Ya'a veka ala tamata ovi rangrihi ovu vai ovi raling ma lolan watan a,
ma ungrihi verin Ning tamata ovi rorang Ya'a.
Velik ne ungrihi wean inyai,
na'uk ira veka wol rkamlabir afa ovi ufalak ra.’ ”*
22 Ba yabi i ntali Ubu Ni Roh ma tamata ra rangrihi ovu vai ovi wol rka'a ra,
neluk faneak verin tamata ovi wol rorang Ubu.
Wean vali yabi i tamata ra rala al rfamalik Ubu Ni vaivatul ra,
neluk faneak verin tamata inorang ra,
wol mane verin tamata ovi wol rorang Yesus.
23 Ba wean i tamata ovi wol rorang Yesus rma bira sidovung a na'ut i misdovu mia,
ma mimunuk myala vai ovi wol mkya'a ra,
na ira veka rfalak ne,
fyoar roak!
24 Na'uk wean i mimunuk fyamalik Ubu Ni vaivatul ra,
na tamata ovi wol rorang Yesus rma ma rarenar afa ovi fyalak ra,
na ira veka rka'a lahir ne,
rotu salasilan.
Ba wean i wol rahil ma rtalik tali rira salasilan ra,
na Ubu veka nukun ira.
25 Afa fanfonak ovi rna'a tamata avyai ralarira ra veka rvotuk munuk lahir,
ba ira veka rsangatur ma raraning Ubu,
ovu rtorung ne,
“Kena urun,
Ubu nana'a lahir bira sidovung a.”
26 Ba terang a valing averi!
Wean i misdovu mia ma fyadawang Duila'a,
na boku mdyedang dadedang tali mazmur,
boku vali msyiair,
ovu vali boku fyamalik afa ovi Ubu nfavotuk ra,
boku rala vai ovi wol rka'a ra,
te boku vali rira kaka'a ma rfalyawang nala vai avyai.
Na'uk musti myotu afa avyai munuk ma al fyangrebat tamata ovi rorang Yesus.
27 Wean i tamata boku rangrihi vai ovi wol rka'a ra,
na tamata irua te itelu musti rsikati ira al rangrihi vai avyai.
Tamata boku vali musti rfalyawang afa ovi tamata avyai rfalak.
28 Wean i wol tamata rfalyawang nala vai avyai ihirira ra,
na tamata ovi rira yabi ma rangrihi ovu vai ovi wol rka'a ra,
deka rangrihi lahir na'a sidovung a.
Ira ka'i rangrihi watan verin Ubu na'a ralarira ra.
29 Nabi irua te itelu tali ira rfamalik ivar ovi rarenar lahir tali Ubu,
na tamata liak ra ranovak ma lolin afa ovi rfalak ra.
30 Na'uk wean i tamata isa i ndoku vali sidovung yai ma nfamalik afa ovi Ubu nfavotuk lahir verin ia,
na tamata i nangrihi lan roak yai musti ntalik ma deka nangrihi kikyai.
31 Wean i myotu wean inyai,
na mia munuk bisma msyikati mia ala fyamalik Ubu Ni vaivatul ra,
boma mia munuk bisma misahak,
ovu bira inorang a ntafal ma nangrebat.
32 Mia veka myotu wean inyai,
tevek tamata ovi rfamalik ivar ovi rarenar lahir tali Ubu rka'a ma rtahang nal ralarira ra,
ma rsikati ira al rangrihi.
33 Ubu wol inan ma vangoa-vanga na'a tamata ovi rorang Yesus rira sidovung ralan a,
na'uk inan ma malinan watan na'a rira sidovung a.
Na'ut i sidovung tamata ovi rorang Yesus munuk rasdovu ira na'a rira sidovung ra,
34 na vata ra wol bisma rangrihi,
tevek rfadoku roak na'a Musa ni inukun ra ne,
ira wol bisma rangrihi.
Ira vali wol bisma rban-ulu na'a tamata ovi rorang Yesus rira sidovung ra.*
35 Wean i inar ma rka'a afa boku,
na ira musti rorat afa avyai tali awarira ra na'a rahan.
Tevek wol inovan lahir verin vata ra ma rangrihi na'a sidovung tamata ovi orang Yesus.
36 Ubu Ni vaivatul ra wol rtali mia,
ovu Ia wol nala Ni vaivatul avyai verin mia watan.
37 Wean i tamata isa nanovak ne,
nabi ia,
te Ubu nala ngrebat liak verin ia,
na musti nka'a ne,
afa ovi ufalak verin mia,
wean lahir afa ovi Ubu nfareta ra.
38 Na'uk wean i tamata boku wol rtorung afa ovi ufalak ini,
na deka mryenar ira.
39 Wean inyai bi,
terang a valing averi,
ni lolin a mdyava a'uk linga'an ma bira yabi i fyamalik Ubu Ni vaivatul ra verin tamata ra.
Deka fyalak teri vali tamata ovi rangrihi ovu vai ovi wol rka'a ra.
40 Na'uk mia musti myotu ma afa avyai munuk inovan ovu malinan watan verin tamata ovi rorang Yesus.