Tamata ovi rorang Yesus rira vava'at ikisa watan na'a rira sidovung
1 Terang a valing averi,
una'a bu'i ralan,
tevek ufabana Duila'a Ni karya.
Era urun verin mia ma bira vava'at ra lolin ma inovan ovu tamata ovi rorang Yesus rira vava'at ra,
tevek Ubu nala roak mia ma myeluk yanan ra.
2 Era verin mia ma lokat amar,
na fyakabava tenabira ra ovu msyiotu lolin mia.
Wean i tamata ra rotu ma wahabira rwa'uk,
na mtyahang ralabira watan ovu myotu a'uk lolin a,
tevek msyilobang mia.
3 Mia musti myotu munuk afa ovi bis myotu ra ma bira vava'at ra ikisa watan,
tevek Ubu Ni Roh nkeak roak mia na'a isa.
Ba deka msyingarahi,
na'uk myotu watan malinan a na'a bira vava'at ra.
4 Ubu Ni Roh ikisa watan,
ovu Ia nkeak roak mia ma mnya'a sidovung isa watan.
Itmunuk taklo'i dida vava'at ra na'a afa lolin ovi Ubu veka notu verin ita,
tevek Ia nera ita ma teluk yanan ra.
5 Dida Duila'a isa watan,
inyai Yesus.
Ita torang a'uk Ia,
ovu vali dida baptisan ihin a isa watan vali.
6 Ubu isa watan,
ba tamata inorang ra munuk Yamadida verin Ia.
Ia not-nala munuk afakataka,
ovu nfareta munuk afakataka.
Ni Roh a nana'a tamata inorang ra munuk ralarira ra.
7 Na'uk terang a valing averi,
Yesus Kristus nsiduk roak yabi ra lokat tamata,
boma msyilobang mia,
wean i Yesus nanovak roak verin ita.
8 Ia nsiduk yabi avyai wean afa ovi rtulis na'a Surat Ralan ne,
“Na'ut i nrata wan i karatat a,
na ntaha ma tamata rivun,
tevek nfaleka roak ira.
Ia nma vali ma nala afa ovi lolin ra tali ira ma neluk rangrangwaha verin tamata ra.”*
9 Wean i tfalak ne,
Ia nrata roak wan i karatat a,
na inyai nfaturu ne,
lan ana Ia nsuta vali lanit ivavan roak.*
10 Ia nsuta roak lanit ivavan ini,
inyai nfaturu vali ne,
Ia nrata roak wan i karatat lia munuk a na'a lanit ratan,
ma nfakena ovu nfangora munuk afakataka na'a inba watan.
11 Ia nala yabi ra lokat tamata,
ovu nsiduk ma rira yabi ra rsialing ira.
Ia nfadoku roak ma tamata boku rna'a rasul,
boku vali rna'a nabi.
Ia nfadoku vali ma tamata boku ti rfamalik Ni Ivar Lolin a verin tamata ovi wol rka'a obin,
na boku vali rban-ulu verin tamata ovi rorang Yesus ma rwanar ovu rair ira.
12 Ia nala yabi avyai,
boma tamata ovi rorang Yesus rka'a ma rkarya na'a Ni va'i ralan a ma rfabana Ni karya,
boma msyilobang mia ovu msyifangrebat mia na'a bira inorang a.
Wean inyai,
na mia tamata inorang ra weabira lahir Kristus tenan a ma mtyafal ma mingrebat.
13 Ba wean vali inyai,
nata ti naran i ita tamata inorang ra munuk dida vava'at isa ovu Ubu Yanan a,
ovu vali dida fikiran isa roak ovu Ia.
Ia veka notu ma lokat amar,
na teluk lahir afa ovi Ia nfadoku verin ita ovu tmela na'a dida vava'at a,
ma wean lahir Kristus Ni afa ovi notu ra munuk.
14 Notu wean inyai,
boma ita deka weadida kikyai kasiko'u yanat ra,
tevek tamata inorang ovi wearira inyai,
ira veka rorang watan tamata ovi rweang ira ovu vaivatul ovi manminak ra,
ma rti linga'an i sian a.
Tamata avyai rira dardirin ra wol rangrebat ma wearira lahir kabal i nait ovu saksakan ra rwi-rwa tia ma watan ira.
15 Na'uk ita deka torang tamata rira siweang ra.
Ita musti tfamalik afa ovi kena ra,
ovu banbanan i nfaturu roak dida silobang a verin terad a valid ra,
boma dida afa ovi totu lokat amar ra ntafal ma tot-nala munuk wean afa ovi Yesus Kristus notu ra.
Ia nfareta tamata ovi rorang Ia munuk,
wean lahir tamata ulun nfareta tenan a.
16 Kristus notu ma ita tamata ovi torang Yesus wead isa watan,
wean afa ovi rna'a munuk tenadida ra rna'a isa,
ma isa nlobang isa.
Ba wean i tsilobang ita,
ovu itmunuk tkarya urun na'a Ni va'i ralan a ovu dida yabi ovi Duila'a nala roak verin ita,
na dida inorang na'a Duila'a veka nmela ovu ntafal ma nangrebat.
Vava'at ngorva'an na'a Kristus
17 Nata ufangnanang urun mia,
tevek afa ovi beti ufalak verin mia na'a ngrebat i Duila'a nala verin ya'a:
Bira vava'at ra deka wean kikyai tamata ovi wol rka'a Ubu,
tevek rira afa ovi rotu ra rorang watan rira fikiran vu ra.
18 Rira fikiran ra ngarmeran watan,
ovu rafena ma rka'a vava'at i Ubu nala verin tamata ovi rorang Ia.
Tamata avyai ralarira rasmotak roak,
tevek rafena ma rarenar Ubu Ni afa ovi nfalak ra.
19 Ira wol rma'it roak ma raktufan urun,
ovu rotu watan afa ovi wol inovan ra.
Ira rfikir a'uk afa ro'i-ra'i ra,
ba rafena ma rtalik rira afa sian ovi rotu ra,
na'uk rtafal ma rotu lalawatan.
20 Na'uk mia wol weabira ira,
tevek afa ovi bira tamata rair roak verin mia na'a Yesus Kristus wol wean inyai.
21 Ya'a uka'a mnga'un ne,
mia mryenar roak Yesus Ni Ivar a.
Tamata ra rair mia ovu afa ovi kena ra na'a Ia,
ma tva'at wean lahir i nfaturu roak verin ita.
22 Ira rair mia ma byatuk bira ininan sian ovi myotu ra na'a bira vava'at mnanat ra,
na'ut i wol myorang Duila'a obin.
Afa mnanat avyai rotu ma rlabir nala mia ovu rotu ma bira vava'at ra wol kena,
tevek ralabira ra rasmotak.
23 Ira rair vali mia ne,
myala bira vava'at ra verin Ubu,
boma Ni Roh a nfangora ralabira ra ovu bira fikiran ra,
ma ngorva'an munuk.
24 Ubu notu ma bira vava'at a ngorva'an ewal.
Ba myot-orang vava'at ngorva'an i notu verin mia.
Afa yai kena,
rmalola ovu rmerat urun wean lahir Ia.
25 Ba era verin mia munuk ma deka msyiklabir kikyai.
Fyalak watan afa ovi kena ra verin terabir-valibira ra,
tevek itmunuk tamata inorang ra tna'a sidovung isa.
26 Wean i mingrova,
na fyikir ma blawat,
boma deka myotu salasilan ra.
Deka mtyahang bira ngrova yai ti ma lera nirit nala ia,
27 boma nitdawan wol ndav-nala linga'an ma nweang mia ma myotu salasilan.
28 Tamata ovi byori ra,
mtyalik kikyai ma deka byori.
Na'uk mkyarya urun ma ratibira ovu karya lolin ovi myotu ra,
boma bira karya enan ra bisma al mlyobang vali tamata ovi rira kasian ra.
29 Wean i mingrihi,
na deka myala vaivatul ovi ngra ra,
ovu deka myi'it tamata ra.
Na'uk myala watan vaivatul ovi rvua snurak a ma rlobang tamata ra,
boma rfangrebat ralarira ra.
30 Ubu notu ma Ni Roh i nleal roak ralabira ra neluk faneak ne,
Ubu Ni roak mia.
Faneak yai Ni Roh i ntorung roak ma nala verin mia,
ma ti naran amar i Ubu veka nsikat ita tali dida salasilan ra ma dida vava'at kakiwal.
Ba deka myotu ma Ubu Ni Roh ralan a lalau tali afa ovi fyalak ra ovu afa ovi myotu ra.
31 Byatuk kikyai bira fikiran sian ovi rotu ma ba'i msyingrova ovu msyingarahi,
deka mtyahang teri ralabira sian ra verin tamata ra,
deka msyifi'it,
deka fyalak sian tamata,
ovu deka myoruk-myak tamata ra.
32 Na'uk msyiotu lolin watan mia,
ovu msyilobang mia,
ovu vali myabun tamata ovi rotu sala verin mia,
wean lahir i Ubu na'i vatuk roak dida salasilan ra,
tevek dida vava'at isa roak ovu Kristus.