Paulus ni karya ma nfamalik Ubu Ni Ivar Lolin a verin tamata ovi wol Yahudi ra
1 Terang a valing averi,
ya'a ini Paulus uflurut verin mia,
tevek Ubu Ni lolin a dawan urun verin ita.
Inak ma mkya'a ne,
una'a bu'i ralan,
tevek ufamalik Kristus Yesus Ni Ivar Lolin a verin mia,
tamata ovi wol Yahudi ra.
2 Ufikir ne,
mia ka'i mryenar roak na'a Ubu Ni rala lolin a,
bi nala karya ini verin ya'a ma ufalyawang Ni Ivar Lolin a verin mia,
ma nlobang mia.
3 Ubu nfavotuk roak verin ya'a na'a afa ovi Ia wol nfalak obin verin tamata ra.
Ia nfalak na'a Ni karya i veka notu verin tamata ovi wol Yahudi ra.
Utulis lan roak afa yai,
na'uk ufaketa watan ia.*
4 Wean i byas roak,
na veka mkya'a lahir ne,
ya'a ufan-aran afa ovi Ubu notu verin tamata ovi wol Yahudi ra,
na'a Kristus.
5 Lalan ana,
tamata ra wol rka'a afa ovi Ubu veka notu ra.
Na'uk fiang ini Ubu Ni Roh a nfavotuk munuk roak afa avyai verin tamata ovi nfili roak ira ma reluk Ni rasul ra ovu Ni nabi ra.*
6 Afa ovi Ubu nfalyawang roak yai wean ini:
tamata ovi rorang roak Ubu Ni Ivar Lolin a,
velik ne wol Yahudi ira,
na Ia naflahar ira wean i nfadoku roak verin tamata Yahudi ra.
Tamata Yahudi ra ovu ovi wol Yahudi ra isa roak ira ovu Kristus Yesus ma rna'a sidovung isa.
Ba tamata ovi wol Yahudi ra rira vali kalolin i Ubu ntorung roak verin Ni tamata ovi rorang Ia.
7 Ubu nfili roak ya'a ma eluk Ni tamata sansinir ma ufamalik Ni Ivar Lolin ini,
tevek nala roak Ni rala lolin a verin ya'a.
Ia nala Ni ngrebat a verin ya'a ma ufamalik nala Ni Ivar a.
8 Inovan ma Ubu nala roak Ni kalolin verin tamata inorang ra munuk,
na'uk wol verin ya'a.
Na'uk tali Ni rala lolin a,
bi nala roak karya ini verin ya'a,
boma ufamalik Ni Ivar Lolin a verin tamata ovi wol Yahudi ra,
ma ufalak na'a Ni kalolin dawan i wol ni wahan a.
Tatuan afa yai na'a Kristus.
9 Ubu nala karya ini verin ya'a,
boma tali ya'a,
na tamata ra munuk bisma rka'a ne,
wean inba ma Ubu notu munuk akataka,
ovu not-nala munuk afa ovi tali lalan ana,
nfadoku roak ma veka notu a.
Ia nfalyawang munuk afa ovi tali lalan a,
wol nfavotuk obin.
10 Ia ralan nfalak ma fiang ini,
na roh ovi rira ngrebat ma rfareta na'a lanit,
lanit ivavan a,
ovu na'a lanit ratan,
bisma rka'a lahir ne,
Ni kaka'a dawan ila'a.
Ira bisma rka'a afa yai tali afa ovi Ni tamata inorang ra rfamalik verin ira.*
11 Ubu notu afa avyai wean lahir i nanovak roak,
na'ut i wol notu lanit ivavan ini obin.
Ia nfakena munuk roak afa avyai na'a afa ovi dida Duila'a Yesus Kristus notu.
12 Terang a valing averi,
dida vava'at isa roak ovu Kristus Yesus,
ovu dida inorang a verin Ia,
ba dida linga'an roak ma tfaseri Ubu,
ovu wol tbobar roak ma tatuan Ia na'a dida falurut ra.
13 Wean inyai bi,
era verin mia ma deka ralabira kako'u ovu ralabira ra deka lalau,
velik ne ning susa dawan na'a bu'i ralan,
tevek ufamalik Ubu Ni vaivatul ra verin mia.
Na'uk ni lolin wean inyai,
boma ralabira ra dawan watan.
Paulus naflurut verin tamata ovi rorang Yesus rira sidovung na'a kota Efesus
14 Terang a valing averi,
Ubu Ni rala lolin a verin ita,
bi usangatur na'a Yamadida Ubila'a wahan ralan a,
ma uflurut verin Ia.
15 Tamata inorang ovi rna'a lanit ratan ovu rna'a lanit ivavan ini,
munuk lahir Yamadida verin Ia.*
16 Uflurut verin Ubu ma nfangrebat mia ovu Ni kalolin i dawan urun a.
Kalolin yai nfadoku roak verin tamata ovi rorang Ia.
Era vali ma Ia nala ngrebat na'a ralabira ra ovu Ni Roh a,
boma bira dardirin ra rangrebat.
17 Uflurut wean inyai,
tevek bira inorang a verin Kristus,
ba fara Kristus nana'a ralabira ra.
Ya'a era vali verin mia ma na'a bira vava'at ra,
na fyaturu lalawatan bira silobang a,
ma neluk faneak ne,
bira inorang a nabwa'ar roak na'a Ia.
18 Uflurut vali ma fara mia ovu tamata inorang ra munuk,
bisma fyan-aran ne,
Yesus Kristus nlobang urun mia,
ovu Ni silobang a dawan urun i lahir.
19 Kristus Ni silobang i nala verin ita yai,
dawan rahi afa ovi tamata ra bisma rfan-aran.
Velik ne wean urun inyai,
na'uk era ma fyan-aran lahir Yesus Kristus Ni lolin yai,
boma Ubu ralan a ovu Ni fikiran a lokat amar nfangora ralabira ra.
20 Terang a valing averi,
Ubu Ni ngrebat ma not-nala afaka watan.
Afa ovi veka notu ra dawan lia afa ovi tanovak ma veka tera tali Ia.
Ia bis notu munuk afa avyai,
tevek Ni ngrebat a nkarya na'a raladida ra.
21 Ba fara tfadawang Ubu,
tevek afa lolin ovi Ia notu na'a tamata inorang ra munuk raladida ra.
Traning ovu tfadawang lalawatan Ia,
nata ti wol ni wahan,
tevek afa ovi notu roak na'a Yesus Kristus.
Kena urun.