Lan a, ita wean tmata tevek dida salasilan ra, na'uk fiang ini, Ubu nfava'at ewal roak ita ma dida vava'at isa ovu Kristus
1 Terang a valing averi.
Lan ana,
na'ut i wol myorang Kristus obin,
na mia wean i ralabira ra rmata,
tevek bira salasilan ra.
Mia wol myot-orang afa ovi Ubu nfalak ra,
ovu vali myotu afa ovi sian ra.
2 Na'ut inyai,
na mia myot-orang watan afa sian ovi rtali tamata ovi wol rka'a Ubu,
rira afa ovi rotu ra.
Bira vava'at i wean inyai nfaturu ne,
myorang nitdawan i nfareta nait sian ovi rna'a lanit.
Nitdawan yai,
fiang ini nkarya na'a tamata ovi rangal Ubu,
ralarira ra.*
3 Lan ana,
dida vava'at ra wean vali tamata avyai ma totu watan afa sian ovi raladida ra rfalak ma totu a.
Ita tot-orang watan dida ininan sian ra,
ovu vali dida fikiran sian ra.
Na'ut inyai,
na inovan ma Ubu nfaturu lahir Ni ngrova a verin ita,
wean tamata liak ra munuk.
4 Na'uk Ubu Ni silobang a dawan,
ba nfaturu lahir Ni rala lolin a verin ita.
5 Lan ana,
na'ut i wol myorang Kristus obin,
na mia wean i ralabira ra rmata roak,
tevek bira salasilan ra.
Na'uk fiang ini,
Ubu nala vava'at ngorva'an roak verin mia ovu Kristus,
ba dida vava'at isa roak ovu Ia.
Mingnanang,
tevek tali watan Ubu Ni rala lolin a,
bi nsikat ita tali dida salasilan ra ma dida vava'at kakiwal.
6 Ubu nala vava'at ngorva'an verin ita na'ut i nfava'at ewal Kristus ntali matmatan.
Ba Ia notu ma ita wean i tdoku ma tfareta ovu Ia na'a lanit ratan,
tevek isa roak ita ovu Kristus Yesus.
7 Ubu notu wean inyai,
boma fiang ini ovu na'a amar ovi veka rma ini,
na tamata ra munuk veka rka'a lahir ne,
Ni rala lolin a dawan lia munuk.
Ia nfaturu roak Ni rala lolin a verin ita,
na'a afa ovi Kristus Yesus notu roak verin ita.
8 Ubu nala Ni rala lolin a verin mia,
ba notu linga'an ma nsikat mia tali bira salasilan ra,
ma bira vava'at kakiwal,
tevek myorang Yesus.
Inyai wol ntali afa lolin ovi myotu ra,
na'uk Ubu ka'i nala watan verin mia.
9 Ubu notu afa yai wol ntali afa lolin ovi myotu ra,
ba deka tamata isa vali nfakaratat tenan a,
ma nfikir ne,
afa ovi notu ra not-nala ma Ubu nsikat ia tali ni salasilan ra,
ma ni vava'at kakiwal.
10 Fiang ini Ubu i notu roak ita,
notu vali ma dida vava'at ra ngorva'an ewal roak,
tevek dida vava'at isa roak ovu Kristus Yesus.
Ia notu wean inyai,
boma totu afa lolin ovi nfadoku roak tali lalan a verin ita.
Kristus notu ma tamata Yahudi ra ovu tamata ovi wol Yahudi ra malinan ewal
11 Terang a valing averi,
mingnanang ne,
tali na'ut i rarali mia,
na wol tamata Yahudi mia.
Tamata Yahudi rfalak ne,
Ubu Ni tamata ra verin ira watan,
tevek rsunat roak ira.
Rfalak sian mia ne,
wol mkya'a Ubu,
tevek wol rsunat mia obin.
Velik aba,
sunat yai wean watan adat i tamata ra ka'i rotu watan na'a tenarira ra.
12 Na'ut inyai,
na mia wol bira vava'at isa ovu Kristus,
ovu wol mkya'a Ia.
Mia wol tamata Israel mia,
ovu vali tamata dakan mia,
ba wol myala tnorung i Ubu notu roak verin Abraham ovu ubun-nusin ra.
Lan ana,
mnya'a lanit ivavan ini,
na'uk wol fyikir aran ma myala afa lolin isa vali na'a amar ovi veka rma ini,
ovu wol mkya'a Ubu.*
13 Lan ana,
raroa mia tali Ubu,
na'uk fiang ini Ubu nfaseri roak mia.
Notu wean inyai,
tevek myorang afa ovi Kristus notu na'ut i laran a nvoat roak,
ovu nmata na'a aa walwalur ma al nakvanak mia.*
14 Kristus notu ma dida vava'at ra malinan ewal roak.
Ia nasdovu tamata Yahudi ra ovu ovi wol Yahudi ra ma rna'a sidovung isa watan.
Ia na'ar vatuk roak afa isa wean balbelat i notu teri tamata Yahudi ra ovu ovi wol Yahudi ra,
ma rasdovu ira.
Balbelat yai nfaturu sidovung irua yai,
rira fikiran ovi rotu ma isa wol inan lahir isa.
15 Yesus ka'i nala tenan a ma nmata,
ma naling vatuk Musa ni inukun ra ovu afa ovi nfareta ma tot-orang munuk a.
* Ia notu wean inyai,
boma ami tamata Yahudi ra ovu mia tamata ovi wol Yahudi ra,
tna'a bangsa ngorva'an isa,
tevek dida vava'at ngorva'an ovu Kristus Yesus.
Linga'an yai bi Yesus Kristus notu ma tamata ra malinan ewal.
16 Kristus Ni matmatan na'a aa walwalur notu ma nasdovu ita na'a sidovung isa ma dida vava'at isa ovu Ubu.
Notu wean inyai,
ma bangsa irua yai malinan ewal.
17 Ia nma ma nfamalik Ubu Ni Ivar Lolin i nala malinan a verin tamata ovi raroa ira tali Ia.
Tamata avyai wol Yahudi ira.
Ia nma vali verin tamata Yahudi ovi sarseri roak ira ovu Ubu.
18 Kristus notu wean inyai,
bi tamata Yahudi ra ovu ovi wol Yahudi ra,
dida linga'an ma tfaseri Yamadida,
tevek ngrebat i ntali Ubu Ni Roh a,
ikisa watan.
19 Ba wean inyai bi,
mia tamata ovi wol Yahudi ra,
wol weabira roak tamata dakan ra,
tevek fiang ini itmunuk isa roak ita na'a Ubu Ni sidovung a.
Ba mia myeluk Ni tiniman ra ovu itmunuk Yamadida verin Ia.*
20 Terang a valing averi,
mia weabira rahan i rfadiri na'a fanderen ratan a.
Nabi ra ovu rasul rira afa ovi rfamalik ra wean rahan yai ni fanderen a.
Na'uk Kristus Yesus wean vatu i rfadoku lan lalean na'a fanderen a ovu fyawan lia munuk ma al nfangrebat rahan yai,
ovu vali Ni dawan nlia munuk.
21 Wean tamata ovi rotu rahan rasusan munuk rahan yai ma natnemu,
ma rotu na'a rahan dawan i tamata raraning Ubu.
Ia nasusan vali Ni tamata ra na'a sidovung isa i nmerat urun.
Kristus notu wean inyai verin ita tamata ovi dida vava'at isa roak ovu Ia ma tna'a isa.
22 Fiang ini bira vava'at isa watan ovu tamata inorang ra munuk,
ba mia tamata ovi wol Yahudi ovu tamata Yahudi ra bira vava'at isa roak na'a Kristus.
Ia notu wean inyai,
ba Ubu Ni Roh nleal lalawatan bira sidovung a.