Paulus ni surat verin tamata ovi rorang Yesus rira sidovung na'a kota Efesus
Paulus nala salam verin tamata ovi rorang Yesus na'a kota Efesus
1 Terang a valing averi!
Ya'a ini Paulus,
utulis surat ini verin mia tamata ovi myorang Yesus na'a kota Efesus.
Ubu nfili ya'a ma eluk rasul verin Kristus Yesus.
Myorang urun Kristus Yesus ovu bira vava'at isa roak ovu Ia,
ovu myot-orang lalawatan afa ovi nfalak ra.
2 Amaflurut verin Yamadida Ubila'a ovu Duila'a Yesus Kristus ma fara nala Ni rala lolin verin mia,
ovu notu ma bira vava'at ra malinan watan.
Tfadawang Ubu, tevek nala Ni rala lolin verin ita
3 Tfadawang Ubu i dida Duila'a Yesus Kristus Yaman verin Ia.
Ubu naflahar roak ita ovu Ni kalolin* a munuk tali lanit ratan ma nlobang raladida ra,
tevek dida vava'at isa roak ovu Yesus Kristus.
4 Na'ut i wol notu lanit ivavan ini obin,
na nfili roak ita tamata inorang ra ma dida vava'at ra rmerat urun,
ovu wol dida sala roak na'a Ubu wahan ralan a.
Ia notu wean inyai,
tevek dida vava'at isa roak ovu Kristus.
5 Ubu Ni silobang a dawan verin ita,
ba tali lalan ana,
nfadoku roak ma nsikat ita ma teluk yanan ra.
Ia ralan ka'i nfalak ma notu afa yai nahu Yesus Kristus,
tevek afa yai notu ma ralan a lolin urun.
6 Ba tfadawang Ubu,
tevek nala roak Ni rala lolin a verin ita.
Ni rala lolin yai,
dawan urun!
Ia nfaturu lahir Ni rala lolin yai verin ita tali Kristus,
Yanan i nlobang urun Ia,
tevek dida vava'at isa roak ovu Ia.
7 Tali Ubu Ni rala lolin i dawan urun yai,
na nala Yesus ma laran nvoat ovu nmata ala nakvanak ita,
ovu na'i vatuk dida salasilan ra.
8 Ubu Ni lolin a dawan urun verin ita!
Ia nala Ni rala lolin verin ita ovu nala vali Ni kaka'a dawan a verin ita,
boma bisma tfan-aran munuk afa ovi ralan nfalak ma notu a.
9 Ubu ralan ka'i nfalak ma nfavotuk verin ita na'a afa ovi nvolan roak ma veka notu na'a Yesus Kristus.
Lan ana,
Ubu wol nfavotuk afa avyai obin.
10 Ubu nvolan ma naran amar i ka'i nfili a,
na Ia veka notu ma afa ovi rva'at munuk na'a lanit ivavan ini,
ovu na'a lanit ratan,
ikisa watan ma Yesus Kristus veka nfareta munuk ira.
11 Ubu ralan ka'i nfalak ma notu munuk afakataka wean lahir i nvolan roak.
Tali lalan ana,
Ia nvolan roak ma nfili ita ma torang Ia,
ovu teluk Ni tamata ovi rorang Ia,
tali dida vava'at i isa roak ovu Yesus Kristus.
12 Ia notu wean inyai,
boma ami tamata Yahudi ovi tali lalan ana,
amfaklo'i roak mami vava'at a na'a Kristus,
veka notu ma tamata ra rfadawang Ubu,
tevek sa'i dawan Ia.
13 Ba mia tamata ovi wol Yahudi ra vali,
na'ut i mryenar Ubu Ni Ivar Lolin ne,
Ia nsikat mia tali bira salasilan ra ma bira vava'at kakiwal,
na myorang roak Yesus Kristus.
Mia mnya'a roak tamata ovi rorang Yesus rira sidovung a.
Mia myorang roak Yesus Kristus,
ba Ubu notu faneak roak na'a mia.
Faneak yai Ubu Ni Roh i ntorung roak ma nala verin mia.*
14 Ubu Ni Roh nfangrebat ita,
ma tka'a lahir Ni tnorung i ita tamata inorang ra veka tala tali Ia.
Wean i naran roak amar i Ubu veka nfatalik ita tali afa ovi sian ra munuk rira ngrebat ra,
na Ia veka nala munuk afa ovi ntorung roak yai verin ita.
Tfadawang Ubu,
tevek sa'i dawan Ia.
Paulus naflurut verin tamata ovi mane rbas ni surat a
15-16 Ba terang a valing averi munuk!
Na'ut i urenar ne,
myorang Duila'a Yesus,
ovu mlyobang tamata inorang ra munuk,
na ufalak fara weninyai lalawatan verin Ubu,
tevek afa ovi myotu yai.
Wean i uflurut verin Ubu,
na ungnanang lalawatan mia.
17 Uflurut verin Yamadida Ubila'a i Ni dawan ovu Ni ngrebat a nlia munuk.
Dida Duila'a Yesus Kristus nfadawang vali Ia.
Era ma Ubu Ni Roh veka nala kaka'a dawan verin mia,
boma mtyafal ma mkya'a Ubu.*
18 Era vali ma fara Ubu notu ma bira fikiran ra lyawan,
boma fyan-aran afa lolin ovi mnyaban ma myala tali Ia,
tevek ralan nfalak roak ma veka nala verin mia.
Ia notu wean inyai,
tevek nera mia ma myeluk Ni tamata ra.
Era vali ma mkya'a afa lolin urun ovi Ubu nfadoku roak ma al naflahar Ni tamata ovi rorang Ia.
19-20 Era vali ma Ubu notu ma fyan-aran Ni ngrebat i dawan lia munuk.
Ia nala ngrebat yai al nlobang tamata ovi rorang Ia.
Ni ngrebat yai wean lahir ngrebat i al nfava'at Kristus tali matmatan,
ma rata ndoku Ubu Ni lihir mela a,
na'a lanit ratan ma nfareta.*
21 Kristus nfareta na'a inyai,
ma Ni fareta a dawan lia munuk afa ovi rira rangrebat ra.
Ni dakdokun a nrahi vali raja ra munuk ovu roh ra munuk rira ngrebat ra,
ovu vali rira fareta ra munuk.
Ia nfareta ovan a amar,
ovu vali Ni fareta a wol ni wahan.
22 Ubu nala fareta verin Kristus ma nfareta munuk fareta avyai.
Ia notu vali ma Kristus nfareta tamata ovi rorang Yesus rira sidovung ra munuk,
wean lahir i tamata ulun nfareta tenan a.
23 Ba ita tamata inorang ra wean lahir tenan a.
Tamata ovi rorang Yesus rira sidovung ra,
rira ngrebat a ntali munuk Kristus,
ovu Ia nala vava'at verin afakataka munuk na'a inba watan.