Tamata Israel rivun rafena ma rorang Ubu, na'uk Ia nfili tamata boku tali ira ma rorang Ia
1 Terang a valing averi,
orat mia ne,
“Ubu nala'ing roak Ni tamata Israel ra?”
Wahal lahir!
Ya'a tamata Israel ya'a,
ovu ubung-nusing Abraham,
ovu vali utali arun dawan Benyamin.
2 Ubu wol nala'ing Ni tamata ovi nfili lan roak ira.
Mia mkya'a afa ovi rtulis roak na'a Surat Ralan na'a Elia.
Ia nafngamu'ur ma nfalak verin Ubu na'a tamata Israel ra ne,
3 “Duila'a,
tamata ra rfedan roak Mu nabi ra,
ovu vali rot-visal roak wan ovi rfadoku rira afwatan ovi rasnuri verin Oa.
Aksa ya'a watan na'a ini ovu rkiwal mane rfedan ya'a vali!”*
4 Na'uk Ubu nfalak verin Elia ne,
“Ya'a ufadoku aling roak Ning tamata rivun ifitu.
Ira wol rsangatur ma raraning walut i rfanara ia ne,
Baal.”*
5 Fiang ini wean vali inyai,
tevek tamata Israel teran ifira watan rorang Ubu.
Ia nfili ira,
tevek Ni rala lolin a,*
6 wol mane nfili ira ntali rira afa ovi rotu ra.
Wean i Ia nfili tamata avyai tali afa ovi rotu ra,
na inyai wol nfaturu Ni rala lolin mnga'un a.
7 Ba ufalak wean ini:
Lyawan roak ne,
tamata Israel rdava linga'an ma rira vava'at ra rmalola na'a Ubu wahan ralan a,
na'uk wol rdav-nala linga'an yai.
Tamata boku tali tamata Israel ra,
Ubu nfili roak ira ma rtuan linga'an yai.
Na'uk tamata Israel liak ra,
Ubu notu ma ralarira ra rangrebat urun ma wol rorang Ia.
8 Rtulis roak na'a Surat Ralan ne,
“Ubu notu ma rira fikiran ra rasmotak,
ma wol rfikir aran linga'an i kena yai.
Ti naran amar ini,
na ira wol bisma rsi'ik afa yai ovu matarira ra,
ovu wol bisma rarenar ovu arurira ra.”*
9 Raja Daud nfalak ne,
“Uflurut ma fara afa ovi inar ma rotu na'a rira snoba ra reluk voar ma ka'i nala ira,
ovu fara rleka ma rotu afa ovi sian ra,
ma Oa mot-visal ira.
10 Fara Ubu motu ma matarira ra lavlova,
boma deka rsirea,
ovu vali motu ma tetarira ra ratbukar lalawatan,
tevek rvara susa ovi aleman urun a.”*
Tamata Yahudi rivun wol rorang Ubu Ni Ivar Lolin, na'uk tamata liak rira vava'at kakiwal, tevek rorang Ia
11 Ufalak verin mia ne,
velik ne tamata Yahudi rasvotun ma rleka tevek wol rorang Kristus,
na wol mane rleka ma wol rbatar nala lahir.
Na'uk tali rira laklekan yai,
bi Ubu nsikat tamata ovi wol Yahudi ra tali rira salasilan ra,
ma rira vava'at kakiwal.
Notu wean inyai,
ma tamata Yahudi ra rsi'ik ne,
Ubu naflahar tamata ovi wol Yahudi ra ma inar urun ma rira vali kalolin yai.
12 Tamata Yahudi ra rira salasilan ovu rafena ma rot-orang afa ovi Ubu nala nahu Kristus.
Ba afa yai notu ma Ubu naflahar urun tamata ovi wol Yahudi ra na'a lanit ivavan a.
Wean i naran roak amar i tamata Yahudi ra rahil ma rira vava'at ra rmalola,
na Ia veka ntafal ma naflahar ila'a tamata ra na'a lanit ivavan a.
13 Fiang ini mane ufalak afa boku verin mia,
tamata ovi wol Yahudi ra,
tevek eluk rasul verin mia.
Ukarya urun,
tevek ufikir ne,
karya ini lolin urun.
14 Otu wean inyai,
na snain ot-nala ma ning tamata Yahudi ra inar urun kalolin ovi mia,
tamata ovi wol Yahudi ra bira roak,
tevek Ubu notu ma bira vava'at ra rmalola.
Inak ma tamata Yahudi rsi'ik kalolin i myala roak yai,
boma boku tali ira inar ma rorang vali Duila'a Yesus,
wean lahir mia.
Wean i rorang Ia,
na Ubu veka nsikat ira tali rira salasilan ra,
ma rira vava'at kakiwal.
15 Ubu nafena ma nala tamata Yahudi ra ma reluk Ni tamata inorang ra,
ba notu ma tamata ra munuk na'a lanit ivavan ini rira vava'at ra bisma lolin ewal ovu Ia.
Na'uk wean i Ubu nal-ewal tamata Yahudi ra ma reluk Ni tamata inorang,
na inyai wean watan i rfava'at ewal tamata matmatan ra.
Ba tali afa yai,
na tamata ra munuk na'a lanit ivavan veka rala kalolin i dawan urun tali Ubu.
16 Ubu Ni munuk Abraham,
Ishak ovu Yakub.
Ba Ubu Ni vali uburir-nusirira ra.
Wean watan afamtahan ovi tala lan roak verin Ubu.
Wean i tamata isa nala ni afamtahan i notu lan lalean a verin Ubu,
na inyai nfaturu ne,
afamtahan ovi rban-muri ra rala vali roak verin Ia.
Bis vali ma tanovak na'a tamata Yahudi ra ne,
ira wearira aa zaitun isa.
Wean i Ubu Ni roak aa yai ni wa'ar ra,
na Ni vali aa sanan ra munuk.*
17 Tamata Yahudi ra wearira aa zaitun ni sanan ra.
Tamata ra ba'i rwanar aa zaitun yai.
Mia tamata ovi wol Yahudi ra,
weabira aa zaitun liak ni sanan ra.
Tamata ra wol rwanar aa zaitun yai.
Tali aa i tamata ra rwanar ia,
na retal roak sanan boku.
Na'a aa sanan ovi retal roak yai warira ra,
na rtomak aa sanan tali aa i tamata ra wol rwanar.
Ba mia tamata ovi wol Yahudi ra,
weabira aa sanan ovi beti rtomak yai.
Rotu wean inyai,
boma mia vali bira munuk afa lolin ovi Ubu ntorung ma nala verin tamata Yahudi ra.*
18 Deka fyakaratat tenabira ra,
tevek Ubu ntomak watan mia ma nala'ing roak tamata Yahudi ra wean aa sanan ovi retal roak ira.
Mingnanang ne,
mia weabira aa sanan ovi rtomak watan,
ba wol myot-nala ma aa yai ni wa'ar a rangrebat,
na'uk aa yai ni wa'ar a notu ma mingrebat.
19 Snain a mia veka fyalak ne,
“Kena,
ma Ubu nala'ing tamata Yahudi ra,
wean aa zaitun ni sanan ovi retal roak a,
boma nala ami wean aa sanan liak ovi rtomak na'a aa zaitun yai.
Inyai nfaturu ne,
ami weamami aa sanan i rtomak na'a aa zaitun yai.”
20 Inyai kena urun.
Ubu nala'ing ira,
tevek wol rorang Kristus,
ovu nala mia ma mnya'a warira ra,
tevek bira inorang a.
Ba deka fyakaratat tenabira ra,
na'uk msyi'ik wabira ma lolin,
boma deka mifla talik bira inorang a,
ma wol myorang roak Ubu.
21 Ba wean i Ubu wol nlobang tamata Yahudi ovi wol rorang Ia,
ma nala'ing ira wean aa zaitun ni sanan ovi retal roak ira,
na Ia veka wol nlobang vali mia,
wean i wol myorang Ia.
22 Ba wean inyai,
na minovak ma lolin na'a Ubu Ni silobang a,
ovu Ni ngrova ma nukun tamata ra.
Ia nfaturu Ni ngrova a verin tamata ovi wol rorang Ia,
na'uk nfaturu Ni silobang a verin mia,
wean i myorang lalawatan Ia ma mingnanang Ni silobang a.
Na'uk wean i wol mingnanang Ni silobang a,
na Ia veka nala'ing vali mia,
wean aa zaitun ni sanan ovi retal roak ira.
23 Na'uk wean i tamata Yahudi ra rahil ma rorang ewal Ubu,
na Ia veka nal-ewal ira wean aa zaitun ni sanan ovi retal roak ira,
ma rtomak ewal na'a warira ra.
Ubu bisma notu wean inyai,
tevek Ni ngrebat a.
24 Mia tamata ovi wol Yahudi ra weabira aa zaitun liak sanan ra.
Mia wol mtyali aa zaitun ovi tamata ra rwanar,
na'uk rtomak roak mia na'a aa zaitun yai.
Ba wean i Ubu notu wean inyai verin mia,
tevek bira inorang a,
na Ia veka notu ma nlia tali inyai verin tamata Yahudi ra.
Ia veka nal-ewal ira ma ti rna'a warira ra,
wean i rorang ewal Ia.
Afa yai wean lahir aa zaitun ovi tamata ra rwanar,
ni sanan ovi retal roak ira,
rala ma rtomak ewal na'a warira ra.
Ubu nfaturu Ni rala lolin a verin tamata ra munuk
25 Terang a valing averi!
Era ma deka fyikir ne,
mkya'a munuk afakataka,
tevek inak ma mkya'a afa fanfonak i Ubu ralan a nfalak ini.
Tamata Israel boku ralarira rangrebat ma rafena rorang Ubu.
Afa ini veka nbana,
nata ti naran amar i Ubu nfadoku roak.
Ia notu ma tamata ovi wol Yahudi,
na'uk nfili roak ira ma rira vava'at kakiwal,
rma munuk ma rorang Ia.
26 Ba tali linga'an ini,
na Ubu veka nsikat tamata Israel ra munuk tali rira salasilan ra,
ma rira vava'at kakiwal.
Rtulis roak na'a Surat Ralan ne,
“Raja i mane ntevut ita tali dida salasilan ra,
veka ntali Sion nma.
Ia veka na'i vatuk Yakub ubun-nusin ra munuk rira salasilan ra.
27 Ubu nfalak ne,
‘Ya'a veka otu tnorung ini verin ira,
ma veka uma ma a'i vatuk rira salasilan ra.’”*
28 Tamata Yahudi ra rafena ma rorang Ubu Ni Ivar Lolin a,
ba rira sian verin Ubu.
Afa yai notu ma tamata ovi wol Yahudi ra uturira.
Na'uk Ubu nfadoku roak ma nfili tamata Yahudi ra,
ba musti nlobang ira.
Notu wean inyai ma nfakena Ni tnorung a verin uburir-nusirira ra,
29 tevek Ubu wol nkati Ni tnorung a verin tamata ovi nfili ovu naflahar roak ira.
30 Lan ana,
mia wol myot-orang afa ovi Ubu nfalak ra.
Na'uk fiang ini,
Ia nfaturu roak Ni rala lolin a verin mia,
tevek tamata Yahudi ra wol rot-orang afa ovi nfalak ra.
31 Wean vali inyai verin tamata Yahudi ra.
Fiang ini ira wol rot-orang afa ovi Ubu nfalak ra,
boma Ia nfaturu Ni rala lolin a verin mia,
tamata ovi wol Yahudi ra.
Na'uk Ia veka nfaturu Ni rala lolin a verin tamata Yahudi ra vali.
32 Ubu notu ma tamata ra munuk wean tamata ovi rtutuk ira na'a bu'i ralan,
tevek wol rot-orang roak afa ovi nfalak ra.
Notu wean inyai,
boma bisma nfaturu Ni rala lolin a verin tamata ra munuk.
Tfadawang Ubu, tevek Ni silobang a verin tamata ra munuk
33 Ubu sa'i dawan Ia.
Ni kaka'a dawan urun ovu nka'a munuk afakataka.
Wol tamata isa bisma nfalyawang nala afa ovi Ia nfadoku ma notu ra,
ovu vali wol tamata isa bisma nfan-aran Ni afa ovi nkarya ra.
34 Rtulis roak na'a Surat Ralan ne,
“Iki nka'a Duila'a ralan a
ovu iki bisma nsurak Ia?”*
35 “Wol tamata isa vali bisma nala afaka watan verin Duila'a,
ma Duila'a naval ia na'a ni afa ovi nala ra.”
36 Ubu notu munuk roak afakataka ovu afakataka munuk rna'a,
tevek Ni ngrebat ma nfareta afa avyai munuk,
boma traning Ia.
Ba tfadawang Ubu,
nata ti wol ni wahan.
Kena urun.