1 Terang a valing tamata inorang averi!
Ya'a inak urun ovu uflurut verin Ubu ma nsikat tamata Israel ra tali rira salasilan ra,
ma rira vava'at kakiwal.
2 Ya'a bisma ufalak ne,
ira inar urun ma rka'a Ubu,
na'uk wol rfan-aran linga'an i kena ma rka'a Ia.
3 Ira wol rfan-aran i wean inba ma Ubu notu ma tamata rira vava'at ra rmalola.
Ba ira ka'i rdava watan linga'an ma rira vava'at ra rmalola.
Ira wol rorang linga'an i Ubu notu ma tamata rira vava'at ra rmalola.
4 Kristus nma ma nfakena Musa ni inukun ra.
Ba tamata iki watan norang Kristus,
na ni vava'at a nmalola.
Ubu Ni ngrebat ma nsikat tamata ra tali rira salasilan ra, ma rira vava'at kakiwal
5 Musa ntulis roak na'a tamata i ni vava'at nmalola,
tevek not-orang ni inukun a ma nfalak ne,
“Tamata ra veka rva'at,
tevek rot-orang afa ovi rtulis roak na'a inukun yai.”*
6 Na'uk Musa ntulis vaivatul liak ovi rfalak ne,
tamata ra bisma rira vava'at ra rmalola,
tevek rira inorang verin Ubu.
Vaivatul avyai ngoarira wean ini,
“Deka ka'i myorat na'a ralabira a ne,
‘Iki veka nrata lanit ratan?’ ”
Ihin a ne,
nera verin Kristus ma nsuta lanit ivavan ini.
7 Deka myorat vali na'a ralabira ra ne,
“‘Iki veka nsuta tivat matmatan i bilaman urun a?’”
Ihin a ne,
nfalak verin Kristus ma ndata ewal lanit ivavan a.*
8 Na'uk rtulis na'a Surat Ralan ne,
“Ubu Ni vaivatul ra sarseri ovu mia.
Mia fyalak vali Ubu Ni vaivatul avyai ovu sumarbira ra,
ovu mtyorung vali roak na'a ralabira ra.”
*
Vaivatul avyai, inyai Ubu Ni Ivar i amfamalik a ma tamata ra rorang Ia.
9 Ba wean i mtyorung ma fyalak na'a tamata waharira ralan ra ne,
“Yesus Duila'a Ia,”
ovu myorang na'a ralabira ra ne,
Ubu nfava'at ewal roak Ia tali matmatan,
na Ubu veka nsikat mia tali bira salasilan ra,
ma bira vava'at kakiwal.
10 Tevek ita torang ovu raladida ra,
bi Ubu notu ma dida vava'at ra rmalola,
ovu tatorung vali Ia ovu sumardida ra,
bi Ubu nsikat ita tali dida salasilan ra,
ma dida vava'at kakiwal.
11 Rtulis roak na'a Surat Ralan ne,
“Tamata iki watan wean i norang Ubu,
na Ia veka not-nala afa ovi ntorung ma nala verin ia,
ma ralan a wol lalau.”*
12 Ba ita tamata Yahudi ra ovu tamata ovi wol Yahudi ra weadida isa watan.
Tevek Ubu ikisa watan,
ma Ia neluk Duila'a verin tamata ra munuk.
Ia naflahar ma dawan Ni tamata ovi rera lablobang tali Ia.
13 Na'a Surat Ralan rtulis ne,
“Tamata iki watan,
wean i nera lablobang tali Duila'a,
na Ia veka nsikat ia tali ni salasilan ra,
ma ni vava'at kakiwal.”*
14 Na'uk wean inba ma tamata ra rera lablobang verin Duila'a,
wean i wol rorang Ia?
Kena ma tamata wol rorang Ia,
wean i wol rarenar Ni Ivar Lolin obin.
Kena vali ma wol tamata rarenar Ni Ivar Lolin yai,
wean i tamata ra wol rfamalik.
15 Tamata iki bisma nfamalik Ni Ivar Lolin yai,
wean i Ubu wol nsinir ia?
Rtulis roak na'a Surat Ralan ne,
“Lolin urun i lahir,
wean i tamata ra rma ma rfamalik Ubu Ni Ivar Lolin!”*
16 Na'uk wol mane tamata ra munuk rorang Ubu Ni Ivar Lolin yai na'a ralarira ra.
Yesaya ka'i nfalak na'a Surat Ralan ne,
“Duila'a,
labir mane wol tamata rorang Ivar i amfamalik ini.”
17 Ba tamata ra musti rarenar Ivar yai,
beti bisma rorang.
Wean i tamata boku ti rfamalik Kristus Ni Ivar a,
beti bisma rarenar.
18 Na'uk mane orat mia ne,
tamata Israel ra wol rarenar Ivar yai obin?
Velik aba rarenar roak,
tevek rtulis roak na'a Surat Ralan ne,
“Tamata ovi rfamalik Ivar yai,
vairira ra ti rsoru munuk roak lanit ivavan ini,
ovu rira vaivatul ra rti rsoru roak lanit ivavan a.”*
19 Ba orat mia ne,
tamata Israel ra rfan-aran roak Ivar yai?
Kena urun!
Ira rfan-aran,
tevek lan ana,
Musa nfamalik Ubu Ni vaivatul ra,
ma nfalak ne,
“Ya'a veka otu ma mia tamata Yahudi ra,
ralabira sian tamata ovi wol Yahudi ra,
ovu veka otu ma mingrova,
tevek uflahar tamata ovi wol Yahudi ra,
ovu fyikir ne,
ira rboda urun.”*
20 Yesaya nabrahi vali ma ntulis afa ovi Ubu nfalak ne,
“Tamata ovi wol rdava Ya'a,
rtuan roak Ya'a,
ovu ufavotuk roak tenang a verin tamata ovi wol rorat Ya'a.”*
21 Na'uk na'a tamata Israel ra,
na Ubu nfalak ne,
“Lokat amar,
na ulauk limang ma era bangsa i wol not-orang afa ovi ufalak ra,
ovu nangal afa ovi ufalak ra.”*