Paulus nfamalik Ubu Ni banbanan verin tamata ovi rorang Yesus
1 Fwangnanang tamata ovi rorang Yesus,
ma ralang ovu rot-orang afa ovi rira dawan fareta ra ovu rira dawan liak ra rfalak a.
Ira musti rasusan tenarira ra ma rotu a'uk afa ovi lolin ra.
2 Fwalak ma deka rfalak sian tamata ra,
na'uk rsialang ira ovu rsiotu lolin ira ovu tamata iki watan.
Ira musti rfakabava tenarira ra ovu rdava watan malinan a.
3 Tevek lan ana,
raladida ra vu watan ma totu lalawatan afa ovi wol kena ra.
Ita totu vali wean ini:
ita wol tot-orang Ubu Ni vaivatul ra,
ovu torang watan dida ininan sian ra ma salasilan nfareta ita.
Dida fikiran ra sian,
tbo'itea ovu ralad sian tamata ra,
tsisala ralad ovu tamata liak ra,
ovu isa wol inan lahir isa.
4 Velik ne lan a,
totu afa sian avyai,
na'uk Ubu nfaturu Ni rala lolin a,
ovu Ni silobang verin ita.
Ia nsikat ita tali dida salasilan ra,
ma dida vava'at kakiwal.
5 Ubu wol nsikat ita tali dida salasilan ra,
tevek afa lolin ovi totu ra,
na'uk Ia ka'i nfaturu Ni silobang a verin ita.
Ia nsikat ita tali dida salasilan ra nahu Ni Roh i nfamerat raladida ra,
ovu nala vava'at ngorva'an verin ita.
6 Ubu nala Ni Roh verin ita ma nkarya ma dawan na'a raladida ra,
tevek Yesus Kristus nmata ma nsikat ita tali dida salasilan ra,
ma dida vava'at kakiwal.
7 Ubu notu wean inyai,
tevek Ni rala lolin verin ita.
Ia nfadoku ne,
wol dida salasilan roak.
Ba tnaban vava'at kakiwal i Ubu veka nala verin ita,
tevek Yamadida verin Ia.
8 Vaivatul avyai kena munuk lahir,
ba morang a'uk.
Ba wean i mair tamata ra,
na fwamalik afa ovi ufalak ra,
boma tamata ovi rorang Ubu,
ralarira urun ma rotu lalawatan afa ovi lolin ra.
Afa ovi air ra lolin watan ma rlobang tamata ra.
9 Baba,
fwaroa tenam tali tamata ovi vair na'a tomu ovi rfamalik ubud-nusid nararira ra,
ovu rsingarahi na'a Musa ni inukun.
Afa avyai munuk wol ihir akataka,
ovu wol rlobang tamata ra.
10 Mtabu tamata ovi mane rkama'ar dida sidovung ra.
Wean i wol rtalik,
na mtabu ira fasa ewal.
Wean i rafena watan obin,
na deka mkamlabir ira.
11 Oa mka'a roak ne,
tamata ovi wearira inyai rafena ma rorang afa ovi kena ra,
ma rotu a'uk salasilan ra.
Tamata avyai rira salasilan ra rfaturu ne,
sala roak ira na'a Ubu wahan ralan a.
Paulus nala snurak situli
12 Ya'a veka usinir Artemas te Tikhikus ma ti nfatuang oa.
Wean i nti naran roak,
na yarak mdava linga'an ma mwa ma mtuan ya'a na'a kota Nikopolis,
tevek uvolan roak mane uti kota yai,
ma una'a inyai na'ut i radridin a dawan.
13 Msi'ik ma lolin ma mlobang Zenas i ni kaka'a dawan na'a inukun ra,
ovu Apolos.
Ira mane rti wan liak,
ba mlobang ira ovu afa ovi veka rtaha ra na'a rira banbanan.
14 Tamata ovi rorang Yesus na'a nuhu Kreta yai musti rotu lalawatan afa ovi lolin ra,
ma rlobang tamata ovi rtuan susa ra.
Tamata ovi rorang Yesus rotu wean inyai,
boma rira vava'at ra fyawar.
15 Ami mam tinemun amala salam verin mia.
Myala salam vali verin tamata inorang ovi rlobang ita.
Fara Ubu naflahar bir tinemun.
Ning surat a lawan watan ini.Salam tali ya'a,
Paulus