Paulus nsurak Titus na'a tamata ovi rorang Yesus rira vava'at ra
1 Titus,
oa musti mair lalawatan afa ovi kena ra.
2 Oa musti msurak brana ovi tuvu roak ira,
boma rka'a ma rsi'ik ma lolin rira vava'at ra.
Ira musti rka'a warira vali,
boma tamata ra ralang ira,
ovu musti rira fikiran ra blawat.
Ira musti ralarira urun ma rorang Ubu Ni vaivatul ra,
ovu vali ralar lolin ma rlobang tamata ra.
Ira musti rtahang nal ralarira ra na'a afaka watan,
boma rira inorang nangrebat.
3 Mair vali wean inyai verin itvata ra,
boma rira afa ovi rotu ra rfaturu ne,
rorang Ubu.
Ira wol rfalak sian tamata ra,
wol ranavut ovu musti rair afa ovi kena ra.
4 Itvata ra rotu wean inyai,
boma rair vata tuvmarmuri ra ma rka'a ma rlobang awarira ra ovu yanarira ra,
5 rka'a warira ma rira fikiran ra blawat,
ovu ralarira ra rmerat.
Ira musti rmarkai,
ovu iva'ur ma rsi'ik ma lolin rira rahan teta ra,
ovu ralarira lolin watan ma rorang awarira ra.
Ira rotu afa avyai,
boma tamata ra deka rfalak sian Ubu Ni vaivatul ra.
6 Msurak vali brana tuvmarmuri ra wean inyai,
boma rtahang nal ralarira na'a afaka watan.
7 Titus,
msi'ik wam ma lolin na'a afakataka munuk,
boma tamata ra rsi'ik mu vava'at a,
na inar ma rorang oa.
Wean i mair tamata ra,
na ralam urun ovu mu vava'at nmalola,
boma ralang oa.
8 Msiair ovu vaivatul ovi kena ra,
boma tamata ra deka rfasala oa.
Motu wean inyai,
na tamata ovi mane rangal oa veka rma'it,
tevek wol rdav-nala linga'an ma rfalak sian ita.
9 Mair tamata sansinir ra ma rot-orang afa ovi duarira ra rfalak na'a afakataka watan,
ovu rfaloling ralarira ra.
Ira deka rsingarahi ovu duarira ra,
10 ovu deka rbori vali rira metan ra.
Na'a afaka watan,
na rira vava'at ra musti rfaturu ne,
tamata lolin ira.
Rotu wean inyai,
boma duarira ra rorang ira ovu tamata ra inar ma rarenar ivar na'a Ubu i nsikat ita tali dida salasilan ra,
ma dida vava'at kakiwal.
11 Mair afa avyai,
tevek Ubu nfaturu roak Ni rala lolin verin tamata ra munuk,
boma nsikat ira tali rira salasilan ra,
ma rira vava'at kakiwal.
12 Ubu nair ita ovu Ni rala lolin a,
ma deka totu afa ovi wol inan ra,
ovu deka torang afa sian ovi rna'a lanit ivavan ini.
Ni rala lolin notu ma tatahang nal ralad ra na'a afaka watan,
ovu torang urun Ia,
ovu vali dida vava'at ra rmalola.
13 Ita tnaban ma tfaklo'i a'uk dida vava'at ra na'a amar dawan i veka notu ma inadida.
Na'a amar yai,
na tamata ra munuk veka rsi'ik Yesus Kristus nma ewal ovu Ni ngrebat i nfitik nyadat a,
ovu nsikat ita tali dida salasilan ra,
ma dida vava'at kakiwal.
Ia Ubu Ia,
ovu Ni dawan nlia munuk afakataka.
14 Ia nala roak tenan a ma al ntevut ita tali dida salasilan ra.
Ia nfamerat vali raladida ra,
tevek Ni munuk ita,
ovu notu ma inadida ma totu a'uk lolin a.
15 Baba,
era ma mair munuk afa ovi ufalak roak verin oa.
Msurak tamata ovi rorang Yesus na'a inyai ovu ngrebat i ntali Ubu.
Msi'ik ma lolin,
boma tamata ra rarenar ma lolin afa ovi mair verin ira.