Paulus ni surat verin Titus
Paulus nsurak Titus
1 Ya'a Paulus,
ususan surat ini verin oa ta baba.
Ya'a eluk Ubu Ni sansinir ovu Yesus Kristus Ni rasul.
Ubu nfili ovu nsinir ya'a ma ti ulobang tamata ovi Ia nfili ra,
boma rira inorang nmela.
Ning varvara vali ma air afa ovi kena ra verin ira,
boma rorang urun Ubu.
2 Tamata avyai rka'a afa kena ovi air verin ira,
ba rnaban vava'at kakiwal i Ubu ntorung roak.
Ubu wol notu lanit ivavan obin,
na nfadoku roak tnorung ini.
Ita bisma torang lahir Ubu,
tevek wol nsiklabir.
3 Ubu nsikat ita tali dida salasilan ra,
ma dida vava'at kakiwal.
Ia nfareta ya'a ma ufamalik Ni Ivar Lolin a.
Ia nfili ya'a,
boma naran amar i nfadoku roak ma tamata ra rarenar Ni vaivatul ra,
na ufamalik Ni Ivar Lolin a.
4 Titus,
ya'a ala oa ma meluk yanak lalean,
tevek itrua torang roak Yesus Kristus.
Fara Yamadida Ubila'a ovu Yesus Kristus i nsikat ita tali dida salasilan ra,
ma dida vava'at kakiwal,
nala Ni rala lolin a verin oa,
ma mu vava'at malinan watan.
Titus ni karya na'a nuhu Kreta
5 Lan ana,
uti talik oa na'a nuhu Kreta,
boma msi'ik dida karya ovi wol kena obin.
Ufalak vali verin oa ma fwili dawan kareda ovi reluk penatua* lokat ahu,
wean i usurak roak verin oa.
6 Wean i fwili tamata ra ma rna'a dawan kareda ovi reluk penatua,
na fwili tamata ovi wol rira sala,
boma tamata ra deka rfasala nala ira.
Ira awarira ikisa watan,
ovu yanarira ra musti rorang vali Yesus.
Deka fwili tamata ovi yanarira ra rotu afa ovi wol inovan ra,
te ulurira vatu ma wol rorang renarir-yamarira ra.
7 Dawan kareda* ovi rban-ulu verin rira sidovung ra rasusan Ubu Ni karya.
Wean inyai bi,
musti fwili tamata ovi wol rira sala,
boma tamata ra wol rfasala ira.
Ira wol rfakaratat tenarira ra,
wol rfarlan ma rangrova,
wol ranavut,
wol rsitaha ovu wol wahar kubang.
8 Ira musti inar ma tamata ra ralola ira na'a rira rahan ra.
Ira musti inar vali ma rotu a'uk afa lolin,
rtahang nal ralarira na'a afaka watan,
rasusan ma lolin rira vava'at ra,
rira vava'at ra rmalola ovu rmerat.
9 Tamata ovi fwili ra musti rorang ma lolin afa kena ovi tair roak verin ira,
boma rlobang ma rair tamata ra na'a afa kena avyai.
Ira musti rsurak vali tamata ovi rangal afa ovi rair ra,
boma rka'a rira sala ra.
10 Tevek tamata rivun ila'a rangal afa kena ovi tair ra.
Nlia tali inyai munuk,
na tamata ovi rorang Yahudi rira inukun i nfalak ne,
musti rsunat rira brana ra.
Ira rsiweang sian ma rala vaivatul ovi wol kena ra ma rair tamata ra,
ovu lunar dawan watan,
na'uk wol rot-nala akataka.
11 Tamata ovi wear inyai,
fwalak teri ira ma deka rsiair kikyai,
tevek ira rti tia ma watan tamata rira rahan ra,
ma rair afa ovi wol kena ra verin ira.
Tamata ovi rarenar ira wol rka'a roak ne,
raroal te rara.
Ira rsiair ma rdava kubang watan,
ba afa ovi rotu ra sian da'in.
12 Lan ana,
tamata Kreta isa i neluk rira nabi nfalak ne,
“Tamata Kreta rsiklabir sian.
Ira rira vava'at a wean afwatan ra ma rotu lalawatan afa ovi sian ra,
rbosa sian ovu inar ma rafna'an watan.”
13 Afa ovi nfalak ra kena.
Ba mtabu ma dawan ira,
boma rorang a'uk Yesus Ni vaivatul ra.
14 Mtabu vali ira ma deka rorang kikyai Yahudi rira tomu siklabir ra,
ovu rira adat ra rtali tamata ovi rangal afa ovi kena ra.
15 Verin tamata ovi ralarira ra rmerat,
na afakataka watan rmerat.
Na'uk verin tamata ovi wol rorang Ubu ovu ralarira ngra,
na wol afa isa vali nmerat,
tevek rira fikiran ovu ralar ila'a ngra-ngrodi vali.
16 Ira rfalak ne,
rka'a Ubu,
na'uk afa ovi rotu ra wol kena ovu rira vaivatul ra.
Ira rira vava'at sian ma wol rorang lahir Ubu,
ovu wol rot-nala afa ovi lolin ra.