Ita musti torang tamata ovi rira inorang a nangrebat
1 Terang a valing averi,
inorang ihin a wean ini:
ita tfaklo'i a'uk dida vava'at ra verin Ubu,
tevek torang urun ne,
ita veka dida afa ovi tnaban tali Ia.
Velik ne wol trea afa ovi ralad ra rfalak obin,
na'uk tka'a lahir ne,
afa avyai rna'a.
2 Lalan ana,
ubud-nusid ra rotu ma Ubu ralan a lolin,
tevek rorang Ia.
3 Ita torang Ubu,
bi tka'a ne,
Ia notu lanit ivavan ini ovu Ni vaivatul ra watan.
Ba Ia notu afa ovi trea ra tali afa ovi wol trea ra.*
4 Habel norang Ubu ma nala ni korban verin Ia.
Korban i nala yai lolin lia a'an i Kain ni korban a.
Ubu ntorung Habel ni korban yai,
ovu nfalak ne,
ni vava'at nmalola,
tevek norang Ia.
Habel nmata roak,
na'uk ni inorang neluk snurak lolin verin ita ma naran amar ini,
boma torang vali.*
5 Henokh norang Ubu,
bi Ubu nsikat roak ia nrata lanit ratan,
boma wol nmata.
Tamata ra wol rarea roak ia,
tevek Ubu nsikat roak ia.
Na'ut i Ubu wol nsikat ia obin,
na Ia nfalak roak ne,
Henokh notu ma ralan a lolin urun.*
6 Wean i wol dida inorang,
na wol tamata isa vali bis notu ma Ubu ralan a lolin.
Wean i tamata iki watan inan ma nfaseri Ubu,
na ia musti norang urun ne,
Ubu nana'a.
Ia musti norang vali ne,
Ubu veka naval tamata ovi ralarira urun ma rdava Ia.
7 Nuh norang Ubu,
ba Ubu nfalyawang afa ovi wol rvotuk obin na'a amar ovi veka rma ini verin ia.
Ba velik ne ia wol nsi'ik afa avyai obin,
na ia not-orang afa ovi Ubu ralan nfalak a,
ba notu kabal dawan i nala vava'at verin ia ovu ni rahan teta a.
Tamata ovi rna'a lanit ivavan wol rot-orang afa ovi Ubu nfalak ra,
ba Ubu nukun ira.
Na'uk Nuh norang Ubu,
ba Ubu nfalak ne,
Nuh ni vava'at a nmalola na'a wahan ralan a.*
8 Abraham norang Ubu,
ba not-orang afa ovi Ubu nfalak ra.
Na'ut inyai,
na Ubu nera ia ma nti negara raroa isa i nfalak roak na'a Ni tnorung verin ia ovu ubun-nusin ra,
ma rna'a inyai.
Ia not-orang afa ovi Ubu nfalak ra,
velik ne wol nka'a ne,
negara yai na'a inba!*
9 Abraham norang Ubu,
ba ti nleal negara yai,
wean Ubu nfalak roak verin ia,
ma wean tamata dakan ia.
Na'a negara yai,
ia nleal watan befak ra.
Ishak ovu Yakub rleal vali befak ra,
ovu rira vali tnorung yai.*
10 Abraham ntahang nal ralan ma nleal inyai,
tevek ia nanaban kota i Ubu veka ka'i notu,
wean lahir ralan nfalak a.
Ubu veka nfadiri kota yai na'a fanderen i nangrebat urun a,
ovu veka nana'a kakiwal.*
11 Abraham irua Sara rorang Ubu,
ba nfaturu Ni ngrebat a verin ira,
ma bisma yanarira,
velik ne tuvu ila'a roak ira ovu Sara wol bisma yanan.
Ubu notu wean inyai,
tevek Abraham norang urun ne,
Ubu nfakena Ni tnorung a verin ia.*
12 Na'ut inyai,
na Abraham itrana roak ia,
ba wean i yanan,
na wol kena lahir,
tevek tenan a wol nangrebat roak.
Velik ne wean inyai,
na'uk ubun-nusin ra rivun ila'a ma wean ngur na'a tahat nelan,
ovu wean nara ovi rna'a lanit ma wol trekan nala.*
13 Tamata avyai munuk rira inorang a nangrebat,
ti naran i rmata a.
Ira wol rtuan obin afa ovi Ubu nfalak roak na'a Ni tnorung ma nala verin ira,
na'uk rka'a ne amar isa,
na veka rira afa avyai,
ovu wol rafla talik rira inorang a.
Na'ut i rva'at obin,
na rtorung ne,
tamata dakan ovu mangun ira na'a lanit ivavan ini.*
14 Tamata ovi rfalak wean inyai,
na rfaturu ne,
inar ma rdava rira ahu livur mnga'un ma rleal.
15 Wean i ralarira ra rfalak ma rewal ira rti ahu i lan ana rleal a,
na rira amar naran ma rewal ira.
16 Na'uk rafena ma rewal ira,
tevek inar ma rfili wan i lolin rahi lia munuk na'a lanit ivavan ini.
Wan yai na'a lanit ratan.
Wean inyai,
bi Ubu wol nma'it ma nrenar i rfalak ne,
rira Ubu verin Ia,
tevek nasusan roak ahu livur mnga'un na'a lanit ratan ma rleal.
17-18 Abraham norang Ubu,
ba nala lahir yanan i Ishak a ma neluk ni korban verin Ubu,
na'ut i Ubu nlabir teman ia na'a ni inorang a.
Ubu nfalak lan verin Abraham ne,
“Ishak ubun-nusin ra veka reluk ubum-nusim,
wean lahir i ufalak roak na'a Ning tnorung verin oa.”
Na'uk velik ne wean inyai,
na ia ntorung watan ma nala lahir yanan ikisa lalo'i ini ma neluk ni korban verin Ubu.*
19 Abraham norang ne,
Ubu Ni ngrebat ma nfava'at ewal Ishak tali matmatan.
Ba bisma tfalak ne,
Abraham nal-ewal roak Ishak tali matmatan.
20 Ishak norang Ubu,
ba na'ut i itrana roak ia,
na naflahar Yakub ovu Esau ma veka rira kalolin ra na'a amar ovi veka rma ini.*
21 Yakub norang Ubu,
ba na'ut i mane nmata,
na nera verin Ubu ma nala Ni kalolin a,
ma al naflahar Yusuf yanan ra.
Yakub ntaha ni takil a ma ndiri,
beti nfadawang Ubu.*
22 Yusuf norang Ubu,
ba na'ut i mane nmata,
na nfalyawang verin tamata Israel ra ne,
amar isa veka rti talik Mesir.
Ia nfalak vali verin ira ne,
na'ut i mane rti talik wan yai,
na rasusan lurin ra ma rtaha vali.*
23 Musa renan ovu yaman rorang Ubu,
ba na'ut i rarali Musa,
na rfonak ia vulan itelu,
tevek felan a lolin buas,
ovu wol rbobar ma rangal afa i raja Mesir nfareta.*
24 Musa norang Ubu,
ba na'ut i dawan roak ia,
na nafena ma rera ia ne,
raja Mesir yanan vata yanan a.*
25 Musa nafena ma notu salasilan ovi rotu ma inan lolin amar isa te irua watan.
Na'uk ia nanovak ne,
ni lolin a,
irmunuk Ubu Ni tamata ra ma rtuan susa.
26 Musa nafena ma nala metan ovi rna'a Mesir,
na'uk ia nfili ma tamata ra ralar sian ia,
tevek norang Raja i Ubu nsinir ma veka nma ma ntevut tamata rira salasilan ra.
Ia nka'a ne,
afa yai lolin rahi metan ovi veka nala tali Mesir.
Tevek ia nanovak ne,
Ubu veka naval ia,
tevek ni inorang a na'a amar ovi veka rma.*
27 Musa norang Ubu,
ba nban-talik Mesir,
ovu ia wol nbobar ne,
raja nangrova ia.
Ba ntahang nal ralan ma nban-talik watan Mesir,
ovu nafena ma newal ia,
tevek ia nrea roak Ubu i tamata ra wol bisma rarea a.*
28 Musa norang Ubu,
ba nfalak ma tamata Israel rotu rira snoba Paskah.
Ia nfareta ira ma rasmir lara na'a rira falfolat ra ma neluk faneak,
boma Ubu Ni sansinir tali lanit ratan i nfedan tamata ra,
deka nfedan tamata Israel yanarira brana iya'an ra.*
29 Tamata Israel rorang Ubu,
ba rban-etal roak Tahat Valvulin a,
wean i rbana na'a lanun i near a.
Na'uk Tahat Valvulin yai nkum-teri munuk tamata Mesir na'ut i rlabas ira,
ma rakduvul ma rmata.*
30 Tamata Israel rorang Ubu,
ba rban-lilit watan kota Yerikho amar ifitu,
na ni tembok dawan i nlilit kota yai nleka munuk lahir.*
31 Vatlean i naran Rahab norang Ubu,
ba wol rfedan ia na'a ni kota a,
na'ut i rfedan tamata ovi rangal Ubu na'a kota yai,
tevek ia nfonak tamata Israel ovi rma fanfonak ira ma rsi'ik kota Yerikho.
32 Wean i ufamalik munuk afa ovi,
na veka mnanat da'in,
ba lawan watan inyai veki.
Ba wol ufamalik na'a Gideon,
Barak,
Simson,
Yefta,
Daud,
Samuel ovu nabi liak ovi rorang Ubu.*
33 Ira rorang Ubu,
ba boku tali ira rfaleka bangsa ra.
Boku rot-orang afa ovi Ubu ralan nfalak ra na'a rira vava'at ra,
ovu boku rtuan roak afa ovi Ubu ntorung ma nala verin ira.
Boku vali bisma rtaha motak singa sumarira ra.*
34 Boku rfedan nala yafu i ongan dawan urun a.
Boku vali wol rmata na'ut i tamata ra rtaha nahin blawat mane rfedan ira.
Boku wol rira ngrebat roak na'ut i rotu rihi,
na'uk Ubu nala ngrebat verin ira ma rfaleka suldadu ovi rtali bangsa liak ra.*
35 Vata boku vali rorang Ubu,
ba velik ne yanarira ra rmata roak,
na'uk rva'at ewal.
Na'uk tamata boku vali rtorung watan ma tamata ra rwi-rwa ira,
ti naran i rmata.
Ira rafena ma rafla talik rira inorang,
boma rfatalik ira tali susa ovi rtuan ra.
Rotu wean inyai,
tevek wean i rmata ma rva'at ewal,
na rira vava'at a lolin urun.*
36 Tamata inorang boku vali,
tamata ra rfalak sian ira,
rvaval ira ovu navnaval,
boku rkeak ira ovu kakeak tma'an ma rala ira rti bu'i ralan.*
37 Tamata inorang boku,
tamata liak rteva ira ovu vatu ma rmata lahir.
Tamata ovi rangal Ubu rala karkadi ma al rkad-lewar tamata inorang boku tenarira ra ma rmata.
Boku rala nahin blawat ma al rfedan ira.
Tamata inorang boku rung a reluk watan domba ulin ovu bibi ulin ra ma rbana rlilin watan,
tevek rira kasian a dawan urun,
ovu tamata ra rwi-rwa ovu rotu sian ira.*
38 Ira rna'a watan wan ovi raroa tali tamata ra.
Ira rlilin watan na'a wan lean vu dawan,
na'a vuar ra,
vuar lean ra,
ovu rna'a van ralan ra.
Velik aba,
sian a dawan da'in na'a lanit ivavan ini,
ba wol inovan ma rleal na'a ini.
39 Ubu inan urun tamata avyai tevek rorang Ia,
velik ne na'ut inyai,
na ira wol rtuan obin afa ovi Ia ntorung roak verin ira.*
40 Ubu nasusan roak afa ovi lolin urun ma nlia tali afa avyai verin ita.
Ia nanovak wean inyai,
boma itmunuk tamata inorang ovi beti tfamalik roak yai,
dida munuk afa ovi Ubu ntorung roak na'a Ni tnorung a,
ma itmunuk teluk tamata ovi rira vava'at ra rmalola na'a Ubu wahan ralan a.